بحث هذه المدونة الإلكترونية

pertook

pertook

2010/12/23

دوماهى بو پیاسێن نه‌ ژ دل

ئادار 2005 

بو عه‌وران شعر هاتینه‌ نڤیسین 
ژ گرگرا عه‌وران خه‌لك فێرى عشقێ بویه‌
ل بیرێن من 
هه‌ر سال خه‌ون ب نڤێژێن بارانێ ڤه‌ دهێته‌ دیتن
خه‌لكێ ب ده‌ستێن شێخان ڤه‌ ماچى دكرن!
ل گوندێ مه‌
كونزڤیركا شێخان هه‌بو
خه‌ونێن وان ل گوندێن دویرێن دویر ژى
بارێن داران دجه‌ماندن
شێخ و 
شلێخ بون
شێخ چوون و خه‌ونێن وان دگه‌ل بایى چوون
شلێخ هاتن و یێن وه‌ك شێخ زانایى
بو تبه‌ركى و به‌رده‌ڤێ شیرى
چار ئایه‌ت بخوڤه‌ دخاندن
چارێن دن ژى ددویڤ خوه‌ را دبه‌زاندن
 بو بێده‌نگیێ و ته‌مبه‌لیا هزركرنێ
بو پێترانكیا دومدرێژ 
ئه‌ز ڤه‌دگه‌ریام
ئه‌ز دخشیام و من خوه‌ دگرت
ژ ناخێ خوه‌ و 
ژ ناخێ ته‌
ژ ناخێ ئه‌وێ ب نڤشتوكا ئه‌م دنڤاندین
زاروكینیا مه‌ پێ نڤاندى و 
ئه‌م ژێ هیبوینه‌ ماچا 
ئه‌مێ ژ ماچا حه‌مه‌ر و هزره‌تا مه‌ ماچ
ماچ
من دناڤ كه‌لهه‌كا بلندا ئاسێ دا خه‌یال دكرن
ئه‌فسانه‌ یه‌..!
گوتن دڤێت دوعا لێبورینێ ژ چیا بكه‌ى
ئه‌ى دوعا 
ده‌نگێ من بلند بكه‌
بلند تر ژ عه‌وران
بلند تر ژ ستێران
من هه‌ناسه‌یه‌كا درێژ دڤێت
خه‌ونێن من دڤێن
ل دویرى پێترانكیێ بچه‌رن
گه‌ر قه‌ده‌ر بو چه‌ند سالى رابردوو
یارمه‌تیم بدا
من شیعرێكم نه‌ نوسیوه‌ و 
ئێستا له‌ بیرم دێ
شیعرێكه‌ بونى زیكرى زاكیرانى لێ ده‌فرێ و 
بونێكى ناموى داپوشیوه‌ و 
خه‌ریكم ئه‌و شیعره‌ بو مردن نه‌مێنێ و
به‌ نوسینێكى قه‌ده‌ر هێمنى وشه‌كانت بدوزمه‌وه‌  
ئه‌و شیعره‌ له‌ گه‌ل شه‌وه‌ شه‌رابێك 
له‌ ناو پێكه‌كانى عیشق دا زیندوبكه‌م
من حه‌زم له‌ وشه‌كانت هه‌یه‌ و 
سه‌به‌تێكى پرى عه‌شقن
وه‌ره‌ بو سه‌فه‌رى عشقى خه‌یال
شه‌وێكى شه‌راب دروست بكه‌ین
شه‌وه‌ شه‌رابێك بو میوانكردنى 
ژماره‌یه‌كى زور له‌ وشه‌كانى ره‌نگا و ره‌نگ
شیعره‌كانى من
ئه‌یانه‌وێ له‌ وشه‌كانى رابردوو
له‌ هه‌موو سایته‌كانى جیهان ده‌رئه‌كه‌ون و
خویان ته‌لاق بده‌ن
شه‌وێكى خوش و به‌ مانایى شه‌وى شه‌راب
به‌ گوناهى عیشق هه‌موو شتیان 
قوربانى پیاسه‌ى نا وه‌ختى شه‌قامه‌ درێژه‌كان بكه‌ن..
پیاسه‌ درێژه‌كان
ئه‌ى جوانترین نهێنى له‌ ناو پیاسه‌كان دا
ئه‌ى جوانترین توره‌بون
وه‌ته‌ن ئه‌ى وه‌ته‌ن
ئاى نیشتیمان 
چه‌ند جوانه‌ نیشتیمان له‌ ناو نهێنیه‌كانى پیاسه‌ دا 
من هه‌ر بو ته‌ حه‌ژ پیاسێن ره‌نگا و ره‌نگ دكر
من حه‌ژ پیاسێن به‌ر دریایى دكرن
په‌یڤ دكرنه‌ وێنه‌ و 
وێنه‌ دكرنه‌ په‌نجه‌ره‌یێن شیعرى
شیعر بو ماچه‌كا جوانا نه‌ بشكفتى و
سینگه‌كێ بیر ل حه‌مه‌ربونێ دكه‌ت
من هه‌ر بیر ل سترانه‌كا هاڤى یه‌
چیروكا كچه‌كا ژ كچینیا خوه‌ زیز بوى
قه‌ده‌رێ بو ده‌ست نه‌داى
هیزارا بویكینێ بو بكه‌ته‌ دیارى
ژ بونا چیروكێن ئه‌نفالا 
ژ بونا ئیمزایێن بوینه‌ قوربانى چیروكان 
ژ بونا عشقه‌كا دناڤ جاده‌كا درێژا پیس دا
ركمانه‌ دگه‌ل كه‌ناسى كرى و 
ب فیتكا پولیسه‌كێ هاتن و چوونێ
ئه‌و جادده‌ ژ بێده‌نگیێ ڤه‌جنقاندى
ببورن بو هه‌ناسه‌یێن كورتێن نه‌ڤییاین سه‌راڤ ببن
بو پیاسه‌یێن نه‌ ژدل
بو شعرێ و
دگه‌ل شعرێ و
مانا شعرێ....



2010/12/22

هێژ خه‌ونێن من ژ پیاسان نه‌ زڤرینه‌!



پیاسێن بێ زه‌وق بوین و هه‌ر كه‌ڤالێ ته‌ماشه‌ دكه‌م، ره‌نگێن وى یێن قه‌شاڤى دبن!
 چاڤێن من ژ ره‌نگان دره‌ڤن
 پێن من و پیاسه‌ یێن بوینه‌ دوو جه‌مسه‌رێن دژیكرنێ
هه‌مى تشتێ ته‌ ئه‌ز هویكریمێ یێ دبیته‌ هه‌لم و ب ده‌ستان ناهێته‌ گرتن
 هه‌رو هه‌ر گاڤه‌كا من ڤیایی دگه‌ل خوه‌ مژیلى خلوه‌گه‌ها خوه‌ ببم و هه‌ر گاڤا ده‌ستێ من چویه‌ سه‌ر قه‌له‌مى، تو یا دبیه‌ به‌رپه‌ره‌كێ سپى و ل بلنداهیا عه‌سمانان، تو یا دبیه‌ عه‌وره‌كێ كیڤى و نه‌شێم ستێران دگه‌ل ته‌ بهه‌ژمێرم.. 
 ئه‌ڤ شه‌ڤه‌ شیعره‌ك یا من دنڤیسیت!..
 پێكه‌ك، من دناڤ شه‌هوه‌تا خوه‌ دا دكه‌ته‌ مێهڤانێ خه‌مه‌كێ
 بالنده‌یێن عاشق دێ دگه‌ل من سه‌فه‌رێ كه‌ن
 چنارێن بلند دێ به‌ژنا خوه‌ بو لێبورینا من چه‌مینن!...
پیاسێن بێ زه‌وق بوین و
 من چه‌ند ژ ته‌ به‌رزه‌كر و من چ ل شوینێ نه‌ دیت!؟ 
كه‌ڤاله‌كێ بێ ره‌نگه‌ و ئه‌ز دزانم د بێده‌را په‌یڤێن من یێن ئاریایى دا، عه‌شقه‌كا زیزه‌ و تو دگه‌ل من نا ده‌یه‌ باى!
ته‌ چه‌ند دا من و من لجهـ هێلا
 نه‌ من تێدا خه‌ونێن خوه‌ نڤیسین و نه‌ ته‌ ئه‌ڤ خه‌ونه‌ دگه‌ل من كرنه‌ راستى
ته‌ چ گوتیه‌ ستێران؟
پایزێ یێن رامالین، یان ژى خو بو كیڤه‌ ڤه‌دزینه‌ و ته‌ چ زوى خو راده‌ستى قه‌ده‌رێ كر
هێژ شیرینیا ناڤێ من یا ب لێڤێن ته‌ڤه‌ و 
هێژ دێمێ من دناڤ ده‌فته‌را بیرهاتنێن ته‌ دا یه‌
هه‌ر كه‌ڤالێ من ده‌راڤێ هزرێن خوه‌ دارێتیێ و به‌رى هزرێن هلاویستن و به‌رچاڤكرنا وان بكه‌م، هزرێن دویربونا ته‌ ره‌نگێن كه‌ڤالى تێكدده‌ن و  هێژ دچاڤێن ته‌ دا ئه‌زێ خوه‌ دبینم و تو یا رستێن گولا دكه‌یه‌ ستڤانكێ گه‌رده‌نا خوه‌ و ره‌نگێ وان گولا دبشێڤیه‌ كه‌ڤالێ من.












په‌یكه‌ر



گه‌ریان دناڤ خه‌ونان دا
مه‌ دبه‌ته‌ پێگه‌هێ مه‌زنترین دره‌و، 
هوسا هه‌مى په‌یكه‌ر 
چاڤێن وان دزل و نڤستى
ژ هشیاربونێ ده‌ردكه‌ڤن و 
دچنه‌ دخه‌ونان دا..!
نه‌خشه‌یان وێنه‌ دكه‌ن، ددرینن
ده‌رگه‌هان ڤه‌دكه‌ن، دوور و كلیل دده‌ن..
ئه‌ڤه‌ دچیڤانوكان ژى دا
پرچا وان لبه‌ر خودیكا دهاته‌ شه‌كرن
رویێن وان دهاتنه‌ مكیاج كرن
رویه‌ك بو هزركرنێ و پێڤه‌دانێ
رویه‌ك بو تێركرنا حه‌ز و شه‌هوه‌تان!
هه‌مى دوور بو په‌یكه‌ران دڤه‌كرینه‌
گریان ... قیژى...، و دشه‌ڤان ژى دا
په‌ردا بێده‌نگیێ دهێته‌ لادان
دگه‌وریا وان دا
ده‌نگ و قیژیێن كچان
ب سه‌لیقه‌یه‌كا نوى 
ب كێشه‌ و سه‌روا دهێته‌ به‌لاڤكرن
هه‌مى به‌لاڤوك ژى
دگه‌ل ڤه‌بونا په‌نجه‌ره‌یێن وان دهێنه‌ خاندن
بێده‌نگى و حه‌شامه‌تا مروڤان
ل سه‌ر جاده‌یێن درێژ
دناڤ تاریاتیا شه‌ڤان دا
دبنه‌ لێ لێ و
چاڤان د سوژن
ده‌نگێ موزیكه‌كا كویرا دویر
موزیكه‌كا رویسا چبلاقه‌
ژ ژه‌نینا له‌شه‌كێ ژبیركرى و 
غاردان دگه‌ل شه‌ڤان كرى 
چوویه‌ ڤه‌ دزیندانا مێشكى دا و مایه‌ ڤه‌ په‌یكه‌ر
بویه‌ڤه‌ په‌یكه‌ر و 
لبه‌ر سینگێ مه‌ خازوكیێ دكه‌ت
ئو جاده‌ ژ بێهنێن وێ یێن كورت
هه‌مى تشتان ژبیر دكه‌ت!
وه‌ك هه‌مى په‌یڤێن ل سه‌ر په‌رتوك و كاغه‌زان 
هاتینه‌ نڤیساندن و هاتینه‌ ژبیركرن..
باروڤه‌ هه‌كو درابونا خوه‌ دا
دكه‌ڤیته‌ پێلا و سیبه‌را خوه‌ ژى دكه‌ته‌ زڤروك
خوه‌ ل فیركا پولیسه‌كێ هاتوچویێ ژى ناگریت
هه‌مى زمان، ب هچك كورتیێ پیاسان دكه‌ن و
هێژ ئه‌م یێ ل سیبه‌را خوه‌ دگه‌رین
رادهێلینه‌ مێژوێ
ئه‌و مێژوا ژ په‌یكه‌ران ده‌ستپێكرى و
ئه‌م برینه‌ د مێشكێ په‌یكه‌ران دا ڤه‌..
هوسان مه‌ ل جاده‌یان
هه‌مى تشت ب وێره‌كى دگوتن
چه‌ند خوش بو هه‌كو په‌یكه‌ر بێ جلك دهاتنه‌ دیتن
مه‌ پێ بو په‌یكه‌ران چێدكرن
كه‌سێ نه‌دڤیا بمینیت په‌یكه‌ر و 
دیسان هه‌میا ڤیان ببنه‌ په‌یكه‌ر ڤه‌!،
سێگوشه‌یه‌كا مێشكێ من نه‌شیاى خوه‌ دگه‌ل بگونجینیت
خه‌ونێن مه‌ یێن دچن و 
دڤێن دبێده‌نگیێ دا، خوه‌ لیس بكه‌ن
ئه‌ڤه‌بون خه‌ونێن تابلویه‌كێ سه‌رنشیف هاتیه‌ هلاویستن
تابلویه‌كێ وه‌رمتى و ژ هه‌مى ره‌خا ژبه‌ر ئێك چوى
ئه‌وێ په‌یكه‌ره‌ك تێدا هاتیه‌ نمایشكرن
ئه‌و په‌یكه‌رێ پرچا وى لبه‌ر خودیكا هاتیه‌ شه‌كرن
حه‌ژێكرنا من، بو تابلوى
تاریاتیا شه‌ڤێ یا خوه‌ بسه‌ر داداى و
جلكێن وێ یێن ژبه‌ر دراندین
ژ هینگێ وه‌ره‌، نم نما شه‌ڤان بویه‌ سه‌لیقه‌ و د سه‌رێ مندا و 
هێژ ئه‌ز و شعر یێ ب ده‌ڤ و لێڤێن ئێك ڤه‌
نه‌ ئه‌و شعر
ل چ زمان و وه‌لات و ڤیسته‌ڤالان 
دهێته‌ خاندن و وه‌رگێران و به‌لاڤكرن!
نه‌ ژى ئه‌ز وه‌ك شاعر 
گوتینه‌ من دێ بیه‌ په‌یكه‌ر...

تابلویێن شه‌ڤه‌كا بێده‌نگ



          تابلویێ ئێكێ

"ژن بێى شه‌ڤ نه‌ ژیانه‌"
ژ ته‌نشت مالا مه‌
ئه‌گه‌ر هاتى
ده‌نگى نه‌كه‌ و 
تكێنێ ژ په‌نجه‌ره‌یا من نه‌ ئینه‌؟!

تابلویێ دوێ

"زه‌لام بێى ژن نه‌ ژیانه‌"
ژن خانمه‌كه‌ و دگه‌ل هه‌تاڤێ درژیێت
دڤێت په‌نجه‌ر په‌سنا وێ بكه‌ن 
شوشه‌ نه‌شكێن..

هه‌رو من دگه‌ل سپێده‌هیه‌كا دى
ژڤانه‌ و
خه‌ونه‌ك ژ رشتنا هه‌تاڤێ
من ماچى دكه‌ت
هه‌مى شه‌ڤان 
تا ده‌رگه‌هێ مالا وه‌ ئه‌ز چیروكا ژ ده‌همه‌نێن ته‌
دڤه‌چنم
تابلویه‌كه‌، تابلو
هه‌مى تشت خوه‌ دگه‌ل ژبیرڤه‌ دبه‌ن
دگه‌ل پێكه‌كى ژ شه‌رابه‌كا سورا
توخا توخ
من كه‌رب ژ بارانێ ڤه‌دبن
هه‌كو خوه‌ ب پرچا ته‌ ڤه‌ دخویسینیت و
بێى شه‌رم رویكێن ته‌ ته‌ر دكه‌ت
ژن بهه‌مى ته‌مه‌نێ خوه‌
ب بهارێ ڤه‌دچیت!
دعه‌ینیكه‌كا شكه‌ستى را
ژن لێكدانا پارچێن شه‌ڤه‌كێ یه‌ و
ژن خانمه‌كه‌
هه‌مى په‌رتوكێن سه‌حكرنا هه‌یڤێ
 ل پێش چاڤانه‌
شاعر هه‌تا جگاره‌كێ دكێشیت
شه‌ڤێ دكه‌ته‌ له‌شفروشه‌ك و
رومانسیه‌تێ
ژ نوتێن موزیكا كه‌مانچه‌كا رویس
دوه‌رینیت
هه‌مى یێن فێر بوینه‌ فرینێ
دفرن، فرن
فرینا هه‌ر بالنده‌یه‌كى ژى ژ روحا منه‌..

2010/12/11

بێده‌نگیا ته‌ ب شعره‌كا من ڤه‌ دچیت



به‌رى به‌لگ بوه‌ریێن
ژیان سه‌ما دوماهیێ بمن دكه‌ت،
شه‌ڤێن درێژ من دگه‌ل ئاڤابونا خوه‌ دبه‌ن و
پیرتر لێدكه‌ن!
شیعرێن من دگه‌ل ته‌ سه‌مایێ دكه‌ن و
دگه‌ل چوونا ته‌ دێ سه‌فه‌رێ كه‌ن..
د جاده‌یێن ئێك سایدیێن باژێرێ مندا
نهێنیێن ماچێن ته‌
كولانێن به‌رته‌نگێن نخافتى
یێن تژیكرین
پایز وه‌رزێ ژیانێ دگه‌ل خوه‌ رادمالیت و
وه‌رزێ عه‌شقێ دوه‌رینیت،
شه‌ڤه‌كا عاشقانه‌ لبن پییا دكه‌ت و
بێده‌نگیا ته‌
كومه‌ پسیارێن بێ به‌رسڤن
ژ بێده‌نگیا نڤیسینا شیعره‌كا من ڤه‌ دچن..
ب سه‌دان ده‌ق من نڤیسین
هه‌میان ژى ماچێن ته‌ لێ دده‌ق داینه‌
تو بێژى پشتى نڤیسینا ڤان رێزان
ژیان لده‌ف من ب چ ره‌نگى بیت
هێژ جادده‌ حه‌سیدیا بمه‌ دبه‌ن
هه‌بونا خوه‌ دگه‌ل شیعرێن من تێكه‌ل دكه‌ن
دگه‌ل تارى شه‌ڤان
دناڤ بریسقه‌ ستێران دا
رسته‌یا ماچان هێژ ب ستوێ ته‌ ڤه‌ شوره‌ وو..
هه‌رو ل كولانه‌كێ
خه‌ونێن ماچه‌كا ته‌ لێ دبینم!
ئه‌ڤه‌ توى ل بلنداهیا عه‌سمانان
ستێران دگه‌ل من،
دهه‌لچنى
د خودیكێرا ته‌ماشه‌ى خو بكه‌ و
عه‌شقا مه‌ به‌هه‌شته‌، به‌هه‌شت!
هه‌ر ده‌م ته‌قوایێ بو دكه‌ین
شیعر ئایه‌تێن عاشقانه‌ و
ده‌فته‌رێن عه‌شقێ بده‌همه‌نێن ته‌ ڤه‌ دخشیێن
تو یا دبێده‌نگیێ دا و دشه‌ڤێن درێژ دا
دخه‌یالێ دا، ده‌هـ جاران من دكه‌یه‌،
ئێخسیرێ شه‌ڤه‌ پیاسێن خووووووو
ژ نوكه‌ وێڤه‌
ئه‌ز شیعرا ژ ته‌ پێڤه‌، بو كێ بنڤیسم
هێژ خه‌ونێن من یێن دگه‌ل به‌رائه‌تا ته‌
ئه‌ز و تو دئێك ده‌فته‌ر دا دنڤین، دژین، خه‌ونێن خوه‌
دكه‌ینه‌ ده‌قه‌كێ نویێ شعرى و
ناڤێ جادده‌یه‌كێ لێ ددانین
سپێده‌هیان ژى
ته‌ ژ سه‌ر چاڤێن خوه‌ را دكه‌م
كى دێ هێت ڤێ شیعرێ ژ من وه‌رگریت و
درینیت
من پێدڤى ب نڤیسینا شیعران نه‌ما
هه‌رو ئه‌ز و تو ل سه‌ر مێزه‌كێى نه‌، بتنێ و
پێكێن خوه‌ لێكدده‌ین...

2010/12/10

شه‌ڤ و باران و ئه‌ز


                           13/8/2010  دهوك


ـ 1 ـ
دشه‌ڤه‌كا بارانى دا
ژوورا من، بێهنێن خوه‌ش ژێ دهێن
دگه‌ل چراكى پیاسان دكه‌م
چاڤێن من ژ روناهیێ دتارینه‌ و
بتنێ ژ ڤى چراكى
وه‌ك خه‌ونان
دخه‌یالێن سنێله‌ییێ دا
سیناهیێن عاشقانه‌ دبینم..
ـ 2 ـ
ب خه‌ونێن خوه‌ ڤه‌
 به‌ره‌ڤ په‌نجه‌رێ ڤه‌ دچووم
گوهه‌ك ل بارانێ و
ئێك ل بێده‌نگیا جاددێ
خه‌ون
دبونه‌ بیرهاتن
ژ دایكبونێ، بو خاتر خاستنێ..
ـ 3 ـ
دهه‌مان ژوور ڤه‌
ژیان كراسه‌كێ راخستیه‌
لهنداڤ جهێ نڤستنا من
باوه‌شین دكر!
چه‌ند بارانێ جادده‌ مالشتبان و
دار ژ به‌لگان دوه‌راندن
خه‌ون ب كراسێ لهنداڤ سه‌رێ منڤه‌
دشاریان..
ـ 5 ـ
دژوورا من ڤه‌
هه‌مى تشت ب ناڤن
ل چراكى، دلێ ته‌ دبینم
ل بارانێ، پێژنا ته‌
ل په‌نجه‌رێ، خه‌ونێن ته‌
ل كراسێ ل هنداڤ سه‌رێ خوه‌
ژیانێ دبینم و
رویساتیا ته‌، لناڤ جهێ خوه‌..


دهوك ... ئه‌و كه‌ڤالێ د هزرا من دا وێنه‌كری !




باژێر دبوو له‌شه‌كێ رویس و
 د كه‌ڤاله‌كی دا دهاته‌ نمایشكرن!
باژێر دبوو كه‌ڤال و ل وه‌لاته‌كێ دویر دهاته‌
وێنه‌كرن،
 باژێَر دبوو جاده‌ و پیاسه‌ لێ دهاته‌كرن!..
 باژێر جاده‌یه‌ و ل سه‌ر شوسته‌یێن وێ
ئه‌ڤێن مه‌شیا وه‌رده‌كا دكرن
نیڤه‌ك ژێ مێ و
نیڤا مای، خه‌ون بوێ مێیاتیێ ڤه‌ ددیتن
 گومانێن قه‌ره‌چه‌كا مێ
چاڤێن هه‌میان زیق دكرن
نه‌ جوانیا وێ و
نه‌ ژ پێچولكا لبه‌ر سینگێ وێ..
هه‌رو ئێڤاری ئه‌زێ ڤێ جادێ دپیڤم و
ل مانشێته‌كێ كورت بو دگه‌رم!

ئه‌ز دمامه‌ ل هنداڤ كه‌ڤالێ باژێرێ خوه‌ و
كه‌ڤاله‌كێ هه‌لاویستی
یێن ملێن خوه‌ ددانه‌ به‌ر
ل ده‌ریا ئیجه‌ی ده‌رباز دبۆن
یێن خه‌ون هه‌ین
ب سه‌نگ و گرانیا وان ئاڤاهی بلندكرن،
یێن بو خه‌ونان دژیان
ل نانی دگه‌ریان

ئه‌ز و كه‌ڤال و بێده‌نگی
به‌ره‌ف ئاوازێن پیانویه‌كا وه‌ستیایی
مه‌ نه‌ دشیا دیوارێن هشیاریێ ب سمین
كه‌ڤال.... رویساتی و بێگونه‌هی
دبونه‌ ئوركسترایه‌كا چیایی و
ب ده‌نگ و ره‌نگ
پیاسه‌ دگه‌ل عه‌وران دكرن و
هه‌می تشت دبونه‌ خاتر خواستن

ئه‌زێ ل هنداڤ سیتافكا جاده‌كا هه‌ییكری
د داخوانیه‌كا سه‌یر دا
مرنا هه‌لبه‌ستێ دهاته‌ راگه‌هاندن
ته‌ڤ میدیایێن جیهانێ
ژ بونا ژ دایكبونا كه‌ڤالى دجڤیان
مانشێتێن  روژنامه‌یان
ب ره‌شی هاتنه‌ نڤیساندن
كه‌ڤال هه‌بوو
ئه‌زمونه‌كا نوی یه‌  كه‌ڤال تێدا به‌رزه‌بویی
خه‌لك داجریانه‌ جاددا و
دروشمێن هه‌ییكرنا كه‌ڤالی بلندكرن!..

ژ هینگێ ئه‌ز و سیتافكا خو
پیاسان ل جاده‌یێن درێژ دكه‌ین
ئه‌ز بو هه‌بونا شعره‌كێ دنڤیسم و
شعر، ژ بو هه‌بونا نه‌خشه‌یه‌كێ دی
به‌رده‌وامیێ دده‌ت

جاده‌ ژی هێژ ب دویراتیا
سیتافكا وێ یه‌ ژێمای
جاده‌ چێكرنا كه‌ڤاله‌كێ رویسه‌ و
كه‌ڤال
دنویترین مه‌زاد دا، چ بها  پێ نه‌ هاته‌دان!

هه‌ناسه‌یێن شیعرى





پێشمه‌رگه‌
                                            
هه‌ر بهوستا پێ خوه‌ لێدانى
شوین پێن منن و
گولله‌یه‌ك یا ڤێكه‌تى!
هه‌ر دارا مه‌زنا بگه‌هیێ و
لبه‌ر سیبه‌را وێ بروینى
گورێ شه‌هیده‌كى یه‌ و
دڤێت سرودا ئه‌ى ره‌قیب ل سه‌ر بخوینى...

تبه‌رك
                                        
ل په‌حناتیا
باژێرێ ئه‌ز لێ ژ دایكبویم
ماچ و سویندێن خه‌لكى
ده‌ستێن شێخى بون!
پشتى ماچێن تلستاران
ماچێن شێخان ژى
به‌رێڤه‌ى باژێرى بون...

نهێنى  
                                
داڤێن پرچا ته‌
وه‌ك په‌یڤێن شعره‌كا من
چاڤێن خه‌لكى رادكێشن!
چه‌ند بكه‌ڤنه‌ به‌ر داڤێن شه‌ى و
حلى ببن..
هند شعرا من به‌لاڤ دبیت و
نهێنیێن جوانیا ته‌
 رادگریت..

ره‌نگ
                                  
دبه‌ریكانا ره‌نگان دا
تو، یا ئێكێ بوى!
چاڤێن ته‌، هاتنه‌ ره‌شكرن...
هه‌ر یاریا من خوه‌ لێدایى و
بویه‌ ده‌نگدان
هه‌ر زوى دبومه‌ به‌ر پیفك و
داڤه‌كا پرچا سه‌رێ من
دهاته‌ سپیكرن...

په‌شێمانى  
                              
د زانینگه‌ها عه‌شقێ دا
وانا ژ هه‌میان درێژ تر
 نڤیسین بو
هه‌ر ژ له‌وح ئه‌لمه‌حفوز و
ل جاهلیه‌تێ موعه‌له‌قاتێن ئه‌لسه‌بع
تا دگه‌هیه‌ مه‌م و زینا ئه‌حمه‌دێ خانى!
ب ئێك كلیك
لبه‌ر شاشا كومبیوته‌رى
نیڤا ژیێ من یێ بورى
 ب هه‌روه‌ دچوو
نیڤا دژى ب په‌شێمانى...

ڤیان    
                        
ئه‌ز دگه‌ل ته‌ بوم
هه‌ر ژ وێ روژا
ته‌ ب ده‌همه‌نا كراسێ خوه‌ یێ سور
عه‌رد د دویف خوه‌ را دمالى!
دوماهیك روژێن وه‌ستیایى
ب دوو سێ چپكێن خوینه‌كا سوور
ئاهـ و ئوهێن شعره‌كێ
د بشافتن و
هه‌ر گاڤا ئیلهاما شعرێ گیرو ببا ژى
تو دنالى...

كلچافك  
                              
عه‌سمانێ شینه‌ و
ئه‌و سیتافكا ژ ته‌ دپه‌شیت
نیڤه‌ك ژێ قرێژا پستویێ منه‌
نیڤا مایى ژى
مێیاتیا ته‌ كریه‌ د كلچافكى دا و
ئه‌و كلچافك
به‌رمایكێ شعره‌كا منه‌...

چنار    
                          
بێى ته‌
وه‌ك پیره‌ چناره‌كا
كه‌تیه‌ به‌ر پێلێن بایى و
تو شیعرێن من نابینى!
یان ساته‌ وه‌خته‌كى
بكه‌ڤیه‌ به‌ر شاشا كومبیوته‌رى
مه‌سجه‌كا بتنێ
بو من بشینى...

 ماندیبون  
                                      
جوانترین روژگارا من
چاڤێن من
بشكورین ژ لێڤێن ته‌ ددزین...
خوشترین په‌یڤا من
ببۆ ناڤێ ته‌
جوانترین شیعرا من
ببۆ په‌سنا ته‌
ژ هینگێ و ئه‌زێ ب شعرێن خو ڤه‌ ماندى
نه‌ هیبومه‌ ماچێن ته‌
نه‌ ژى فرینا
دگه‌ل درێژه‌ پیاسێن ته‌...

چیروك      
                              
دناڤبه‌را من و ته‌ دا
ژیان چیروكه‌كا شه‌رمینه‌ و
چاڤێن من باوه‌شكێن خه‌وێ دهێنێ!
هه‌ر شیعرا من درێژه‌ پیاسێن جادان
 تێدا نڤیسین
ئه‌وێ شیعرێ ئیسك دهێنێ

سویند  
    
هه‌ر ژ وێ روژا ته‌ ڤیایى
گه‌ڤزكانێ دگه‌ل شیعرێن من بكه‌ى
مه‌زنترین سویندا ته‌ خوه‌ پێ زنجیرداى
دگه‌ل درێژه‌ پیاسێن من
كت و جوتانێ پێ دهاته‌ كرن..

حیجاب  
                                  
دگه‌ڤزكا وه‌رزێ بهارێ دا
من په‌نا بو
جوانیێ و شیعرێن رویس دبر!
پشتى به‌لگ وه‌ریاین و
پایزێ خوه‌ رویس نیشانداى
من شیعر نه‌ نڤیسین و خو بێده‌نگ كر..

مالئاڤاهى  
                              
من ده‌ست
ژ نڤیسینا شیعرێ به‌ردا و
تو یێ ته‌لاران بلند دكه‌ى
ته‌ ئه‌ز دگه‌ڤزكێن شیعرێ دا هێلام و
تو یێ ده‌وله‌تێ
ژ ده‌ست دده‌ى..

شه‌هید

گورێ ژ هه‌میا بلندتر و
نه‌خشاندى تر!
سویندا ژ هه‌میا پر باوه‌رى تر،
كێلیا پشتا سه‌رێ وى یه‌ و
سالێ جاره‌كێ
ته‌له‌فزیون بیرێ لێ دئینیت...
سالێ ئێك جه‌ژن
زاروكێن وى ب دیاریێن به‌رپرسان شاد دبن!
ژ ئاخفتنێن وى
په‌یره‌وێ حزبان دهێته‌ نڤیسین
هول و جاده‌
بناڤێ وى هاتینه‌ ناڤكرن
هه‌ر سمینارا دهێته‌ گێران
هه‌ر ڤیسته‌ڤالا بهێته‌ به‌ستن
نهێنیه‌كا نوى یه‌ و
چه‌ند چاڤێن من ب بشكورینا مونالیزایێ دكه‌ڤن
بشكورینا شه‌هیده‌كى دهێته‌ بیرا من..

هێژ روندكێن ژ چاڤێن ته‌ دوه‌ریێن؟!





من گرى دچاڤێن ته‌ دا دیت..  تو د په‌شى و تو نه‌شیایى ب چاڤان خاترێ بخازى.. سلاڤێن ته‌ د گه‌وریا ته‌ را دمانه‌ ئاسێ!، پێن ته‌ به‌رى ته‌ قه‌ستا ده‌رگه‌هى كرن.. من ئاگه‌هـ ژ پێژنێن ته‌ هه‌بو، تو د سیتافكا خوه‌ دهه‌لنگفتى، هێژ زه‌نگا ده‌نگێ ته‌ دگوهێ مندا یێ قه‌رسى یه‌، چیروكا دزینا خوشترین ماچ ژ لێڤێن ته‌، ب ئیمزا لێبورینێ من سلاڤێن ته‌ بلند راگرتن!
هه‌مى تشت
هاتنه‌ دیلێت كرن و ئه‌و ناڤێن ته‌ دبن په‌رده‌یا شه‌رمێ را زیق كرین و
ته‌ ب كراسێ بێ هه‌تكیێ  ناڤكرین
شیعرا ڤیایى ب دیالوكێ بهێته‌ نڤیسین
ته‌ ڤر لێددان و
ته‌ به‌رپه‌رێن  من سه‌روبن كرن
 ته‌ دڤێت یاریان ب پیروزیێن من ژى بكه‌ى!
  دناڤ پایزا عه‌شقا مندا
په‌یڤێن من بده‌یه‌ به‌ر كاشوێ خوه‌ و
 هێژ تو یا گه‌فا ل نڤیسینێن من دكه‌ى
و هێژ خه‌ونێن من
دڤێن ماچان لدۆر به‌ژنا ته‌ ب ئالینن و
دگه‌ل هه‌ناسه‌یێن
هه‌ر دار كاژه‌كا تو لبن رونشتی
یان هه‌ر خه‌ونه‌كا
ته‌ مێیاتیا خوه‌ تێدا نیشان داى و ره‌نگ كرى
سالوخه‌تێن شیعره‌كێ نه‌ و ژ ته‌ دوه‌رهان..
تو شیعره‌ك بوى
ته‌ خوه‌ ل پرێزه‌یا عه‌شقێ نه‌ دگرت و
تو یا چاڤ ترسیایى بوى
زوى چاڤێن ته‌ شه‌رم به‌لاڤه‌دكرن
تو یا دچى و
ئه‌زێ به‌رمایكێن ته‌ ڤێدده‌م!
تو باخچه‌ى، بلنداهى، چیایى، جوانترین گول، خوشترین ئاواز، نازكترین شیعرا منى و ئه‌زێ په‌یڤێن وێ دنڤیسم و هێژ ئه‌زێ ل ده‌رازینكا جوانیا وێ و خه‌ونێن من یێن یاریان ب په‌یڤان دكه‌ن و تو یا ل بلنداهیا و هێژ تو یا دفرى و خو دنازینى........؟!
دگه‌ل ته‌ و ده‌نگێ عه‌وران
هه‌كو هه‌مى تشت دگوهێن من دا ده‌نگ ڤه‌دده‌ن
تو د بویه‌ ئه‌لهوووو
نكلێن ته‌،
كونێن زوها دخه‌ونێن من ڤه‌دكرن
شیعرێن من نه‌ دشیان خوه‌ لبه‌ندا ته‌ بگرن
نزانم؟!
شیعرێن من تژى ره‌نگ دبون
ته‌ ره‌نگ ژ كیڤه‌ دئینان!
ته‌ به‌شه‌ك ژ من تژى دكر و هێژ ئه‌زێ لته‌ دگه‌رم
تو تێكه‌لى من دبویى
دزانم به‌شه‌ك ژ ته‌ ژى، تژى ئه‌زم
تو كى؟!!
دزانم ته‌ دڤێت دجیهانا من دا رازێى
یان ببی یه‌ په‌یڤێن من و
ته‌ بگڤێشمه‌ شیعره‌كا خوه‌
حه‌ژته‌ بكه‌م و تو حه‌ژ من بكه‌ى..
تو كى؟!!
تو به‌رپه‌ركێ نه‌ نڤیسى و
 ژ پایزه‌كا ژ عه‌شقێ زیز، ڤه‌قه‌تیایى
ئه‌زێ گازى ته‌ دكه‌م
ب دلێ خو، ب ده‌نگێ خو و ب پیروزیا شیعرێن خو و
تو نه‌شیایى خوه‌ ل به‌ندا شیعره‌كا من راگرى
 تو هێژ یا ژ په‌یڤێن من دره‌ڤى و
و هێژ ئه‌زێ ل به‌رمایكێن ته‌ دگه‌رم
تو یا دگه‌هى و ئه‌زێ دقفلبونا شیعرێن خوه‌ دا
روندكێن ته‌ هه‌مبێز دكه‌م...


شه‌ڤه‌كا پایزى





ل ئێڤاریه‌كا خه‌موكى
عه‌ور دگه‌ریان..
باى رادهێلا عه‌ورا و ئه‌ز ل سیبه‌را خوه‌ دگه‌رهام!
ته‌مبه‌لته‌رین گه‌روك
سیبه‌را من باى دبر و
باى دگه‌ل خوه‌ هه‌مى تشت رادكرن
رادهێلا به‌لگا و دار رویس دكرن
بایه‌كێ بێ ره‌حمێ ب گڤه‌ گڤ
به‌رپه‌رێن من
 پێكدا د دان
په‌یڤێن من دگه‌وریا مندا ئاسێ دكرن..
هشكه‌ قه‌له‌مه‌كێ كه‌تیه‌ به‌ر پێلێن پایزه‌كا بێ ره‌حم و
حبر تێدا زوها بوى
نه‌ به‌ره‌ڤانى ژ په‌یڤێن من دكر و ل سیبه‌را من دگه‌ریا
نه‌ پایز دكره‌ وه‌رزێ عه‌شقێ و
چ به‌لگێ ب تاكه‌كى ژى ڤه‌دما
 د وه‌ریا..

دگه‌ل دوماهى هه‌ناسه‌
دوماهى نڤیسین و دوماهى عه‌شق
د بومه‌ گه‌روك و ل سیبه‌را خوه‌ دگه‌ریام
بروژییێ
 نڤیسینا شیعران بوم
بروژییێ، عه‌شقێ!
شیعر و عه‌شق و شێتاتى
ب تبلێن خوداوه‌ندێ عه‌شقێ من دنڤیسا
من دوماهیك وه‌رز بو عه‌شقا خوه‌
بره‌نگێن ڤه‌بویى
دوماهیك هێما بو نڤیسینێن خوه‌
به‌لگێن زه‌ربویى
دوماهیك ره‌نگ
به‌رى بهێته‌ شێلى كرن
دوماهیك به‌لگ
كه‌تیه‌ به‌ر پێلێن بایێ پایزه‌كا رویس
پایزه‌كا ژ رویساتیێ تێر نه‌بوى
شعر رویس كرین
دار رویس كرین
شعر فێرى ماچا و ره‌نگان كرین
من هه‌مى كرنه‌ دپێكى دا و
دگه‌ل پیربونا ره‌نگان
شكاندنا روژییان
هه‌میا پێكێ خوه‌ ل پێكێ من د دا و
دگوتن بو پیربونا ره‌نگان
نوووووش....

تو مانشێتێ شیعره‌كێى





ئه‌و شه‌ڤێن
 ستێر دناڤ عه‌وران دا سه‌مایێ دكه‌ن
رستا نهێنیێن من
دناڤ خه‌ونێن خوه‌ یێن ئالوز دا
دكه‌یه‌ نامه‌!
ژیان دناڤ خه‌ونان دا، جوانه‌
نێزیكه‌ چاڤێن من بو چاڤێن ته‌ شێت ببن
ئه‌زێ دخه‌ونێن ته‌ دا مانشێتێ شیعره‌كێ دبینم
تو یا دهزرێن من دا
تو، به‌رپه‌ره‌كێ سپى و نه‌ نڤیسایى
به‌ده‌نا ته‌ پره‌ ژ بێ ده‌نگیێ و تو یا دمندا دحه‌لهى..
ئه‌زێ دكولانێن باژێرێ خوه‌ دا
سه‌ما به‌رزه‌بونێ دكه‌م
ل قولاچه‌كێ، ل سه‌ر مێزه‌كا بتنێ
دگه‌ل خوه‌ و بێده‌نگیێ
ئه‌زێ دپه‌رداخێ خوه‌ دا سه‌رو بن دبم
په‌یڤه‌ك ژ من و په‌یڤه‌ك ژ ته‌
ئه‌زێ ماچه‌كێ دبنێ شوشه‌یێ ڤالا دا
هه‌مبێز دكه‌م
(چزى ڤیزیه‌كا) دگوهێن مندا
زه‌نگه‌كێ دوباره‌ دكه‌ت!
نوووووش
بو خه‌ونێن ته‌ یێن دوباره‌ خو فێرى عه‌شقێ دكه‌ن
ل سه‌ر مێزه‌یێن دى
ل نێزیك
به‌رپه‌رێن من یێن قرمچاندى و
نه‌بوینه‌ شیعر
هێشتا باى ئه‌زمونا خوه‌ بو عه‌وران نه‌ ده‌ركریه‌ و
پسیارێن دهێنه‌ كرن
كه‌نگى دێ بیته‌ هولكا باى و
كه‌نگى دێ شانوگه‌ریا عاشقان هێته‌ نمایش كرن
دبه‌رپه‌رێن شاعیره‌كیدا
ده‌نگێ عه‌وران موزیكا عه‌شقێ یه‌ و
د هناڤان دا
قومار ب په‌یڤان دهێته‌كرن
د به‌ریكانا ره‌نگان دا
هه‌ر گاڤا وه‌رزێ پایزێ گه‌هشتێ و
خه‌ون ب ماچان ڤه‌ هاتنه‌ دیتن
بو وه‌رزێ وه‌راندنا به‌لگا و
عاشق هاتنه‌ رویسكرن
دبیته‌  دوماهى بو نڤیسینا شعرا  و
دوماهى پیاسێن نه‌ ژ دل
و هێژ به‌رپه‌رێن من یێن نه‌ نڤیسى
یێ كینێ
ژ چاڤێن ته‌ دهه‌لینن
هێژ ئه‌زێ شه‌هوه‌تێ دچاڤێن ته‌ دا دبینم
هێژ ئه‌ز و په‌رداخێ لبه‌ر سینگا من
یێ خوزیا بو ماچان رادهێلین
هه‌ر ژ وێ روژا
ته‌ نهێنیێن خوه‌ داقوتاینه‌ به‌ر من!
دكه‌لا ئاریانا مێیاتیا خوه‌ دا
رستا گونه‌هان دناڤ نهێنیێن خوه‌ دا دكه‌یه‌ نامه‌
هه‌ر شه‌ڤ ل به‌رامبه‌ر ستێران
په‌ردا ل سه‌ر كچینیا خوه‌ رادكه‌ى و
من هوى دكه‌یه‌ نڤیسینا دگه‌ل ده‌نگێ عه‌ورا و
 روژیێن خوه‌، بمه‌ دشكێنى..
بوچى؟
بتنێ ئێك پسیار یا خوه‌ ژ من ڤه‌دهێلیت و
په‌یڤێن من خو لێكناده‌ن تێدا ببنه‌ شیعر
 بوچى: ژ ڤى باژێرێ پرى مروڤ
دیتنا من بتنێ
 ته‌ بو خو نێچیر دكر؟!!