جاك خوە بگرە چ نەمایە دێ گاز ھێت؟!!

 عبدالرحمن بامەرنی

ئەڤ دەربرینە ل سەر وێنەیەكێ (جاك و رووز) ژ فلمێ (تایتانیك) ھاتبوو نڤیسین و ل فەیس بوكێ ھەڤال (بژار محەمەد)، ب بەرچاڤێن من كەفتبوو. وێنە روودانا غەرقینا پاپورا تایتانیك پیشانددەت و دەما (جاك) دناڤ ئاڤا بەفرگرتییا دەریایێ دا و (رووز) دل ددلێ وی ددەت، كو بەرگریێ بۆ چێكەت و لدووماھیێ (جاك) دناڤ ئاڤا دەریایێ دا دبیتە بەستی.

وێنە ب سەرێ خوە و بەری چ جاكێن دی ببنە گەرەوا حكومەتا ھەرێما كوردستانێ، من گوت (حكومەتا ھەرێما كوردستانێ.. ئەڤە بخوە بەراوردكرنەكە بۆ نە سەركەفتنا حكومەتا مە بەرامبەر یارییا دگەل حكومەتا عیراقێ، كو وان چ كێشێن نە یێن بلاڤكرنا گازا سپی و نە ژی یێن غاز و پەنزینا نینن، ئەگەر ھەبن ژی، دێ ب ئاسانی و ب بەھایەكێ ئەرزان بدەست كەڤن) و بەری چ قوربانیێن دی و چ روودانێن دی یێن ناخ ھەژین دروست ببن، وەك ئەوا ڤان رۆژان ل ئێك ژ گوندێن سەر ب قەزا ئاكرێ روودای و تێدا دایكەك و 4 زارۆكێن وێ بووینە قوربانی و بەری ھەبن خوە بدەنە رەخێ حكومەتێ و گوتارا من كومێنت رێژ بكەن!

چیرۆكێن سەركەفتنێ تایبەتە بۆ (ماموستایان)

 ع. بامەرنی

ماموستایەك ژ قوتابخانەیەكێ ھاتە ڤەگوھاستن و ماموستایەكێ دی ھاتە جھێ وی و د پولێدا، پسیارەك ژ قوتابیەكی كر، بەری قوتابی بەرسڤێ بزانیت یان نەزانیت، قوتابیێن پولێ ھەمییان كرنە كەنی. لێ ژ سەربورا ڤی ماموستای و بەرێخوەدانا وی بۆ چاڤێن قوتابیێن دی، زانی كو ئەو ھزردكەن ئەڤە قوتابیەكێ گەمژەیە و ھیچ تشتەكی نزانیت.

وانە ب دووماھی ھات و ماموستای گازی وی قوتابی كر و بتنێ دگەل ئاخفت و بەیتەكا شعری ل سەر كاغەزەكێ نڤیسی و گوتێ بۆ سوبەھی ژبەر بكە، وەك تو چاوان ناڤێ خوە ژبەر دكەی و ھشیار بی ڤێ نھێنیێ نەبێژییە كەسەكێ دی.

رۆژا پاشتر دناڤ پولێدا ماموستای ھەمان بەیت ل سەر تەختە رەشی نڤیسی و پشتی شروڤەكرنەكا كورت، ئەو بەیت ژبەرچاڤێن قوتابیێن دی رەشكر و گوتە قوتابییان، كی دێ شێت وێ بەیتێ بۆ من ژبەر بێژیت؟

كەسێ دەستێ خوە بلندنەكر، ژبلی وی قوتابی و گوتێ رابە وێ بەیتێ بێژە.

قوتابی ل بەر چاڤێن ماموستای و ھەمی قوتابیێن د پولێدا ئەو بەیتا شعری خواند و ماموستای دەست خوشی لێكر و گوتە قوتابییان، ھین ھەمی دەستان بۆ ب قوتن.

پا ئەز حەز ژ (سەروكێ حكومەتێ) ناكەم!!

 عبدالرحمن بامەرنی

ئەز دا نڤیسم ئەز حەز ژ سەروكێ حكومەتێ ناكەم، ژبەركو نە ژ حزبا منە؟ لێ دا مانشێتێ نڤیسینا من درێژ بیت و من كورت ڤەبری و پێدڤی چ ھێڤە و وێڤەیا ناكەت، ژبەركو ئەز كوردم و سروشتێ مە كوردان یێ ھوسانە، دەما ئەم حەز ژ كەسەكی نەكەین، خوە ئەم حەز ژ دیكل و مریشكێن وان ژی ناكەین.

دێ ئێكسەر چمە ناڤ بابەتێ خوە، ئەو ژی چەند جاران من گوتارێن دكتورە نەوال سەعداوی كرینە كوردی و من د (روانگە و رەخنە)دا بلاڤكرینە، ناڤەرۆكا وان گوتاران ژی تشتێ جوان بوو و ل سەر ژیانا كوملگەھی یا رۆژانە بوو و ئەز وەك خواندەڤانەك، ھەر تشتێ ئەز دبینم نزیكی كومەلگەھێ مە بیت یان یێ جوان بیت، ئەز حەزدكەم بخوینم و جارنا حەزدكەم كەسێن دی ژی بخوینن، ھەر وەك بابەتێ مەریوان ھەلەبچەیی من بلاڤكری، كو زێدەتر نزیكی تێكستەكێ ئەدەبی بوو، لێ پەیامەك بوو، ژ بۆ گەلەك كەسان ئەڤێن ھەستا نەتەوایەتی لدەف كێم و بتنێ ل دەلیڤە و پارییان دگەرن و بابەتێ وی، نە نزیك و نە دوویر چ گرێدان ب حیجابێ ڤە نینە.

ئەم پێدڤی دروستكرنا شاكارێن ئەدەبینە؟!!

 عبدالرحمن بامەرنی

شاكار وەك زاراڤ بۆ كارێن گەلەك باش و جوان دھێت و مەبەستا من ژی، ئەز پێ بەحسا ئێك ژ كارێن جوان بكەم و ئەگەر زێدەتر بەحس بكەم، بەرییا چەند سالان بوو من رۆمانا (عومەر دەوران) یا ب ناڤێ (سیتاڤا تاریێ) خواند، كو ژ لایێ رێڤەبەرییا چاپ و بالاڤكرنێڤە ھاتبوو چاپكرن و (ھزرڤانی) ژ لاتینیێ ڤەگوھساتبوو پیتێن ئارامی و ئەو بۆ من ئێك ژوان رۆمانان بوو، كو من حەژ خواندنا وێ كری و رەھوانبێژی و زمان و روودان و سەرھاتییا رۆمانێ تێرا وێ چەندێ ھەبوون، ئەز نڤیسینەكا رەخنەیی ژی ل سەر بنڤیسم و بلاڤبكەم، ئەڤە بخوە پرۆژێ من یێ نڤیسینێ یە ل سەر رۆمانا دەڤەرا بادینان و ئەگەر نەچیتە دبن بوارێ پەسنێدا، تا نوكە من ل سەر 24 رۆمانێن دەڤەرا بادینان نڤیسین ھەنە و تا دەرگەھەكێ چاپكرنێ بۆ ڤەدبیت.

دا ڤەگەرم سەر بابەتێ خوە یێ من مەبەست پێھەی، ل ئێك ژ چالاكیێن ئێكەتییا نڤیسەران بوو، خودانێ رۆمانا سیتاڤا تاریێ ژی دناڤدابوو و دگەل سلاڤ و پرسیاركرنێ، گوت من رۆمانەكا نوی یا ھەی و من ھێشتا چاپ نەكریە و حەز دكەم بخوینی؟ كێشا من دگەل رۆمانێ د درێژاھییا وێدا بوو كو ژ 95337 پەیڤا پێكدھات و دیسان دگەل رێنڤیسێ، كو ئەو ب پیتێن لاتینی دنڤیسیت و ئەز ل خواندنا وێ یێ كوھم!

پەروەردا دھوكێ ل (موخل و بێژنكان) بكەن

 عبدالرحمن بامەرنی

دێ راستە راست مەبەستا خوە ژ ناڤئینانا (موخل و بێژنكان) دیاركەم و یا پێدڤی پەروەردا دھوكێ روھنكرنێ بدەت، ئەگەر نە دەت، دڤێت دیڤچوونەك ژبۆ بابەتی ھەبیت و لێپرسین دگەل ھەر كەسەكی بھێتە كرنێ، یێ دبیتە ئەگەرێ ھەدەردانا مالێ گشتی و ئینانەخارێیا ئاستێ زانستی!!!!

ئەڤا ئەز دێ نڤیسم ب ھەلكەفت بوو، ژبەركو كچا من ل پولا چارێ بنەرەتییە و ل سەر من پێدڤییە دەمێ خوە بۆ تەرخان بكەم و وانێن وێ ھاری نیشا بدەم. وانا كوردیێ ژی ئێك ژوانە، لێ راستی نمونا ڤێ پەرتووكێ تێرا وێ چەندێ ھەیە، كو دەھان نیشانێن پرسێ ل سەر ئاستێ زانستیێ قوتابییان دانین و بزانین ئەم ل بەرامبەری چ كێشەیینە؟!!

دا ژ پەرتووكێ دەسپێبكەم، د ھەر لاپەرێ تو بگەھیێدا، چەندین شاشیێن زمانی یێن زیق ھەنە، من گوت یێن (زیق)، ژبەركو ئەز بخوە نڤیسەرم و گەلەك جاران د نڤیسینێ و تایپكرنێدا ئەز پیتان د بەمە جھێ پیتان و دبیت شاشیێن چاپخانێ ژی جاروبار ھەبن. لێ د رۆژنامێ و كوڤارێ ژیدا، مە چەندین فلتەر ددانە نڤیسینێن خوە بەری دیزاینێ و پشتی دیزانیكرنێ ژی و دەما دچوو چاپخانێ، ئێدی ئەم نەدشییان چ راستڤەكرنا بۆ بكەین.

شەقا بچینی دێ شەقان ھەلینی؟!!

عبدالرحمن بامەرنی

وێنێ ژ ھەمیان بەرچاڤترێ بوویە بابەتێ سوشیال میدیایێ، بابەتێ پێھنا پولیسی بوویە، دەما دادوەشینیتە خویندكارەكێ زانكویێ! تا ڤێرە ئەڤ وێنەیە دێ گەلەك بلاڤ بیت و ھەر كەس و لایەنەك، دێ وەك خوە شرۆڤەیێ دەتێ و وەك وی دڤێت دێ بابەتی تێكڤەدەت! ژخوە ئەڤە بابەتەكێ نووی نینە ل ھەرێما كوردستانێ بڤی رەنگی بھێتە ئازراندن، لێ كێشا مە و ل سەر راوەستییانا مە، ئەم چاوان روودانان ھەلسەنگینین، ئایا ب گرتن و سزادانا سەرپێچكەران بتنێ بابەت دێ چارە بیت؟ ئایا یا دروست ئەم كێشان راستەخو چارەسەر بكەین وەك بەرەڤانیكرنێ و ئارامكەرەكێ یان ئەم كێشەییان ژ رھـ و ریشالان چارەسەر بكەین؟ ئھا ئەڤا دڤێ گوتارا كورتدا ل سەر راوەستم ئەڤەیە، ئەم چاوان كەلتورێ شەق و شەق داوەشینێ راوەستینین و بێژین بەسە؟!!

وەك رووھنكرن ژی، لدەف من بخوە خویندكار و تایبەتی خویندكارێن زانكویێ، رێزگرتنەكا مەزن ھەیە و (زانینگەھـ، خویندكارێن زانكویێ و ماموستایێن زانكویێ)، ئەڤە تەخا بلندن، كو ئەم سەرێ خوە پێ بلند بكەین و یاسا لدەف من ھەمی تشتەكە. ئەگەر مە مللەتەكێ ئاڤا بڤێت، ئەگەر مە ئارامی و ھاولاتیبوون بڤێت، دڤێت یاسا لدەف مە بتنێ ل سەر كاغەزێ نەبیت، بەلكو سەروەر بیت.

نڤیسینا پێشگوتنێ بۆ پەرتووكا (كاش فرۆش) یا سەعید شەریف

 عبدالرحمن بامەرنی

بوچی ئەڤ پەرتووكە یا گرنگە؟!

ئەڤا ئەز وەك پێشگوتن بۆ ڤێ پەرتووكێ دنڤیسم، بتنێ د چوارچوڤەیێ گرنگییا نڤیسینا سیناریویێ دایە، كو براستی ئەگەر لێنێرینەكێ دڤی دەربارەیدا ل پشتی سەرھلدانێ و ھێڤە بكەین، ئەو كارێن تەمسیلی یێن بۆ تەلەفزیونێ یان رادیویێ ھاتینە كرن، كارێن بچووك بوون! مەبەستا من ب بچوكینیێ نە مەبەست كو ئەو كار د لاواز بوونە و دڤێ نڤیسینێدا ئەز ھیچ كارەكی ژوان نا ھەلسەنگینم، ھندی ئەز ل سەر ھەبوونا سیناریویێن بەردەست بنێرم.

 

 كارێن بچووك ژ نەبوونا سیناریویێن باشە و ژ نەبوونا سیناریویێن بەردەستە، ئەز باوەرم ئەكتەرێن باش مە ھەبوونە  و دەرھێنەرێن باش مە ھەبوونە و كەسان مە ھەبوونە، كو ب ئەركێ دەرھێنانا كارێن ھونەریێ یێن باش راببن، لێ نەبوونا دەقێن سیناریویێ، ئەگەرەكێ بھێز بونە ژ بۆ نەبوونا كارێن جودا و یێن پێش كێش.

كەلتورێ ھونەری پەیدا بكەن..؟!

 ع. بامەرنی

ب رێكەفت چەند خەلەكێن بەرنامێ ھونەریێ (ئاوزێن گەنجان) ل سەر كەنالێ عەمسانیێ وار tv من دیتن، ئێك ژوان ل نیڤا بازارێ دھوكێ و ب دروستاھی ل سیكا ماستی و چەند گەنجان ئامیرێن وان یێن موزیكێ د دەستاندا بوون و ستران دگوتن و ئێك ژ ڤان خەلەكان ژی ل سلێمانیێ بوو، ئەڤ كومە ژی ژ چوار ھونەرمەندێن موزیك ژەن پێكدھێت، ئامیرێن خوە یێن دەنگی و موزیكێ ل نزیك (سەھولەكە) ل سەر جاددا سەرەكی یا بناڤێ سالم دانابوون، كو جادەكا قەرەبالغە و موزیكەكا كوردییا رەسەن و ستران دگوتن. ژبلی ئەڤێن ل سەری من گوتین ژی، وەك بەرنامەكێ حەفتانە ئەگەر یێ شاش نەبم، ژبەركو من پەیوەندی برێكا سوشیال میدیایێ ب ھەڤالێن ڤی كەنالی كر، بۆ وەرگرتنا زێدەتر زانییاریان، لێ چ بەرسڤ نەبوون، لێ ئەز باوەرم ھەمی حەفتییان و ھەر جارێ ل جھەكی و ب شێوازەكێ و ھندەك موزیكێن نوی ل سەر شاشا ڤی كەنالی دەردكەڤن و دووبارەیا ھەمان خەلەكە، دھەما حەفتیدا ژی دھێتە پیشاندان.

مە دھوكییا ژی خودێیەك یێ ھەی؟!!

 عبدالرحمن بامەرنی

بەری چەند سالان بوو، ھەمان نیشانێن ھشكە سالیێ وەك ئەڤ سالە ل دھوكێ دیاردكرن. رێكەفت كارەك بۆ مە چێبوو و ئەز و ھەڤالەك بەرەڤ سلێمانیێ چووین، ھەر ئەم گەھشتین و نەگەھشتینە (كانی وەتمانێ) ل سەر رێكا ھیران و نازەنییا بۆ قەزا دوكان، چپكێن بارانێ ھاتن و تا ئەم گەھشتینە ناڤ سەنتەرێ سلێمانیێ، فرچێن جامان ڤێرا نەگەھشتن، ھندی خودێ كەرەمكر. وێ شەڤێ ئەم ماینە ل سلێمانیێ و سپێدێ ئەم ژ خەو رابووین عەرد یێ سپێ بوو و مە دا رێ و د ھەمان رێكا ڤەگەرێدا بۆ دھوكێ، ل (شەقلاوە) چكێن دووماھیێ ژ عەوران دكەتن و تا ئەم ھاتینە دھوكێ، نە ئەو سیك و نە ئەو بازار.

باشە ئەڤا ل سەری ئەم نەشێین مایێ خوە تێبكەین و تشتەكە خودێ باشتر دزانیت و ھەر ئەوە خودانێ دلوڤانیێ و جھێ وی بڤێت دێ بەرێ عەوران دەتێ، ئێ باشە حكومەت، حكومەتا ھەرێمێ، ئیدارا پارێزگەھا دھوكێ ما ھەتا كەنگی دێ پارێزگەھێن دی ل سەر حسابا مە ژیانێ كەن، حەتا كەنگی دێ جاددێن وان و قوتابخانێن وان و نەخوشخانێن وان و خزمەتگوزاریێن وان ل سەر حسابا مەبن و بەشەكێ پارێ تەرخانكریێ دھوكێ ژی بۆ وان چیت؟! ما یا بەرئاقلە تو ل دھوكێ لیترا پانزینێ د سەر 870 دیناران دا بیت و ل ھەولێرێ بێ خوە گەلەك ماندی بكەی، دێ تانكێ ترومبێلا خوە ل سەر 690 دیناران فول كەی!!!

نڤیسینا پێشگوتنێ بۆ پەرتووكا (زێمارا دلی) كومەلە چیرۆكێن (ئەمجەد عوبەید)

 عبدالرحمن بامەرنی

ل جھێ پێشگوتنێ..

ئەز ناڤەشێرم، كو ئێك ژوان چیرۆك نڤیسێن ل دەڤەرامە و ھەر گاڤا چیرۆكەكا وان ب بەرچاڤێن من بكەڤیت، ئەز خواندنا وێ ژخوە ناكەم و ئەز دخوینم، خواندنەك نە دگەل دووماھی ھاتنا وێ پشت بدەمێ. من گوت ئەز، ژبەركو چیرۆكێ و ھەر تێكستێ نڤیسەر سنعەتكاریێ تێدا بكەت، ئەو تێكست من رادكێشییتە خوە، دناڤ تێكستی ژیدا ھند ناڤەرۆك و روودان بۆ من گرنگ نینە، ھندی یاریپێكرنێن نڤیسەری، ئایا تا چەند یێ سەركەفتی بوویە و تا چەند شیایە منەكێ خواندەڤا، ببەتە ناڤ كووراتییا تێكستێ خوەدا.

ئاخر تێكست ژی ھەر ھوسانە، ئەو نڤیسەرێ نەشییا بۆ چەند رۆژان، خواندەڤایی دناڤ قولاچێن تێكستێ خوەدا بگێرینیت و جیھانا خوە نیشان بدەت، ھینگێ كەنگی ئەو تێكستەكێ ئەدەبییە.

نڤیسینا پێشگوتن بۆ پەرتووكا ھەلامەتێن شەڤێ یا عەلی بەندی

 عبدالرحمن بامەرنی

ھوزانڤان جوداتر ژ كەسێن دی..

ھەڤالینیا زێدەتر ژ 30 سالان، تێرا ھندێ ھەیە مرۆڤ بشێت ئێك دوو ناس بكەت، ھەر چنەبیت ھندەك وێستگەھان ژ ژیانا وی، گەنجاتیا وی، مژوولاھیێن وی و حەزێن وی، ئەڤێن ھەنێ ژی ھەمیان دێ كورتكەمە ناڤ جیھانا نڤیسینێ، ژبەركو نڤیسینێ و شعرێ ئەم كرینە ھەڤال، بەردەوام ژی ئەم بەرھەمێ ئێك دوو دخوینین، ھەر چنەبیت شعر گەلەك نھێنیان ژ ھوزانڤانی دیار دكەت، ئاستێ ویێ ھزركرنێ و مەعریفێ و یا گرنگ لدەیف من بخوە و تایبەت ئەڤێن شعرێ دنڤیسن، شێوازێ یاریكرنا وانە ب پەیڤان و ئەو سنعەتكاریا ئەو د شعرێن خوەدا دكەن.

 ئەڤ ھەڤالینییا ئەز ژێ بەحس دكەم ژی ھوزانڤان (عەلی بەندی)یە، كو شعرێ ئەم كرینە ھەڤالێن ئێك و نوكە ئەز پێشەكیكێ بۆ كومەلا وی یا شعران دنڤیسم.

دچار هەیڤاندا (936) بابەت د(روانگە و رەخنە)دا هاتینە بلاڤكرن

عبدالرحمن بامەرنی

د هەر كارەكیدا پێداچوون و هەلسەنگاندن یا گرنگە، ژبۆ وێ‌ چەندێ‌ مرۆڤ پێشخستنێ‌ دكارێ‌ خوەدا بكەت. دڤان چار هەیڤێن بوری دا و بدروستاهی ل رۆژا 23/1/2020 ێ‌، ئێكەم گوتار مە د مالپەرێ‌ (روانگە و رەخنە)دا بلاڤ كر و تا نوكە بووینە 936 گوتار و بابەت.

ئەڤ گوتارێن مە بلاڤكرین ژی، گەلەك بیاڤ بخوەڤە دگرتن، (سیاسەت، كلتور، كومەلگەهـ، زانست، ئابوور، هونەری، ژنان، پەروەردە، ساخلەمی، لێنێریا تە و نیو میدیا ... هتد) و نڤیسەرێن بۆ مە د نڤێسین ژی، بێ‌ جوداهی و بێ‌ فلتەر، هەر بابەتەكێ‌ بۆ مە هاتی مە یێ‌ بلاڤكری. ناڤەشێرم مە هندەك ژ وان بابەتان بۆ خودانێن وان زڤراندینە ڤە، ئەڤێن ناڤزراندن تێدا یان سڤكاتی ب ئاینەكی یان ژی ناڤتێدانا كەسان و حزبان و دڤی بیاڤیدا گەلەك جاران نڤیسەران گازندە دكرن، ئەرێ‌ ما مالپەر نە رەخنەییە؟! د بەرسڤێدا، بەلێ‌ مالپەرێ‌ (روانگە و رەخنە) مالپەرەكێ‌ رەخنەییە، لێ‌ ئەم ل سەر حسابا چ لایەنان نابینە داردەستێ‌ چ لایەنێن دی.

گەلەك جاران نامێن تایبەت گەهشتینە و پسیاركرینە، ئەرێ‌ كی پالپشتییا مالپەری دكەتن؟! یا راستی بیت، ئەو كەسێن دنڤێسن، ئەو كەسێن هەست ب بەرپرساتیێ‌ دكەن و دیاردێن نە شیرین دبینن و وان دیاردان رەخنە دكەن، هەر ئەون پالپشتیێ‌ لێ‌ دكەن، بۆ ڤێ‌ چەندێ‌ ژی گوتارێن د مالپەریدا دهێنە پارڤەكرن ڤێ‌ دیدەڤانیێ‌ ددەن و مە هەولنەدایە و هەولنادەین ژی، مالپەر ببیتە ناڤتێدانا چ لایەنێن سیاسی.

تشتێ‌ دڤان چار هەیڤێن بوریدا زێدەتر ئەم ل سەر راوەستییاین و تایبەت پشتی دەركەفتنا حالەتێن ڤایروسێ‌ كورۆنایێ‌ ل هەرێما كوردستانێ‌ و كەرەنتیبوونا هاولاتییان د خانیڤە، مە هزر دوێ‌ چەندێدا كر، كو پێدڤییە ئەم زێدەتر خوە ب وەستینین و ببینە هەڤكارێن وەزارەتا تەندروستی و ناڤخویی بۆ پێگیریكرنا هاولاتییان ب رێنمایێن ئەو دەردكەن.

٤٥سالییا دامەزارندنا (ی. ن. ک) و چەند دیتنەک

عبدالرحمن بامەرنی

بەری ئەز بچمە ناڤ بابەتێ من مەبەست پێھەی ئەز ل سەر بنڤیسم، ئەز دێ ژ بیرئانینا ٤٥ سالیا دامەزراندنا یەکێتی نیشتیمانی کوردستان دەستپێکەم و ڤێ یادێ ل ھەمی خەلکێ کوردستانێ و ھەمی ئەندام و لایەنگرێن وێ پیروز کەم، ب وێ ئومێدێ، ئەڤ یادە ببیتە دەلیڤەیەک، کو ھەڤگرتن و ئێکرێزییا ناڤ مالا کوردی پێ قایم ببیت و شەرێ راگەھاندنێ دناڤبەرا (یەکێتی و پارتی)دا بھێتە راگرتن، ژبەرکو بارودوخێ کوردستان تێدا دەرباز بیت، ل سەر مە فەرز دکەت، ئەم ئێک و دوو قەبوول بکەین و ئەم دەستێن خوە بکەینە دناڤ دەستێن ئێکدا.

ئایا کورد خاین و تێکدەرن یان کال فامن؟!

کەسێ ھندی کوردان خیانەت و نە پاکی دگەل ئێک نەکریە و ژ ڤی ئەگەری ژی، تانوکە کورد نەبووینە خودان کیانەکێ سەربەخوو. ئەگەر ئەم ڤێ بکەینە پرسیار، ئایا راستیەک بۆ ڤێ چەندێ ھەیە؟! د بەرسڤێدا و لدویڤ ئەوا بۆ مە ھاتیە ڤەگێران، ئەگەر بەرپەرێن مێژوویێ و شورەش و بزاڤێن کوردی ھەمیان تێکڤەدەین، ل ھەمیان دێ خیانەتێ بینین، لێ مە چ جارەکێ پرسیار نەکریە، ئایا قەدەرا کوردانە و ھەر جار ئەو ب خوە خیانەتێ و نە پاکیێ دگەل ئێک و دو دکەن و ڤان بزاڤ و شورەشان ژناڤ دبەن؟ یان ژی تشتەک دی دپشت ڤێ چەندێ راھەیە؟!!

دێ چێبيت..!

عبدالرحمن بامه‌رنى

چه‌ند پوسته‌كێن فيس بوكى بيرا من لڤى كاريكاتورى ئينان، كو د (رۆژناما چاڤدێر)دا مه‌ بلاڤ كربوو و ژلايێ كاريكاتورڤان (زێره‌ڤان سالح)ى ڤه‌هاتبوو چێكرن. به‌رى بزڤرمه‌ وان رۆژێن ئه‌ڤ كاريكاتوره‌ تێدا هاتيه‌ چێكرن و كا هزرا چێكرنا وى ژكيڤه‌ هاتبوو، ئه‌ز دێ پيچه‌ك ل سه‌ر چه‌ند پوسته‌كان راوه‌ستم كو ئه‌ز كێشايمه‌ ڤێ نڤيسينێ. 

سه‌ره‌راى كو گه‌له‌ك كه‌س باس ل موچه‌ى دكه‌ن و نه‌دانا مووچه‌ى و بارودوخێ نه‌خوش و بێكارى، لي پوسته‌كى گه‌له‌ك سه‌رنجا من راكێشا، كو بڤى ره‌نگى بوو: (حكومه‌ت ب هه‌مى ناڤێن خودێ ئه‌م مفلس بووين).

ئه‌ڤ پوستێ ل سه‌رى يێ كه‌سه‌كى يه‌ و ماموستايه‌ ژى، ماموستا يانكو نه‌وه‌يه‌كى فێردكه‌ت و داخوازا وى ئه‌و بيت، موچێ وى بده‌نێ، ئه‌كيد يان كو گه‌له‌ك تشت يێن هه‌ين ب سه‌قه‌تى يێن برێڤه‌چووين و تا بگه‌هيته‌ وى ئاستى، حكومه‌ت نه‌شێت موچه‌ى بده‌ت، بابه‌ت گه‌له‌ك تايان بخوه‌ڤه‌ دگريت و هه‌مى ژى بۆ سياسه‌تا كورتبين ڤه‌دگه‌رن.

داڤه‌گه‌رم سه‌ر كاريكاتوورى، هينگێ ل نڤيسينه‌گا رۆژنامێ هه‌ر تشته‌كێ ئالوز ببا و مه‌ ڤيابا هيڤيه‌كێ بۆ په‌يدا بكه‌ين دا بێژين دێ چێبيت، ئه‌ڤ دێ چێبيته‌ كه‌فتبوو سه‌ر ئه‌زمانێ مه‌، ل وى ده‌مى د رۆژنامێ دا هه‌مى ژماران مه كاريكاتوره‌ك ژى بلاڤ دكر، كاريكاتورێن مه‌ ژى ل سه‌ر كه‌توارێ ژيانا رۆژانه‌ بوون، هه‌ڤالێ كاريكاتورڤان ژى كاك زێره‌ڤانى ژ گوتنێن مه‌ ئه‌ڤ كاريكاتوره‌ دروست كر و ب رۆژنامێ ڤه‌ گرێدا، كو رۆژنامه‌ هيڤييا و ده‌نگ و باسان دده‌ته‌ خه‌لكى و هه‌ر په‌يڤا (دێ چێبيت) دوباره‌ دبيت و ئه‌ڤه‌ ژ سه‌رهلدانێ وه‌ره‌ خه‌لك چاڤه‌رێ و هێشتا نه‌چێبووى. ئه‌و يێ ل ناڤ گورستانێ و ئه‌م يێ دبينه‌ هه‌ستى و هه‌ر ل هييڤيا چێبوونێ نه‌ و تشتێ سه‌ير ژى، كو كاريكاتورى هێزا خوه‌ ژێ وه‌رگرتى، ئه‌وێ دگورى ژى دا ب هه‌مان ده‌ردێ مه‌ ژ ڤێ دنيايێ يا باركرى و هێشتا چێنه‌بوويه و باوه‌رناكه‌م ژى بڤى ده‌ست و دارى و بڤێ عه‌قليه‌تێ ژى چ جاره‌كێ چێبيت!!

نڤیسین ل سەر راپورتەكا (كەنالێ رووداو)

عبدالرحمن بامەرنی

ل ھەرێما كوردستانێ راپورتا زانستی ب 15 ھزار دیناران دھێتە فروشتنێ، ئەڤە ناڤ و نیشانێن راپورتەكا ھەوالی یا كەنالێ عەسمانیێ رووداو بوون، كو دناڤ راپورتێدا ھاتیە، لدویڤ دیڤچوونێن رووداو، بھایێ راپورتان دناڤبەرا 15 تا 25 ھزار دینارێن عیراقیدایە و ل بازاری ب خویندكاران دھێنە فروشتنێ.

ئەڤە ددەمەكیدایە كو وەزارەتا خواندنا بلند ل ھەرێما كوردستانێ بریاردا كو دووماھی ب پروسا خواندنێ بھێتە دان و ئەو خوێندكارێن د خوڵا ئێكێدا دەرنەچووین، دشێن وەك قەرەبوو ڤەكولینەكێ یان راپورتەكێ ئامادە بكەن و دێ ساڵا خواندنێ بۆ وان بدەرچوون ھێتە ھژمارتنێ.

لڤێرە ئەز بەحسا ئەڤ سالە و ئاستێ زانستیێ خویندكارێن زانكویێ و دروستكرنا ڤەكولینێن وان ناكەم، لێ پرسیار ئەوە، زانكو تا چ راددە ل سەر ڤەكولینان دراوەستێت و ئایا ئەو ڤەكولینێن ھەنێ بۆ خوێندكاری بووینە پالدەر، كو بگەھنە دەرئەنجامەكی ل سەر ئەوا ئەو پێرابووین و لدویڤ ژێدەران گەریاین و دیڤچوون بۆ كری؟! ئایا تا چ راددە دیڤچوون ل سەر وان ڤەكولینان دھێتەكرنێ یێن خویندكار پێشكێش دكەن و تا چ راددە ئەو ڤەكولین بەرھەمێ خویندكارییە و ژ ئەنترنێتێ و چ ڤەكولینێن بەرھەڤ (كوپی پێست) نەكرینە؟!.

تەتەر یان تویتەر

عبدالرحمن بامەرنی

تەتەر من بۆ (عەلی تەتەر) بكارئینایە، كو ھاتیە دەست نیشانكرن دا پوستێ پاریزگارێ نویێ دھوكێ وەربگریت و تویتەر ژی من بۆ تەكنەلوجیایێ و پێشكەفتنێ بكارئینایە، تەكنەلوجیا ژی مرۆڤی دناڤ خوەرا بەرزەدكەت و وەكی شیرەكێ دوو سەرە یان مرۆڤی دبریت یان مرۆڤ رێكا خوە پێ ڤەدكەت. ئینانا ھەردوو زارڤان ژی پێكڤە، بەرچاڤكرنا دوو سەرەرێیانە و پوستێ پاریزگاریێ بۆ جەنابێ وی ئەزموونەكە و ئەگەر ل سەر دەمێ پوستێ خوە شیا دھوكێ پێش بێخیت و دوور ژ حزبایەتی و بەرژەوەندیێن خوە یێن تایبەت و مرۆڤێن خوە كاری بكەت و خوە ب خودانێ ھاوڵاتیێن دھوكێ بزانیت، ئەڤە شییا ناڤێ خوە ل رێزبەندییا باشترین پارێزگار توماربكەت و پارێزگەھا دھوكێ ژی ژ ھەمی روویانڤە، بكەتە سەر پشكا پارێزگەھێن دی.

من گوت دوو سەر یان دوو رێ ل بەر سینگا وی ھەنە، ئەز دێ وەك ئاكنجیەكێ پاریزگەھا دھوكێ گوتارا خوە نڤیسم و ڤێ راستیێ بەرچاڤ كەم، بۆ من پێشكەفتنا پارێزگەھا دھوكێ ژ ھەمی روویانڤە ژ پێشكەفتنا پارێزگەھا (ھەولێرێ و سلێمانیێ و ھەلەبچە) باشترە، لدویڤ ئەزموونا من دیتی و من خواندی، گەلەك یا بزەحمەتە كەسێ ئێكێ بشێت سەركەفتنەكا تەمام دكارێ خوە دا بینیت، ئەگەر كەسێن دبن ویدا دگەلدا دھاریكار نەبن، ئەڤە نە بتنێ بۆ پوستێ پارێزگاریێ، بەلكو خوە تا بەرپرسێ ھوبەكێ ژی بیت.

پارێزگەھا دھوكێ ژ ڤی دەنگ و باسی ل كیڤەیە؟!

عبدالرحمن بامەرنی

لڤان رۆژێن بوری، چەندین گوتارێن رەخنەی ل سەر باجانكان و (مەعمەل تەعلیب)ا دھوكێ یا كەڤن د مالپەرێ (روانگە و رەخنە)دا ھاتنە بڵاڤكرن، ھەر نڤیسەرەكی ژی جوداتر ل سەر كەرتێ چاندنێ بگشتی و جوتیاران و ھاڤێتنا باجانكان ل سەر جاددە و نیڤا كەرتكان نڤیسی بوون و ھەمیان رژدی ل سەر وێ چەندی دكرن، ئەگەر نوكە كارگەھەكا دوشاڤا تەماتێ ھەبا، جوتیاران سندوقێن باجانكان ب جاددێ وەرنەدكرن، كو نوكە بھایێ فروتنا ئێك سندوقا وان ل بازاری بتنێ ئێك ھزار دینارە.

دگەلدا ژی گەلەكان وەك چارەسەری دگوتن، ئەگەر مەعمەل تەعلیبا دھوكێ یا كەڤن مابا و نەھاتبا خرابكرن، دا مفایێن وێ گەلەك بن و تەماتە ژ وەڵاتێن دی نەدھاتە ھاوردەكرن و پارێ وێ دا بۆ حكومەتا ھەرێما كوردستانێ مینیت و دەلیڤێن كاری دا پەیدا بن و خەلك دا كەرتێ كشتوكالی پێش ئێخیت و دا ڤێ ژی ل سەر زێدەبكەم، ئەگەر گوندێن مە د ئاڤەدان بان و خەلك ل سەر گوندێن خوەبانە، ئەڤرو دەلیڤە بۆ توركیا ژی نەدما ب بەھانا پەكەكێ ئاڵایێ خوە ل چیایێن مە بلند بكەت.

ئەڤا من دڤیا ل سەر بنڤیسم و پارێزگەھا دھوكێ پێ بەرپرسیار بكەم، ئەڤ پوستێ ل خارێ بوو، كو د سوشیال میدیایێدا ھاتیە بڵاڤ كرن و لدویڤ وی پوستی پارێزگەھـ یا ھاریكار نینە كو كارگەھەكا دوشاڤا تەماتێ (تەعلیبێ) ل دھوكێ بھێتە ڤەكرن.

پوستێن فەیسبۆكی و تڤەنگێن داوەتییان

عبدالرحمن بامەرنی

ئەز دێ بابەتێ خوە بۆ بھایێ ئەمپێرێ كارەبا موەلیدێ تەرخانكەم، لێ بەری بچمە دناڤ بابەتیدا، ئەز دێ چەند جوداھی و بەراوردیێن دی دناڤبەرا پارێزگەھا (دھوكێ، ھەولێرێ و سلێمانیێ)دا ئینمە زمان. ژبەركو نە بتنێ بھایێ ئەمپێرێ كارەبێ ل دھوكێ گرانترە، بەلكو جوداھی دگەلەك تشتێن دیدا ھەیە و ژوان ژی بھایێ پانزینێ. دەما ئەم دچووینە ھەولێرێ یان سلێمانیێ، كو پرانیا جاران سەرەدانا مە بۆ ھەولێرێ زێدەتر بوو، ل دەما زڤرینێ و ل دووماھی پانزینخانەیا ژ ھەولێرێ مرۆڤ بۆ دھوكێ دھێت ل سەر رێكا چەمەی، دا ترومبێلێن خوە ژ پانزینێ فول كەین، دیسان ئەگەر ژ لایێ شەقلاوە ژی ھاتباینە، پرانیا جاران دووماھی پانزینخانا بەری تونێلێ، مە ترومبێلێن خوە ژ پانزینێ فول دكرن، ژبەركو مە دزانی جوداھی دناڤبەرا پانزینخانێن دھوكێ و پارێزگەھێن دیدا ھەیە.

سەبارەت بھایێ كارەبێ ژی ھەان سەلیقە و ھەمان تاس و حەمامە و ھەمی ھەیڤان دەما بھایێ ئەمبێرێ كارەبێ دھێتە دەست نیشانكرن، پوستێن فەیسبۆكی تژی گازندە دبن. ئەز باوەرم ژی گازندێن ھەمی ھاوڵاتییان ژ جوداھییا بھایێ ئەمبێرێن كارەبێ دایە دناڤبەرا پارێزگەھێن دھوكێ و ھەولێرێ و سلێمانیێ دا و ئەگەر كەسەك خوە ب جوامێرینیێ بینتە دەر و بێژیت ژبەركو ل ھەولێر و سلێمانیێ كارەبا عام زێدەتر دھێتە بەردان، ژخوە ئەڤە خولیسەریەكا دییە!!

تابلویەكێ شعری ژ نڤیسینا ھیوا فازل

د شعرا نویدا، خواندەڤا ب وێنەی ڤە دھێتە گرێدان، رەنگە د ئێك شعردا چەندین وێنە بكەڤنە بەر چاڤێن مرۆڤی و دبیت د شعرەكا درێژ دا، ھیچ وێنەیەك تێدا نەبیت كو سەرنجا مرۆڤی بۆ خوە راكێشیت. مەبەستا من ب وێنەی، ھەر تشتەكی نەلڤێ ھەلبەستاڤێ شیابیت لڤینەكێ بدەتێ و برەنگەكی و دووان ژیانێ بدەتێ و مرۆڤ ھەست ب زیندیبوونا وی بكەت. ئەگەر بۆ زێدەتر روھنكرن برەنگەكێ دیتر بێژم، دوبارە بەرێخوەدانا سروشتی و دیمەنان، بێزاریەكێ لدەف مرۆڤی پەیدا دكەن و تا وی راددەێ ئەڤ دوبارە دیتنا ھەمان جوانی و تا ئەو جوانی ل چ قاس ژی بیت، بەھایێ خوە یێ جوانی و سەرنج راكێشیێ ژ دەست ددەت. بەلێ ھندەك ھەلبەستڤان ھەنە، ب وێ جوانیێ و كاریگەر دبن و وێنەكی ژێ دروست دكەن، لڤین و دەنگ و دیتن تێدا ھەبیت و چەند ئەڤ وێنێ شعری شیا ڤان ھەر سێ بەھایان بخوەڤە ھەلگریت، دێ ئەو شعر زێدەتر سەرنجا خواندەڤای بۆ خوە راكێشیت.

شعرەكا كورت كو گەلەك جاران ھندەك ب ھایكویان ناڤ دكەن، ل سەر دیوارێ ھەلبەستڤانا گەنج ھیوا فازل ھاتبوو بڵاڤ كرن، سەرنجا من بۆ خوە راكێشا، دەما دبێژیت.

خوه‌جهێن وارێ خه‌ونا

‎د ڕكه‌ها بێ دادیێ دا

‎خوزیا پا‌رڤه‌ دكه‌ن

‎دا ل په‌راڤێن ژیانێ ب گه‌ڤزن

دڤێ شعرێدا من وێنەك دیت، دبیت د ناڤەروكا خوەدا وێنەك بچووك بیت و ب چەند پەیڤان ھاتبیتە چوارچوڤەكرن و ببیتە تابلوو، لێ وێنەكە ب قەد نڤیسینا رۆمانەكێ یە. دەما دبێژم رۆمان رەنگە پرسێ لدەف گەلەكان دروست بكەت، چاوان رۆمان؟! شعر بخوە جیھانەكا جوداترە ژ ھەمی ژانرێن ئەدەبی و دا زێدەتر ل سەر ڤێ خالێ نە راوەستم، ئەڤ وێنێ بچووكێ دڤێ شعرێ دا چەندین رامانان د ھەلگریت و دێ ھەولدەین بتنێ ل سەر ڤێ وێنەی راوەستین، ئەوێ مە مەبەست پێھەی، بوچی ب قەد نڤیسینا رۆمانەكێ بیت؟!

نڤیسەر ل گەلیەكی و خواندەڤا ل گەلیەكێ دی

عبدالرحمن بامەرنی

رەنگە لدەف گەلەك ھەڤالان ژی، ھەمان پرس من ئازراندیە، ئەرێ بوچی ل دەڤەرێن دی باشترین ھوزانڤان و چیرۆك نڤیس و رۆمانڤیس و ھونەرمەند وووووو ھەنە و لدەف مە ئەگەر پرسیار ژمە بھێتەكرنێ، ئەم نەشێین ناڤەكی دەست نیشان بكەین؟ ئایا ئەڤە جورەكێ زكرەشیێ یە، كو ئەم شوونا ئێكودوو بلند بكەین ئەم ئێك د شكێنین یان ژی بۆ ڤالاتیا دناڤبەرا نڤیسەری و خواندەڤانی دا ھەی دزڤریت؟! ئەڤ بابەتە بلا لجھێ خوە بمینیت..

ئایا نڤیسەرێ مە وی تشتێ پێشكێشی خواندەڤایێ خوە دكەت، یێ وی بڤێت و ئایا پروسا خواندنێ لدەف مە یا دروستە؟! ئەڤ پرسیارە گرنگن، دا بشێم بھێمە سەر كاكلا بابەتێ خوە یێ من دڤێت ل سەر راوەستم.

ژبەركو نڤیسین بخوە بەھرەمەندی و پیشە و سنعەتكاریە و دا كو نڤیسەر بشێت بەردەوامیێ بدەتە بەھرەمەندییا خوە و سنعەتكاریێ تێدا بكەت، دڤێت دو كاراكتەر تەمامكەرێن وی بن، ئێك: رەخنەگر و ئەو تشتێ ئەو دنڤیسیت ل موخل و بێژنكان بكەت، دا نە ھەر تشتێ ھەبیت بێخیتە بەر دەستێ خواندەڤای و دوو: دڤێت خواندەڤا ھەبیت و نڤیسەر ھەست بكەت، ئەو تشتێ ئەو دنڤیسیت، یێ دھێتە خواندن، دا بشێت نڤیسینا ددوڤدا جوانتر لێبكەت و زێدەتر سنعەتكاریێ تێدا بكەت.

پەیاما ل پشت ھاتنا كازمی..!

ئەز بەحسا ناكوكیێن دناڤبەرا ھەرێمێ و بەغدادا ناكەم، ژخوە ژ دەرھاڤێژێ سیاسەتا نە حەكیمانە، ئەڤ ناكوكیە ھند یێن ئالوز بووین، سەرێ من بخوە ژ ناڤ ناھێتە دەر.. بتنێ ئەز دێ بەحسا ھاتنا كازمی و سەرەدانێن وی و مەسجا وی بۆ خەلكێ عیراقێ ھەمیێ كەم، دەما ل سەر كورسییا حوكمرانیێ روونشتی.

عیراق ب ھەرێما كوردستانێ ڤە، كومەلگەھەكێ ھندێ ئالوزە، دڤێت ئەڤێ حوكمرانیێ لێدكەت یاریكەرەكێ گەلەك زیرەك بیت. كازمی بۆ دەستپێكرنا یاریكرنا خوەیا حوكمرانیێ، چ راست و چ نە راست زارڤەكرنەك دناڤ تورێن كومەلایەتیدا بلاڤەكر، دەما برایێ وی تەلەفون بۆ دكر و وی دگوتێ، تو بۆ واستە و واستەكاریێ ژنوكە وێڤە نە برایێ منی، تو ژی بتنێ ھاولاتیەكێ عیراقی..

دا بزڤرمە ئەوا بمەڤە گرێدای و ھاتنا كازمی بۆ ھەرێما كوردستانێ و فوكسا من ل سەر (دھوكێ) یە. كو تێدا كازمی سەرەدانا چەند جھان كر، ژوان كەلھا نزاركێ و چاوا مە دیت، شلق ب تورێن كومەلایەتی كەفتن، دەما دەیكەكا قورتالبوویا ئەنفالێ دبێژیتێ (تە ئەمانەت كوردستان)..

ئەڤێ ئەمانەتكرنێ بیرا من ل سەرھاتیەكێ ئینا، (پیرەژنەك چوو دەف حاكمی و گوتێ: بزنا من یا ھاتیە دزین؟ حاكمی گوتێ: دیارە تو یا دخەو بوویی. پیرەژنێ گوتێ: راستە حاكمی خوش بیت ئەز یا دخەو بووم، لێ من ھزركر تو یێ ھشیاری)..

ئەرێ (ھیڤیدار ئەحمەد)ی چ گوت؟!!

عبدالرحمن بامەرنی

پارچە ڤیدیویەك ژلایێ چەند ھەڤالێن من ڤە من بۆ من ھات و تێدا دیار بوو، كو (ھیڤیدار ئەحمەد) وەك پەرلەمانتارێ كوردستانێ ل سەر كەنالێ رووداو چەند راستی دگوتن، ھەر چەندە ئەو تشتێن وی گوتین تشتەكێ ڤەشارتی نینە و (ب رۆژا نیڤرو دكەنە گازی)، لێ پەرلەمانتارەك و ل سەر كەنالەكێ دیاریكری ڤان راستییان دیار بكەت، دخوە بخوەدا جھێ ل سەر راوەستیانێ یە.

ھیڤیدار د بەرسڤەكا پرسێن پێشكێشكاری دا، دبێژیت: "مە سەرەدانا ھەمی گومركێن ھەرێما كوردستانێ كرینە یێن فەرمی و نە فەرمی، ئەگەر دزی و تالان ل وان گومركان نەبیتن و ھەمی پارە بۆ خەزینا حكومەتێ بیتن، رەنگە پێویست نەكەتن ئەم ھندە تكا و رجا ل عیراقێ بكەین، بەلام ئەو پارە نە بۆ خەزینا حكومەتێ نە و ھەتا بەشەك بۆ حزبان ژی نینن و بۆ ھندەك شەخسانە، بۆ خوە دبەن و پێ دەولەمەند دبن، پرۆژێن خوە پێ چێدكەن و خوە پێ مەزن دكەن ل سەر حسێبا ڤێ خەلكی و ئەڤ كوردستانە و ئەڤ خەلكە ژی نە موھیمە. سوبەھی ئەگەر لڤێ كوردستانێ قەوما، ئەوان بەشەكێ زورێ پارێ خوە یێ تەحویل كری ژی و ئەو دێ جەوازا خوە و چانتێ خوە یێ بچیك ھەلگریت و دێ چیتە دەرڤە، بوویە ئەم داخوازێ ل حكومەتێ دكەین، گوشارەكا ئێكجار زور ل سەر ڤان دەروازان بكەتن، پارە ھەمی ددەستێ حكومەتێ دا بن، كو ئەم بشێین موچێ خەلكێ خوە بدەینێ، كو ب سەر بلندانە حكومەت بشێت بەرامبەر خەلكێ خوە راوەستیت، كەرەمبكەن ئەڤە من حەقێ وەدا".

ئەدەبا كوردی جودایە ژ ئەدەبا عەرەبی.. بەرسڤەكا نەرمە بۆ (ئەدیب عەبدوللا)ی

عبدالرحمن بامەرنی

بەری بچمە ناڤ بابەتێ خوە یێ من مەبەست پێ، دێ شرۆڤەكرنەكێ دەمە ناڤ و نیشانێ گوتارا خوە. (ئەدەبا كوردی)، ئەم ھەمی دزانین بۆ جھێ دەستئاڤێ دھێتە گوتن، ئەڤ ناڤێن ھەنێ ژی ھەنە، وەك: (تەوالیت، مەرافق، wc وووو ھتد). (ئەدەبا عەرەبی)، د بەرامبەر وێدا ئەم (تورە) بكار دئینن، تورە ژی زێدەتر زاراڤەكە بۆ رێزگرتنێ لخوە دھێتە بكارئینان، ئەڤێن جوان د ئاخڤیت و رێزێ ل ھەمی تشتەكی دگریت، گەلەك جاران دێ بێژینە زارۆكەكێ نە تەبتێ یان یێ شویم (خوە تورە بكە)، دیسان د زمانێ عەرەبیدا، ئەدەب دھێت كو كەسەكێ رازی ژ خوە و یان كو رەوشت و رەفتارێن وی و ئەدەب وەك پەیڤەكا ئەدەبی ژی دھێت، كو ئاخفتنكەر د گوتنێن خوەدا یێ رەھوان بیت و چەندین پێناسێن دی، ئەگەر وەك پێناسە مە بەحسكربیت و كورتییا وێ لدویڤ تێگەھشتنا مە (ئەدەب) بۆ ژانرێن ئەدەبی دھێت، وەك شعر و چیرۆك و رۆمان وووووو ھتد. (بەرسڤەكا نەرم)، مەبەستا من بڤێ نەرماتیێ، ھەر تشتێ مرۆڤ لەزێ تێدا بكەت و ھەلچوونێن مرۆڤی د زێدەبن و مرۆڤ د گەرماتیێدا بیت، ھینگێ بریار و ھەلسوكەفتێن مرۆڤی ژی دێ لەز و بەزاتی پێڤە دیار بیت. د كوردەواری ژیدا ئەڤ زاراڤە ژی زێدەتر بۆ بارانا نەرم و دژوار ھاتیە گوتن، كو بارانا نەرم د عەردیدا دچیتە خارێ و ھەمی شینكاتی و داروبار ژێ مفادار دبن و تا ئاڤا بنعەرد ژی و د بەرامبەردا بارانا بوش و دژوار ژی، ھەمی تشتەكی دگەل خوە رادمالیت و بتنێ زیانێ دگەھینیت ھەمی تشتەكی. (ئەدیب) بێی ناڤ ئینانا ناڤێ وی بتنێ وەك نمونە، ئەز دێ بەحس ل ھەڤالەكێ خوە یێ ئەز گەلەك رێزێ لێ دگرم كەم، كو ناڤێ وی (رەشاد) بوو و رەشاد بخوە پەیڤەكا عەرەبییە و یانكو ل رێكا راست بچیت و د كوردیێدا رامانەكا جوداتر ھەیە و بتنێ وەك نوكتە ئەم دبەر دكانەكێ را چووین و گیایێ (رەشاد)ێ، كو وەك كەرەفسێ بۆ خارنێ یا خوشە، ل بەردەرێ دكانەكا زەرزەواتی دھاتە فروشتنێ، وی ژ خودانێ دكانێ پرسیار كر، كا ناڤێ ڤی گیایی چییە؟ ژبەركو ب زاراڤێ وان ناڤەكێ دی ھەبوو و دڤیا خوە ژێ پشت راست بكەت، ئینا من گوتێ: ئەڤە ناڤێ تەیە و پێنەڤێت دگەل كەنیێ، ھەمان تشت بۆ كاك ئەدیبی ژی، ئایا پەیڤا ئەدیب د زمانێ عەرەبی دا یا زانایە و دھەمان دەمدا د زمانێ كوردیێ ژیدا ھەمی كەس رامانا پەیڤا ئەدیب دزانن، كو كەسەكە ل سەر ئەدەبیاتا كاری و داھێنانێ دكەت؟!!

خواندنەك كورت د چیرۆكا (نالینا كەمانجێ‌) یا (هاجانی)دا*

عبدالرحمن بامەرنی

ژ 21 ناڤ و نیشانێن چیرۆكان، چیرۆك نڤیس (ئیسماعیل هاجانی) كومەلا خوە یا كورتە چیرۆكان، ب چیرۆكا هەشتێ‌ (نالینا كەمانجێ‌) ناڤكریە و بۆ پالپشتیكرنا ڤی ناڤ و نیشانی، چەند رێزەك ل جهێ‌ پێشگوتنێ‌، ل سەر نالینان نڤیسیە و سروشت و ژینگەهـ و ژیان ب نالینانڤە گرێداینە. ئەڤ پەرتووكە ژ قەبارێ‌ ناڤین و 111 لاپەران بخوەڤە دگریت و ئەڤە كومەلا پێنجێ‌ یە یا چیرۆك نڤیسییە، دهێتە وەشاندن.

بوچی نڤیسین:

د نڤیسینێن خوەدا من چ جارەكێ‌ پرسیار ژخوە نەكریە، بوچی ئەز بنڤیسم، لێ‌ د (نالینا كەمانجێ‌)دا، دو تشتان ئەز پالڤەدایمە ڤێ‌ نڤیسینێ‌، ئێك: زمانێ‌ هاجانی تایبەتی د نڤیسینا ڤێ‌ چیرۆكێدا، زمانەك خوش و رەهوانە و ریتمەكا بێدەنگ دگەل خواندنا وێ‌ هەیە و كارلێكێ‌ دگەل هەستێن مرۆڤی دكەت، دەربرینێن ویێن شاعیرانەنە و ب قاس هوستایەكێ‌ ئاڤاهییان د دانانا بەرێن بازیدا، پەیڤێن وێ‌ كت كتە جهێن خوە یێن دروست گرتینە و ئاڤاهیەكێ‌ جوان دروستكرینە، دو: د پرانیا ئەو چیرۆكێن من خواندین، چیرۆك نڤیسی پەیامەك یا هەی و د دووماهیا چیرۆكا خوەدا، (گولێ‌) دكەت و خواندەڤایێ‌ خوە مەست دهێلیت و سەركەفتنا كورتە چیرۆكا هونەری ژی، د شارەزاییا چیرۆك نڤیسیدا یە و شێوازێ‌ گولكرنا وی. هەر چەندە وەك خواندەڤا، رەنگە ئەز و هەر كەسێ‌ ڤێ‌ چیرۆكێ‌ بخوینیت، دیدەڤانیێ‌ بۆ توماركرنا ڤێ‌ گولێ‌ ددەین و بهەمی پیڤەران گولەكا دروستە، لێ‌ ئەز ناڤەشێرم مرۆڤ خوشیێ‌ ژ وێ‌ گولكرنێ‌ نابینیت و دووماهییا چیرۆك پێ‌ هاتیە قفلكرن، خواندەڤا هەست ب گەلەك تشتان دكەت، كو چیرۆك نڤیسی ئەو نەفەس دگەلدا نەبوویە، لێ‌ ڤەگەریتڤە.

پروسا خواندنێ و ئازراندنا چەند بابەتَێن دى.. كورتە چیرۆكێن (د. ئەمجەمد عوبەید) وەك نمونە

 عبدالرحمن بامەرنى

دا كو خواندەڤا هەبیت و پرۆسا خواندنێ یا تەندروست بیت، دڤێت چەند كارلێكەك تەمامكەرێن ئێك بن و بەشداریێ دڤێ پروسێدا بكەن، ئەو ژى، نڤیسین و رەخنەگرتن و خواندەڤان. د رۆژەڤەكا وەكى ئەڤرو ژیدا، كو ئەم گازندێ ژ نەبوونا خواندەڤاى دكەین، دڤێت ئەم ل هەردوو كارلێكێن ئێكێ و دویێ ڤەگەرین و تا چ رادە ئەو هەردوو د راستە رێیا خوە یا دروسترا دەرباز بووینە، ئەو ژى نڤیسەر و رەخنەگرن؟ بەرى ئەم بەرسڤێ ب بەلێ یان نەخێر ژى بدەین، دڤێت چەند خالەكان ل بەر چاڤێن خوە دانین، ئەو كینە د نڤیسن و د بێژنە خوە نڤیسەر و ئەو ل كیرێ بلاڤ دكەن و ئایا نڤیسینێن وان دهێنە خواندن یان نە؟ خالا گرنگ ژى، ئایا نڤیسین بوویە پیشە یان نە؟.

ئەگەر ل سەر بەرسڤا پرسیارا ئێكێ راوەستین، ئەو كینە د نڤیسن یان ژى بێژین، نڤیسەر كییە؟ پێنەڤێت هەر كەسێ بنڤیسیت، ئەو نڤیسەرە و تایبەت ئەگەر دو جار و سێ جار و چەندین جاران بابەتێن وى هاتنە بلاڤكرن، دێ بێژینە وى یان ئەو بخوە دێ وەك نڤیسەر خوە دەتە ناسكرن و لڤێرە مە كورتیەكا پێناسا نڤیسەرى بەرچاڤ كر، پێنەڤێت ژى چەندین جورێن نڤیسەران هەنە، ژوان ژى نڤیسەرێ (ئەدەبى، كومەلایەتى، تەندروستى و سیاسى ووووو هتد). بۆ نڤیسینا بابەتێ خوە ژى، بتنێ دێ نڤیسەرێن د بیاڤێ ئەدەبیدا د نڤیسن وەرگرین، ئەڤێن شعرەكێ یان هەر ژانرەكێ دیێ ئەدەبى دنڤیسن  بلاڤ دكەن و چەندین جاران تێكستێن وى د رۆژنامە و كوڤاراندا هاتنە بلاڤكرن، دێ بێژینە ڤى نڤیسەر و ژ خوە ئەگەر بەردەستێ وى یان بارێ ئابوریێ ڤى كەسى یێ باش بیت و شییا بۆ خوە دو پەرتوكێن ئەدەبى چاپ بكەت، دێ وى ماف هەبیت ئەندامەتییا ئێكەتییا نڤیسەرێن كورد ژى وەرگریت و ئەڤە وەك مافەكێ وى و كونگرێ بالایێ ئێكەتییا نڤیسەران رێ پێدایە، كو مەرجێن وان بۆ ئەندامبوونێ د ئێكەتییا نڤیسەرێن كورددا، دڤێت هەر نڤیسەرەكى دو پەرتوكێن ئەدەبى یێن چاپكرى هەبن.  ژبەركو بابەتێ مە ب ئەندامبوونێڤە یێ گرێدایى نینە، ئەم دێ ل سەر ڤى كەسى راوەستین، ئەڤێ دبێژیتە خوە ئەز نڤیسەرم!

كورتە چیرۆك (ئێكە و نابیتە دوو)

عبدالرحمن بامەرنى

ئەڤ دیوارە ل سەر ناڤێ من یێ هاتیە تاپووكرن و ئەگەر رۆژێ سێ جاران پالا من لێ نەبیت، ب پشت راستیڤە ئەز دوو جاران هەر دهێم یان پالا خوە ددەمێ یان ژى ل سەر ڤى كەر بلوكى، جهێ روونشتنا خوە ل سەر خوەش دكەم. چاڤێ من لێ یە، ئەڤە ژ سپێدێ ژ خەو رابووی، جارا سیێ یە دهێتە هنداڤ بەلەكونێ و ل سەر پێن خوە د زڤریتەڤە. هەر جارەكا دهێت، چاڤێن خوە ل كولانێ‌ هەمیێ‌ د گێرینیت و تا پشت راست نەبیت، ل سەر پێن خوە نا زڤریت، هەر جارا دهێت ژی، ئەز ل بەر ڤى دیوارى مە و هشك راوەستیایى، خوە لڤین ناكەڤیتە مژوولانكێن چاڤێن من.

 ڤێجارێ  ئەو بخوە هات، بەلێ‌ هاتنا وێ‌ نەشیا من ژ جهێ‌ من بلڤینیت و پیرە دایكا وێ‌، دوو چاڤ هەبوون پێ‌ زێرەڤانیا كچا خوە دكر و ب هەردوو چاڤێن دی، ل كولانێ‌ و ل قورمێ داران دگەریا، كا دێ‌ رەشاتیا من دكیرێ را، ستێركا چاڤێن وێ‌ بوو خوە راكێشیت.

 نە ژ دەڤێ‌ من، دبێژن ڤێ‌ پیرەژنێ‌ حەفت مێر كرینە و خوە ژ دویان دایە بەردان و د شەڤا بیكینیا وێدا، ل زاڤایەكی نەبوویە سپێدە و دو یێن دی نەگەهشتینە بكەنە ئێك سال و یێ‌ شەشێ كەس نزانیت ب چ سەرچوویە و ئەڤێ نوكە لدەف مای، یێ‌ كەتیە قورنەتی و دێ‌ بێژی، بەری حەفت سالان یێ‌ مری و ژ قورنەتێ‌ خانی نەشێت دو پێنگاڤان ژ جهێ‌ خوە بلڤیت. 

كورتە چیرۆك (سمینارا سەیدای)

  عبدالرحمن بامەرنی

ـ بەرێز دلێ‌ تە نەمینیت، هەر وەكو تۆ ئەتەكێتێن دانیشتنێن ڤی باژێری دزانی، رێزا ئێكێ‌ بتنێ‌ بۆ بەرپرس و رێڤەبەرێن دام و دەزگەهانە و تو دشێی ل رێزا دویێ، جهەكی بۆ خوە پەیدا بكەی و ل سەر كۆرسیەكێ‌ دانیشی!

ئەڤە مەزنترین هۆلا ڤی باژێری یە و بكێمی 800 كەس دشێن ل سەر كورسیكان روونە خارێ‌، لێ‌ یا من هزر نەكری، ئەڤ ژمارە دو جار هند لێهات، ئەگەر ئەڤێن ژ پێرڤە ژی دگەلدا بهێنە هژمارتن.

 ژ نشكەكێڤە چەپ رەپا دەستقوتانا خەلكی، هندی ئێك د هۆلێڤە هەی، ئاگەهی هاتنا سەیدای كرن و هەمی رابوونە ژ پێرڤە و تا سەیدا گەهشتییە سەر دەپێ‌ شانۆیێ‌، دەستێن خەلكی ژ چەپ رەپێ‌ نە د راوەستان، بتنێ‌ ئەڤێ‌ برەخ منڤە نەبیت، خوە ب خواندنا پەرتووكەكێ‌ ڤە مژوولدكر و دا من ژ گومانا پسیاركرنێ‌ رزگار بكەت، گۆتە من: "دیارە ئەڤە جارا ئێكێ‌ یە تو لڤان سمیناران ئامادە دبی؟". ئەڤ پسیارە كر و خواندنا پەرتووكێ‌ بۆ وی ژ بەرسڤا من گرنگتر بوو و من ژی خوە تێنەگەهاند.

پەروەردا دھوكێ ل (موخل و بێژنكان) بكەن

 عبدالرحمن بامەرنی

دێ راستە راست مەبەستا خوە ژ ناڤئینانا (موخل و بێژنكان) دیاركەم و یا پێدڤی پەروەردا دھوكێ روھنكرنێ بدەت، ئەگەر نە دەت، دڤێت دیڤچوونەك ژبۆ بابەتی ھەبیت و لێپرسین دگەل ھەر كەسەكی بھێتە كرنێ، یێ دبیتە ئەگەرێ ھەدەردانا مالێ گشتی و ئینانەخارێیا ئاستێ زانستی!!!!

ئەڤا ئەز دێ نڤیسم ب ھەلكەفت بوو، ژبەركو كچا من ل پولا چارێ بنەرەتییە و ل سەر من پێدڤییە دەمێ خوە بۆ تەرخان بكەم و وانێن وێ ھاری نیشا بدەم. وانا كوردیێ ژی ئێك ژوانە، لێ راستی نمونا ڤێ پەرتووكێ تێرا وێ چەندێ ھەیە، كو دەھان نیشانێن پرسێ ل سەر ئاستێ زانستیێ قوتابییان دانین و بزانین ئەم ل بەرامبەری چ كێشەیینە؟!!

دا ژ پەرتووكێ دەسپێبكەم، د ھەر لاپەرێ تو بگەھیێدا، چەندین شاشیێن زمانی یێن زیق ھەنە، من گوت یێن (زیق)، ژبەركو ئەز بخوە نڤیسەرم و گەلەك جاران د نڤیسینێ و تایپكرنێدا ئەز پیتان د بەمە جھێ پیتان و دبیت شاشیێن چاپخانێ ژی جاروبار ھەبن. لێ د رۆژنامێ و كوڤارێ ژیدا، مە چەندین فلتەر ددانە نڤیسینێن خوە بەری دیزاینێ و پشتی دیزانیكرنێ ژی و دەما دچوو چاپخانێ، ئێدی ئەم نەدشییان چ راستڤەكرنا بۆ بكەین.

شەقا بچینی دێ شەقان ھەلینی؟!!

 عبدالرحمن بامەرنی

وێنێ ژ ھەمیان بەرچاڤترێ بوویە بابەتێ سوشیال میدیایێ، بابەتێ پێھنا پولیسی بوویە، دەما دادوەشینیتە خویندكارەكێ زانكویێ! تا ڤێرە ئەڤ وێنەیە دێ گەلەك بلاڤ بیت و ھەر كەس و لایەنەك، دێ وەك خوە شرۆڤەیێ دەتێ و وەك وی دڤێت دێ بابەتی تێكڤەدەت! ژخوە ئەڤە بابەتەكێ نووی نینە ل ھەرێما كوردستانێ بڤی رەنگی بھێتە ئازراندن، لێ كێشا مە و ل سەر راوەستییانا مە، ئەم چاوان روودانان ھەلسەنگینین، ئایا ب گرتن و سزادانا سەرپێچكەران بتنێ بابەت دێ چارە بیت؟ ئایا یا دروست ئەم كێشان راستەخو چارەسەر بكەین وەك بەرەڤانیكرنێ و ئارامكەرەكێ یان ئەم كێشەییان ژ رھـ و ریشالان چارەسەر بكەین؟ ئھا ئەڤا دڤێ گوتارا كورتدا ل سەر راوەستم ئەڤەیە، ئەم چاوان كەلتورێ شەق و شەق داوەشینێ راوەستینین و بێژین بەسە؟!!

وەك رووھنكرن ژی، لدەف من بخوە خویندكار و تایبەتی خویندكارێن زانكویێ، رێزگرتنەكا مەزن ھەیە و (زانینگەھـ، خویندكارێن زانكویێ و ماموستایێن زانكویێ)، ئەڤە تەخا بلندن، كو ئەم سەرێ خوە پێ بلند بكەین و یاسا لدەف من ھەمی تشتەكە. ئەگەر مە مللەتەكێ ئاڤا بڤێت، ئەگەر مە ئارامی و ھاولاتیبوون بڤێت، دڤێت یاسا لدەف مە بتنێ ل سەر كاغەزێ نەبیت، بەلكو سەروەر بیت.

بەلگە فلمێ (بالندێن مشەخت) و راوەستیانەك

 عبدلبرحمن بامەرنی

ئەڤ بەلگە فلمە ب ناڤێ (the migratory birds) و من وەرگێرانا گوگلی لێدا ھوسا ھات (بالندێن مشەخت)، دەمژمێر 5ی ئێڤارێ ل ھولا ژمارە (1) یا دھوك مول ھاتە نیشاندان و من چانسێ بەرێخوەدانا وی ھەبوو. بەلگە فلم ل دەڤەرا قەرەداخێ ل باكورێ كوردستانێ ھاتیە وێنەكرن و دەرھێنەرا فلمی ژی توركە و پیشەییا وێ ماموستا بوو، لێ دەولەتا توركییا ژبەر ڤی فلمی ئەو ژ سەركارێ وێ دەرئێخست، ئەڤە لدویڤ گوتنا وێ بخوە.

تشتێ من ژڤی بەلگە فلمی تێبینی كری و ئەز پالدایمە ڤێ نڤیسینێ، كو تایبەت بۆ ل سەر ژیانا كوچەرێن كوردان، ل زوزانا و پەزی و چەراندن و ھەمی ھوردەكاریێن كوچەراتا ب جوانی و رێك و پێكی دھاتنە پیشاندان. تا وی راددەی ھەر كەسێ ئەڤ بەلگە فلمە یە دیتبا دا زانیت ڤێ دەرھێنەری چەند حەز بۆ ژیانا كوچەراتیێ یا ھەی، ژیانا وان یا سادە، ھەمی تشتەك ب جوانی وێنە دكرن و پیشانددان، تا وی راددەی دا ھزركەی، ئەڤ تشتێن ھەنێ دھزرا وێدا بۆ ھەمی بینەران دێ تشتەكێ نوی و سەرنج راكێش بن، ئەڤە ژی دبیت ب دیتنا وێ ژینگەھێ ڤەبن ئەوا ئەو دناڤدا مەزن بووی. تا ڤێرە كارێ دەرھێنانێ و وێنەگرتنێ تشتەكێ ھەری جوانن و ئەز نەشییام ھیچ تێبینیەكێ ل سەر بنڤیسم.

كەلتورێ سینەمێ دروست بكەن؟!!

 عبدالرحمن بامەرنی

مە بڤێت و نەڤێت، دڤێت ئەم خوە دگەل جیھانا نوی ب گونجینین و مل ب ملێ وێ بچین. خوە ئەگەر ئەم دگەل نەچین ژی، ئەو دێ مە ددوف خوەرا راكێشیت، چ راكێشاندن؟ ئەو بابەتەك دییە و دڤێت ئەو راكێشان نەبیتە خراندن. سینەما ژی ئێك ژ وان ھەمی تشتانە یێن مە و تاكێ مە ژڤێ خراندنێ رزگار دكەن و مە ب جیھانا نویرا دگەھینن، خوە ئەگەر ئەم دویڤەلانك ژی بین، دێ مە دەرفەت ھەبیت، ئەم تاكێ كورد، نەوەیێ نوی ژڤێ جیھانێ نە ڤەقەتینین و ئێك ژ بەرەژەنگێن ڤێ ڤەقەتیانێ ژی، وەك نمونا گەنجێن مەیە، ل سەر سنورێن بیلاروسیا یا نوكە دھێتە دیتن.

ئەز بەحسا سینەمێ و گرنگییا وێ ناكەم بۆ مە كوردان، ھندی ئەز دێ ل سەر فلمە فێستیڤالا دھوكێ راوەستم. ئەز دێ بەحسا مەزاختیەكێ مەزن كەم، كو ژ بودجا حكومەتا ھەرێما كوردستانێ بۆ فێستیڤالێ دھێتە خەرجكرن، ئەو بودجە ژ خەلكییە و دڤێت بۆ خەلكی بیت. ئەگەر بەحس ل گەرێن بوریێن فێستیڤالێ بكەم، دا بینی چارێكا ھولێ ژ بینەران تژی نەبوویە، من گوت چارێك دا مەعنەویاتێن پێرابوویێن فێستیڤالێ كێم نەبن، ژبەركو ژ چارێكا وێ ژی كێمتر دھاتنە دیتن، ئەڤ گەرە و ھاتنا خەلكی باشتر بوو، ئەگەر راستر بێژم، من شەنسێ وەرگرتنا باجەكا چونا ژوور ھەبوو، ئەگەر بۆ من ژی دەست نەددا ئەز ل تەماشەكرنا گەلەك فلمان یێ ئامادە بم..

ئەڤرو ل فلمە فێستیڤالا دھوكێ من (ئایلان) دیت

 عبدالرحمن بامەرنی

تەوزیفكرنا كاراكتەرێن كورد، خوە ئەگەر نمونا (ئایلانێ بچووك) ژی بیت، ئەڤێ ل سەر كنارێن دەریایێ ب خەندقی ھاتیە دیتن و جیھان ب وێنێن خوە ھەژاندی، پەیامەكە ژبۆ دانەنیاسیینا گەلێ كورد و ئازارێن وان ب جیھانێ.

ئەڤرو سەعەت 5ی ئێڤاری بوو، ل زانكویا دھوك ھولا كونفرانسان بۆ ماوێ 90 خولەكان فلمێ (the little refuge feature)، ژ دەرھێنانا (بەتین قوبادی). ھاتە پیشاندان و من چانسێ بەرێخوەدانا وی فلمی ھەبوو، ھەر چەندە گەلەك زمان تێكەلی فلمی ببون و بتنێ وەرگێران ب زمانێ ئنگلیزی بوو، لێ تێرا ھندێ ھەبوو كو ئەز گەلەكێ ژێ تێبگەھم و فلم من دگەل خوە ببەت.

فلم ل سەر ئایلانی بوو، ئەو زارۆكێ كوردێ ژ كوبانێ دگەل دەیبابێن خوە برێكا قەچاخ ڤییاین كوچبەری وەلاتێن رۆژئاڤا ببن، دەما داعشا تیرورستی ب سەر دەڤەرێن وان دا گرتی. دگەل دەستپێكرنا فلمی ژی مە تەرمێ وی ل بەر كنارێ دەریایێ دیت و لێ دەرھێنەری ب رێكا وی ڤییا ئێك ژ كێشەیێن جیھان گەلەك ل سەر رادوەستیت پیشان بدەت، ئەو ژی كوچبەرییە كو ئێك ژ كێشەیێن ھەرە مەزنێن جیھانێ یە و ژوان ژی(كوچبەری، ژینگەھـ، یەكسانی، مافێ مرۆڤی).

ئێ بوچی بتنێ ل دھوكێ؟!

 عبدالرحمن بامەرنی

ئەڤرو سپێدێ ب ترومبێلا خوە ئەز یێ ل دویڤ پانزینا ئەرزان گەریام و شێڤدی كەسەكی گوتە من، ل پانزینخانا بەرامبەری تەناھیێ دێ سوبەھی پانزینا ئەرزان ھێتە بلاڤكرن و سپێدێ پشتی تشێت خارنەكا زوی، من بەرێخوەدا دەرڤەی دھوكێ و بۆ رێكا تەناھیێ و من دیت ل وێ پانزینخانێ بلاڤ ناكەن و من گوتە خوە ئەز ھەر یێ ھاتیم، من رێكا خوە بۆ سێمێلێ گرت و ھەر پانزینخانا ئەز د گەھشتمێ و بھایێن وان بڤی رەنگی بوون دناڤبەرا (890، 875، 850) و باش بوو نزانم چاوان چاڤێ من ب پانزینخانەیەكێ كەفت و بھایێ لیترێ بتنێ 820 دینار بوون، ھەر وەكو ئەز ب سەر تشتەكێ مەزن ھەلبوویم و من ئیشارەتێن ترومبێلێ ھەلكرن و چوومە دوێ پانزینخانێ ڤە و من ترومبێلا خوە ژ پانزینێ فول كر.

ئەڤا ل سەری ئاخفتنا ھەڤالەكێ من یێ دەوامێ بوو، سپێدێ ئەم ل سەر گرانی و ئەرزانییا بھایێ لیترا پانزینێ د ئاخفتین و دەما من گوتیێ ئەگەر شوونا تو ھندە ل پانزینخانا بگەری، ما باشتر نەبوو، ھەما ھەر ژ دەستپێكێ تە ب گرانی داگرتبایە؟ ئەڤا من پرسیاركری من لدویڤ ترومبێلا خوە و سەرفكرنا پانزینێ بەحسدكر، لێ وی گوت: ترومبێلا من كێم سەرف دكەت و رەنگە لیترەك بۆ دوو لیتران زێدەتركێ نەچبن.

كی بەرپرسە ژ نڤیسین و بەلگەكرنا شورەشێ؟!!

عبدالرحمن بامەرنی

ئەڤرو ئاھەنگا ئیمزاكرنا پەرتووكا (ل ژێر سیبەرا چیا) یا نڤیسەر رزگار كێستەی بوو و تێدا نڤیسەر و ئەدەب دوست و ل ھەردوو رێزێن ئێكێ، كو ل سەر كورسییان نڤیسی بوو تایبەت، بتنێ پێشمەرگێن كەڤن، پلەدارێن سەربازی و بەرپرسان مافێ روونشتنێ ل سەر ھەبوو.

كی ل كیرێ ب روونیت، ئەڤە بابەتێ من نینە و یا من ژ ڤێ ئاھەنگێ تێبینی كری، نڤیسەرێ پەرتووكێ كو دناڤ شورەشێدا وەك پێشمەرگەیەك ژیایە، ب دلسوزییا خوە و وەك ئەركەك، كو ھەم نڤیسەرە و دەستێ نڤیسینێ ھەیە و ھەم ژی بەشداری دەھان داستانان بوویە، رابوویە ب نڤیسین و بەلگەكرنا شورەشێ، وەك ئەو دناڤدا ژیایی و دیتی، كو ئەڤە بەرگێ دوویێ بوو ژ پەرتووكا وی و پرۆژێن وی یێن داھاتی دڤی دەربارەیدا كو بەحسكرین، جھێ دەست خوشیێ بوون.

دا ل بابەتێ خوە بزڤرم، بەرییا چەند سالان خوێندكارەكێ زانكویێ ژمن خاست، كا چ پەرتووك ل سەر شورەشێن كوردی ھەنە، ژبەركو ڤەكولینا وی ل سەر شورەشێن كوردییە؟! راستی بیت چ پەرتووك نەبوون، من گەلەك جاران ژی ھزركریە ئایا شورەشێن كوردی ھندە د شەرمینوك بوون، بوویە كەس ل سەر نا نڤیسیت؟ ئەڤێن دناڤ شورەشێدا ب لاوازی ب ئەركێ خوە رابووینە و وان بخوە پێنەخوشە راستیێن تەحل بھێنە ئاشكەراكرن؟ پێشمەرگەیێ نوكە ھێشتا یێ تا ئەڤرو دژیانێدا مای، ھەست دكەت ئەڤا بۆ وی ھاتیە كرن بەسی وییە و پێشمەرگاتی نەما و شورەش نەما، ئێدی بەرناكەڤیت بەحس لێ بھێتە كرنێ؟!! ئەڤە و سەدان پرسیارێن دی یێن بێ بەرسڤ د سەرێ مندا دروست دبن، تو بێژی سەركردایەتییا كوردی بخوە ئەنقەست نەڤێت ڤان شورەشان بەلگە بكەت، ژبەركو رولێ كاراكتەرێن وێ ھاتیە بەرزەكرن و ئەو بخوە گەھشتبنە دامێ و نەڤێن چ دەرگەھان ل سەر خوە ڤەكەن؟ بلا بەرسڤا ڤێ ژی ژنك من نەبیت، ژبەركو ئەڤە ژی بابەتێ من نینە..!