هه‌ر ئێكى وه‌رزه‌ك پێ خوشه، بێهنامن ب وه‌رزێ پایزێ دهێت. پیاسه و هلكێشانا بێهنێن كویر، جاران هه‌كو ل سه‌رێ غاباتى، لهنداڤ تاخێ قه‌ره‌چا من ته‌ماشه‌ى دهوكێ دكر. هه‌مى تشت رویس و بساناهى دهاتنه پێش چاڤێت من... ته‌به‌لانێ، مژویلاهیا هاربێن عه‌سكه‌ریێ بو. هه‌ردوو بزنێن خالێ حه‌جى، كو بتنێ خه‌ما وى گه‌هاندنا وان بو (گر كێریشكى) و ئه‌ڤه دوماهى خه‌ما وى و چه‌را بزنێن وى بو!.
پایز دوماهى پێگه‌ها منه. هه‌ر تشتێ من دڤێت بگه‌همێ ئه‌ز خه‌ونێن پایزى پێڤه دبینم، پایزا من نه دوماهیا عه‌مرى و بێ ئومێدیێ یه؟!. ل پایزێ، دار بو ژیانه‌كا نوى به‌لگێن خوه دوه‌رینن، ل پایزێ، دار خوه تافیل دكه‌ن، عاشقان فێرى رویساتیێ و به‌رائه‌تێ دكه‌ن. چه‌ند وه‌راندنا به‌لگان دبینم، هه‌ست ب هلكێشانا بایێ پایزى دكه‌م، بیریێن غاباتى و ته‌به‌لانا هاربێن عه‌سكه‌ریێ و جوانترین جه كو تو دهوكێ تێدا كونترول بكه‌ى. ئه‌ڤه پایز یا بدوماهى دهێت و هێژ ئه‌ز نه‌شیایمه مایكى بده‌مه به‌ر ده‌ڤێ خوه و پایزا ئه‌ڤ ساله رابگه‌هینم. نه عاشقان دبینم خوه هه‌مبێز دكه‌ن، نه دار به‌لگێن خوه دوه‌رینن، نه كه‌س خوه تێدا تافیل دكه‌ت و بتنێ ته‌لارێن بلند، هوتێل و موتێل و ئاڤاهیێن نه‌هێنه هژمارێ و جاده ژ ترومبێلان دخه‌ندقینه، دهوكا من یا دبیته باژێره‌كێ ئه‌وروپى؟!! ل ده‌وروبه‌رێن من، ئه‌و غاباتێ هاربێن عه‌سكه‌ریێ دوهى لێ ته‌به‌لانێ دكر!! ئه‌ڤرو هه‌ر ئێكى دوو سێ بلوك یێن هلاڤێتینه سه‌ر ئێك و سه‌رێ زاروكێن خوه یێن كێشاینه بن، هێژ خه‌ونێن وان ژ په‌یداكرنا نانى و چێكرنا نهانیه‌كى ده‌رباز نه‌بوینه. چه‌ند هلباسكى ڤى غاباتى دبم، تراژیدیا چیروكا خالێ حه‌جى و گر كێریشكى و خانیێن ته‌جاوز ل پێش چاڤێن منه.
خه‌لكێ غاباتى ژى وه‌ك من حه‌ژ دهوكێ دكه‌ن، ددرێژاهیا شه‌ڤێن درێژ دا خه‌ونێن خوه دكه‌نه یوتوبیا و روناهیێن باژێرى پێ دهه‌ژمێرن. به‌لێ نه وه‌كى من، ژبه‌ركو پایزا وان نه وه‌كى یا منه و ئه‌و پێناسا ئه‌ز دده‌مێ ئه‌و بره‌نگه‌كێ دى دبینن، ئه‌و وه‌رزێ پایزێ ددانن دوماهى وه‌رز بۆ ژیانا خو و وه‌راندنا به‌لگان، یان كو پیراتى و نزیكبونا مرنێ!... تشتێ ئه‌ز راكێشایمه ڤێ نڤیسینێ، ئه‌ز چه‌ند قه‌ستا غاباتى و دوباره بیرئینانا بیرهاتنێن خوه بكه‌م، ئه‌ز لڤێ تراژیدیێ دهه‌لنگڤم! هه‌كو بزنێن خالێ حه‌جى ژ گر كێریشكى دزڤرن ل كیرێ كوتان دبن!، ره‌حمه ل گورا ته‌بن خالێ حه‌جى، هه‌كه دا خه‌مه‌كا دژى لته زێده‌بیت.
ليست هناك تعليقات:
إرسال تعليق