عبدالرحمن بامەرنی
ئەو چەند رۆژ بوون، كامیرا وی ب ستوویێ ویڤە و ل كولانێن ڤی تاخی دگەریت. دبێژنە ڤی تاخی، شێخ مەقسود. ھەر دیمەنێ كەفتبا بەر چاڤكێ كامیرا وی، د چركاند.
وێنێ كۆشتیەكێ بێ گیان. ژ سەروبەرێ كەلەخی دیار، ھاولاتیەكێ سڤیلێ ڤی تاخییە و جلێن ناڤ مالێ ل بەرن. دەڤ و دەڤ یێ كەفتی و ژبلی خوینا ژبن لەشێ وی چوویی و ب عەردیڤە ھشك بوویی، دوو گوللە ژی یێ ب پاتكا وی كەفتین. وێنەیەك بۆ چركاند. بیرا وی ل بەری سەرھلدانێ و (تەلقەتولرەحمە) یا بەعسیان ھات.
ل وێڤەتر، خەبەنكێ دكانەكێ یێ ژبن چوویی و ھێشتا ھندەك دوكێل ژ رەفاتكێن وێ بلند دبیت، سوتنێ ھەمی تشتێن ناڤ دكانێ یێن تێكداین. وێنەك بۆ چركاند. بیرا وی ل كورێ وی ھات، بەری ژ مالێ دەركەفتبا، دا ھێت پێڤە ماچی كەت و وی ب مەبەستا وی دزانی. پارە بۆ دكانێ دڤیان و كورێ خوە یێ بچویك ئینا بەرچاڤێن خوە و ئەگەر تشتێن دكانێ ھەمی ژناڤ بچن، كی دێ باوەریێ بۆ چێكەت، كو دكان یا ھاتیە سوتن.
ل تەنشتا دكانێ، فرنەكا نانی بوو و چ شوینوارێن فرنێ لێ نەماینە، فرن ب تەنیرێ فرنە و ئەگەر تەنیر ژناڤچوو، دێ نانی ب كیرێ ڤەدەن. چەند وێنە بۆ فرنێ چركاندن. بیرا وی ل رۆژێن چەلێ و دەشتانێ ھات، ئار ھەبوو، ئاڤ ھەبوو، ئاگر و دار ھەبوون و قور قورا زكێ ھەمیان بوو.
چەند پێنگاڤێن دی چوو. ل كولانێ زڤری و چەند چەكدار دیتن، رھێن وان ب رھێن سەبرۆیێ دین ڤەدچوون. بەحسێ سەبیكرنێ دكرن. تفێ خوە د دەڤێ واندا نەدگرت و خەون ب حوریێن بەھەشتێ ڤە ددیتن. تەكبیر دكرن، ئەللاھوئەكبەر.. وێنەك بۆ چركاند. بیرا وی ل شەرێ داعش ھات، دەما ب سەر شنگالێ دا گرتین، ھەمیان ئەڤ رھە بەردابوون و تو بێژی دیرۆك دێ چەند جاران خوە دوبارە كەت.
سێ كولانان وێڤەتر، ئاڤاھییەكێ سێ نھوومی یە و تەرمێ شەرڤانەكێ، دناڤ دەستێن چەند چەكداراندایە. وێنەك بۆ چركاند. چەند چەكدارێن دی ل بنێ ئاڤاھی یێ تەكبیرێ دكەن و ب ناڤێ خودێ ھیتافان ددەن. وێنەك بۆ وان ژی چركاند. دگەل بلند بوونا دەنگێ تەكبیران، چەكدارێن ل سەر ئاڤاھی تەرمێ وێ شەرڤانێ دانە بەر پێھنا و د ئاڤاھیدا ھاڤێتنە خارێ. كامیرە ژ دەستی كەفت و چ وێنێن دی نەھاتنە چركاندن.
ـــــــــــــــــــــــــــــــــــــــ
دەنیس عەفرینی: شەرڤانەكا كوردە و ل رۆژئاڤایێ كوردستانێ و ل (تاخێ مەقسوود)، دكەڤیتە شەرێ بەرگریكرنێ دژی مورتەزیقێن دڤیا تاخی ھەتكبكەن و تا دووماھی فیشەك شەرێ خوە دكەت و دشێت بیست مورتەزیقان بكوژیت. شەھید دبیت. مورتەزیقە دگەھنێ و كەلەخێ وێ د ئاڤاھیەكێ سێ نھومیدا دھاڤێژنە خارێ.
سەبرۆیێ دین: زەلامەكێ د ژیێ خوە یێ دەھكێن چارێ دابوو و یێن دین بوو، سەرۆریھێن وی ھۆڤاتیا وی نیشانددا.
3ـ رۆژناما ئەڤرۆ ھژمار (3910)، یا رۆژا 20/1/2026
ليست هناك تعليقات:
إرسال تعليق