تێبینى: رێ بو به‌لاڤكرنا ڤى بابه‌تى دروژنامێن دهوكێ دا نه‌هاته دان
هه‌ر چه‌نده ئه‌ز نه دگه‌ل وان مانشێتانم یێن ب نیشانا پرسێ ده‌ستپێدكه‌ن، به‌لێ په‌یدابونا گوڤارا "چایخانه" بناڤێ سه‌ربه‌خو، بخو نیشانا پرسێ یه. دبیت مه‌ره‌ما من ژ ڤێ نڤیسینێ پتر ئازراندنا بابه‌ته‌كى بیت، ئه‌و ژى، ئه‌و نه باوه‌رییا دناڤبه‌را ده‌ستهه‌لاتێ و هاولاتى دا هه‌ى.
گوڤارا چایخانه كو دڤان روژێن بورى دا، ژماره "1" كه‌ته به‌رده‌ستێ خوینده‌ڤانان، سه‌رنڤیسه‌ر و خوادنێ ئیمتیازێ، روژنامه‌نڤیس (سه‌باح ئه‌تروشى) یه. هه‌ر وه‌كو دسه‌رگوتارا وێ دا نڤیسى، كو گه‌له‌كا دڤیا بزانن بوچى چایخانه و كى پالپشتیا وێ دكه‌ت، (لایه‌نه‌كى گوت " پاراستنا پارتى یا لپشتێ، دا دژى پارتێن دن كار بكه‌ن"، لایه‌نه‌كێ دى گوت "نه‌خێر ئه‌ڤه جه‌ماعه‌تا گورانن و دێ لڤینه‌ك و هاولاتیه‌كێ ل دهوك دامه‌زرینن"........). براستى ئه‌و پێشبینیێن وى كرین و ئێخستینه گومانێ، نه دویره ئێك ژوان یا راست بیت ژى! هزره‌ك بو نه‌هێلانا وێ بوشاهییا هه‌ى هاتبیته كرن، كو دبێژن ل دهوكێ روژنامه‌ڤانیا ئازاد نینه و په‌یدا نابیت، بوچوون بو وێ چه‌ندێ بچن كو باشتره گوڤاره‌ك بڤى ره‌نگى هه‌بیت، نه‌ك لایه‌نه‌كێ دى، كو دبه‌رژه‌وه‌ندا خوه دا ببنینت. هه‌ر چه‌نده ئه‌ڤ هزره بابه‌ته‌كێ جودایه و دویره ژوێ، ئه‌وا من دڤێت دڤان رێزان دا بئازرینم.
هه‌ر كه‌سێ دئه‌ڤرویا نوكه دا، ل وان به‌لاڤوكێن ل دهوكێ ده‌ردكه‌ڤن بنێریت. دێ بینیت هه‌میان سه‌مته‌كا تایبه‌ت هه‌یه، ئازراندنا بابه‌تان و دویڤچوونا وان یا ئاراسته‌كریه و جوره نه باوه‌رییه‌ك، نه تێركرنه‌ك دناڤبه‌را روژنامه‌گه‌ریێ و خوانده‌ڤانى و بكرێ روژنامێ دا لجهـ هێلایه. مه‌ره‌ما من ب بكرێ روژنامێ مه‌رج نینه خانده‌ڤا بیت و دبیت ژى دكانداره‌ك بیت، بو وى زور یا گرنگه هه‌ر رویدانه‌كا ل باژێرێ وى دهێته رویدان، پتر حه‌زدكه‌ت ژ جهه‌كێ باوه‌رپێكرى ئه‌گه‌رێن وێ رویدانێ بزانیت، نه‌ك ژ جاددێ، كو به‌ره‌لاییه‌ك دگه‌هاندنا وى خه‌به‌رى دا هه‌بیت. به‌لێ ژبه‌ركو ل پێش وه‌خت دزانیت، بابه‌تێن ئازراندى، و دویڤچوون و راپورتێن تایبه‌ت و وێره‌كانه بو بابه‌تان ناهێنه بلاڤكرن. دێ لپێش وه‌خت بێژیت، روژنامێن مه بو مه چ به‌لاڤ ناكه‌ن، نڤیسه‌رێ مه چ نانڤیسیت كو ئه‌م پێ به‌ره‌ڤ په‌رتوكخانێ ڤه بچین.
بویه ئه‌ز باوه‌ردكه‌م، ئه‌گه‌ر چایخانێ شیا پاقژى، راستگویى و سه‌ربه‌خویا خوه ب پارێزیت، دشێت به‌رده‌وامیێ بده‌ته ده‌رئێخستنا خوه و پالپشتیا وێ ژى، خه‌لك دێ كه‌ت. بوچى؟ ژبه‌ر كو یا ژ نیڤا خه‌لكى ده‌ردكه‌ڤیت و ئه‌گه‌ر شیا پتر رولێ خوه دڤى ده‌رباره‌ى دا بگێریت، دێ بیته پره‌كا باوه‌ریێ و هینگێ، هه‌م دێ روژنامه‌نڤیسێ مه شێت ده‌ستهه‌لاتا خوه گێریت و په‌یره‌و كه‌ت، هه‌م ژى دێ بیته چاڤدێر ل سه‌ر دام و ده‌زگه‌هان. باشتر و باشترین دێ په‌یدا بیت، هینگێ ژى سودمه‌ندێ ئێكى ده‌ستهه‌لاته و پالپشتیا ئێكسه‌را حكومه‌تێ یه. ل ره‌خێ دژى، كو من مه‌ره‌م پێ هه‌یه ئه‌ز ڤى بابه‌تى ب ئازرینم، خه‌لك دێ بڤان روژنامه و گوڤار و روژنامه‌نڤیسان ڤه، هێنه گرێدان. ده‌ستهه‌لاتا روژنامه‌نڤیسى، دێ خزمه‌تا چاكسازیێ ژ هه‌مى لایه‌كى ڤه كه‌ت و دێ هاولاتى ب شیان و خزمه‌ت و شێوازێ برێڤه‌برنا ده‌ستهه‌لاتێ هه‌ر ژ قوبا په‌رله‌مانى و تا بچویكترین رێڤه‌به‌رى ئاگه‌هدار بیت. هه‌ر بویه‌ره‌كا یان پێشهاته‌كا بهێت ژى، دێ بو هاولاتى یا روهن بیت و چ تشت لبه‌ر چاڤان دتارى و مژه‌وى نابن. دڤێت روژنامه‌نڤیس به‌رسینگا هه‌ر تشتێ ژ جاددێ ده‌ردكه‌ڤیت بگریت، ژبه‌ركو ئه‌و ده‌ستهه‌لاتا ژ جاددێ ده‌ردكه‌ڤیت، ده‌ستهه‌لاته‌ك كوره‌یه و چه‌ه‌ندین لایه‌ن بخو مفاى ژێ وه‌ردرگن و هه‌ر ئێك لدویڤ به‌رژه‌وه‌ندیا خوه، بلایێ خوه ڤه دكێشیت.
%20copy.jpg)
ليست هناك تعليقات:
إرسال تعليق