عبدالرحمن بامەرنی
مە بەحسا ژنا دووێ دكر و مە بەحسا، فرەژنیێ ژی دكر. یا راست ئەم ژ پێنج كەسان زێدەتر بووین و ئەم ب بوینە دوو بەش، ئەم ھندەك دگەل بیرۆكەیا فرەژنیێ بووین و ئەم ھندەك دژی بیرۆكەیا فرەژنیێ بووین و تشتێ سەیر، مە ھەردوو ئالیان خوە ب چالاكڤانێن جڤاكێ سڤیل دزانی. مە ئەڤێن باوەری ب فرەژنیێ ھەی، بەھانا مە بۆ ڤێ چەندێ، ژمارەیا زوورا قەیرە كچان و ئەرێ گونەھا ڤان كچان چییە كەس دەرگەھێ مالا وان نەقوتیت و چەند ب ناڤ سالڤە بچن، چانسێ شویكرنا وان كێمتر لێبھێت و ئەگەر فرەژنی ھەبیت، رەنگە گەلەك ھەبن و ل بن ھەر بەھانەیەكێ ھەڤژینا دووێ ژی بینن و بڤی رەنگی دێ بالانسا كومەلگەھی ئالیسەنگ بیت.
ئەم ئەڤێن دژی بیرۆكەیا فرەژنیێ، مە زێدەتر بەحسا مافێن ژنان دكر، دەما فرەژنی ھەبیت دێ كێشە ھەبن، ژنەك ل سەر حسابا ژنەكا دی دێ ژیانێ كەت و ئەم ب ھیچ رەنگەكی دگەل ڤێ چەندێ نەبووین. مە ھندەكان ژی بەندك لدویڤ ھەردوو جینان بەرددا و مە دگەل ھەردوو ئالیان ھندەك راستی ددیتن و ھەڤالەكێ مە یێ ئاخفتنا وی دەرمان، چەند جار بزاڤدكرن ئەو ژی خوە بدەتە دگەل ئالیەكی و راستی ژی بیت ئەم پێدڤی كەسەكی بووین، مە ل خالەكێ بگەھینتە ئێك، ل لێزڤرینێ من گوتێ: "كا راوەستن ب زووری ھەڤالێ مە دڤێت ب ئاخڤیت، بھێلن بلا دیتنا وی ژی ھەبیت خوە ئەگەر بەران ژی د مە وەربكەت". بوویە ئەڤە خۆش دەلیڤەیە ئەم ھەناسەیەكێ بدەینە بیرۆكەیێن خوە یێن جودا و ھەر ئالیەكی ژمە حەزدكر ئاخفتنا وی بۆ ئالیێ وی بیت و بەندك بدویڤ ویڤە بچیت، لێ ھەڤالێ مە گوت: "ھین ھەردوو ئالی یێ بەحسێ مافێن ژنان دكەن و ھین یێ بەحسا جڤاكێ سڤیل ژی دكەن، ئەرێ ھین دزانن پوختێ تێگەھێ جڤاكێ سڤیل، ب مەبەستا كاركرن بۆ بدەستڤەئنانا بەرژەوەندی و بەھایێن تاكان و كومەلێ پێكڤە؟!". ھەڤالێ مە راستگوت و ھەردوو بیرۆكەیێن مە، دێ بەرژەوەندیێن ھندەك ئالیان تێكددەن و م بابەت ب دووماھی ئینا.
ـــــــــــــــــــــــــ
رۆژناما ئەڤرو ھژمار (3894). 21/12/2025
ليست هناك تعليقات:
إرسال تعليق