ده‌ما ئه‌م ل ئازادیا ده‌ربرینێ دزڤرین و دبێژین مه ئه‌ڤ ئازادیه دراگه‌هاندنا خوه دا هه‌یه، ڤێجا ئه‌م ده‌زگه‌هێن خوه یێن راگه‌هاندنێ و به‌لاڤكرنێ دكه‌ینه دخزمه‌ت دا و ئه‌م ل سه‌ر بالگه‌هێ ره‌وشه‌نبیر دنڤین و هه‌مى ده‌زگه‌هێن خوه بناڤێ ره‌وشه‌نبیر ل قه‌له‌م دده‌ین، بتنێ ئه‌م به‌رسڤه‌كێ ژ خوه را چێدكه‌ین، ئه‌م ره‌وشه‌نبیرین ژبه‌ر كو مه قوناغه‌ك ده‌رباز كرى یه و مه ژبیركرى یه، تا ڤێگاڤێ عه‌قل نه‌كارى یه دسه‌ر گوتارا مه دا زال ببیت.
ئه‌ڤرو زه‌مینه به‌ره‌ڤ وێ چه‌ندێ ڤه دچیت، تێگه‌هێ دیالوكێ و ده‌ربرینێ و وه‌رگرتنا ره‌ئیا كه‌سێ به‌رامبه‌ر، ب بیته درویشمێ سه‌ره‌كیێ باژێرڤانیبونێ و ببیته سه‌متا پارتێن مه یێن سیاسى، كو ده‌ستهه‌لات د ده‌ستان دا یه و دشێن ببیته رێخوشكه‌ر، نه‌ك به‌روڤاژى دروشمێن ره‌ونه‌قدار و گه‌مارگرتى و گوتار و خاپاندن، ببنه رێگر ژ بۆ هه‌لێخستنا به‌رنامێ هه‌ر هشیاركرنه‌كێ و د ئه‌نجام دا كار پێ بهێته راوه‌ستاندن.
ئه‌ڤرو سه‌ركوتكرنا ده‌ربرینێ، یا بویه دیارده و كه‌نگى ئه‌م ل سه‌ر وێ دیاردێ زالبوین، دێ شێین هه‌ستكه‌ین مه ئازادیا ده‌ربرینێ هه‌یه. ده‌ربرینا ئه‌ڤرۆ به‌رسینگرتنا هزرا دوهى یه و تێكدانا به‌رژه‌وه‌ندیانه و ره‌خنه ل گه‌نده‌لیێ یه و قوتكرنا به‌ندكێ تیرورێ یه.
كه‌نگى مه هه‌ولدان، ده‌زگه‌هێن خوه‌یێن راگه‌هاندنێ و به‌لاڤكرنێ، بكه‌ینه دخزمه‌تا هزرا ئازاد دا و ره‌خنه و ره‌خنه ل خوه‌گرتنێ, دویر ژ هه‌ر ئیدیولوژیه‌كا به‌رته‌نگ. وێ گاڤێ دێ شێین دته‌خێن جڤاكى گه‌هین و لدویڤ پولینكرنه‌كا زانستى و ئه‌كادیمى، هه‌ر تویژه‌ك به‌ره‌ڤ سه‌متا خوه چیت و بێگومان ب ئێك تمامكه‌رێ یێدى چڤاك ئاڤا دبن و كه‌نگى زاڵ بوون ل سه‌ر هزرێن پاشڤه‌مایى و دیاردێن نه‌شرین و نه‌هێلانا گه‌نده‌لیێ و به‌رسینگرتنا به‌رژه‌وه‌ندیا هاته دى، وێ گاڤێ دێ ژ بازنه‌یێ گرتى ده‌ركه‌ڤین و هه‌ر ئێك دێ هه‌وڵده‌ت نه كه‌فته به‌ر چه‌كوچێ ڤێ ئازادیێ.
دچڤاكێ مه‌یێ كوردى دا, ئه‌م بۆ ده‌ربرینا ئازادیێ دنڤیسین و دبێژین و هه‌ست بڤێ ئازادیێ ناكه‌ین. هه‌ر پێكولا ژڤى لایى ڤه ژى هزر تێدا بهێته‌كرن، دێ چه‌په‌ره‌ك كه‌فته به‌رامبه‌ر و ئاسته‌نگ ژێرا په‌یدا بن، ژبه‌ركو هێژ عه‌قلێ مه ل سه‌ر گوتارا مه زال نه‌بویه.
ئه‌ڤرۆ ئه‌م پێدڤى وه‌رچه‌رخانه‌كا هزرى نه و گه‌ر تا دوهى ئه‌م هاتبینه خاپاندن و ده‌وله‌تان ل سه‌ر حسابا مه و ئاینێ پیروز، یاسا دبه‌رژه‌وه‌ندا خوه دا ده‌رێژ كر بن و ملله‌تێن خوه ئاڤا كربن, ئه‌ڤرو ده‌م هات، هزر د نه‌ته‌وا خوه و تایبه‌تمه‌ندیا خوه‌دا بكه‌ین و رێ ل به‌ر هزرا ئازاد ڤه‌كه‌ین و هزرا ئازاد دخزمه‌تا ئاڤاكرنا نه‌ته‌وا خوه دا بده‌ینه كارى و نه‌بینه سه‌رقوتكه‌ر و ته‌ماشه‌ڤان بمینین!.
%20copy.jpg)
ليست هناك تعليقات:
إرسال تعليق