لاپتوپ...........
عبدالرحمن بامەرنی
Bamerni77@yahoo.com
هەر ئێكی برەنگەكی دەركەتنا سێرانان پێخوشە و هەمی ژی چاڤەرێی روژا ئەینی یان هەر بێهنڤەدانەك هەبیت دا دگەل خێزانا خوە دەركەڤن. لدەف خەلكێ ناڤەراست و باشورێ عیراقێ دەما دهێنە كوردستانێ، ژ گەرما هاڤینێ و توزێ دویر دكەڤن و كەش و هەوایەكێ چیایی د ببینن و ب ئازادانە ڤی بایی دهەلكێشن، دەما ئەو دهێن خارنا خوە دگەل خوە دئینن و لبن دارەكێ دروینن و سێرانا خوە ب بێدەنگی دبەنە سەر.
لدەف گەنجان پێناسەیەكا دی هەیە، بتایبەت ئەڤێن دویر دچن و قەستا وەلاتێن دی دكەن، هەر چنەبیت ئەوان ژی پیچەكا مافی یا هەی، فشارا ل سەر ملێن خوە كێم بكەن، ئەڤە بخو ژی دەركەتنەكا تەندروستە ئەگەر یا مفادار بیت و بو گەشتیاری و جهێن گەشت و گوزاری بیت.
لدەق ژنان و كچان ژی تشتەكێ دی و جوداهیا خوە هەیە. نە بتنێ جەژنە، بەلكو ئازادكرن و ئارامكرنا مێشكێ وانە، هەر چنەبیت دڤێ روژێ یان دەركەتنێ دا هەست ب هەبونا خوە وەك رەگەزێ مێ دكەن و ئەو دروینن و زەلام جهێ وان دگریت. نە بتنێ ئەو دكەیف خوشن كو برێكا سێرانێ ژ كونجا مالێ دەردكەڤن، بەلكو بو وان گەلەك خوشە دەما دبینن زەلام ژی پیچەك ژ زەلامینیا خوە كێم دكەت و هندەك خارنان چێدكەت.
لدەف خودانێن رەزا و ئاقارا ژی دل ئێشیی یە، بتایبەت ئەڤ خێزانێن زاروكێن خو شیرەت نەكەن و دچنە ناڤ پێوانێن وانا و هەر تشتێ دەستێ وان بگەهتێ دڤەرەنن یان بكەیفا خوە ئەڤ سێران چیێن هەنێ داران دبرن و پێژانان خراب دكەن و گەلەك جاران ژی دارێن بەری ژی ددەنە بەر داس و بڤرێن خوە.
ئەڤا ل سەری دیتنا من بو دەما ئەز سەروچاڤێن خەلكی دبینم، كو هەر ئێكی سێران پێخوشە هندی ئەو پێناسەیێ ددەتێ و دێ مەرەما وی ژ وێ دەركەتنێ چبیت. لێ ئەڤە بتنێ بەس نینە كو بو ڤێ نڤیسینا خوە یا كورت ئەز ڤی بابەتی بینمە زمان. سێرانێن هەمیان ژی بگشتی ئەڤێن لخارێ نە، خارن و قازانێن حەشاندی، ئیپراخ، ترشك، كێپاری، برنج و ساڤار و گوشت و تكە و چاو و سندوقێن بیبسیا و كارتونێن ئاڤێ وووووو كو ئەز نەشێم هەمیان بەحس بكەم. تشتێ دژی داوەتن و دەنگێ سترانا و دێ بینی دەرگەهێ ترومبێلێ یێ ڤەكریە و كاسێتەكا ل سەر و گەنج ملێن ئێك دگرن و داوەتێ دكەن یان ژی ئەگەر جهـ یێ خوش بیت و عەرد یێ راست بیت و كەڤرو بەرەزیرك هەبن، ژن و زەلام دێ بنە دوو جوین و كێل و بێلانێ دكەن، ئەڤە ژبلی هەمی یاریێن دی كو یا بویە عادەت سێرانێن مە ل سەر دچن.
راستە هەر كەسەك یێ ئازادە و هەر ئێك دێ وەك خوە ژیانا خوە و خوشی و نەخوشیێن خوە بەتە سەر، بەلێ سێران نەهوسانە، سێران دویركەتنە ژ شەمەتا جاددێ و كولانێ و بازاری و كاری و ئارامكرنا مێشكی یە.
ئەڤێ جارێ ژی وەك هەمی جارێن چوویی ئەز نەشیام كەسێ رازی بكەم كو وەك من بڤێت سێرانێ بكەین، ژبەركو ئەز ئێكم و ئەو گەلەكن، رونشتنا بتنێ ژی گەلەك جاران فایدێ من نەدكر و نە چار دبوم بەشداریێ دگەل وان بكەم، ژبەركو ئەز ژی بەشەكم ژ خێزانێ و دڤێت یێ نامو نەبم، هین بێژن ئەگەر من گوت بلا یێ نامو بم و تە گوت دێ نامو بم و هەمیا گوت بلا نامو بین چ چێبیت، ئها ئەڤە ئەو بابەت بو كو من ڤیایی ژ مێشكێ خوە ڤەگوهێزمە لاپتوپێ خوە و نزانم دێ چەند یێ سەركەتی بم و دێ چەند هێتە خاندن.
ليست هناك تعليقات:
إرسال تعليق