بحث هذه المدونة الإلكترونية

pertook

pertook

2011/01/13

نڤسین ب قه‌له‌مێ حبرى " ترس"


هه‌میان پێخوشه‌ گوهـ ل سترانێن كوچك و دیوانان بگرن، هه‌كو (نادر سپیندارى) له‌علیخانا گوڤه‌یى دبێژیت یان لاوكێ مه‌عده‌نى ب ده‌نگێ (خه‌لیل باكوزى) یان ده‌ما (حه‌سه‌ن عه‌لى خه‌نجه‌ر) ئوسێ زه‌رى ب قه‌سابێ سه‌رێ (.......) دده‌ته‌ نیاسین یان هه‌كو (شوكرى بێسه‌ڤى) تبلێن خوه‌ دكه‌ته‌ دگوهێن خوه‌ را و بف دكه‌ته‌ سه‌یدكو سه‌یده‌ڤانان. براستى ده‌نگێ وان و سه‌لیقا ستران گوتنا وان، گه‌له‌ك ژ دلێ مه‌ دهێت و ئه‌م ناهێلین كپێن ژ ده‌نگێ بچویكه‌كى بهێت، ته‌ هه‌ر دڤێت تاویكا بده‌یێ و گوهێ هه‌میان ژى، دگه‌ل خوه‌ش دهێت.
دسالێن شنوى تله‌فزیون ل سه‌ر چایخانا هاتینه‌ بلاڤه‌كرن، هه‌ر گاڤا فیتى و ده‌ست قوتان ب سه‌ر گوندى ڤه‌ چبان، هه‌میان دزانى (سه‌میرا ته‌وفیق) یا هاتیه‌ سه‌ر شاشا تله‌فزیونێ و تشتێ سه‌یر ژى ژێ، ژنان ژى حه‌سیدى بدیتنا وێڤه‌ دبرن، به‌لێ نه‌ ژبه‌ر ده‌نگێ وێ، به‌لكو ئه‌و ژنا شیایى سه‌رنجا زه‌لام و لاوێن گوندى بو خوه‌ راكێشیت، تو بێژى یا ب چ به‌ژن و باله‌. 
چه‌ند خوشه‌ هه‌كو ئه‌ز ڤان هزران دكه‌م، هه‌ر چه‌نده‌ وێنێن من یێن زاروكینیێ ژى بون، به‌لێ هه‌میان دزانین چاوان ده‌ربرینێ ژ هه‌ستێن خوه‌ بكه‌ن، ته‌ چ ڤیابا و ته‌ حه‌ژ چ كربا، تا ته‌ گوهێ خوه‌ دا با چ ژى. كه‌سێ ماكێ خوه‌ دته‌ نه‌دكر، ژبه‌ركو هه‌ستێن ته‌ بون و دبێ زیان بون و ب سه‌ر توخیبێ كه‌سێ ڤه‌نه‌دچوون، تو یێ ئازاد بوى تێدا. براستى سه‌یره‌ ئه‌ڤا ئه‌م نوكه‌ خوه‌ تێدا دخاپینین، ئه‌م هه‌مى هه‌ستێن خوه‌ ڤه‌شێرین و مه‌ شیانێن ده‌رئێخستنا وان نه‌بن و ئه‌م نه‌شیابین خوه‌شیێ ژێ وه‌ربگرین، دبه‌رامبه‌ر دا، هنده‌كێن دى، به‌ریكێن خوه‌ ل سه‌ر حسابا مه‌ تژى بكه‌ن.
ترسا مه‌ یا ئێكێ ژ حه‌ژێكرنێ یه‌، ژبه‌ر هندێ ژى ئه‌م زویكا لخوه‌ بگومان دكه‌ڤین، هه‌ر دیدارا هونه‌رمه‌نده‌كێ سترانبێژ، دێ بینى ژ فلكلورى ده‌ست پێكر، ب به‌هانا ساخكرنا پاشماوێ باب و باپیران. براستى ژى مافێ ویه‌، ژبه‌ركو گوهێن خه‌لكى ژى ل ئێك ئاواز و ئێك سه‌لیقه‌ بتنێ خوش دهێن و دترسیت، ئه‌و پارێ ل ئێكه‌م كلیپا خوه‌ دمه‌زێخیت، خه‌رجیا خوه‌ نه‌ زڤرینیت. دا كو خوه‌ ژ ترسا ئێكێ ده‌ربازكه‌ین ژى، دڤێت ژ (گوندى و هه‌ڤجارى و جهالى و باگوردانى و به‌فریكێ) ده‌ست پێبكه‌ینه‌ ڤه‌. كه‌نگى ئه‌م شیاین خوه‌ دگه‌ل روژان بگونجینین، هینگێ دێ بئازادانه‌ وى ناڤى بێژین، یێن ئه‌م حه‌ژێدكه‌ین.



 
إرسال تعليق