عبدالرحمن بامەرنی
مەبەستا من ب جینوسایدەكێ، ئەو كۆمكۆژی و دەردەسەریێن ب سەرێ مللەتێ كورد ھاتین، كو دەھان چیرۆكێن ڤەشارتی یان نیڤ تەمام مە یێن ھەین و ھندەك لڤێرە و وێراھەنێ دھێنە بەحسكرنێ، لێ ئەوا گەھشتیە مە تشتەكێ كێمە و دروست نەگەھشتیە یان كێماسی د روودانێدا ھەنە و ئەگەرێن روودانێ و ئەنجامدەر و ئەڤێن ب جینوسایدێ رابووین كەسێن بەرزەنە و ئەگەر ھەبن ژی، راستییا وان یا شێلوبێلە و دەما ئەز بەحسا كارەكێ ئەدەبی دكەم، رێك من بەحسا ڤان ھەمی كێماسی و ڤەقەتیانایە. ئەڤ چەند رێزێن پێشگوتنێ ئەو بوون دەما مە بەحسا دووھەمین كونفرانسێ زانستی یێ نێڤدەولەتی یێ جینوسایدێ دكر، ئەڤێ ژ لایێ وەزارەتا رەوشەنبیری یا حكومەتا ھەرێما كوردستانێ ل رۆژێن 25 و 25ێ ئابا 2025ێ ل سلێمانیێ برێڤەچووی و ناڤونیشانێ ڤەكۆلینا من (مەزراندنا جینوسایدەكا ئێزدیان دكارەكێ ئەدەبیدا).
رەنگە جوداھیا ڤەكولینا من ئەو بیت، ئەم چاوان بشێین كاری ل سەر جینوسایدەكێ بكەین و وێ جینوسایدێ بكەینە كارەكێ ئەدەبی و من ئەڤە كرییە. ئەڤ جینوسایدا من بۆ ڤەكۆلینا خوە دەستنیشانكری، قوربانیێن وێ كوردێن ئێزدی نە و دەم و جھێن جینوسایدێ د دیار كرینە، ئەڤ كەسێن تێدا بووینە قوربانی كو ژمارا وان 380 كەس بوون، زارۆك بوون، ژن بوون، كەسێن دانعەمر بوون و لدویڤ شاھدحالان خوە ژنێن دو گیان ژی ژێ قورتال نەبووینە و ب درەندەترین شێوە ھاتینە كۆمكوژكرن و نە بتنێ ئەڤە، زارۆك و كچ و ژن ژی ھاتیە رەڤاندن. دەما من كار ل سەر ڤێ كۆمكوژیێ دكر، دووھەمین كونفرانسێ زانستی یێ نێڤدەولەتی (جینوسایدی كورد.. رەنگدانەوەی لە (ئەدەب ـ ھونەر ـ میدیا)دا دەرگەھێ وەرگرتنا ڤەكولینان ڤەكربوو و من ب دەلیڤە دیت، ئەز كاركرنا خوە ل سەر ڤێ جینوسایدێ بەلگە بكەم و ئەڤ ڤەكولینە ببیتە ھاندەرەك بۆ گەلەك نڤیسكارێن دی، ژبەركو مە ب دەھان كۆمكوژیێن دی یێن ھەین و كار ل سەر نەھاتیە كرنێ، مە ب دەھان روودان و كارەساتێن دلتەزین یێن ھەین و خەلكەكێ بێ گونەھـ ب درەندەترین شێوە یێ ھاتیە كۆمكوژكرن و تالانكرن و كچ و ژن تێدا یێن ھاتینە سەبیكرن و كار ژبۆ نەھاتیەكرنێ، چ ئەو كارنەكرنە ژ بەر كێمیا ژێدەران بیت، كێمییا ڤەگێر و شاھد حالان بیت و من ئەڤە كر، من پوختێ ڤەكولینا خوە پێشكێشی لیژنا بەرھەڤكارا ڤێستیڤالێ كر و خوشبەختانە رێ بمن دان ئەز كاری ل سەر ڤێ ڤەكولینێ بكەم و من ئەڤە كر. من دەست ب نڤیسینا ڤەكولینێ كر و دگەل ڤێ چەندێ ژی من كار ل سەر وێ جینوسادیێ كر و من رۆمانەك ژێ نڤیسی و وەك پلانا من بۆ خوە دانایی و وەك دیار، دڤیابا ل سالا بوری ئەڤ كونفرانسە ھاتبایە ئەنجامدان و ھاتە پاشخستن. لێ من كار ل سەر رۆمانا خوە كربوو و ئەڤێ ڤەكولینێ كارێ من یێ نڤیسینا رۆمانێ ب ساناھیتر لێكر، لێگەریانێن من ل رۆمانێن ل سەر كۆمكوژیان ھاتینە نڤیسین و ئەو چ پیڤەرن دڤێت ل بەر دەست ھەبن تا مرۆڤ بشێت كۆمكوژیەكێ بكەتە رۆمان و ئەز باوەردكەم خواندنا وێ رۆمانێ دگەل خواندنا ڤێ ڤەكولینێ پێكڤە، دێ دەرگەھێ نڤیسینێ ل بەر گەلەك نڤیسەران ڤەكەت، ئەو ژی كاری ل سەر ڤان كۆمكوژیان بكەن، ھەر وەكو من گوتی مە دەھان كۆمكوژیێن دی ھەنە و نەھاتینە ساخكرن و ئەڤە مێژوویا مەیە و دڤێت ئەم لڤێ مێژوویێ دەركەڤین و لێ ببینە خودان چ خراب چ باش، دڤێت ئەم ھیچ تشتەكێ شەرم نەكەین و خوە نەدەینە پاش.
بوچی من ئەڤا ل سەری نڤیسی، ددەمەكیدا من وەك ڤەكولین ژی پێشكێشكریە؟ ژبەركو مە كوردان دیرۆكا خوە نەنڤیسایە و ئەم گرنگیێ پێنادەین، نە بتنێ جینوساید و كارەسات و روودانێن دلتەزین، بەلكو ئەم دیڤچوونێ بۆ ھیچ تشتەكێ خوە ناكەین، شوینوارێن خوە، مێژوویا خوە، دابونەریتێن خوە و بۆ فلكلورێ خوە و ئەم دیڤچوونێ بۆ راستی و دروستییا ڤان چیرۆكە سەرهاتییان بكەین. ئەز بەحسا مێژوونڤیسییێ ناكەم، ئەز بەحسا بەلگەكرنێ، ئەز بەحسا نڤیسینا وێ روودانێ دكەم بەری بەرزە بیت و ئێدی ئەم خوزییا بۆ رانەهێلین، وەك مە خوزی بۆ گەلەك تشتێن دی راهێلایین و مە گوتی خوزی مە دیڤچوون بۆ كربایە، بەری ژناڤ دەستێن مە دەركەڤیت و چەند روودان و چیرۆك و سەرهاتی یێن هاتینە بەرگوهێن مە و ب زاردەڤ مە یێن گولێ بووین، لێ مە تومار نەكرن و هەر چنەبا، ئەگەر مە توماركربانە، دا ئەڤرو كەڤنە بەردەست و ئاخر مێژوو هووسا دهێتە و توماركرن.
ـــــــــــــــــــــــــــ
گوڤارا مەحفەل ھژمار 37 یا زڤستانا 2025ێ.
ليست هناك تعليقات:
إرسال تعليق