بحث هذه المدونة الإلكترونية

pertook

pertook

2014/10/22

سروشتێ‌ جوانێ‌ كوردستانێ‌ و عەقلێ‌ مە یێ‌ گەشت و گوزاری


گەشت و گوزار نە بابەتەكێ‌ كەڤنە ل پارێزگەهەكا دهوكێ‌ بهێتە ئازراندن، لێ‌ باشترین بابەتە ژی ئەگەر مە بڤێت ئەم رویەكێ‌ گەشت و گوزاری بدەینێ‌ و سەرنجا خەلكی بكەڤیتێ‌. گەشت و گوزار بخوە ژی گەنجینەیەكا بەرچاڤە و بتنێ‌ مە عەقلەكێ‌ ئابوری دڤێت، كو ئەم پارەی ژ بەریكا گەشتیاران بینینە دەرێ‌ و ئەو ب دانا وی پارەی یێ‌ كەیف خوش بیت. دەرئینانا پارەی ژی ژبەریكێن كەسەكێ‌ دی یا ب ساناهی نابیت، ئەگەر تو تشتەكی بو پێش كێش نەكەی و خزمەتەكێ‌ بو نە كەی. شوكور دڤی بابەتی دا، سروشتێ‌ دەڤەرا مە بهەمی رەنگەكی یێ‌ هاریكارە كو مە ئەم بشێین سەرنجا خەلكی راكێشین و ژبیرنەكەین ژی، ئەڤ سروشتێ‌ هەنێ‌ ل هەر چار وەرزان دشێت سەرنجا خەلكی بو خوە راكێشیت و بتنێ‌ یا ل سەر مە پێدڤی، ئەم مێزەكێ‌ بكێشینە بەرسینگا خوە و كورسیكەكا زڤروك بكێشینە بن خوە و رێڤەبەریێ‌ بكەین و پاران بهژمێرین. 
رەنگە ئەم پسیارەكێ‌ بكەین، ئایا گەشتیاری چ ژ مە دڤێت كو ئەو پارەی ب بەر مە وەربكەت؟ گەشتیار دەما هەیڤێ‌ جارەكێ‌ یان هەر هلكەفتێ‌ هزرا گەشتەكێ‌ بو جهەكێ‌ گوزاری دكەت، ئەو دێ‌ بەرهەڤیێن خوە كەت، هەر ژ ترومبێلێ‌ و جهێ‌ نڤستنێ‌ و خارنێ‌ و دیمەنێن جوان و وی دڤێت لڤان هەمییان ژی كەسەك هەبیت خزمەتا وی بكەت یان كو، دەما ئەو ل سالێ‌ حەفت روژان ددانیت كو گەشتێ‌ تێدا بكەت، ئەو حەز دكەت دوان حەفت روژان دا ئەو بێهنا خوە ڤەدەت و هەمی تشت ل بەر سینگا وی بن و كەسەك هەبیت خزمەتا وی بكەت و كەشەكێ‌ خوەش بو پەیدا بكەت، دبەرامبەر دا ئەو دێ‌ پارەی مەزێخیت. ژبەركو وی هزرا خوشیێ‌ دوان حەفت روژان دا كریە و دڤێت ئەو حەفت روژ بو وی ببنە بیرهاتن، خێزانا وی و زاروكێن وی بەحسێ‌ ڤێ‌ گەشتێ‌ بكەن، دیمەنێن جوان ببینن، كەلتورەكێ‌ دی و رەوشەنبیریەكا دی و هونەرێ‌ دەڤەرەكا دی ببینن.
گەشتیاری چ خزمەت ژ مە دڤێت؟ رەنگە هەر كەسەك ژ مە د كوژیەكی را تەماشای ڤێ‌ پسیارێ‌ بكەت، ددوو نمونان دا، پشتی خوپیشاندانێن سەرسنكێ‌ بو سەر جهێن گەشت و گوزاری ل وێ‌ دەڤەرێ‌، ئەڤ ئاخفتنە هاتنە بەحس كرن، ئێك: مە شەرم دكر ئەم بێژینە شوفێران دێ‌ چینە سەرسنكێ‌، مە شەرم دكر ئەم بێژنە خەلكی مالا مە یا ل سەرسنكێ‌، ژبەركو جهێن لەشفروشی لێ‌ هەبون. دوو: تە راستی بڤێت سەرسنكێ‌ نە جهێ‌ ژیارێ‌ یە و چ كار نینن مروڤ تێدا بكەت. باشە ئەگەر بچاڤەكێ‌ دی تەماشای گەشت و گوزاریێ‌ بكەین و هەر سەرسنكێ‌ بخوە بكەینە نمونە، ئەگەر كەرتێ‌ گەشت و گوزاری ل وێرێ‌ یێ‌ خورت بیت، چەند كەس دێ‌ پێ‌ بخودان كەڤن، ژبلی هەبونا هوتێل و موتێلان و خارنگەهێن مەزن، بتنێ‌ دێ‌ ژ تەخا ئەڤێن بێ‌ كار بێژم، ئەگەر چایەكا ل سەر پەلان بهێتە بەرهەڤكرن، ئەگەر توڤك و جەرەسات بهێنە فروتن، ئەگەر سەلك و كارێن دەستی یێن كوردەواری بهێنە پیشاندان و فروتن، دێ‌ چەند ژ خەلكێ‌ وان دەڤەران قازانجێ‌ كەن و دێ‌ چەند كەسێن دی بكار كەڤن، ژبلی كرێكاران و ئەڤێن ل بەر وان خارنگەهـ و چایخانەیان كار دكەن. باش لبیرا منە، ل بەری سەرهلدانێ‌ و بتنێ‌ ل سەرسنكێ‌ و ل ئێك ژ خانیێن نیاس، خودانێ‌ خانی پێنج ژوور هەبون و سێ‌ ژوور بو گەشتیاران ڤالا كربون و پارەكێ‌ باش بو بدەست دكەفت.
پێشنیارا من بو رێڤەبەرییا گەشت و گوزاری و كارگێرییا پارێزگەها دهوكێ‌ ئەوە، هەر دەڤەرەكا گەشت و گوزاری بیت، كو ئەو دەڤەرێن هەنێ‌ ب هژمارا تلێن دەستانە، بهێنە پێش خستن و كار تێدا بهێتە كرن، هەر كەسێ‌ بەرهنگارییا ڤێ‌ بریارێ‌ بكەت ژی، بلا ژوێ‌ دەڤەرێ‌ بار بكەت یان خانیێ‌ خوە بو كرێ‌ بدەت، هەر چەندە دێ‌ موزایەداتێن سیاسی و ئاینی بو ڤێ‌ پێشنیارێ‌ هەبن ژی، بەلێ‌ یا من بتنێ‌ گوتنە. 

تێبینی: دروژاناما وار ژمارە 1196 دا هاتیە بلاڤكرن
إرسال تعليق