عبدالرحمن بامەرنی
بۆ من گرنگە ئەز ل سەر ڤێ كورتەچیرۆكێ راوەستم و خواندەڤایی بەشداری خواندنا وێ بكەم، ژبەركو ئەڤ كورتەچیرۆكێن بڤی رەنگی، زێدەباری ھونەرێ سەركەفتنێ یێ دارێتنا وێ، تۆماركرنا سەردەمەكێ ھەستیارە ژ دیرۆكا مللەتێ كورد و نەھامەت و مەرگەساتێن ب چاڤ دیتین.
كورتەچیرۆكا (جنوب1)، سەردەمەكی وێنەدكەت بۆ بەری سەرھلدانێ دزڤریت، دەما رژێما بەعسا ژناڤچووی ل سەر دەستھەلاتێ و ھەر تشتێ وێ دڤیا، سڤكاتی، زیندانكرن، ئەشكەنجەدان، دەربەدەركرن، بنئاخكرن و كوشتنا ب كۆم ب ئاشكەرایی دكرن، ل بەر چاڤێن جیھانێ ھەمیێ و ھەر تشتێ ڤیابا دكر و ب سەرێ خوەڤەدبر.
نڤیسەری چیرۆك ب دوو بارھلەگران كورتەچیرۆكا خوە دەستپێكرییە و ئەڤ بارھەلگرێن ھەنێ ل پێنج گوندان دگەرن و ھەر خێزانا پێشمەرگەھەكی لێبیت، ڤێجا ئەندامێن ئەوێ خێزانێ ژن بن، زارۆك بن، پیر بن كێشە نینە و ئەڤە وەك تۆلڤەكرنەك بۆ پێشمەرگەھان، ئەوان سزا بدەت و خێزانێن وان بەرەڤ باشوورێ عیراقێ ب بەت و زاراڤێ (جنوب) كو د ئەدەبیاتا بەری سەرھلدانێ دا گەلەك دھاتە ڤەگێران، ب رامانا باشوورێ عیراقێ دھێت، وەك زاراڤەكێ خوجھێ بەری سەرھلدانێ یە و دەما دگوتی دێ بەرەڤ جنوبی بەن، ھەمیان دزانی كو دێ ئەڤ كەسێن ھەنێ ھێنە نەفیكرن، ب مەبەستا ل پارێزگەھێن باشوورێ عیراقێ بنەجھـ بكەن و رێ ل وان بگرن جارەكا دی ڤەگەرنە سەر گوند و حال و مالێن خوە و ئەڤە ژی جورەكێ جینوسایدەكێ بوو حكومەتا عیراقێ بەرامبەر كوردان ئەنجامددا، دا كەس نەبیتە پێشمەرگەھـ و دیسان خێزانێن وان و زارۆكێن وان دناڤ كەلتورێ عەرەباندا بھێنە حەلاندن و رژێما وی دەمی ھوسان ھزردكر، ئەگەر ئەندامێن خێزانێن پێشمەرگەھان نەفیكرن یانكو ئێدی كەس نابیتە پێشمەرگە و دیسان ئەڤە جورەكێ ڤەشارتنا شكەستنێن خوە ژی بوون بەرامبەر پێشمەرگەھی و چیرۆك نڤیس بخوە ژی ڤێ چەندێ دوپاتدكەت، دەما دبێژیت: "ئەڤە ئەو سزایە، سزایێ حکۆمەتێ دڤیا تولا شکەستنا خوە هەمبەر پێشمەرگەهان ژ خێزانێن پێشمەرگەهان ڤەکەت".
نڤیسەرێ چیرۆكێ ڤیایە دیمەنەكی ژناڤ ئێك ژوان بارھەلگران پیشانبدەت، بەحسێ ژنەكێ ب ناڤێ (فاتما) دكەت و وێ دوو كور بناڤێ (محەمەد و عەلی) یێن ھەین، محەمەد یازدە سالی بوو و عەلی بتنێ سێ ھەیڤ بوون و نڤیسەر فوكسێ دئێختە سەر وێ ژنێ و ھەردوو زارۆكێن وێ، ژ بێ جانسیا وێ، سەرێ سپێدەیەكا زوو و ئێكەم گوند و ئێكەم خێزان ئەو ژن و زارۆكێن وێ بوونە، تێشت نە خوارن، زارۆكێ ساڤا و برسی شیر دسینگێ دەیكا ویدانە و پشتا بارھەلگرێ و ئاسنەكێ رەق و سار، گێژبوون و دلرابوون و نڤیسەر دیمەنەكی دروست دكەت، خواندەڤایێ خوە ب چیرۆكێ ڤە گرێددەت، دیمەنەكێ ناخ ھەژین و دەما مرۆڤایەتی دمریت و د سەر ڤێ نەخۆشییێ را، برس، ترس و چارەنڤیسەكێ نەدیار، دویریا مال، كەس و كارا، زەلام، باب و برا و یا ژ ھەمیا مەزنتر و نەخوەشتر، نەزانن دێ كیڤە چن، ژن و حورمەت و بتنێ و دوو زارۆك دناڤ دەستاندا و ئێك بتنێ سێ ھەیڤی و دا بزانین نڤیسەرێ چیرۆكێ چاوان ئەڤ دیمەنە وێنەكریە: "ترسەک کەتە دلێ فاتمایێ و گری کەتە حەفکا وێ لێ دەرنەئێخست. ژ جەهنەما خودێ وێنەیەک دژوارتر و پر ئاگرتر و نەخوەشتر ئینا بەر چاڤێ خوە. هەم ژ ترسا و هەم ژ شەرما ئێدی پسیار نەکر، هەر چەندە هەر نەزانی جنۆب چیە؟ ئایا جنۆب وەلاتەک دییە، وارەک دییە یان ژی جەهنەمەک دییە مرۆڤان یا چێکری". چیرۆك بەردەوامیێ ددەتە خوە و وێنە رادھێلتە وێنەی و ھەر وێنەیەك ژ یێ دی دلئێشتر. ئەز بەحسا خوە بكەم وەك خواندەڤایەك د سەردەمێ بەری سەرھلدانێ ژیایی و ئەو دیمەن ب چاڤێن خوە ددیتن، دەما زیلێن عەسكەری د تژی زارۆك و ژن و پیر و ئەنفالێن سالا 1988ێ و ئەڤ دیمەنێن ھەنێ و دوبارە نڤیسەرەك وان رۆژان وێنە بكەت و بكەتە كارەكێ ئەدەبی و بەرچاڤ بكەت. ئەگەر بەراوردیەكێ دگەل ڤی وێنەی و وان رۆژان بكەین، ل سالا 1988ێ بوو و ئەم وی دەمی ل تاخێ نەعورێ بووین، زیلێن عەسكەری ب رێز بوون و د تژی بوون ژ ژن و زارۆك و پیران، زارۆكان بەرێخوەددا خەلكی و خەلك ل سەر لێڤێن جاددان نەدشییان ھیچ تشتەكی بۆ بكەن، ئەڤێن د زیلان ژیدا برسی و ترس و چارەنڤیسەكێ نەدیار و دەما چیرۆك نڤیس ڤی دیمەنی وێنەدكەت و دبێژیت: "بەری هنگێ حکۆمەتێ چەند کەسێن ژ رەگەز عەرب کۆم کری بوون دا بەر و گلێش و بەرمایکان د وان وەر بکەن. ئەوان عەرەبان ئاخفتنێن نەخوەش و خەبەر دانە وان و هندەک بەر و گلێش و تیڤلێن زەبەش و گۆندوران د وان وەر دکرن و درووشم بۆ حکۆمەتێ و سەدامی ڤەدان". ھەمان دیمەن ھینگێ ل دھۆكێ ژی دروست دبوون، لێ ئەو كەس ئەگەر عەرەب ژی نەبن، دیڤەلانك و كرێگرتیێن رژێمێ بوون و نڤیسەر دھێت دیمەنەكێ دییێ ھەڤدژ پیشانددەت و ھەر كەسێ چیرۆكێ دخوینیت و دگەھیتێ، بێ حەمدی وی دێ چاڤێن وی تژی رۆندك بن. ژلایەكێڤیە ئەڤ كەسێن حكومەتێ بۆ ڤێ چەندێ تەرخانكرین ئاخفتنێن كرێت و گلێشی و تیڤلێن زەبەشا دوان وەربكەن كەسەك نەوێریت، نەشێت ھیچ تشتەكی بۆ ڤان بێگونەھان بكەت، ژ نشكەكێڤە كەسەك ب ناڤێ (حەجی ئیسف) ل خەلكی دكەتە گازی و دبێژیت: "گەلی كورددا دەیننێ". ئەڤ ئاخفتنا ڤی كەسی بۆ حكومەتێ و داردەستێن حكومەتێ و ئەڤێن رەگەز عەرەب گەلەك یا خۆش بوو و بۆ كوردان ئاخفتنەكا فھێتی بوو و چاوان كوردەك ڤێ زورداریێ قەبویلبكەت و ڤێ گوتنێ بێژیت و ئەڤ كەرب و كینە بەرامبەر نفشێ وی لدەف وی ھەبن؟!!! لێ دەما دیتین (حەجی ئیسف)ی دەستھاڤێتە باجان سوركان و خیاران و ھاڤێتنە ناڤ بارھەلگرێ، خەلك تێگەھشت كو مەبەستا ڤی كەسی ئەوە ئەڤ خەلكێ ناڤ ڤان بارھەلگران ژنن، زارۆكن و برسینە و ئەو پێدڤی خورانێ نە و ئەگەر ب رێكەكا ھوسا نەبیت ئەوان چ دەستھەلات نینن كو خوارنێ پێشكێشی وان بكەن یان بەرسینگا حكومەتێ راوەستن و نڤیسەر ڤی دیمەنی ھوسان وێنەدكەت: " ژ نوو خەلکێ ئەو فەهم کر و زانین ئارمانجا وی چیە. جیرانێن وی ژی خودانێ فێقیان، فێقی هاڤێتن ناڤ بارهەلگران و جیرانێ دی پسکەوێت، کێک و شریناهی هاڤێتن ناڤ بارهەلگرێ و شاگردەکێ فرنا نانی ژی هەر چەند گەلەک زارۆک بوو، لێ ب هەمی شیانێن خوە نان هاڤێتن ناڤا بارهەلگرێ. ببوو بارانا تشتان ل سەر سەرێ هەر دو بارهەلگران، هەر کەسێ چ لبەر دەستی با دهاڤێتە ناڤ بارهەلگرێ و هەتا هندەک پێ حەسیان ئەوان پێویستی ب ئاڤێ ژی هەیە، لەوما ژ بیر نەکرن هندەک شیر و شەربەتێن دناڤ پاکێتان دا ژی بۆ وان هاڤێتن".
چیرۆكێ گەلەك دیمەنێن دی یێن دلئێش و ناخ ھەژین دناڤدا ھەنە، نڤیسەرێ چیرۆكێ ب ھوستایی و لێزان وێنە كێشایینە بەر ئێك و دووماھی و چارەنڤیسەكێ نەدیار، چیرۆك ب دووماھی ئینایە.
ــــــــــــــــــــــــــــــــــ
ـ جنوب1، كورتەچیرۆك، ھیڤیدار یاسین، كوڤارا پەیڤ ژمارە 102، لاپەرە 101تا 104.
ـ د رۆژناما ئەڤرۆ ھژمار (3899)، یا رۆژا 5/1/2026ێ بلاڤبوویە.
ليست هناك تعليقات:
إرسال تعليق