سلۆیێ كورێ سەلیمی

عبدالرجمن بامەرنی/ كورتەچیرۆك

سالێن نوتان ژ چەرخێ بوری، چاڤێن ھەمیان ل دەستێ نیاسێن وان بوون ئەڤێن ل دەرڤەی وەلاتی، بتنێ سەلیمێ ئیسێ نەبیت! چەند ئێكی گوتبایێ، كورێ من، برایێ من یان كورخالەتێ من وەرەقەك یان دوو وەرەقێن دولاری یێن بۆ من فرێكرین، بێ حەمدی خوە دا تف كەتە سلۆیێ كورێ خوە!

جارەكێ ژ دەڤێ من دەركەت و من پرسیارا سلۆی ژێكر؟ لێ ھێشتا پرسیارا من ب تەمامی ژ دەڤێ من دەرنەكەفتی، ئەو سەلیمێ ژ خەبەر و گوتنێن كەشەفرێت كوفر، دڤیا ژ دینێ خوە دەركەڤیت و گوتی: (خوزی ئەو كورێ كەری، ھەر سلۆیێ بەرێ بایە و نەكو سلێمانێ نوكە). نە بتنێ من، ھندی كەسەكی سلێمانێ ئیسێ ناسدكر، مرۆڤەكێ جوامێر بوو و ئاخفتنا كرێت ژ دەڤێ ڤی خوشمرۆڤی دەرنەكەفتییە، لێ پشتی سلۆیێ كورێ خوە فرێكریە دەرڤەی وەلاتی، ئەڤ سلێمانە ژڤی دەستی یێ چوویە دەستێ دی.

سلێمانی گوت: ھندی سلۆیێ كورێ من ل ڤێرێ، سەرێ خوە بۆ سوجدێ نەبریە و نەدزانی بەرێ كەعبێ دكەڤیتە كیرێ و پشتی چوویە دەرڤەی وەلاتی، وێ رۆژێ یێ تەلەفونێ دكەت و دبێژیت، بابو ئەز دێ ھێمەڤە، لڤێرە وەلاتێ كافرانە و چ مزگەفت لێ نینن نڤێژێن خوە لێبكەین و ئەڤە د دەمەكیدایە، من خانیێ خوە یێ بۆ فروتی و نوكە ئەم یێ د كرێیاندا و ھێشتا دولارەكا بتنێ ژی بەرێڤەی (برەھیم خەلیلا) نەكریە و كورێن عالەمێ، یێ مرۆڤێن خوە یێن دویر ژی ب خودان دكەن.

ئێ بابێ من، ئەگەر تو یێ نڤێژان بایە، لڤێرە مزگەفت یا دبێژیتە مزگەفتێ جھێ من بكە و دەنگێ مەلا تێكەلی ئێك دبیت و ڤێ مەسرەفێ و خولیسەریێ، من تو نەفرێكریە دەرڤەی ولاتی دا بچی نڤێژا بكەی، من تویێ فرێكری، دا بچیە سەر لێڤێن بەحرا و دگەل كەزی زەر و چاڤ شینان سەمایێ بكەی. كورێ من، من تویێ فرێكری، تو مە ب خودان بكەی و دولاران فرێبكەی، نە بگەھیە ئەفغانیەكی/ سودانیەكی و تە دناڤخوەرا بەرزە بكەن.     

دەستپێكا سالێن دوو ھزارێ بوو و سلۆیێ كورێ سەلیمی ل جادە و كولانێن دھوكێ، ژ عەرەبانەكا فرۆتنا باقلكان دەستپێكر. جھەك بۆ خوە كرێكر و چەند كورسی ل نزیك عەرەبانا خوە دانان و گەنجان، ئێڤارییان ژڤانێن خوە لێ ددانان، دەستپێكێ مێزەك و دوو كورسی بوون و پاشی بونە دوو مێزە و دووماھی جار من عەرەبانا وی ل وێرێ دیتی، ل بەر وان كورسییان كور ژی ھەبوون و كچ ژی د روونشتی بوون و من ب چاڤێن خوە ژی دیت، كچەكێ ژوان نارگیلە ژی دكێشا.

سال گەھشتبوو دوو ھزار و دەھێ و بەرگیزێن وییێن مەرەزی و دوو دەرسووكان، نەشییان سەلیمێ ئیسێ ل بەر چاڤێن من ب كەنە كەسەكێ دی و ل نێزیكترین چایخانە، مە گازی دوو چایان كر و گوتە چایچی: (مامكۆ، دڤێت چایا من یا رەش و كێم شەكر بیت). ژمن پرسیار و ژ وی پرسیار، ئەم گەھشتینە سەر سوحبەتا سلۆی و ئایا ھێشتا سلۆیە یان بویە سلێمان؟ سەلیمی گوت: ئەز دڤی كوری ناگەھم، بەری بچیتە دەرڤەی وەلاتی سلۆ بوو و چ كارەكێ نەباش یێ وی بوو، ژ دەرڤەی وەلاتی زڤری و ژ سلۆی بۆ سلێمان، نە بتنێ نڤێژ و تاعەت، ھەر شولێ باش با، بارا وی بوو و سەرێ من ب رەفتارێ وی بلند بوو و پاشی كافییەك ڤەكر و ئەز ل تە ناڤەشێرم، خودێ روویێ خوە ل بەر ڤەكر و ب وێ كافیێ، پارەكێ مەزن كەفتە بەردەستان و رۆژەكێ من ب ھەردوو چاڤێن خوە دیت كچ و ژن ژی لێ د روونشتینە و سەركۆل، تیقە لیقا وان، نارگیلێن وان و ئێدی من بەرێخوەنەدا وی و كارێ وی و ھەر كەسێ پرسیارا وی ژمن كربایە، من دگوتێ بەحسا سلۆی لدەف من نەكەن و دەما بێھنا من ژ رەفتارێن وی تەنگ بووی، ئەز چوومە جھێ كارێ وی و من گوتێ سلۆ، ئەڤە دگەل تە ناچیتە سەری، جار تو یێ ل رێزا ئێكێ ل مزگەفتێ و پێ تە یێ ب پێن مەلاییڤە، جار ژی تو یێ كافییان برێڤەدبەی و ھەڤالێن من دبێژنە من، سلۆیێ كورێ تە یێ ل بەر بارێ و كچ و ژن لێ دچنە ژڤانان و نارگیلە ژخوە ب سەرێ خوە!

ھێشتا سەلیمێ ئیسێ یێ بەحسا كورێ خوە دكەت، كا سلۆیە یان سلێمان، چایچیێ گەنج دوو چا ل سەر مێزا ل بەر سینگا مە دانان و گوتە سەلیمی: (مام، ئەڤە چایا تە یا رەش و كێم شەكر، ھەر وەكو تە داخوازكری).

سەلیمێ ئیسێ د بەر سوپاسیێ را گوت: مامكۆ لڤێ زەمانی گەلەكا ب ساناھییە، تە دڤێت دێ بیە سلۆ و تە دڤێت ژی دێ بییە سلێمان! ھەر چەندە من زانی وی چ گوت، لێ چایچیێ گەنج بێی بزانیت سلۆ و سلێمان كورێ وییە، گوتێ: مام دوو فرەكا ل چایا خوە بدە و ئەگەر تاما وێ ھەر سلۆ بیت، دێ بۆ تە ب چایەكا سلێمان گوھورم.

*د كوڤارا پەیڤ ژمارە 93 دا بلاڤبوویە.

* دكوڤارا رامان ژمارە 313دا بلاڤبوویە.