دبێژن حاكمه‌كى سێ ژن هه‌بون و ڤى حاكمى چ حالێ خو و چ خوشى دگه‌ل هه‌ر سێ ژنكان نه‌بون، ژبه‌ر كو هه‌ر ئێكێ ژوان كێماسیه‌ك ل ده‌ف هه‌بو.
ژنه‌ك یا ئه‌زمان درێژ بو و ژبه‌ر قه‌رقه‌شا وێ چ خوشى ژێ نه ددیتن و ژنا دویێ یا بێ زێهن بو و زوى تشت ژبیر دكرن و یا سیێ هه‌مى گاڤا چاڤێ وێ ل ده‌رڤه بوو و چ جار یا تێر نه‌بو و چاڤێ وێ هه‌ر ل زه‌لام و سوحبه‌تێن زه‌لامان بو.
دبێژن روژه‌كێ حاكمى گوته وه‌زیرێ خو وه‌ره دا دناڤ باژێرى دا بگه‌ریێن و ب زانین چ ل ناڤ باژێرێ چ چێدبیت.
هه‌ر دۆكا، كار و جلكێن خو گوهورین و یێن بابه ده‌روێشا كرنه به‌ر خوه و كه‌تنه ناڤ باژێرى و ل ماله‌كێ بونه مێهڤان، دوێ مالێدا زه‌لام و ژنه‌ك بون، ئه‌و ژن هندا ل به‌ر خزمه‌تا زه‌لامێ خوه راوه‌ستیایى بو و هه‌ر تشتێ زه‌لامێ وێ ژێ داخازكربا له‌بێ و به‌لێ بو و دگاڤێ دا بو به‌رهه‌ڤ دكر.
حاكمى گوته وى مروڤى ته ژنه‌كا گه‌له‌ك ب ئاقل یا هه‌ى و هه‌كه تو بهێى ئه‌م دێ ژنكێن خوه پێك گوهورین و من سێ ژن یێن هه‌ین و ئه‌ز دێ هه‌رسێ ژنێن خو ده‌مه ته و تو ژنكا خوه بده من.
حاكمى هه‌رسێ كێماسیێن ژنكێن خو ژى بو گوتن.
ئه‌وى ژى گوتێ بلا و ب شه‌هده‌یا وه‌زیرى لسه‌ر ڤێ چه‌ندێ رێكه‌فتن و حاكمى ئه‌و ژنك بخو بر و هه‌ر سێ ژنێن خو بو فرێكرن.
پشتى وى كابرایى كێماسیێن ژنێن حاكمى زانین، رابو هه‌مى كلیلێن مالێ و مال و پاره و هه‌ر تشتێ هه‌ى كرنه د ده‌ستێ وێ ژنكێ دا، ئه‌ڤا زویكا تشتان ژبیر دكه‌ت.
هندى ژنكێ گوتێ ڤان تشتان نه ده ده‌ست من، ژبه‌ر كو ئه‌ز دێ ژبیردكه‌م و نزانم من چ دانایه كیرێ.
زه‌لامى گوتێ باوه‌ریا من دڤێت ب ته بهێت كو دێ تو شێى مالا من پارێزى.
ژنكێ گوتێ پا ما ده‌م تو خودانێ ڤێ باوه‌ریێ ى، پا سوزبیت ئه‌ز یێدى هیچ تشته‌كى ژبیر نه‌كه‌م و هه‌مى زێهنا خوه ب ده‌مه كارى.
روژا پاشتر وى زه‌لامى دوو پاله گرتن و هات دا لایێ پشتێ ژ دیوارێ مالا خو ده‌رگه‌هه‌كێ دى ئێخیتێ.
ژنكا وى ئه‌وا هه‌ر ده‌م چاڤ ل ده‌ڤه و زه‌لامێن خه‌لكى. گوتێ ئه‌ڤه دێ چ كه‌ى دێ بو خانیێ مه خراب كه‌ى.
زه‌لامى گوتێ ما بو ته چ بێژم، ئه‌ز دێ پشتا خانى ده‌رگه‌هه‌كى ئێخمێ هه‌ر گاڤا ئه‌ز هاتمه به‌ر ده‌رگه‌هى و زه‌لامه‌كێ بیانى ل ده‌ف ته بیت و دا شه‌رما من و ته نه‌چیت، بلا ئه‌و زه‌لام د ده‌رگه‌هێ پشتێ را ب ده‌ركه ڤیت.
ژنكێ گوتێ پا ماده‌م تو خودانێ خو و ڤێ چه‌ندێ ى، پا سوز بیت ئه‌ز بتنێ بو ته بم و چاڤێ من نه‌چیته چ زه‌لامێن دى.
زه‌لامى چه‌ند رێكه‌ك ل ژنكا پر بێژ و ئه‌زمان درێژ جه‌رباندن، چ چاره بو نه‌دیتن ئینا به‌ر دا و فرێكره مالا بابێ وێ.
دبێژن پشتى هه‌یامه‌كى جاره‌كا دى حاكم و وه‌زیر بوى ره‌نگێ به‌رێ هاتن ل وێ مالێ بونه مێهڤان و دیت دوو ژنك بتنێ یێن ماین و پشتى پسیار ژێكرى كانێ ئه‌و كێماسى ل ده‌ف ماینه یا نه.
وى زه‌لامى چیروكا خو و هه‌ر سێ ژنكا بو گوت و گوتێ بتنێ یا پر بێژ چ چاره‌سه‌ى بو نه‌بون.
حاكمى ژى هه‌ر دوو ژنێن دى لێ پیروز كرن و خاترا خو ژێخاستن.
ليست هناك تعليقات:
إرسال تعليق