دبێژن ل گونده‌كى سێ برا هه‌بون و روژه‌كێ ئێكى ژوان گوت ئه‌ز دێ چمه باژێرێ مویسل كاروانى.
پشتى ده‌وارێ خو ژ متایێ به‌رده‌ست باركرى و قه‌ستا باژێرێ میسل كرى، دبێژن ل باژێرێ میسل ب كوسا یا ب ناڤ و ده‌نگ بو.
ئێكێ كوسه هاته د رێكا ویدا و گوتێ ئه‌ز و بابێ ته ده‌سته‌برا بوین و كێشا مالا خو و گوتێ تو مێهڤانێ منى و بشه‌ڤێ گوتێ ئه‌ز و تو دێ شه‌رتانێ كه‌ین، هه‌چیێ ژ مه دره‌وه‌كا مه‌زنتر كر دێ مالێ یێدى خره‌ك بو یێدى بیت.
وى ژى گوتێ بلا.
كوسه‌ى گوتێ تو ڤێ قازانێ دبینى و ده‌ستێ خو درێژكره قازانه‌كێ دخانى ڤه و گوتێ ئه‌م گرارێ تێدا چێدكه‌ین و پێنچ سه‌د مروڤ ژێ دخون و هێژ ب نیڤى ژى نه‌بوى.
ئه‌وى ژى گوتێ هه‌ما ئه‌ڤه ده‌وارێ من ب بارڤه بو ته و ئه‌ز نه‌شێم چ دره‌وێن هوسا بكه‌م و ب وان سه‌رو دلان زڤرى گوندێ خو ڤه و بێى چیروكا خو بو برایێن خو بێژیت.
دبێژن برایێ ناڤى گوتى ئه‌ز دێ چمه كاروانى و ئه‌و ژى وه‌ك برایێ خو یێ دى كه‌ته ده‌ستێن وى كوسه‌ى و ده‌وارێ وى ب متا ڤه ژێ هاته برن.
برایێ بچوك گوتى دورا منه و وى ژى ده‌واره‌ك بار كر و هه‌ر وه‌كو برایێن دى گه‌هشته باژێرێ میسل و كوسه‌ى وه‌ك یێن دى گوتێ ئه‌ز و بابێ ته ده‌سته برایێن ئێك بوین و بره مالا خو و گوتێ ئه‌ز و تو دێ شه‌رتانێ كه‌ین.
برایێ بچویك ژى گوتێ دێ بێژێ چ شه‌رته؟
كوسه‌ى گوتێ هه‌ر كه‌سێ دره‌وه‌كا مه‌زنتر كر، مال و ملكیه‌تا یێ دى خره‌ك بو وى یه.
گوتێ ئه‌ز رازى مه و ده‌ست ب دره‌وا خوه بكه.
كوسه‌ى گوتى تو ڤێ قازانێ دبینى هه‌كو ئه‌م گرارێ تێدا دكه‌لینین، پێنچ سه‌د مروڤ ژێ دخون و هێش ب نیڤى نه‌بوى.
برایێ بچویك گوتێ ئه‌ڤ دره‌وه هه‌ما چنینه. و گوتێ پا تو گوهێ خو بده دره‌وا من.
برایێ بچویك گوت ئه‌م سێ برا بوین، ئه‌م چوینه گوندێ تلكێفێ و بوینه گاڤان وان و بو هه‌ر حێوانه‌كى نانه‌ك و هێكه‌ك ددانه مه و هندى هێكێن مه بونه گه‌له‌ك مه بو ژوره‌ك ڤالا كر و مه هێكێن خو كرنێ تا ئه‌و ژور ژ هێكا تژى بوى. هندى دنیا گه‌رم بو و بهێن ژ ژورێ هات، ئه‌م هاتین و مه هێك ب رێكا شخرا برنه سه‌ر بێده‌رێ و سێ روژان مه كێشان هه‌تا خلاس بوین.
پشتى مه هێكێن خو كێشاینه سه‌ر بێده‌رێ و مه ده‌وار برینه سه‌ر و مه گێره كرین، ئه‌م رابوین مه ملهێب ئینان و هه‌ر ملهێبه‌كا لبن وان هێكا د دا بیست و پێنج دیكل و مریشك ژێ ده‌ردكه‌تن، درێژ ناكه‌م هند دیكل و مریشك ژێ ده‌ركه‌تن سه‌رێ وان گه‌هشته زاخو و بنێ وان لده‌ف مه و ئه‌ز رابوم دیكله‌كێ ره‌ش دناڤدا بوو ئه‌ز ل پشتا وى سیار بوم و چوم ل دور زڤریم و خر من كومكرنه ڤه.
كوسه‌ى گوتێ هه‌تا ڤێره دره‌وا ته به‌سه، ئه‌ڤه بو ته كلیلێن خانیێ من و بخاترا ته.
ليست هناك تعليقات:
إرسال تعليق