عبدالرحمن بامەرنی
زاراڤێ (حزب) هەر بۆ حزبان دهێت و زاراڤێ (كەف)، ب مەبەستا ئەو حزبێن كێرفێ وان زوی بلند دبیت و زوی دادكەڤیت. بۆچی من (كەف) بكارئینا؟ رێك من بەحسا نموونا كەفا نیسكێ یە و ئەو دناڤ فەرهەنگا كوردیدا گەلەك یا بەربەلاڤە، دەما دبێژن وەكی كەفا نیسكێ یە!.
ل هەرێما كوردستانێ مە دوو حزبێن سەرەكی هەنە و چەندین حزبێن دی، هندەكان ژوان مێژوویەكا درێژ هەیە و خەباتا چیایی و شەهید هەنە، ئەز وان ب حزبێن كەف ناڤ ناكەم. ئاراستەیا حزبێن ئیسلامی ژی دیارە و ئەڤا من دڤێت بەحسبكەم، واقعێ هەرێما كوردستانێ یە (دوو حزب، دوو هێز، دوو زوون)، هەر چەندە ئەڤە راستیەكا تەحلە، لێ راستیەكا دی ژی یا هەی، ئەو ژی مە بڤێت و نەڤێت ل هەر زوونەكێ پرت و بلاڤەیی بكەڤیتێ، هەڤسەنگییا هێزێ ل هەرێما كوردستانێ هەمیێ تێكدچیت! بۆچی من ئەڤە گوت؟ ژبەركو ئەو پرت و بلاڤەیی، ل سەر حسابا وێ هەڤكێشەییێ دروست دبیت و ئالیەك ل بەرامبەری یێ دی ئالیسەنگ دبیت.
رەنگە هەبن بێژنە من فرە حزبی ژ نیشانێن دیموكراسیەتێ یە و ئەڤە تشتەكێ ئاسایی و تەندروستە، ئەز ژی دبێژم ئەڤە تشتەكێ ئاسایی و تەندروستە، لێ ب مەرجەكی، هەر گوهورینا بهێتەكرنێ، ئەو گوهورینە ل هەردوو زوونان بیت و ژ پێگەیێ هەردوو حزبێن سەرەكی كێم بكەت، هینگێ دێ تشتەكێ ئاسایی و تەندروست بیت، لێ دەما ئەو گوهورینە بتنێ ژ ئالیەكی بخووت و گوهورین بتنێ ل ژمارا كورسیان دیار بیت، هینگێ كارەساتە، دێ تێكچوونا هەڤسەنگییێ ب زیقی دیار بیت و كارتێكرنێ ل هەرێمێ هەمیێ كەت و نموونەیەكا بچویك بینم، دەما خوپیشاندانێن جەماوەری یێن بەری چەند سالان بتنێ ل زوونەكێ دروست دبوون، چ گوهورین ل شێوازێ یان تیرازێ حكومەتێ هاتەكرنێ؟ هیچ.
ژبەركو فشارێن خوپیشاندانان، چ كارتێكرن ل زوونا دی نەدكرن و بتنێ ل وێ زوونا خوپیشاندان لێ دهاتنەكرنێ، دامودەزگەه دهاتنە گرتنێ، پەكەفتن دكەفتە ژیارا هاولاتییان و ئەگەر وێ فرەحزبیێ، سەنگا خوە ل زوونەكێ هەبیت و ئەو سەنگە چەند بیتن ژی، ناچیتە د حسابێن هەڤكێشەیێدا و شوینا ببیتە ئالاڤەك بۆ فشارێ ل سەر ڤان هەردوو حزبان و چاكسازی بهێنەكرنێ، بەرۆڤاژی بتنێ هەڤكێشە تێكدچیت و ئالوزی دروست دبیت، وەك نوكە و ئەڤە زێدەتر ژ سالەكێ دەرباز بوو و هێشتا حكومەتا هەرێما كوردستانێ نەهاتیە پێكئینان.
یا من دڤێت بگەهمێ، واقعەك ل هەرێما كوردستانێ یێ هەی و دا ئەڤ واقعە سەر راست بیت، دڤێت هاولاتییێ هەرێما كوردستانێ دڤێ هەڤكێشەییێ بگەهیت، دەما ئەڤ هەردوو هێزە ل بەر سینگێ ئێك بن، دێ خزمەت زێدەتر هەبن، دەرگەهێن گەندەلیێ بخوە دێ كێم بن و خزمەتگوزاری بخوە دێ زێدە بن و هاولاتی دێ هاولاتی بیت، ب هەمی رامانا هاولاتیبوونێ.
ــــــــــــــــــــــــــــــــــــ
رۆژناما كوردستانی نوێ ھژمار (9574)، یا رۆژا 2026/1/6
ليست هناك تعليقات:
إرسال تعليق