بحث هذه المدونة الإلكترونية

pertook

pertook

2014/10/27

توركیا گێمەكێ‌ دژی یێ‌ یاریێ‌ خوسارەت بوو!

عبدالرحمن بامەرنی
هاریكاریێن ئەمریكا و هەڤپەیمانێن وێ‌ بو پێشمەرگەی ژ بو رویبریبونا وان دگەل تیرورستێن داعش، هاریكاریەكە بو سنورداركرنا پێشڤەچوونا داعشێ‌ لڤێ‌ دەڤەرێ‌ و دەرئەنجامێ‌ وێ‌ ژی، دا كو ئەڤ گروپە نەبیتە گەفەكا راستەوخو ل سەر ئارامیا جیهانێ‌. ئەگەر ل بەروكێن شەری ژی تەماشا بكەین، پێشمەرگەی ل باشورێ‌ كوردستانێ‌ و شەرڤانێن یەپەكێ‌ ل روژئاڤایێ‌ كوردستانێ‌، شیاینە باوەرییا ئەمریكا و هەڤپەیمانێن وێ‌ بو خوە مسوگەر بكەن، كو ئەو دشێن بەرسینگا ڤی گروپی بگرن. ژبەر هندێ‌ ژی، ئەمریكا هەر زوی د هەوارا پێشمەرگەی هات و دگەل هەڤپەیمانێن خوە، دەست ب پرچەككرنا پێشمەرگەی كر. لێ‌ گرفت د شەرڤانێن یەپەكێ‌ دا بو و ئەگەر هاتنە پرچەك كرن، ئایا دێ‌ بنە گەفەك ل سەر دەڤەرێ‌ و دەوروبەرێن خوە؟ كو یەپەكە ب بەشەكێ‌ یان تایەكێ‌ پەكەكێ‌ بو هەوالگیریا ئەمریكا هاتیە پێناسەكرن و پەكەكە ژی دلیستا پارت و رێكخراوێن تیرورێ‌ دا یە؟ هەر چەندە بابەتێ‌ یەپەكێ‌ و كانتونێن روژئاڤای و (جەبهە و لنەسرە و داعش) ل سوریێ‌ نە بابەتەكێ‌ نوی نە بو ئەمریكا، لێ‌ رەنگە ئەمریكا بچاڤێ‌ گومانێ‌ ل ڤان شەرڤانان تەماشەكربیت و دان بوێ‌ چەندێ‌ نەدانابیت، كو ببیتە هەلبژاردەییا وان.
بوچی ئەمریكا نەدڤیا پشتەڤانیا یەپەكێ‌ بكەت: 
1. رژێما ئەسەدی: یەپەكە تا راددەیەكی بوێ‌ چەندێ‌ دهاتە تومەتباركرن، كو هەڤكارێ‌ ڤەشارتیێ‌ رژێما سوریێ‌ بویە و ئەمریكا ژ مێژە هەولدانان دكەت، وێ‌ رژێمێ‌ بگوهوریت.
2. توركیا: مەترسیا مەزن یا وەلاتێ‌ توركیا، پەیدابونا كانتونێن كوردی یە ل وی وەلاتی و توركیا دزانیت پەیوەندیێن یەپەكێ‌ و پەكەكێ‌ گەلەك نزیكی ئێكن و تا وی راددەی ئەو وەلاتە یەپەكێ‌ ب چەقەكێ‌ پەكەكێ‌ دزانیت و ئەگەر ئەمریكا و هەڤپەیمانێن وێ‌ د هەوارا وان چوون، ئەڤە جورە دان پێدانەكە ب كانتونێن وێ‌ و دترسیت كو ببنە هێلیڤانێن پەكەكێ‌ و ئەڤ چەندە ژی بو توركیا هێلا سورە و یەپەكە ب تەمامكەرێ‌ پەكەكێ‌ ددا ناسكرن، كو پەكەكە دلیستا رێكخراوێن تیرور دانە و ژلایەكێ‌ دیڤە ئەگەر ئەمریكا پشتەڤانیا یەپەكێ‌ ل وێ‌ پارچەیێ‌ كر و ئەگەر دەستهەلات ل سوریایێ‌ هاتە گوهورین و كورد بو نە خودانێن هەرێما خوە، هینگێ‌ كوردێن باكور ژی دێ‌ لیستا داخوازیێن خوە زێدە كەن.
3. هەرێما كوردستانێ‌: دان پێنەدانا هەرێما كوردستانێ‌ كانتونێن روژئاڤای، ئەگەرەكێ‌ دی بون كو ئەمریكا و هەڤپەیمانێن وێ‌ بگومان ل یەپەكێ‌ و شەرڤانێن وێ‌ سەح بكەت. 
4. خواندنا ئەمریكا: ئەگەر ئەمریكا پشتەڤانیا پێشمەرگەی كربیت و یا یەپەكێ‌ نەكربیت، ژ بەركو ل هەرێما كوردستانێ‌ حكومەت و پەرلەمانەكێ‌ هەلبژارتی هەیە و دشەرێ‌ ئازادییا عیراقێ‌ دا، پێشمەرگەی رولەكێ‌ ئەرێنی گێرابو و ئەمریكا هەرێما كوردستانێ‌، ب ئێك ژ هەڤپەیمانێن خوە یێن گرنگ لدەڤەرێ‌ دزانیت و سەبارەت یەپەكێ‌ ژی، گومانا لدەف هاتبو دروستكرن كو بەشەكە یان چەقەكە ژ پەكەكێ‌.

بوچی ئەمریكا هەڤكاریا خوە بو یەپەكێ‌ دیار كر:
1. خوراگریا شەرڤانێن یەپەكێ‌: هێرشا تیرورستێن داعش دڤان حەفتیێن بوری دا، بهەمی هێزا خوە ڤە بو سەرداگرتنا كوبانێ‌ و بوی چەكێ‌ خوە یێ‌ گران ڤە و دبەرامبەر دا، خوراگری و بەرخودانا شەرڤانێن پەكەكێ‌ بو ئەمریكا دیار بو، كو ل وەلاتێ‌ سوریا تاكە هێز یا بشێت بەرسینگا گروپێ‌ داعشێ‌ بگریت، یەپەكە یە و بو ڤێ‌ ژی بزاڤێن خوە ئێخستنە كاری كو هاریكاریێ‌ بو پێش كێش بكەت و سەرانێن ئەمریكا و چەند وەلاتێن دی دیاركرن، كو كەتنا كوبانێ‌ بو ناڤ دەستێن داعشێ‌ هێلا سورە.
2. بەرەڤانیكرن ژ ئاخێ‌: بو ئەمریكا دیار بو، كو شەرڤانێن یەپەكێ‌ نە رێكخراوەكا تیروری نە و شەری دژی تیرورێ‌ دكەن و ئەڤ بەرخودانا ئەو دكەن، بەرخودانەكە ژ بو رزگاركرنا ئاخێ‌ و پاراستنا گیانێ‌ هاولاتیان و ئەڤە ژی ئامانجەكا پیروزە و ئەڤە نە ئامانجا چ رێكخراوێن تیروری یە.
3. خوپیشاندان: خوپیشاندانێن ل توركیا ژلایێ‌ هاولاتیێن كورد ڤە و ل چەندین وەلاتێن جیهانی، كو داخوازكرین ئەمریكا و هەڤپەیمانێن وێ‌ پشتەڤانیا خوە بو كوبانێ‌ و كوردێن وێ‌ پارچێ‌ وەك پێشمەرگەی دیاركەت، پشت راستكرنەك بو جڤاكێ‌ نیڤ دەولەتی دروست بو، كو یەپەكە نە مەترسیە ل سەر ئاسایشا جیهانی.
4. پشتەڤانیا هەرێمێ‌: خالا گرنگ پشتەڤانیا سەركردایەتیا هەرێما كوردستانێ‌ بویە ژبو بەرخودانا شەرڤانێن كوبانێ‌ ل وەلاتێ‌ سوریا و ئەڤێ‌ ژی تا راددەیەكی رێخوشكرن بو ئەمریكا و هەڤپەیمانێن وێ‌ پەیدا كر، كو دڤێت هاریكاری بو یەپەكێ‌ هەبیت بو بەرسینگرتنا گروپێ‌ داعش و یەپەكە دێ‌ شێت باوەریا جڤاكێ‌ نیڤ دەولەتی بدەست خوە ڤە ئینیت.

بوچی توركیا یاری دوراند:
1. ئەمریكا و هەڤپەیمانێن وێ‌، یەپەكە ب تیرور ل قەلەم نەدان و ئامادەیا خوە بو پشتەڤانیكرنا وێ‌ دیاركرن و توركیا ژی نەچاركرن، كو دەریێن خوە یێن سنوری بو گەهاندنا هاریكاریان بو كوبانێ‌ و یەپەكێ‌ ڤەكەن.
2. خوپیشاندانێن پشتەڤانیكرنا كوردان چ ل توركیا یان هەر وەلاتەكێ‌ جیهانی بو جیهانێ‌ هەمیێ‌ دیاركرن، كو دوزا كوردی دوزەكا رەوایە و ئاخ و زمان و نەتەوە وان پێكڤە گرێددەت و جڤاكێ‌ نیڤ دەولەتی ژی، دێ‌ خواندنێن خوە یێن جوداتر بو ئایندەیێ‌ كوردان ل باكور و روژئاڤایێ‌ كوردستانێ‌ هەبن.
3. یەپەكێ‌ و پەكەكێ‌ خوە نیشاندان كو نە پارتێن تیروری نە و بەلكو دژی تیرورێ‌ نە.
4. گەفێن گروپێ‌ تیرورستی یێ‌ داعش، پەیوەندیێن ئیرانێ‌ و ئەمریكا برنە دقوناغەكا دی دا و ئەڤە ژی بو ئالیسەنگیا دەڤەرێ‌ و بتایبەتی توركیا نە باشە، كو ئیران دەستێوەردانەكا راستەوخو دعیراقێ‌ دا دكەت.
5. توركیا نەشیا دەنگێن پێدڤی یێن ئەندامێن ئەنجومەنێ‌ ئاساییشا نیڤ دەولەتی بدەست ڤە بینیت، كو دوی ئەنجومەنی دا ببیتە ئەندام و ژ 193 دەنگان بتنێ‌ 60 دەنگ بو خوە مسوگەركرن و ئەڤە ژی رەنگە بو هەبونا هندەك بەلگەیێن گوماناوی بیت كو ڤی وەلاتی دەست دگەل گروپێ‌ داعشێ‌ دا هەبیت.

دروژناما وار ژمارە 1199 دا هاتیە بلاڤكرن
إرسال تعليق