ل چایخانەیا ژنمریا

عبدالرحمن بامەرنی

نزانم بۆ چ شول بوو، بەرێ من كەفتییە كولانكا بۆ سەردابا فێقی دچیت. ئەڤ كولانكا ئەز ژێ دبێژم، ب دیوارێ مزگەفتا مەزنڤە، چەند دەبكەك وەك تەختكێن روونشتنێ درێزكرینە و ب چایخانەكێ ڤەدچیت. دگەل دەربازبوونا من، هەڤالەكی گازی من كر و دەما لێ زڤریم، باش بوو بیردانكا من هاری من كری و من گوتێ "خالد" تووی، كرە كەنی و مە ئێك دوو هەمبێزكر و ئەم پێكڤە روونشتینە خارێ و بۆ من گازێ چایەكێ كر. مە چایێن خوە تێكڤەدان و دگەل فرا ئێكێ، گوتە من: "ئەڤە چ جارەكێ ب وێ چایێ ڤە ناچیت، ئەڤا ل سالێن هەشتێیان مە ڤەدخار، چایا هینگێ تام تام بوو و خودان چەندێ دویربایە، بێهنا وێ هاتبا مرۆڤی، مەژیێ مرۆڤی ڤەدبوو". دگەل سەرهەژاندنا من ب گوتنێن وی، جارەكا دی بەردەوامی دا ئاخفتنا خوە و گوت: "بیرا تە ل چایخانا تەحسین تاهای ژی دهێت، وی دەمی ئەو چایخانە ل نیڤا سیكێ بوو ل تەنشت جیهانا دەمژمێرا یا نوكە؟". من گوتێ، باش بیرا من دهێت. پێڤە چوو و گوت: "پتریا رۆژان سترانا (باران باری باری، یا حەسەن شەریفی) ل سەر مسەجلێ بوو و ئەز نوكە چەند خەریبیێن وێ چایخانێ و دەنگێ حەسەن شەریفی یێ وی وەختی دكەم". هەڤالێ من ئەڤە (21) سالن دهۆكێ نەدیتی و هەر تشتەكێ هاری بیردانكا وی بكەت، یا قەست كریێ و یێ بۆ من بەحس دكەت، گوت: "ئەڤە حەفتیەكە ئەز ژ ئەلمانیا ڤەگەریایم و هەر رۆژ ئەز دهێمە ڤێ چایخانێ و چایەكێ ڤەدخووم، تو دزانی بوو؟ من گوتێ نە. گوت نێ ئەڤە چایخانا ژنمریا نە و دەما كەسەكی ل ئەلمانیا ناڤێ ڤێ چایخانێ گوتی، بۆ من بۆ مەرەق و هەر دەما بهێمە كوردستانێ، قەستا ڤێ چایخانێ بكەم، من گوتێ، نەبێژی نوكە تو یێ مایە بێ ژن؟! كرە كەنی و گوت: برا نە هەر كەسێ لڤێ چایخانێ چایێ ڤەخووت یان كو ژنا وی یا مری و لدوور سەرێ خوە زڤری، كا كەسەك گوهێ خوە ددەتەمە یان نە و ئەم رابووین و ب ناڤ سیكێ ڤە چووین.
ـــــــــــــــ
رۆژناما ئەڤرو ھژمار (3908) یا رۆژا 2026/1/18