2014/12/29

خواندنەكا دوور ژ نڤیسەری بۆ رۆمانا (داویا شەرڤانەكی)* یا عسمەت محەمەد بەدەل

عبدالرحمن بامه‌رنى
جان دیلمان نویل، دبێژیت: ئەدەب، لایەكی سەبارەت واقعێ‌ مروڤی و ئەو ناوەند و چاوانیا ناسینا مروڤی ب وێ‌ ناوەندێ‌ و پەیوەندیێن مروڤی ڤە هەین، پێش كەش دكەت. ژڤی روانگەی ژی، دەما مروڤ كارەكێ‌ ئەدەبی دخوینیت و مروڤ خوە دناڤ وی كاری دا دبینیت یان مروڤ هەست بكەت، ئەوی كارێ‌ هەنێ‌، گرێدانەك ب بەشەك یان قوناغەك ژ ژیانا مروڤی ڤە هەیە، رەنگە دیتنا مروڤی و خواندنا مروڤی ژ بو وی كارێ‌ ئەدەبی یا جوداتر بیت، كو كەسەكێ‌ دی، هەمان خواندنێ‌ بدەتێ‌، كو ئەڤ كارلێكا من ژێ‌ بەحس كری، دوی كارێ‌ ئەدەبی دا نەبینیت. رۆمانا (داویا شەرڤانەكی) ژی یا چیروك نڤیس (عسمەت محەمەد بەدەل)، ئێك ژ وان رۆمانانە، كو چیروكا وێ‌، دسەر دەمەكێ‌ مێژویی و دەست نیشانكری دا هاتیە رویدان و ئەو هەمی تشتێن وی بەحس كرین، هەر كەس دشێت خوە دوان رویدانان دا بیینیت، بتایبەت ئەو كەسێن دوی سەردەمی دا ژیاین. ژبەركو بدەهان چیروكان ژوی رەنگی، دڤی كومەلگەهی دا رویداینە و ژبەركو، دوی سەردەمی دا، ئەڤ رویدانێن هەنێ‌، هەمی ب ئێك ڤەدچوون و خەم و مژولاهیێن خەلكی ژی وەك ئێك بون و هەمی بەشداری وان خوشی و نەخوشیان دبون.

2014/12/25

مەترسییا داعشێ‌ ئەگەر بو بەدیلێ‌ هەمی گروپێن ئیسلامی!

عبدالرحمن بامه‌رنى
راستە دەولەتا ئیسلامی ل عیراقێ‌ و شامێ‌ ـ داعش ـ بناڤێ‌ پەیرەوكرنا شەریعەتێ‌ ئیسلامێ‌، پێشرەویێ‌ دكەت و بو بەرفرەهكرنا دەستهەلاتا خوە ئاینێ‌ ئیسلامێ‌ بو خوە كریە بنەما و ژڤی رەهەندەی خەلك پێوەندیێ‌ پێدكەت، بەلێ‌ دخوە بخوە دا، داعش نە هلكەندەیێ‌ چ ئایدیلوژیەتێن ئیسلامی یە و بتنێ‌ ئیسلام وەك ئاین، شیایە خزمەتا وێ‌ و فرەهبونا دەستهەلاتا وێ‌ بكەت.


ئایدیولوژیەتا داعش؟
پتریا شەرێن ل جیهانێ‌ هاتینە رویدان، دوو ئامانجێن سەرەكی بخوە ڤە دگرتن، یان بو بەرفرەهكرنا بەروكێ‌ دەستهەلاتەكێ‌ بویە و پترییا ڤی جوری ژی ژ بو بەرژەوەندیێن ئابوری بویە یان ژی ئایدیولوژیەتەك ل پشت هەبویە، چ وێ‌ ئایدیولوژیەتێ‌ رەهەندێن ئاینی بخوە ڤە گرتبن یان ژی رەهەندێن ئاخێ‌ و زمانی. ئەگەر ل سەر ئامانجێن داعشێ‌ یێن بەرچاڤ ژی راوەستین، داعش زێدەتر هەلگرێ‌ ئایدیولوژیەتەكا ئاینی یە و هەر لبن ڤی ئالای ژی، بەروكێن شەری گەرم دكەت و گەلەك ژ چەكدارێن وێ‌ یان ئەڤێن ل بەروكێ‌ شەری بو دجەنگن، هزر دكەن داعش گروپەكێ‌ بناڤ جیهادی یە و پەیاما ئیسلامێ‌ دگەهینیت، كو بهزرا وان، ئیسلام

2014/12/21

رۆمانا (سیتاڤا تاریێ‌)، هەر وەكو من خواندی

عبدالرحمن بامه‌رنى

خواندنا رومانێ‌ ئەگەر كارتێكرنێ‌ لمروڤی بكەت، تا دوماهی لاپەر، بەرێ‌ مروڤی ژێ ناهێتە وەرگێران و چەند لاپەرەیەكی دقولپینیت، مروڤ هزر ل رویدانەكا نوی و تشتەكێ‌ نە پێشبینی تر دكەت. هینگێ‌ چاڤێ‌ مروڤی نامینیتە، ل قەبارێ‌ وێ‌ و ژمارا بەرپەرێن وێ‌. رۆمانا سیتاڤا تاریێ‌ یا (ئومەر دەوران)، ب قەبارەكێ‌ مەزن، ب 454 لاپەران، ژلایێ‌ رێڤەبەریا چاپ و بلاڤكرنێ‌ ڤە لدهوكێ‌، ب رێزبەندیا 98ێ‌ هاتیە چاپكرن و ئێك ژوان رومانان بویە، ئەگەر دەرفەت بكەڤیتێ‌، ئەز جارەكا دژی ببمە خواندەڤایێ‌ وێ‌. رومان بەحسێ‌ ژیانا گەریلایان دكەت، گەریلا ل چپا و چیا ژی برامانا، برس و ترس و سەرما. ل بەروكێن شەری و شەر ژی ژ بو رزگاركرنا نەتەوەیەكی و رزگاركرنا نامیسێ‌ و كەرامەتێ‌ وەك مروڤ. بەحس ل خەباتا كچێن گەریلا دكەت، خەباتا ژن و زەلامان دئێك چەپەر دا. بەحسێ‌ خیانەتێ‌ و بێبەختیێ‌ دكەت، هوكارێن نەچاركرنا كەسێن لاواز، كو پشتێ‌ ل هەڤالێن خوە بكەن. بەحس ل رێ‌ رەوێ‌ پارتەكێ‌ و بزاڤەكێ‌ و نەتەوەیەكێ‌ داگیر كری دكەت، ژ نێزیك مروڤ دشێت ل ژیان و بەرخودانا گەریلایان شارەزا ببیت، ئەڤێن حەز دكەن تشتەكی ژێ‌ بزانن.
كارێكتەرێن سەرەكی یێن رومانێ‌، ژنەكا نەژاد توركە و بریار دایە، ببیتە گەریلا، گەریلا بونا وێ‌ ژی، ژ بەر داخباربونا وێ‌ بویە ب گەریلایەكێ‌ زەلام ڤە. ژلایەكی ڤە، عەشقا وی چوویە دناڤ دلێ‌ وێ‌ دا و ژلایەكێ‌ دیڤە، ئەڤ گەریلایە گەلەك رەوشەنبیر و تێگەهشتی و قوتابیێ‌ زانكویێ‌ بویە و نوكە ل چیا، خەباتا خوە دبەتە سەر. پرس ژخوە دكەت، ئەگەر دوزا وی یا رەوا نەبایە، ئەو دا چاوان دەستان ژ ژیانا باژێران كێشیت و ژیانا چیان و برسێ‌ و ترسێ‌، هەلبژێریت؟ پسیارێ‌ ژخوە دكەت و بەهانێ‌ بو خوە دروست دكەت، كو دوزا وان دوزەكا دروستە و دگەهیتە بریارەكێ‌، كو ئەو ژی، دگەل گەریلایان ژیانا خوە ببەتە سەر و ژیانا باژێری و خوشییان، ل پشت خوە بهێلیت.

2014/12/09

گەفێن كوچبەریێ‌ و عەقلەكێ‌ بابسالاری گەریانەك بو ناڤ لاپەرێن رومانا (ژڤانەك بۆ دوماهیا شەڤێ‌)

رومانا (ژڤانەك بۆ دوماهیا شەڤێ‌) یا رومانڤیس (ئاواز مستەفا بەرواری)، ئێك ژوان رومانا یە، كو من ددەمەكێ‌ كێم دا، هەمی بەرپەرێن وێ‌ خواندین، هەر چەندە ئەز ئێك ژ وان كەسانم، بتایبەت ل دەڤەرا بادینان، ئەڤێن بەرهەمێن داهێنانێ‌ دنڤیسن، چ چیروك یان رومان و شعر، ئەز ژ نێزیك ناس دكەم یان من بەرهەمێن وان خواندینە، لێ‌ ئەڤە ئێكەم جار بو، ناڤێ‌ ڤێ‌ خانمێ‌ ب بەرچاڤێن من بكەیڤت. دەما من دەست بخواندنا ڤێ‌ رومانێ‌ ژی كری، رەنگە هزرەك بو من دروست ببیت، كو ئەز ل خواندنا وێ‌ یێ‌ دوو دل بم یان من هزر كربیت، كو دێ‌ دنیڤا رێ‌ دا، ئەم ئێك هێلین. ژبەركو رومان ژ 278 لاپەران پێك دهات و دەم بو خواندنا وێ‌ دڤییا و ناڤێ‌ روماننڤیسێ‌ ژی بو من، یێ‌ نوی بو و من گومان كربیت، كو بەرهەم دێ‌ یێ‌ ساددە بیت. لێ‌ یا راستی بیت، چەند من لاپەرەكێ‌ وێ‌ خواندبا، ئەز بەرەڤ لاپەرێ‌ دی ڤەدچووم و تا من گەهاندیە دوماهی نڤیسین، ئەو ژی هاتبو نڤیسین "شەمبی"، من پەرتوك بجهـ نەهێلا و من خوە ل چ خواندن و نڤیسینێن دی نە كرە خودان، تشتێ‌ ئەز ب خواندنا رومانێ‌ ڤە گرێدایم ژی، ئێك: چیروكا وێ‌ یا كارتێكەر بو و دەربرین ژ دورهێلێ‌ كومەلگەهێ‌ كوردی و دەبەدەریێ‌ دكر، دوو: خالا دوێ‌ لدەف من گرنگییا خوە هەبو، ئەو ژی شێوازێ‌ دارشتنێ‌ بو.

حكومەت چاوان قەرەبۆیا وولاتیان بكەت

دگرژە و كێشمەكێشەیێن دناڤبەرا حكومەتا بەغدا و هەرێما كوردستانێ‌ دا، ژبلی كو بابەت زێدەتر گرێدای سەروەرییا حكومەتا هەرێما كوردستانێ‌ و ماف و دەستور و بەرژەوەندیێن مافێن نەتەوەی یێن وێ‌ بون، دگەل بەغدا، كو دبەرامبەر دا بەغدا و سیاسەتا سەروك وەزیرێن بەرێ‌ یێن عیراقێ‌ هەمی ئەو بون، كو هەرێمێ‌ ملكەچی ئیرادەییا خوە بكەت، بو ڤێ‌ چەندێ‌ ژی حكومەتا عیراقێ‌ چەند كارتێن فشارێ‌ بكار ئینان و كارتا ژ هەمیان ژی كاریگەرتر، كارتا برینا موچێ‌ فەرمانبەران بو، ئەو ژی بتنێ‌ فەرمانبەرێن هەرێما كوردستانێ‌ و نەك عیراقێ‌ هەمیێ‌، بمەرەما، خوە نەرازیكرنا فەرمانبەرێن هەرێما كوردستانێ‌ و گڤاشتن ل سەر سەركردایەتی و حكومەتا هەرێمێ‌، كو هەرێمێ‌ پابەندی بریارێن بەغدا بكەت. دبەرامبەر دا، هاولاتی بو بەشەك ژ پشتەڤانییا حكومەتێ‌، ژبەركو بابەت نە بتنێ‌ گرێدای برینا قیتێ‌ وی یێ‌ روژانە بو، بەلكو، بابەت گرێدای دەستكەفتان و سەروەریێ‌ و ئەو خەباتا بو هاتیە كرن و خوین و كارەسات ژبو هاتینە دان، كو هیچ خێزانەكا كورد نینە، ئەگەر، بجورەكی و دووان، نە ببیتە قوربانی ڤان دەستكەفتان، ئەڤێن نوكە ئەم پێ‌ بوینە خودان هەرێمەكا سەربەخو، دناڤ عیراقەكا ئێكگرتی دا.

راوەستیانەك لدەف (عەرزوحالچیان)


عبدالرحمن بامەرنی

گەلەك جاران من قەلەمێ‌ خوە یێ‌ هەلگرتی، كو ئەز تشتەكی ل سەر عەرزوحالچیان بنڤیسم، لێ‌ دوو تشتان ئەز دراوەستاندم، ئێك: دا بێژم ئەو ژی فەقیرن و یێ‌ رزقێ‌ خوە دخون. دوو: من بو خوە دگوت، ما كی دخوینیت و كی دنڤیسیت، دا دویڤچوون ل سەر نڤیسا من بهێتەكرنێ‌! نڤیسینا من ژی، نە بتنێ‌ ژبەركو كارێ‌ وان تشتەكێ‌ روتینی یێ‌ زێدەیە، بەلكو بهایێ‌ وان نە یێ‌ ڤەبری یە و بو مروڤی گومان ژوی پارەی دروست دبیت، یێ‌ ژ مروڤی وەردگرن. بو نمونە، ئەز دێ‌ ئێك ژ عەریزچیێن دادگەها دهوكێ‌ وەرگرم، ئەو ژی، ئەز پێدڤی (ویكالەتەكا تایبەت) بوم، دا هەڤالەك موچێ‌ من یێ‌ بەری دوو هەیڤان وەرگریت، دەما لیژنا دابەشكرنا مووچان دهێت، ژبەركو سەفەرەكا چەند روژی درییا من دا بو. تا ڤێرە تشتەكێ‌ ئاسایی یە و من رێكا دادگەهێ‌ گرت و ئێكەم ویستگەها من ژی، عەریزچی بۆن، كو هەمی یێن كومڤەكرینە دهولەكا ژ دەست چێكری دا و ئەو هول یا تژی ژورێن بچیك كرین، كو هەر ژورەك ژی ئێك عەریزچی یێ‌ تێڤە و كارێ‌ وان ژی، زێدەتر كار ئاسانی یە، هەم بو هاولاتی، كو دێ‌ زانیت دێ‌ بەرەڤ چ بەش چیت و هەم ژی بو كارمەندێن دادگەهێ‌، كو دێ‌ زوی شێت مامەلێن هاولاتی پرێڤەبەت، ئەڤە نە بتنێ‌ ل دادگەها دهوكێ‌، بەلكو ل پتریا دام و دەزگەهێن حكومی، ئەڤ چەندە هەیە.

ژ شنگالێ‌ بو كوبانێ‌ چەند هەناسەیێن ڤەقەتیایی

ـ تیرور ـ

چەكێ‌ وان ئیمانە و 
بناڤێ‌ خودێ‌ و پێغەمبەران
بەروكێ‌ شەری دگرن و
پێشرەویێ‌ دكەن.
خەلیفەنە و ئەمیرن، جیهادی نە
خوە كوژن و مروڤایەتیێ‌ نزانن!
دێرو و مزگەفتان، مەكان و مەزارێ پێغەمبەران
ژبنی رادكەن دپەقینن
خەونا هەمیان ژی ئێكە
بەحەشتی نە و دێ‌ حەفتێ‌ حوریان بدەست ڤە ئینن..
ـ شەهید ـ
ئەو بناڤێ‌ خودێ‌ شەری دكەن،
لبن ئالایێ‌ لا الە الا الله دكەڤن و
دسەكتن.
ئەم بناڤێ‌ ئاخێ‌ و نەتەوەی و نامیسێ‌
بەرگریێ‌ دكەین
ئەم دكەڤین و شەهید دبین..

حاسیبە ئێكەم بێ‌ پلانیا من بو

عبدالرحمن بامەرنی
ل سالا 1993ێ‌ بو، ئەز هینگێ‌ ل بامەرنێ‌ بوم و من كەر دكانكەك بو خوە ڤەكربو. زڤستانێ‌ پەرێن خوە دادهێلان و هەمییان خوە بو سەرمایا وێ‌ بەرهەڤدكر. ژ هەبون و نەبونا گازێ‌ و سوپا دارا، من كر و نەكر، من ژ نیڤ بەرمیلێ‌ گازا سپی زێدەتر دمالا خوە دا من نەبو. ئەڤە ژی بو گوندەكێ‌ چیایی و بەفرین گەلەك كێمە، كو ب شەڤ و روژان دڤێت ئاگر دمالێ‌ دا یێ‌ هلكری بیت. من دحسابا خوە دا بو خوە دانا، ئەز پێدڤی دوو تەرەكتورێن دارا مە، ئەگەر بتنێ‌ سر و سەقەما زڤستانێ‌ مە نە ئێخیتە نڤینان.

2014/10/29

كێمییا خواندنێ‌ و تەخەبونا كێشەییان


عبدالرحمن بامرنى

بوچی مە خواندەڤا نینە؟ بوچی پەرتوكێن مە ناهێنە خواندن و بوچی لهەمی باژێر و باژێركێن سەر ب پارێزگەها دهوكێ‌ ڤە روژنامە و كوڤار ناگەهنێ‌ و گەلەك بوچیێن دی! گەر ئەڤە پرسەك بیت و هەمی گازندەییان ژێ‌ بكەن، دەزگەهێن راگەهاندنێ‌، خودانێن پەرتوكخانا، نڤیسەر بخوە. لێ‌ ئەڤە بتنێ‌ بەس نینە كو ئەم خوە بهندەك بەهانەیان ڤە گرێدەین و دڤێ‌ گێژەڤانكێ‌ دا بمینین. ئەز دڤێ‌ كورتە نڤیسینێ‌ دا ناچمە سەر ئەگەران كو رەنگە بدەهان جاران بەحس ل سەر هاتبیتە كرن و بوینە بابەتێ‌ روژنامە و كوڤار و رادیو و تیڤییان، بتنێ‌ دێ‌ بابەتەكی ئازرینم، ئەو ژی، دان و ستاندنە. 
دان و ستاندن دناڤبەرا خواندەڤای و روژنامە و پەرتوكان دا، ئایا دنڤیسینێن خوە دا ئەم چ پێش كێش دكەین و دبەرامبەر دا ئەم چ بدەست ڤە دئینین! ئایا ئەو تشتێ‌ ئەم بو خواندەڤای پێش كێش دكەین، بدروستاهی و رێكێن زانستی دگەهیتە بەر دەستێ‌ وی؟ ئایا ئەو تشتێ‌ ئەم بو خواندەڤای دنڤیسین و دئازرینین، هەمان تشتە یێ‌ ئەو دخازیت؟
بهزرا من، ڤالاتییەكا دئێك نەگەهشتنێ‌ دناڤبەرا پەرتوكێ‌ و روژنامێ‌ دگەل خویندەڤای دا هەیە. ئەگەر وان روژنامە و كوڤارێن لدهوكێ‌ دەردكەڤن، ئەگەر وان دەزگەهێن چاپكرن و بلاڤكرنا پەرتوكان ل دهوكێ‌ هەین و ڤانە هەمیان بكەینە نمونە، دێ‌ دیار بیت كو مە كومەكا بلاڤوكان هەنە و پەرتوكخانێن مە تژی ناڤ و نیشانن و هەر زمانێ‌ تە بڤێت و ئەڤە ژبلی هەبونا دوو روژنامێن روژانە، كو ئەڤێن هەنێ‌ بو پارێزگەهەكا وەكی دهوكێ‌ بەسن كو مە خواندەڤایەكێ‌ مشە هەبیت، لێ‌ دبەرامبەر دا، خواندەڤا مە نینە! ئەگەر رێژا خواندنێ‌ ژی وەربگرین و هەڤبەری رێژا روژنامە و كوڤار و پەرتوكان ئەوێن بتنێ‌ ل سنورێ پارێزگەها دهوكێ‌ دهێنە فروتن، هەر ناهێتە بەحس كرن یان كو ئەم بدروستاهی ل بەر سینگێ‌ كێشەیەكێی نە، ئەو ژی مە گرفتا خواندنێ‌ هەیە. 

2014/10/27

ئەم دێ‌ كەنگی ب بەروكێ‌ خو یێ‌ شەری كەڤین!

هیچ كوردەك نینە ئەڤرو نەزانیت بەروكێ‌ شەری ل كیڤەیە و دێ‌ بەرێ‌ لویلییا تڤەنگا خوە دەتە كیرێ‌. ئەگەر
بەری نوكە ل هەر پارچەیەكا كوردستانێ‌ جوداتر ژ یا دی، دوژمنێن جودا هەبن! ئەڤرو دوژمنەكێ‌ مەترسیدار یێ‌ پەیدا بوی و یێ‌ گەفێن راستەوخو ل سەر كوردان دكەت و ئەڤە نە بتنێ‌ ل هەرێما كوردستانێ‌، بەلكو ل پارچێن دژی و ئەم یێ‌ وان هێرشان دبینین، ل كوبانێ‌ ل روژئاڤایێ‌ كوردستانێ‌ و ئەم یێ‌ دبینین چاوان كورد یێ‌ دەربەدەر دبن و چاوان گەفا جینوسایدەكا دی ل سەرە و رەنگە چ ژ جینوسایدا شنگالێ‌ كێمتر نەبیت، كو ب سەدان خەلكێ‌ وێ‌ هاتنە سەر بریكرن و كوشتن و ب سەدان ژن بوینە كەنیزە و و وەك جاریە ل بازاران، كرین و فروتن پێهاتیە كرن. 

توركیا گێمەكێ‌ دژی یێ‌ یاریێ‌ خوسارەت بوو!

عبدالرحمن بامەرنی
هاریكاریێن ئەمریكا و هەڤپەیمانێن وێ‌ بو پێشمەرگەی ژ بو رویبریبونا وان دگەل تیرورستێن داعش، هاریكاریەكە بو سنورداركرنا پێشڤەچوونا داعشێ‌ لڤێ‌ دەڤەرێ‌ و دەرئەنجامێ‌ وێ‌ ژی، دا كو ئەڤ گروپە نەبیتە گەفەكا راستەوخو ل سەر ئارامیا جیهانێ‌. ئەگەر ل بەروكێن شەری ژی تەماشا بكەین، پێشمەرگەی ل باشورێ‌ كوردستانێ‌ و شەرڤانێن یەپەكێ‌ ل روژئاڤایێ‌ كوردستانێ‌، شیاینە باوەرییا ئەمریكا و هەڤپەیمانێن وێ‌ بو خوە مسوگەر بكەن، كو ئەو دشێن بەرسینگا ڤی گروپی بگرن. ژبەر هندێ‌ ژی، ئەمریكا هەر زوی د هەوارا پێشمەرگەی هات و دگەل هەڤپەیمانێن خوە، دەست ب پرچەككرنا پێشمەرگەی كر. لێ‌ گرفت د شەرڤانێن یەپەكێ‌ دا بو و ئەگەر هاتنە پرچەك كرن، ئایا دێ‌ بنە گەفەك ل سەر دەڤەرێ‌ و دەوروبەرێن خوە؟ كو یەپەكە ب بەشەكێ‌ یان تایەكێ‌ پەكەكێ‌ بو هەوالگیریا ئەمریكا هاتیە پێناسەكرن و پەكەكە ژی دلیستا پارت و رێكخراوێن تیرورێ‌ دا یە؟ هەر چەندە بابەتێ‌ یەپەكێ‌ و كانتونێن روژئاڤای و (جەبهە و لنەسرە و داعش) ل سوریێ‌ نە بابەتەكێ‌ نوی نە بو ئەمریكا، لێ‌ رەنگە ئەمریكا بچاڤێ‌ گومانێ‌ ل ڤان شەرڤانان تەماشەكربیت و دان بوێ‌ چەندێ‌ نەدانابیت، كو ببیتە هەلبژاردەییا وان.

ده‌وله‌ت دهێته‌ ستاندن نه‌ك خاست

گۆڕینی قه‌باره‌ی نوسین: Decrease font Enlarge font

پرسا ده‌وله‌تێ‌ و راگه‌هاندنا ده‌وله‌تا كوردی بویه‌ ئێك ژ پرسێن گرنگێن جاددا كوردی ل هه‌رێما كوردستانێ‌، بتایبه‌ت پشتی پێشهاتێن نوی ل سه‌ر گوره‌پانا سیاسی یا عیراقێ‌ په‌یدا بوین. ئازراندنا ڤێ‌ پرسێ‌ ژی بو جارا دوێ‌ یه‌ خه‌لكێ‌ جاددێ‌ بخوه‌ ڤه‌ مژویل دكه‌ت و ل ئێكه‌م جار، ل ده‌ما سه‌روكێ‌ هه‌رێما كوردستانێ‌ ب گه‌شته‌كێ‌ بو چه‌ند روژان چوویه‌ ده‌رڤه‌ی وه‌لاتی و جادده‌ هاته‌ لڤاندن، كو سه‌روك یێ‌ چووی پشته‌ڤانیا وه‌لاتێن زلهێز و جیهانی بو ڤێ‌ پرسێ‌ مسوگه‌ر بكه‌ت و دێ‌ ل نه‌وروزێ‌ ده‌وله‌تا كوردی هێته‌ راگه‌هاندن. جادده‌ و میدییا كوردی و بتایبه‌تی ل ده‌ڤه‌را زه‌ر و ئه‌گه‌ر بێژم ل سنورێن پارێزگه‌ها دهوكێ‌، زێده‌تر ئه‌ڤێ‌ پرسێ‌ به‌رفره‌هی بخوه‌ ڤه‌ گرت و خه‌لكی خوه‌ به‌رهه‌ڤ كرن بو ڤێ‌ راگه‌هاندنێ‌ و د ئێكه‌م هه‌لویست ژی دا، سه‌روكێ‌ هه‌رێمێ‌ دگوتارا خوه‌ دا، كو ل نه‌وروزا سالا 2012ێ‌ پێش كێش كری، چه‌ند راستی ئاشكه‌راكرن كو ئێدی كورد یان دڤێت  ببنه‌ شه‌ریكێن راسته‌قینه‌ یێن عیراقێ‌ یان دێ‌ پرس بو خه‌لكی هێته‌ زڤراندن، كا ئه‌و دعیراقێ‌ دا بمینن یان سه‌ربه‌خوه‌یا خوه‌ رابگه‌هینن. ل جارا دوه‌م ژی، پشتی پێشهاتێن نوی ل سه‌ر گوره‌پانا سیاسی یا عیراقێ‌ په‌یدا بوین و گروپێ‌ بناڤێ‌ ده‌وله‌تا ئیسلامی ل عیراقێ‌ و شامێ‌ (داعش)، مه‌زنترین باژێرێ‌ دوێ‌ ل عیراقێ‌ د چه‌ند ده‌مه‌كێن كورت دا، بێی هیچ به‌رگریه‌كا سوپایێ‌ عیراقێ‌ داگیر كری و خه‌لافه‌تا خوه‌ یا ئیسلامی لێ‌ راگه‌هاندی، كو زه‌مینه‌ سازی بو پێشمه‌رگه‌ی هاته‌ روخساندن و ب به‌رگریه‌كا كێم، پترییا ده‌ڤه‌رێن دكه‌ڤنه‌ بن ماددێ‌ 140 یێ‌ ده‌ستورێ‌ عیراقێ‌، كو ئه‌و ده‌ڤه‌ر جهێ‌ ناكوكیێ بون دناڤبه‌را به‌غدا و هه‌رێما كوردستانێ‌ دا، كو كورد ب ئاخا خوه‌ دزانن و لهیڤییا جێبه‌جێكرنا ڤی مادده‌ی بون كو دوباره‌ ڤه‌گه‌رن ناڤ باوه‌شا هه‌رێما كوردستانێ‌ و پێشمه‌رگه‌ شیا وان ده‌ڤه‌ران ئازاد بكه‌ت. دهه‌لویستێ‌ سه‌ركردایه‌تییا كوردی ژی دا، كو چ دی ئه‌و ده‌ڤه‌ر نه‌ زڤرن بو باوه‌شا عیراقێ‌ و لبن ره‌حما سه‌روك وه‌زیرێن عیراقێ‌، كا دێ‌ ئه‌و مادده‌ هێته‌ جێبه‌جێكرن یان نه‌. لڤی ده‌می جاره‌كا دی پرسا

2014/10/22

سروشتێ‌ جوانێ‌ كوردستانێ‌ و عەقلێ‌ مە یێ‌ گەشت و گوزاری


گەشت و گوزار نە بابەتەكێ‌ كەڤنە ل پارێزگەهەكا دهوكێ‌ بهێتە ئازراندن، لێ‌ باشترین بابەتە ژی ئەگەر مە بڤێت ئەم رویەكێ‌ گەشت و گوزاری بدەینێ‌ و سەرنجا خەلكی بكەڤیتێ‌. گەشت و گوزار بخوە ژی گەنجینەیەكا بەرچاڤە و بتنێ‌ مە عەقلەكێ‌ ئابوری دڤێت، كو ئەم پارەی ژ بەریكا گەشتیاران بینینە دەرێ‌ و ئەو ب دانا وی پارەی یێ‌ كەیف خوش بیت. دەرئینانا پارەی ژی ژبەریكێن كەسەكێ‌ دی یا ب ساناهی نابیت، ئەگەر تو تشتەكی بو پێش كێش نەكەی و خزمەتەكێ‌ بو نە كەی. شوكور دڤی بابەتی دا، سروشتێ‌ دەڤەرا مە بهەمی رەنگەكی یێ‌ هاریكارە كو مە ئەم بشێین سەرنجا خەلكی راكێشین و ژبیرنەكەین ژی، ئەڤ سروشتێ‌ هەنێ‌ ل هەر چار وەرزان دشێت سەرنجا خەلكی بو خوە راكێشیت و بتنێ‌ یا ل سەر مە پێدڤی، ئەم مێزەكێ‌ بكێشینە بەرسینگا خوە و كورسیكەكا زڤروك بكێشینە بن خوە و رێڤەبەریێ‌ بكەین و پاران بهژمێرین. 

2014/10/15

ستراتیجی، وەك پێدڤیەكا مە یا سەردەمانە

عبدالرحمن بامه‌رنى
هەر چەندە گەلەك پێناسە بو ستراتیژیەتێ‌ هاتینە گوتن، لێ‌ ئاسانترین پێناسە ب بەرچاڤێن من كەفتی، دبێژیت: (ستراتیژیەت پلانەكا جێبەجێكرنێ‌ یە بو بدەستڤەئینانا ئامانجەكێ‌ ددەمەكێ‌ دەست نیشانكری دا، ئەنجامێن وێ‌ ژی بو دەمەكێ‌ درێژ یان ناڤنجی یان ژی كورت خایەن دهێنە ڤەخواندن و دارشتن). 
هەر ستراتیژیەتەك چ ئەنجامێن وێ‌ دباش بن یان ژی خراب، پێنگاڤەكا گرنگە بو پرێڤەبرنا هەر پلانەكێ‌ و هەر پلانەكا ستراتیژیەتا وێ‌ ب ئەندازەیانە و شارەزایانە نە هاتبیتە دارشتن ژی و كەسێن بسپور ل سەر كار نە كربیت، ئەنجامێن وێ‌ لدویڤ خواستەكان نابن. ستراتیژیەت بخوە ژی هونەرەكە و دانەرێن وێ‌ ژی پشت بەستنێ‌ ل سەر هندەك داتا و زانیاری و پێشبینییان دكەن و دئەنجام ژی دا، كێمترین دەرفەتێ‌ بو شاشیێ‌ و هنگافتنێ‌ ل پشت خوە دهێلن و هەر ستراتیژیەتەكا سەركەفتی ژی بهێتە دارشتن و بكەڤیتە دقوناغا جێبەجێكرنێ‌ دا، دەستكەفتێن وێ‌ بو چەندین سالان بەردەوامیێ‌ ددەنە خوە و كار پێ‌ دهێتە كرن. ستراتیژیەت ژی بو هەمێ‌ جومگێن ژیانێ‌ دهێنە دانان، چ سیاسی بن یان ژی ئابوری.... هتد. 
ژڤی روانگەی، ئەگەر ژ سەرهلدانێ‌ تا نوكە وەربگرین و ئایا تا چ راددە مە شیایە ستراتیژیەتەكا ئەندازایانە بو هەمی جومگەیێن خوە یێن رێڤەبرنێ‌ و خزمەتگوزاریێ‌ و ئایندێ‌ خوە یێ‌ سیاسی دارێژین؟ رەنگە بەرسڤ وەك مە بڤێت بدەست مە نەكەڤیت! ئەگەر نە چمە سەر هەردوو ئەگەرێن ژ پاشماوێ‌ كەلتورێ‌ بەری سەرهلدانێ‌ بو مە مای و پاشماوێ‌ كەلتورێ‌ عەقلیەتا چیایی یا سەركردایەتییا كوردی دگەل ژیانا باژێریبونێ‌ بكار ئینای. دێ‌ بینین بتنێ‌ ئێك ستراتیژیەت گەلەك كەتیە بەر گوهێن مە، ئەو ژی رێكەفتنەكا ستراتیژی دناڤبەرا هەردوو پارتێن سیاسی یێن باشورێ‌ كوردستانێ‌، پارتی و ئێكەتیێ‌ دا بو و بەرهەمێ‌ وێ‌ ستراتیژیەتێ‌ ژی، شیا تا راددەیەكێ‌ باش شینەوارێن دوو ئیدارەیێ‌ نەهێلیت و دوماهیێ‌ ب شەرێ‌ ناڤخوی بینیت و بەرەیەكێ‌ ئێكگرتی بەرامبەری دوژمنێ‌ خوە دروست بكەن. هەر چەندە نیشانێن دوماهی هاتنا وێ‌ ستراتیژیەتێ‌ ژی یێ‌ پەیدا دبن، بەلێ‌ وەكی دی، ئەم نەشیاینە وەك پێدڤی هیچ ستراتیژیەتەكێ‌ بو پلانێن خوە دابنین و ئەگەر مە لهندەك كاران، پێشرەوی ژی كربیت، ئەو پێشرەوییا هەنێ‌ ژی باوەردكەم یا كورت خایەن و نە یا سەرگرتی بویە!

2014/09/25

داعش بو كوردان هه‌م خێره‌ و هه‌م ژی نه‌هامه‌ت!


2014/07/21

هنارێن سەیدایێ‌ سەعید


عبدالرحمن بامەرنی
Bamerni77@yahoo.com

زاروكینی گەلەك تشتێن خوش و نەخوش بو مروڤی دكەتە بیرهاتن، براستی ژی زاروكینی قوناغەكا خوشا تەمەنێ‌ مروڤی یە، هەمی تشتێن وێ‌ یێن خوش و نەخوش بو مروڤی دگرنگن. چەند جارەكێ‌ ئەز سەرەدانا وی گوندی بكەم یێ‌ ئەز لێ‌ ژ دایك بویم، كولانێن گوندی، جهێ‌ یاریكان، بیرێن گەلەك تشتان دكەم، ئەم چەند بچیكێن ل تەمەنێ‌ من پێكڤە چبوینە شینواركێن گیزا ل عاقارێ‌ بنێ‌ گوندی، خودانێ‌ ئێك ژ بیستانان راهێلا مە و هزركر ئەم یێ بەرا دگیزێن وی وەردكەین، ئەوی زیڤرە بەرەك داوەشاندە مە، هێشتا ڤیزێنا وی ل بەر گوهێن منە بتایبەت هەر گاڤا ئەز گیزا ل جهەكی دبینم یان ئەوێن نوكە ل سەر عەرەبانا دهێنە فروتن! كو تاما وان گەلەك نەخوشە، ڤێجا نزانم چنكو گیزێن (ئوكرانی) نە یان بیرێن وی بەری دهێنە هزرا من، كو خودێ‌ ئەز ژێ‌ خلاس كریم.
هنارێن سەیدایێ‌ سەعید ژی ئێك ژوان بیرهاتنان بون، هەر چەندە بتنێ‌ كەلەكەكا بەرا دناڤبەرا بیستانێ‌ مە و یێ‌ وی دا هەبو، لێ‌ وان هنارەك ل سەر وێ‌ كەلەكێ‌ هەبو، براستی هنارێن وەك وێ‌ دكێم وێنەبون، نە وەك یێن نوكە و ل سەردابا فێقی دهێنە فروتن. تشتێ‌ بیرێن من لهنارێن سەیدایێ‌ سەعید دئینیت ژی گەلەك كەیفا من ب سەیدایەتیا وی دهێت هەكو ماموستا، سەیدایێ‌ سەعید و سەیدایێ‌ حەسەن یێ‌ بیركاریێ‌، جوداهیا وان ژی، وی زێدەتر كچك دقوتان و سەیدایێ‌ حەسەن ژی گەلەك كورك دقوتان، براستی ژی تا نوكە ئەز رەفتارا وان هەردوو سەیدا یا نزانم.

2014/07/15

ئەز دتاریێ‌ دا دشێم ئەز بم..

           
 عبدالرحمن بامەرنی

دناڤ لاپەرەكێ‌ (ئەی فور) دا
ئەز خو تاقی دكەم،
لڤی لایێ‌ پەنجەرێ‌، چاڤەرێی نە هاتنا كەسەكی دكەم.
وەرە گێسكی بدە نڤیسینێن من
توزا سالەكێ‌ پێڤە دیارە.
رستەیەك ژ لاپەری درژیتە سەر من
پرتێن من ل هەر جهەكی بژالە دبن
هەمی تشتێن منێن بژالە یێن د(فایل بوكس)ەكی دا
درستەیەكێ‌ دا هەمی دەرگەهان دقوتم!
خوە ژ ماندیبونا پستویێ‌ من بدەنە پاش
ئەز دتاریێ‌ دا دشێم بتنێ‌ ئەز بم!
كەس بو من چ زەنگا لێنەدەت
ئەز دەرڤەی بازنەمە.
ئەز دتاقیكرنا خوە دا سەر نەكەفتم..

2014/06/25

بو ئەڤ ژنێن دبوارێ‌ ژنان دا دنڤیسن

هەر كەسێ‌ لڤێ‌ دوماهیێ‌ دویڤچوونا روژنامە و كوڤارێن لدهوكێ‌ دەردكەڤن بكەت، دێ‌ بینیت كو ئەو ژنێن دبوارێ‌ ژنان دا دنڤیسن یێن دبنە دوو جوین، جوینەك زێدەتر وان بابەتان دئازرینیت یێن راستەوخو گرێدای كومەلگەهی و مافێن ژنان و بەرێخودانا كومەلگەهی بگشتی ل سەر رەگەزێ‌ مێ‌ و سنورداركرنا وان مافان و ئەڤ قەلەمێن هەنێ‌ ژی، زێدتر گوتارا خوە دگوتارەكا رەخنەی ئەدەبی دا دەردبرن، زێدەتر كو گوتارەك بیت یا راستەوخو ئێك بابەت تێدا بهێتە ئازراندن و دبەرامبەر دا جوینەك دی هەیە، شوینا ببیتە تەمامكەرێ‌ یێن دی و كێشەییا ژنێ‌ ببیتە بابەتەك و بهێتە بەر بەحس و ڤەكولینان، دبیتە بابەتەك زێدەتر بو كێشانا راییا گشتی. دوان بابەتان ژی دا، مروڤ هەست بگڤاشتنێن كومەلگەهی ل سەر وان دكەت و تا وی راددەی، هندەك جاران پەیاما وان جورە ئالوزیەك و هەڤدژیەك تێدا بەرچاڤ دبیت.
جارێ‌ ئەم ژ هەبونا كێشەیێ‌ دەست پێبكەین، ژبەركو هەبونا دوكێلێ‌ گومانا پەیدابونا ئاگرەكی یە، ئایا بابەتێ‌ ژنێ‌ دكومەلگەهێ‌ مە یێ‌ كوردی دا كێشەیە یان نە؟ بو ڤێ‌ پرسێ‌ ئەم دێ‌ پێدڤی داتا و بەلگەیان بین، ئەڤ كەسێن دهێنە كوشتن و سوتن، چەند ژێ‌ زەلامن و چەند ژێ‌ ژنن؟ رێكخراوێن كومەلگەهێ‌ مەدەنی چەند ژێ‌ ل سەر ژنانە و چەند ژێ‌ ل سەر زەلامانە؟ رێژەیا فەرمانبەرا و نڤیسەرا و هونەرمەندا و كەرتێ‌ تایبەت و قوتابی و خویندكارا و وووو زێدەتر ژنن یان زەلامن؟ رێژەیا نە خویندەواریێ‌ زێدەتر دناڤبەرا رەگەزێ‌ مێ‌ دا هەیە یان نێر؟ بهزرا من دەرئێخستنا جوداهیێ‌ بو رێژەیی دگەل ژنان و زەلامان هند جوداهیا خوە هەیە، هەر ناهێتە بەحس كرن یان كو ژن ئەڤرو ل كومەلگەهێ‌ مە كێشەیە، هەبونا كێشەیێ‌ ژی ب زەلامی و رەگەزێ‌ نێر ڤە گرێدایە! ئایا كچێ‌ چەند مافێ‌ خواندنێ‌ هەیە؟ ئەگەر دەیبابان مافێ‌ خواندنێ‌ دا بیتێ‌، تا چ قوناغ دشێت وێ‌ خواندنێ‌ ببەتە سەر؟ ئەگەر خواندنا خوە بدوماهی ئینا، دێ‌ رێگری هەبیت كو كارێ‌ ژ دەرڤە ل دام و دەزگەهەكی یان رێڤەبەریەكێ‌ یان كەرتێ‌ تایبەت كار بكەت؟ ئەگەر خێزانا وێ‌ رێ‌ بدەتێ‌ ژی ئایا هەڤژینێ‌ وی یێ‌ بەرهەڤە و ئەو عەقلیەت لدەف هەیە كو ژن ژی بەشەكێ‌ گرنگە د بدەستڤەئینانا داهاتێ‌ مالێ‌ دا؟ ئەڤە ژبلی كو ژنان كێشەیەكا دی یا گەلەك مەزن یا هەی، خو ئەگەر دەیباب رێ‌ بدەنێ‌ بەردەوامیێ‌ بدەتە خواندنا خوە ژی، ژبەركو كچان تەمەنەكێ‌ گونجای یێ‌ هەی بو شویكرنێ‌ و رەنگە تا 23 و بو 25 سالیێ‌ دەرفەتا وێ‌ یا شویكرنێ‌ زێدە هەبیت و هەر گاڤان ڤێ‌ كچێ‌ دڤی تەمەنی دا شویكر یان كو ژ خواندنێ‌ هاتە ڤە قەتاندن و هەر گاڤا ڤیا بەردەوامیێ‌ بدەتە خواندنا خو ژی یان كو دەرفەتا وێ‌ بو قەیرەبونێ‌ یا هەی و دێ‌ ئاریشەیەكا دی بو وێ‌ و دەیبابێن وێ‌ دروست بیت. 

2014/05/19

عەشقا د قیتارێ‌ دا

لاپتوپ...........
عبدالرحمن بامەرنی
Bamerni77@yahoo.com
 عەشقا قیتارێ‌، نە ناڤێ‌ رونامەكێ‌ یە و نە ژی داهێنانەكا نوی و نە ژی ئێك ژ فلمێن هولیوودە. عەشقا دناڤ قیتارێ‌ دا ڤەگێرانەكە و مەرەما من ژ ڤێ‌ ڤەگێرانێ‌ ژی، بتنێ‌ پاقژییا دلێن گەنجێن مەیە و ئەو كومەلگێ‌ ئەڤ گەنجە دناڤ دا پەروەردە بوی و دیسان كارتێكرنا دنیا بینینێ‌ ل سەر وی و چەند ئەڤ گەنجێن هەنێ‌ شیاینە و دشێن خوە خوە ژ بن گڤاشتنێن كومەلگەهی و رەوشت و تیتالان دەرباز بكەن، كو گەلەك جاران ئەڤ رەفتارێن مروڤی، دبنە ڤەگێرێن پێكەنینێ‌ و مروڤ خوە دئێختە بن ڤێ‌ پرسێ‌ ڤە، تو بێژی ئەز هینگێ‌ یێ‌ گێل نەبم؟!
ئەو جارا دوێ‌ بو ئەم دچین پلێتا قیتارێ‌ دبرین، مەرەما من ئەو جارا دوێ‌ بو ئەز ل قیتارێ‌ سیار دبم. ئەڤێ‌ جارێ‌ ژی ئەم هەشت نەهـ هەڤال بوین، ئەم هەمی دەرچووێن ئێك قوناغ بوین و دا ژ باژێرێ‌ میسل بەرەڤ بەغدا برێكەڤین. دەم شەڤ بو و ئەگەر ئەز یێ‌ شاش نەبم، ل دەهی شەڤێ‌ ژڤانێ‌ برێكەفتنا قیتارێ‌ بو. ئەڤ ڤەگێرانا ئەز ژێ‌ بەحس دكەم، بەری سەرهلدانا سالا 1991 ێ‌ ب سالەكێ‌ بو. دقیتارێ‌ دا هەر دوو كەس ل سەر ئێك كورسی درونشتن، كو هەر كورسیەك دوو نەفەری بو. مە رێزبەندیا خوە گرت و ئەم ئێك و ئێك و دوو و دوو بەر ب برینا پلێتان چوین و لدویڤ ژمارا ل سەر پلێتێ‌، ئەم ل جهێن خوە گەریاین و هەر دوو ژ مە ل سەر ئێك كورسیا دوو نەفەری و ئێك ژ هەڤالێن مە ل سەر كورسیەكێ‌ رونشتە خوارێ‌ و ما لهیڤیا كەسێ‌ دوێ‌ كو لدویڤ ژمارا پلێتێ‌ بهێت. رەنگە مە ئەڤێن دی ب دل پێڤەمان ل وی هەڤالی دنێری، ژبەر كو تا بەرێ‌ سپێدێ‌ و ژ گرگر و مر مرا قیتارێ‌، كو نەدهێلا خەو بكەڤیتە چاڤێن مە، ئەم نەدشیاین چاڤێن خوە دانین سەر ئێك و دەما سپێدەهیان ژی ئەم ژێ‌ پەیا دبوین، ئەم دشر و دڤەقوتایی بوین. 

ئەو ناڤێن دگەل مندا مەزن بوین!

لاپتوپ............
عبدالرحمن بامەرنی
Bamerni77@yahoo.com
هەر كەسەكی ناڤەك پێخوشە پێ‌ بهێتە گازیكرن و ئەو ناڤێ‌ ئەز پێدهێمە ناسكرن و گازیكرن، ئەو ناڤە یێ‌ بابێ‌ من پێخوش و ڤیایی بەشەك ژ ناسكرنا من بو وی ڤەگەریت و رێزگرتن بو وی، من حەزا وی لپێش وی ناڤێ‌ خوازیارێ‌ خوە ئێخست، ئەڤێ‌ هوین نوكە من پێ ناس دكەن.. چیروكێن ناڤی گەلەك هەنە و هەر ئێكی ژی دڤێت تایبەتمەندییا خوە هەبیت، كو بەلێ‌ ئەو یێ‌ هەی.. لپێشیا وێ‌، بابێ‌ من یێ‌ دوێ‌ هەبو و تا بناڤێ‌ وی من خو نە دا با نیاسین و من (ئەحمەدێ‌ مەلای) پێڤە نەكربا، كەسێ‌ ئەز ناس نە دكرم.. چیروكا من بو هەلبژارتنا ناڤێ‌ منێ‌ خوازیار گەلەكن و هەمی ژی ب زاروكینیا من ڤەنە و ئەو ناڤن یێن من ئەڤ زاروكینیە دگەل دا مەزن كری.. دكانا قدوسی خوشترین جهـ بو كو هەر شەڤ من خەون ب (فالكان) ڤە ددیت و شەكروكێن وی یێن سور و زەر.

قەردارێ‌ تە مە سەیدایێ‌ عەدنان

عبدالرحمن بامەرنی 
هەر كەسەكی ژ مە ویستگەهەك هەیە و ژ وێرێ‌ ژیانا وی دەست پێدكەت، چ ئەو ژیانا هەنێ‌ دەستپێكا خواندنێ‌ و چوونا كولیژەكا تایبەت بیت یان ژی ئەنجامدانا پروژەكی یان ژی گوهورینا هزرێن وی بیت و بیروكەیا وێ‌ هزرێ‌ كارتێكرن ل سەر ژیانا وی هەمیێ‌ كربیت. رەنگە ئەو ویستگەهـ ژی خوە دچوارچوڤێ‌ شیرەتەكێ‌ یان سوحبەتەكێ‌ یان ژی دان و ستاندنەكا هەڤالینیێ‌ دا و تا حەژێكرنەكێ‌ دا ببینیت، چ ئەو حەژێكرن ژ ئالیێ‌ كوری ڤە بیت یان كچێ‌ و هەردوو پروسا هەڤژینیێ‌ دگەل ئێك پێك بینن.

(ژاژیێ‌ عەسلی) و عەسلخانە

لاپتوپ...........

عبدالرحمن بامەرنی
Bamerni77@yahoo.com

هەر چەندە ئەم هەمی دفێرین دەما ئەم تشتەكی دكرین، ئەم دبێژینە خودانێ‌ دكانێ‌ كا فلان تشتێ‌ عەسلی بدە من و ئەم دوو سێ‌ جاران ژی بو تەئكید دكەین، كا تە یێ‌ عەسلی دا یە من یان نە!  ئەم ژبیردكەین كو شوینا ئەم بێژینێ‌ فلان تشتێ‌ (عەسلی) بدە من، هەر وەكو ئەم دبێژینێ‌ (وژدانا) خو بدە كاری.
 تشتێ‌ ئەز كێشایمە ڤێ‌ نڤیسینێ‌ ژی، دەما ژنەكێ‌ پسیارا (ژاژیێ‌ عەسلی) ژ خودانێ‌ دكانەكێ‌ كری، كو ب سەدان پسیار دسەرێ‌ من دا دروست كرن، ژبەر كو ڤێ‌ ژنێ‌ نە بتنێ‌ دگوتی بو من ژاژیێ‌ عەسلی، بەلكو خودانێ‌ دكانێ‌ دا سویندێ‌ ژی كو ژاژیێ‌ عەسلی بو بكێشیت. چیروكا ڤێ‌ ژنێ‌ ژی، دەما ئەز ل بەر دەرێ‌ دكانەكا جام كری راوەستیایم، كو چەند جورێن ژاژی دبەرچاڤكری بون. بەری ئەو ژن ژی وەك ل بەر دەرێ‌ ڤێ‌ دكانێ‌ راوەستیت ژی، من دگوتە خودانێ‌ دكانێ‌ كا تە چ جورێن ژاژی هەنە؟ گوت: ژاژیێ‌ پیستی و ژاژیێ‌ ب گەلەك گیا و ژاژیێ‌ پەنیر زێدە و دیسان ژاژیێ‌ ب پەنیر و یێ‌ بێ‌ پەنیر. پسیارا من ژێكری، كا چ جوداهی دناڤبەرا هەمیان دا هەیە، ژلایێ‌ خوشیێ‌ و تامێ‌ ڤە؟ خودانێ‌ دكانێ‌ گوتی: هەر چەندە بهایێ‌ هەر ئێكی ژ یێ دی جوداهیا خوە هەیە، لێ‌ ئەڤە لدویڤ حەزا بكری دمینیت، هندەك بتنێ‌ یێن پیستی دخون و زێدەتر ئەڤە لدەف زەوقا وان دمینیت، ئەگەر نە، ژاژی هەر ژاژی یە.

نە رازیبون یان خو (قانع) كرن

لاپتوپ...........

عبدالرحمن بامەرنی
Bamerni77@yahoo.com
تشتێ‌ ڤێجارێ‌ ئەز لڤێ‌ نڤیسینێ‌ راوەستاندیم، سەفەرەكا من یا هەولێرێ‌ بو، رەخنەكا بێ‌ رامان، دفن بلندی، هەر تشتێ‌ تو ددەرحەقی وی دا بێژی! هەر چەندە خەلكی هەمیێ‌ مافێ‌ هەی یێ‌ نەرازی بیت و نە رازیبون بخوە ژی پروسەیەكا ساخلەم و دیموكراسی یە، لێ‌ نەرازیبونێ‌ ژی ئەتەكێتێن خوە هەنە، هەر وەكو یا بویە دیاردە، دا كو خوە باشتر نیشان بدەی، دێ‌ رابی ب شكاندنا من! شكاندنا من ژی، هەمی ئەو تشتن یێن بمن ڤە گرێدای، ناڤێ‌ من و گوندێ‌ من و ژینگەها من و ئاینێ‌ من و نەتەوا من و باژێرێ‌ من وووووو.
 بەری چەندەكێ‌ بو ئەز ژ هەولێرێ‌ دزڤریمە ڤە، درێكێ‌ دا شوفێری گوتی: ئەگەر دەستیری بیت، دێ‌ ل خارنگەهەكێ‌ برێڤە خارنەكێ‌ خوم، مە ژی كو ئەم سێ‌ نەفەر بوین، مە رازیبونا خوە ل سەر ڤێ‌ چەندێ‌ نیشان دا، ئەوی خارن خار و هەڤالێ‌ وی كو هەردوو ل كوشنێن پشتێ‌ یێن ترومبێلێ‌ درونشتی بون و شنی مە دوێ‌ خارنگەهێ‌ ڤە سەروچاڤێن ئێك دیتن، من گوتێ‌ كەرەمبكە ل سەر ڤێ‌ مێزێ‌ دا پێكڤە ئەم چایەكێ‌ ڤەخوین؟ جامێری هات، ئێكەم سوحبەتا وی دەست برەخنێ‌ كر، ڤیا بو من بڤی رەنگی خو بدەتە ناسكرن كو ئەو ل وەلاتەكێ‌ روژئاڤای ژیانێ‌ دبەتە سەر و یا دوێ‌ ژی بو من (تەجروبا) خوە و دنیا دیتنا خوە یا روژئاڤای نیشا من بدەت. گوت: هەمی تشت دێ‌ هێنە گوهورین، بەس خەلكێ‌ مە چ جارەكێ‌ ناهێتە گوهورین، من ژی گوتێ‌ مەرەما تە چیە؟ گوت: ئەڤ خەلكێ‌ ل ڤان گوندان بو نمونە، خانیێن وان دبێ‌ سەروبەرن و تژی بەر سینگێ‌ مالا وان تشت و مشتن و هیچ جارەكێ‌ فێرنابن تشتێن زێدە ژ بەر دەرێ‌ مالا خوە بهاڤێژن.

2014/05/18

محەمەدێ‌ دختور ژی پیر بو!*


عبدالرحمن بامەرنی

تشتێ‌ من چ جار باوەرنەدكر، پیروبونا محەمەدێ‌ دختور بو! ژبەركو هەر كەسێ‌ نەساخ با، ددانێ‌ وی ئێشابا یان هەستی چاڤكێن وی كەفتبان و خو سەرێ‌ وی ژ كەستبا یان جهەكێ‌ وی بریندارببا، ڤێجا چ ئەو كەسێ‌ هەنێ‌ زاروك با یان ژن یان زەلام و تا پیرەمێر و پیرەژنان ژی قەستا خەستێ‌ دكرن و محەمەدێ‌ دختور بو دەرمان دنڤیسین و ئەو ب وان دەرمانان ساخ دبونە ڤە. تشتێ‌ من هیچ جارەكێ‌ ژی هزر تێدا نەكری، كو محەمەدێ‌ دختور پیر ببیت و ئەو ژی بكەڤیتە بەر نەساخیان تا من وێ‌ روژێ‌ ل هەلكەفتەكێ‌ دیتی كو ژ برێڤەچوونا وی مروڤی دزانی، ئەو دەرمانێن وی بو خەلكی دنڤیسین یان ئەو دەرمان نەماینە یان ژی ژیانێ‌ دەمێن خو هەنە و دڤێت مروڤ تەقەبوللا هەمی قوناغەكا ژیانا خو بكەت.

كی دخوینیت و كی دنڤیسیت


دكوڤارا زين ژماره‌ 12 دا بلاڤ بويه‌
عبدالرحمن بامەرنی
Bamerni77@yahoo.com

هەر چەندە ئەڤ چیروكا دێ‌ نڤیسم، سەرهاتیا خوە یا تایبەت هەیە و كەسێ‌ بو من ڤەگێرای ژی ل سەر رویدانەكێ‌ گوتبو، كو ئەو رویدانا هەنێ‌ بمن و هەڤالەكی و بخواندن و نڤیسینێ‌ ڤە یا گرێدای بو! لێ‌ ئەڤە زێدەتر ژ دوو سالان ل سەر گوهدانا من بو وێ‌ چیروكێ‌ بورین و ئەز هەر جار ڤێ‌ پرسێ‌ ژ خوە دكەم، هین بێژن راست بیت كو ئەو تشتێ‌ ئەم دنڤیسین و بلاڤ دكەین، گوتنا كی (دخوینیت و كی دنڤیسیت) ل سەر بگونجیت و ئەم ل عاقارەكی بین و ئەو ل عاقارەكی.
بەری ئەز بچمە ل سەر وی تشتێ‌ من دڤێت بەحس بكەم، ئەز دێ‌ بنەكوكا چیروكێ‌ نڤیسم، چیروك بخوە ژ دارستانێ‌ دهێتە ڤەگێران و بڤی رەنگی: (ریڤیەك و گورگەك هەبون، ریڤی هەر شەڤ دچوو رییا گوندی و دەما ڤەدگەریا دیكلەك دئینا و دخار. گورگ ژی هەردەم یێ‌ برسی بو و چ بدەست نە دكەفت. روژەكێ‌ گورگی گوتە ریڤی، تو نابێژیە من، تو هەرو ڤان دیكلا ژ كیڤە دئینی؟ ریڤی گوتێ‌: سەیێ‌ گوندی هەڤالێ‌ منە و هەر گاڤا ئەز نزیكی گوندی دبم، ئەو دهێتە بەراهیا من و بو من دیكلەكی دئینیت. گورگی گوتێ‌: كا دێ‌ من ژی بكە هەڤالێ‌ وی سەی، ئەڤە چەند روژە من هیچ تشتەك بەرێڤەی گەورییا خو نەكری. ریڤی كاغەزەك بو نڤیسی و گوتێ‌: هەر گاڤا سە هاتنە تە، ڤێ‌ كاغەزێ‌ بدە دەستێ‌ وان.

ل سەر خاترا كچەكێ‌ دێ‌ ڤێ‌ نڤیسم


لاپتوپ...........

عبدالرحمن بامەرنی
Bamerni77@yahoo.com
گەلەك كەس یێن هەین داخباری هندەك تشتان دبن و پێڤە دهێنە گرێدان، ژوان كەسێن گەلەك سەرنجا من ژی راكێشاین، كچەك دتەمەنێ‌ گەنجاتیا خوە دا، عاشق و داخبارێ‌ دەنگێ‌ هونەرمەندێ‌ وەغەركری (عەبدولواحد زاخویی) بو. ئەڤ كچا هەنێ‌ نە بتنێ‌ داخباری گوهداریكرنا سترانێن وی بو، لێ‌ ئەڤ داخباریا هەنێ‌ گەهشتبو راددێ‌ دینبونێ‌. سێ‌ هەیڤان ژی پشتی مرنا هونەرمەندی، ڤێ‌ كچێ‌ رەنگێ‌ رەش ژبەر خو نەدكر! رەشبینیێ‌ هەمی هزرێن وێ‌ داگیر كربون! من گەلەك جاران كەربێن خوە ژ دەنگێ‌ سترانبێژی ڤەدكرن، لێ‌ ئەو ژ من تورەدبو و دگەهشتە وی راددەی كو پەیوەندیێن خوە دگەل من ب قەتینیت. هەر چەندە من چ پەیوەندی دگەل دا نەبون، بتنێ‌ نیاسینەكا كێم، دیارە وێ‌ ژی دڤیا هندەك ژ كولێن خوە، ژ خەمێن خوە لدەف كەسەكی دارێژیت، كو بەشداری خەمێن وێ‌ ببیت. ئەڤ داخباریا هەنێ‌ نە بتنێ‌ لدەف وێ‌ كچێ‌ پەیدا بوو، ژبەركو بدەهان كورو كچێن باژێری داخبار ببون، نزانم، ژ دەنگێ‌ وی، ژ كەساتیا وی یان ژی ژبەر كو مرنا وی نە تشتەكێ‌ ئاسایی بو، تا ئەو دلوڤانی و حەژێكرن گەهشتیە وی راددەی، ئەڤ داخباربویێن هەنێ‌ هزر بكەن، ئەو سترانبێژێ‌ هەنێ‌ نە مریە و یێ‌ چوویە دخەونا هندەك چاكان دا، كو یێ‌ دگوری دا ساخە.

ژێڤەبە حەقێ‌ تە گەهشت؟!


نڤیسینەكا من یا نوی دكوڤارا زین ژمارە 9 دا، وەك گوشەكا هەیڤانە لبن ناڤێ‌ لاپتوپ دهێتە بلاڤكرن.
عبدالرحمن بامەرنی
Bamerni77@yahoo.com

بیرا من ل سوحبەتەكێ‌ هات، ئێك ژ هەڤالێن من یا راستتر نە برامانا هەڤالی، چنكو ئەو گەلەك ژ من مەزنتر بو، لێ‌ ئەم وەك هەڤالان بوین و گەلەك تشت هەبون ئەم ل سەر سوحبەتا بكەین و مە بەردەوام سەرەدانێن ئێك دكرن و مە پسیارا ئێك دكر بو خوشی و نەخوشیان. روژەكێ‌ ل سەر سوحبەتا تزبیان و گرانیا وان بو من ڤەگێرا، گوت: ل سالێن هەشتیان بو، مە سیارێن بارهەلگر ژ گومكرێن دهوكێ‌ تژی فێقی دكرن و مە بو باژێرێن باشورێ‌ عیراقێ‌ دبرن. ئێك ژڤان گەشتان ژی، مە بارەكێ‌ شتییا بو (باژێرێ‌ دیوانیە) ل باشورێ‌ عیراقێ‌ باركر و پشتی مە شتیێن خوە هەمی فروشتین، مە فراڤین ل ئێك ژ خوارنگەهێن وی باژێری خار و ئەم ل چایخانەكێ‌ بو ڤەخارنا چایەكێ‌ درونشتی بوین. هندەك تزبی ددەستێ‌ من دابون كو ب پارێ‌ هینگێ‌، من 65 دینارێن عەسلی پێدابون و من كربونە ددەستێ‌ خوە دا و دبەر ڤەخارنا چایێ‌ را من چەق چەق ژێ‌ دئینا و خوە پێڤە مژوول دكر.

عەقلیەتا سابینێ‌


لاپتوپ...........

عبدالرحمن بامەرنی
Bamerni77@yahoo.com 


دەما ئەز هزر ل موچێ‌ خوە یێ‌ هەیڤانە دكەم، ئێكسەر ئەز هزرا كەرێ‌ سابینێ‌ دكەم! هەمی تشت دگەل ڤی كەرێ‌ سابینێ‌ هاتنە گوهارتن، ئەڤە نە ئەو گوهورینە یا دگەل من بتنێ‌ پەیدا بوی، بەلكو خەلكێ‌ ڤی باژێری هەمی وەك منن، هەمیان بیرهاتن دگەل كەرێ‌ سابینێ‌ هەبوینە، بتایبەت ئەگەر مووچێ‌ خوە یان داهاتێ‌ خوە یێ‌ سالێن نوتان هەمبەری یێ‌ ئەڤرو و پشتی سالا 2000 ێ‌ بكەن، ئەو داهاتێ‌ ل وی دەمی هەیڤا مە پێ دچوو سەر، ئەڤرو هەمان پارە، جوداهیا سابینێ‌ بتنێ‌ دیار ناكەت، ل وی دەمی كەرەكێ‌ سابینێ‌ بو گەلەك تشتان دهاتە بكارئینان، سەر و ریهـ پێ‌ دهاتنە تراشین، سەر و لەش پێ‌ دهاتنە شویشتن، ئامان پێ‌ دهاتنە شوشتن و ژاراڤ كرن، جل و بەرگ و گورە و جلكێن زاروكا و لحێف و بەتەنی و دووشەك و تا تەوالیت و دەست شو ژی پێ‌ دهاتنە پاقژكرن. 

بیرهاتنە‌كا من


نڤیسینا من د كوڤارا (زین) ژمارە 6 دا كو وەك گوشەكا هەیڤانە لبن ناڤێ‌ (لاپتوب) دهێتە بلاڤكرن
عبدالرحمن بامەرنی

 

Bamerni77@yahoo.com

ئەز ببومە بازرگان، یا راستتر بازرگانەكێ‌ بچویك و هەرو جارەكێ‌ ئەز ب (ئەمانێ‌) و ب (ربعەكێ‌) دچوومە كومەلگەها كورێن گاڤانا. بازرگانیا من ژ دەهـ دیناران دەست پێكریە و دوماهی جار من بایێ‌ 28 دیناران تشتێن قەچاخ دگەل خوە ئینابون. بازرگانیا من ژی دەمژمێرێن ئەلەكترونی بون و جزدانك، هەر چەندە خەلكی گەلەك تشتێن بناڤ قاچاخ ژ وێرێ‌ دكرین و بخو دئینانە مال. ئەڤ قەچاخیا ئەز ژێ‌ بەحس دكەم، یا سالێن هەشتیان بو هێشتا شەرێ‌ عیراقێ‌ و ئیرانێ‌ دگەرمە گەرما خوە دا.
هەر دەما ئەز دچوومە ڤێ‌ بازرگانیێ‌ ژی، ترسا من ژ چ تشتەكی نەبو، بتنێ‌ ژ خالا پكشنینێ‌ (سەیتەرێ‌) بو، یا راستر نە بتنێ‌ هەكو تشتێن قاچاخ ڤمن ئەز دترسام كو بهێمە گرتن، بەلكو دەما ئەز دچووم ژی ئەز دترسام. سەهما سەیتەرێ‌ دسەرێ‌ هەمیان دابو، هەر دەما ئەم نزیك دبوین ژی، وەك بڤێنەكێ‌ دەنگەك ب سەر نەفەران ڤە دچوو و من دزانی كو هەمی یێ‌ (ئایەتان و بسمللا و قولئەعوزو وا و ئایەتولكورسی) بخو ڤە دخوینن، ئەڤ دوعایێن هەنێ‌ ژی زێدەباری نفرینان. 

2014/04/24

پێناسەیا سێرانێ‌ (2)

لاپتوپ...........
عبدالرحمن بامەرنی
Bamerni77@yahoo.com

هەر ئێكی برەنگەكی دەركەتنا سێرانان پێخوشە و هەمی ژی چاڤەرێی روژا ئەینی یان هەر بێهنڤەدانەك هەبیت دا دگەل خێزانا خوە دەركەڤن. لدەف خەلكێ‌ ناڤەراست و باشورێ‌ عیراقێ‌ دەما دهێنە كوردستانێ‌، ژ گەرما هاڤینێ‌ و توزێ‌ دویر دكەڤن و كەش و هەوایەكێ‌ چیایی د ببینن و ب ئازادانە ڤی بایی دهەلكێشن، دەما ئەو دهێن خارنا خوە دگەل خوە دئینن و لبن دارەكێ‌ دروینن و سێرانا خوە ب بێدەنگی دبەنە سەر.
 لدەف گەنجان پێناسەیەكا دی هەیە، بتایبەت ئەڤێن دویر دچن و قەستا وەلاتێن دی دكەن، هەر چنەبیت ئەوان ژی پیچەكا مافی یا هەی، فشارا ل سەر ملێن خوە كێم بكەن، ئەڤە بخو ژی دەركەتنەكا تەندروستە ئەگەر یا مفادار بیت و بو گەشتیاری و جهێن گەشت و گوزاری بیت.

چایخانا رەوشەنبیری (1)

لاپتوپ...........
عبدالرحمن بامەرنی
Bamerni77@yahoo.com

 هێشتا مە خو ژ چلێ‌ زڤستانێ‌ خلاس نەكری، دێ‌ ترسا چلێ‌ هاڤینێ‌ كەڤیتە بەر سینگا مە! د وەرزێ‌ زڤستانێ‌ دا ب تنێیاتی زێدەترە و شاعر و نڤیسەر ژی زێدەتر حەز ژ بێدەنگیێ‌ و وەرزێ‌ وەریانا بەلگا و شەڤێن درێژ دكەن، هەر چەندە شەڤێن زڤستانان بو عاشقان نا برسقن و نەشێن تەماشای ستێران بكەن، بەلێ‌ حەز دكەن دڤێ‌ بێدەنگیێ‌ دا دگەل تنێیاتیا خوە بمینن! ئەز ژی وەك وان حەز ژ تنێیاتیێ‌ دكەم، بەس ئەز نە عاشقم و نە ئەز عەشقێ‌ دكەم ژی، ژبەركو ئەز هەست دكەم من تەمەنێ‌ عەشقێ‌ یێ‌ ل پشت خوە هێلای.
بەری چەند روژان بو دەما من قەستا بازارێ‌ دهوكێ‌ كری و ئەو چەند جاركی بو من دەورا خوە ژ فلكا دەرمانخانا سەعد و بو بن سینەمێ‌ و د بەر كولانكا سەردابێ‌ را سەردكەتم و بو چایخانا نەجارا و سیكا سەرافا یا كەڤن و دا جارەكا زڤرمە جهێ‌ خوە ڤە، نزانم جارا چەندێ‌ بو و ژ مروڤان ئەز نە دشیام پرێڤە بچم و هەر من هەست ب تنێیاتیێ‌ دكر، هەر چەندە هەمی تشت دكەڤتنە پێش چاڤێن من و رەنگێن مروڤان تەماشای من دكرن، چاڤێن من هەمی تشت دڤیان و هەمی تشت بو من دگرنگ بون ئەز بكرم و خو من بازارێ‌ تشتەكی ژی نە دكر! وان هەمی مروڤێن د بەر من را دبورین یان ل پشت من دهاتن یان ل بەری من دچوون، حەز دكرن من ژ ڤێ‌ تنێیاتیێ‌ دەربێخن و هەر كەسێ‌ من هەست پێدكر یێ‌ پێن خوە سست دكەت خو پسیارەك ژی ژ من هەبا، دا پێنگاڤێن خو ڤر هاڤێژم و خو ژێ‌ دویر ئێخم.

2014/04/02

كورته‌ چيروك سیسرك


گرگرا عەوران ئەزمانێ‌ وی بەرەڤ خریانەكا بچویك ڤەدبر! بەری ل سەر وان كوفریا وەك هەر جار بهێتە پاشڤەبرن، هەر زوی شیا وێ‌ سەرداچوونێ‌ د گەوریا خوە دا داعویریت. 

ـ ژبیرنەكەی ئەڤ شەڤە بتنێ‌ ئەز دشێم دەركەڤم؟ خو گیرونەكەی؟ چ جلك بكەمێ‌؟ مكیاجی بدانم یان نە؟. ئەڤ پسیارێن هەنێ‌ فلاش باكن و هەمی ئەو دەنگ بێدەنگ كرن، دەما خوە هاڤێتیە بەرێڤەی دەروكێ‌ حەوشێ‌ و ڤێجارێ‌ ژی بەری بدروستاهی ژ مال دەركەڤیت، كتەكا نەعالێ‌ شپێن ژ پاتكا وی ئینا. 
هەر چەندە بارانەكا هویرك دباری، لێ‌ نەعیمێن عەسمانی تشتەكێ‌ دی دگوتن، عەوران هندی ملێن خوە دبەر ئێكرابربون، باژێر هەمی گڤاشتبو سەر ئێك و هەر كەسێ‌ لڤی دیمەنی سەحكربایە، دا بێژیت، ئەڤ شەڤە توفانا نوحی دێ‌ لڤی باژێری دوبارە بیت. 
جگارە ژ پاكیتێ‌ دەرئێخست و كرە دناڤ هەردوو لێڤێن خوە را و ما لهیڤیا دەستێ‌ خوە یێ‌ دی، كا دێ‌ دكیش بەریكێ‌ دا چیتە سەر چەقماقێ‌. بەری ئەو پەنجەرێن دكەڤنە هنداڤ جاددێ‌ بهژمێریت كا چەندا ژێ‌ روناهیێن وان دهلن، بیر ل كەر بلوكێ‌ خودانێ‌ كیسكی دكر، كو چەند جارەكێ‌ ڤیابا چاڤ چەرینەكێ‌ ل بەشێ‌ ناڤخویێ‌ كچان بكەت، دوكێلا جگارا وی حەزێن نڤیسینا چیروكەكێ‌ لدەف وی خورتتر لێدكرن. 
خوزیێن سیسركا، ئەو شەرم ژ كەسێ‌ ناكەن و تا سەرشو ژی بو وان یا دەستویر دایە. خوزی چاڤێن وان یێن من بان، دا ژوور ژوور قەست كەمێ‌. نوكە ئەو چ دكەن؟ چ جلكێن شەڤێ‌ ل بەرن؟ ئەتەكێن وان ب لەشێ‌ وان ڤە نیسەك بوینە. كچێن سنێلە و گەنج حەزدكەن تەماشای بەژن و بالا خوە بكەن. چاڤێن وان دچنە مێیاتیا وان، بتایبەت ئەگەر د سەرشوێ‌ ڤە بن و چپكێن ئاڤێ‌ ژ داڤێن پرچا وان دكەڤنە سەر مەمكێن وان و گرێل دبن، ژ سەرێ‌ بشكوژێن وان ڤەدپەشن و دبژكنەڤە یان دەما ل بەر قودیكێ‌ دەستێن خوە دپرچا خوە دا دئینە خارێ‌ و لێڤێن خوە دگەزینن. دتەمەنێ‌ وان دا كەنی گەلەك جان ژ دەڤێ‌ وان دەردكەڤیت. ئەو چاوان شانازیێ‌ ب مێیاتیا خوە دبەن؟ پرێڤەچوونا وان یا وەكو مەشا وەردەكان، چاوان ب بن چاڤكی لدوور خوە سەح دكەن كا چاڤێن چەند كوران ددویفرا دخشیێن، ئەو چاڤێن هەنێ‌ چەند ژێ‌ گەنجن، كورن، مەزنن پیرەمێرن ب ژن و نەڤینە. قارەمانیێن خو، ئەو بو كوران چ دبێژن؟ ئەوان ئێك بتنێ‌ پێ‌ بەسە یان حەزدكەن دەستهەلاتا خوە ل سەر نفشێ‌ نێر بهێلن و ب سحرا مێیاتیا خوە شاعر و شێت و بەهرەمەندان تژی كولانێن باژێری بكەن؟ باشە تو بێژی هەر ژوورەكێ‌ چەند كچ تێڤە بن؟ نوكە چەند دخوینن و چەند ژێ‌ یارییا ب ئێك و دوو دكەن و لێڤێن ئێك و دوو سوراڤ و سپیاڤ دكەن، نوكە چەند دسەرشوێ‌ ڤە نە و چەند سەرێ‌ خوە حلی و ڤەحلی دكەن؟ ئەو چاوان دكەڤنە سەر جهـ و بالیفكێن خو. بتنێ‌ دنڤن یان جوت جوتە و دەستێ‌ خوە دبن سەرێ‌ ئێك و دوورا دبەن و سینگێ‌ خو ب ئێك ڤە دگڤێشن؟

2014/03/18

فیتكا دوماهیێ‌...

عبدالرحمن بامەرنی

بو شكاندنا بێدەنگیا تە
ئەز دێ‌ ڤێ‌ یاریێ‌ بدوماهی ئینم و
سەفەرێ‌ كەم!
من نەڤێت یاریەكا تژی خەم بیت و
سەفەرا من جلێن بێدەنگیا تە لبەر بن..
سەفەرا من ل ویستگەهەكا تژی مروڤ دەست پێدكەت
فارگون دتژی نە و حەشامەتن
رێ‌ جودایە و تابلو دجودانە و
كەنی و گری و بشكورین و هەوایێ‌ ئەم دهەلكێشین ژی جودایە..
هەمی تشت دناڤ حەشامەتێ‌ را بەرزەیە و
چاڤەرێی هاتنا كەسەكێ‌ ژی ناكەم!
جگارا خو، وەك من دڤێت هل دكەم و
پێكێ‌ خوە یێ‌ شەرابێ‌ وەك من دڤێت فر دكەم
دوماهی فیتكا تەمەنێ‌ یاریێ‌ یە
هەمی تشتێن من یێن منن و
هەمی تشتێن خو ژی دگەل خوە ببە..
دفارگونێن ڤێ‌ شەمەندەفرێ‌ دا
خەریبیێن تە ناكەم

كاریكاتۆرێن روژنامەڤانی

عبدالرحمن بامەرنی
ـ رویدان ـ
فوتوگرافەك
دەست ژ كارێ‌ خوە رادكەت.
فوتوگراف نیگەرانە
كامیرە وەك وی بڤێت
نەشێت وێنێن سەروچاڤان
بهلینیت..

ـ چیروك ـ
روژنامەنڤیسەكی
سوتنا كچەكێ‌ كرە دویڤچوون.
هێشتا چیروكێ‌ دەست پێنەكری
گەفێن سوتنەكا دی بوچوون..