بحث هذه المدونة الإلكترونية

pertook

pertook

2014/07/15

ئەز دتاریێ‌ دا دشێم ئەز بم..

           
 عبدالرحمن بامەرنی

دناڤ لاپەرەكێ‌ (ئەی فور) دا
ئەز خو تاقی دكەم،
لڤی لایێ‌ پەنجەرێ‌، چاڤەرێی نە هاتنا كەسەكی دكەم.
وەرە گێسكی بدە نڤیسینێن من
توزا سالەكێ‌ پێڤە دیارە.
رستەیەك ژ لاپەری درژیتە سەر من
پرتێن من ل هەر جهەكی بژالە دبن
هەمی تشتێن منێن بژالە یێن د(فایل بوكس)ەكی دا
درستەیەكێ‌ دا هەمی دەرگەهان دقوتم!
خوە ژ ماندیبونا پستویێ‌ من بدەنە پاش
ئەز دتاریێ‌ دا دشێم بتنێ‌ ئەز بم!
كەس بو من چ زەنگا لێنەدەت
ئەز دەرڤەی بازنەمە.
ئەز دتاقیكرنا خوە دا سەر نەكەفتم..


باران دڤی لاپەرەی دا
جهێ‌ تایتلێ‌ سەرەكی دگریت.
باران ل هەر جهەكی بهێت
مروڤان تەر دكەت.
باران بو هەمی لایەكی دشێت لەیستنێ‌ بكەت
باران هەمی تشتان دشێت بشوت!
باران ب سوزانیەكێ‌ ڤە دچیت
هەمی دەستێن خوە بو درێژدكەن.
ئەز فێر نەبویمە دەستێ‌ خوە ل بەر كەسێ‌ درێژ بكەم
ژیان ل سەر پەرێن بەلاتینكەكێ‌ یە و
هێشتا وەك زاروكەكی ددویفرا دكەمە غار
دەستێ‌ من ل بەر ژیانێ‌ یێ‌ درێژكریە و
ئەز ب چ قەرەچان ژی ڤە ناچم.
ئەز دتاقیكرنا خوە دا سەر نەكەفتم..

ئەز و باران و ژیان
ئەكتەرێن سەرەكی یێن ڤی لاپەرەی نە
ئەی فور، تێرا نڤیسینا مە هەر سێیان ناكەت.
دیالوكا مە نەشێت
خەونێن زاروكان بكەتە راستی.
ژیان روندكەكە ل بەر دەرێن دوكانان،
ب شەڤێ‌ مێژوا ستێران تومار دكەت.
لڤێرە باران دباریت
مروڤان بارینا بارانێ‌ پێخوشە و
ل رەخێ‌ دیێ‌ ڤێ‌ پەنجەرێ‌
ل خەونێن كچەكێ‌ تاری یە!
 كەس چیروكا كچینیا وێ‌ نزانیت.
ئەز دتاقیكرنا خوە دا سەر نەكەفتم..

هەمی تشتێن ل سەر ڤی لاپەری نە راستن
باران ل سەر ڤی لاپەری ژی درەوە و
دەستێ‌ من ب پرچا بارانێ‌ ڤە یە
ئەز هەمی تشتان ژێ‌ دزانم
باران نەشێت هەمی تشتان بشوت.
ئەز و ژیان و باران
ئەكتەرێن سەرەكی نە دڤی (ئەی فوری) دا
ئەم بەركێن دومینێی نە و
 بەری دوو شەش مە قفل بكەت
ئەز د تاقیكرنا خوە دا سەرنەكەفتم..

إرسال تعليق