بحث هذه المدونة الإلكترونية

pertook

pertook

2014/07/21

هنارێن سەیدایێ‌ سەعید


عبدالرحمن بامەرنی
Bamerni77@yahoo.com

زاروكینی گەلەك تشتێن خوش و نەخوش بو مروڤی دكەتە بیرهاتن، براستی ژی زاروكینی قوناغەكا خوشا تەمەنێ‌ مروڤی یە، هەمی تشتێن وێ‌ یێن خوش و نەخوش بو مروڤی دگرنگن. چەند جارەكێ‌ ئەز سەرەدانا وی گوندی بكەم یێ‌ ئەز لێ‌ ژ دایك بویم، كولانێن گوندی، جهێ‌ یاریكان، بیرێن گەلەك تشتان دكەم، ئەم چەند بچیكێن ل تەمەنێ‌ من پێكڤە چبوینە شینواركێن گیزا ل عاقارێ‌ بنێ‌ گوندی، خودانێ‌ ئێك ژ بیستانان راهێلا مە و هزركر ئەم یێ بەرا دگیزێن وی وەردكەین، ئەوی زیڤرە بەرەك داوەشاندە مە، هێشتا ڤیزێنا وی ل بەر گوهێن منە بتایبەت هەر گاڤا ئەز گیزا ل جهەكی دبینم یان ئەوێن نوكە ل سەر عەرەبانا دهێنە فروتن! كو تاما وان گەلەك نەخوشە، ڤێجا نزانم چنكو گیزێن (ئوكرانی) نە یان بیرێن وی بەری دهێنە هزرا من، كو خودێ‌ ئەز ژێ‌ خلاس كریم.
هنارێن سەیدایێ‌ سەعید ژی ئێك ژوان بیرهاتنان بون، هەر چەندە بتنێ‌ كەلەكەكا بەرا دناڤبەرا بیستانێ‌ مە و یێ‌ وی دا هەبو، لێ‌ وان هنارەك ل سەر وێ‌ كەلەكێ‌ هەبو، براستی هنارێن وەك وێ‌ دكێم وێنەبون، نە وەك یێن نوكە و ل سەردابا فێقی دهێنە فروتن. تشتێ‌ بیرێن من لهنارێن سەیدایێ‌ سەعید دئینیت ژی گەلەك كەیفا من ب سەیدایەتیا وی دهێت هەكو ماموستا، سەیدایێ‌ سەعید و سەیدایێ‌ حەسەن یێ‌ بیركاریێ‌، جوداهیا وان ژی، وی زێدەتر كچك دقوتان و سەیدایێ‌ حەسەن ژی گەلەك كورك دقوتان، براستی ژی تا نوكە ئەز رەفتارا وان هەردوو سەیدا یا نزانم.
بیرهاتنێن من دگەل سەیدایێن من گەلەك هەنە و ئەز رێزێ‌ ل وان دگرم، گەلەك ژوان تا نوكە ژی پەیوەندیێن مە دگەل دخوشن و یا راست كەیفا وان ژی دهێت دەما دبینن قوتابیەكێ‌ وان سلاڤ بكەتی، لێ‌ تشتێ‌ بو چەندین سالان دگەل من دا مەزن بوی و من چ بەرسڤ بو نەدیتین، ل قوتابخانا مەمێ‌ ئالان بو، سەیدایەك مەهەبو و هەر وەكو دیار ئەز ل (دەرسا) وی نەیێ‌ زیرەكبوم، گوتە من تو بو سینەمێ‌ یێ‌ زیرەكی! براستی ئەوی چاوا زانی ئەز ل سینەمێ‌ بوم؟! ئەڤ پسیارە بو دەهان سالان دگەل من دا مەزن دبو و من چەند جارەكێ‌ دیتبایە ژی، من خو حازردكر كو ئەز وێ‌ بیرهاتنێ‌ بو ڤەگەرینم، كا وی وێ‌ روژێ‌ ل سینەمێ‌ چ دكر؟ بەس من دخورا نە ددیت یان رێك نە دكەڤتێ‌، تا روژەكێ‌ من پێ‌ ل جرعەتا خوە و هەمی یاسا و رێسایێن خوە داناین، ئەڤێن من دگەل خوە دا مەزن كرین و من گوتێ‌: سەیدا بیرا تە دهێت ل وێ‌ روژا سینەمێ‌ و من بو چیروك گوت، وی گوتە من، رێڤەبەرێ‌ سینەمێ‌ هەڤالێ‌ من بو و ئەز دژورا وی ڤەبوم، بەرێخوددەمێ‌ تو یێ‌ دهێیە ژوور ڤە.
دەما ئەز ڤان بیرهاتنان دكەم، ئەز بخو دبێژم پا بوچی هەمی بیرهاتنێن مروڤی یێن زاروكینیێ‌ و سنێلەیێی پێكڤە ناهێنە بیرا مروڤی وەك بەرێخودانا فلمەكێ‌ سینەمایی، لێ‌ ئاخفتنا نڤیسەر و بیرمەندێ‌ عەرەب (عەلی لوەردی) دهێتە بیرا من، دەما دنڤیسینەكا خوە دا بەحسێ‌ ڤێ‌ چەندێ‌ كری و گوتی، نە هەر تشتێ‌ مروڤی خاند یان مروڤی كربیت و دیتبیت، هەمی گاڤان لبیرا مروڤی یە و دەما مروڤ پێدڤی دبیت، ئەو بخو ژ عەقلێ‌ مروڤی یێ‌ (باتن) دهێتە دەر. دەما ئەڤ گوتنە ژی دهێتە بیرا من، یا راست ئەز هەست ببێهن فرەهیێ‌ دكەم، كو پاشخانا بیرهاتن و ئەو تشتێن من دیتین و دسەر من رابورین تێرا هندێ‌ هەنە كو دەما ئەز بمینمە بتنێ‌، من و لاپتوپێ‌ من بكەتە هەڤالێ‌ نڤیسینەكێ‌. 

دكوڤارا ژينى ژماره‌ 14 دا بلاڤ بويه‌
إرسال تعليق