گرگرا عەوران ئەزمانێ وی بەرەڤ خریانەكا بچویك ڤەدبر! بەری ل سەر وان كوفریا وەك هەر جار بهێتە پاشڤەبرن، هەر زوی شیا وێ سەرداچوونێ د گەوریا خوە دا داعویریت.
ـ ژبیرنەكەی ئەڤ شەڤە بتنێ ئەز دشێم دەركەڤم؟ خو گیرونەكەی؟ چ جلك بكەمێ؟ مكیاجی بدانم یان نە؟. ئەڤ پسیارێن هەنێ فلاش باكن و هەمی ئەو دەنگ بێدەنگ كرن، دەما خوە هاڤێتیە بەرێڤەی دەروكێ حەوشێ و ڤێجارێ ژی بەری بدروستاهی ژ مال دەركەڤیت، كتەكا نەعالێ شپێن ژ پاتكا وی ئینا.
هەر چەندە بارانەكا هویرك دباری، لێ نەعیمێن عەسمانی تشتەكێ دی دگوتن، عەوران هندی ملێن خوە دبەر ئێكرابربون، باژێر هەمی گڤاشتبو سەر ئێك و هەر كەسێ لڤی دیمەنی سەحكربایە، دا بێژیت، ئەڤ شەڤە توفانا نوحی دێ لڤی باژێری دوبارە بیت.
جگارە ژ پاكیتێ دەرئێخست و كرە دناڤ هەردوو لێڤێن خوە را و ما لهیڤیا دەستێ خوە یێ دی، كا دێ دكیش بەریكێ دا چیتە سەر چەقماقێ. بەری ئەو پەنجەرێن دكەڤنە هنداڤ جاددێ بهژمێریت كا چەندا ژێ روناهیێن وان دهلن، بیر ل كەر بلوكێ خودانێ كیسكی دكر، كو چەند جارەكێ ڤیابا چاڤ چەرینەكێ ل بەشێ ناڤخویێ كچان بكەت، دوكێلا جگارا وی حەزێن نڤیسینا چیروكەكێ لدەف وی خورتتر لێدكرن.
خوزیێن سیسركا، ئەو شەرم ژ كەسێ ناكەن و تا سەرشو ژی بو وان یا دەستویر دایە. خوزی چاڤێن وان یێن من بان، دا ژوور ژوور قەست كەمێ. نوكە ئەو چ دكەن؟ چ جلكێن شەڤێ ل بەرن؟ ئەتەكێن وان ب لەشێ وان ڤە نیسەك بوینە. كچێن سنێلە و گەنج حەزدكەن تەماشای بەژن و بالا خوە بكەن. چاڤێن وان دچنە مێیاتیا وان، بتایبەت ئەگەر د سەرشوێ ڤە بن و چپكێن ئاڤێ ژ داڤێن پرچا وان دكەڤنە سەر مەمكێن وان و گرێل دبن، ژ سەرێ بشكوژێن وان ڤەدپەشن و دبژكنەڤە یان دەما ل بەر قودیكێ دەستێن خوە دپرچا خوە دا دئینە خارێ و لێڤێن خوە دگەزینن. دتەمەنێ وان دا كەنی گەلەك جان ژ دەڤێ وان دەردكەڤیت. ئەو چاوان شانازیێ ب مێیاتیا خوە دبەن؟ پرێڤەچوونا وان یا وەكو مەشا وەردەكان، چاوان ب بن چاڤكی لدوور خوە سەح دكەن كا چاڤێن چەند كوران ددویفرا دخشیێن، ئەو چاڤێن هەنێ چەند ژێ گەنجن، كورن، مەزنن پیرەمێرن ب ژن و نەڤینە. قارەمانیێن خو، ئەو بو كوران چ دبێژن؟ ئەوان ئێك بتنێ پێ بەسە یان حەزدكەن دەستهەلاتا خوە ل سەر نفشێ نێر بهێلن و ب سحرا مێیاتیا خوە شاعر و شێت و بەهرەمەندان تژی كولانێن باژێری بكەن؟ باشە تو بێژی هەر ژوورەكێ چەند كچ تێڤە بن؟ نوكە چەند دخوینن و چەند ژێ یارییا ب ئێك و دوو دكەن و لێڤێن ئێك و دوو سوراڤ و سپیاڤ دكەن، نوكە چەند دسەرشوێ ڤە نە و چەند سەرێ خوە حلی و ڤەحلی دكەن؟ ئەو چاوان دكەڤنە سەر جهـ و بالیفكێن خو. بتنێ دنڤن یان جوت جوتە و دەستێ خوە دبن سەرێ ئێك و دوورا دبەن و سینگێ خو ب ئێك ڤە دگڤێشن؟
ئەڤ دیمەنێن هەنێ هەمی ئەو بون یێن دناڤ دوكێلا جگارا خودانێ كیسكی دا بلند و بلاڤە دبون، تابلویەكێ جوان بو و هەر كەس دشیا بخوینیت، بتایبەت كێشا دكێلا جگارێ سەمتا پەنجەرێن بەشێ ناڤخویێ كچان دگرت، ئەوێ دكەتە لایێ دی یێ جاددێ، دەما سیبەرا پرێڤەچوونا وێ پیاسێن خوە دناڤ ڤی تابلوی دا كێش دكرن!
جگارە هێشتا یا دناڤ لێڤان را و هێشتا چەق چەقا چەقمەقا وی یە و ژ نشكەكێ ڤە بشكورینەكێ لێڤێن وی گرت، لێ ئەڤ بشكورینە نە یا گوریا وێ چەقمەقێ بو، رەشاتیەكێ ژ دویر ڤە ئیشارەت دایێ و نەزانی ئەو بنك ڤە بچیت یان خوە لێ بگریت كو ئەو بنك ڤە بهێت. رەشاتیێ هەر خوە نزیك تر دكر و دەنگەك ژێ بنك وی ڤە دهات، بەلێ یێ پشت راست نەبو ئەو دەنگێ وێ یە یان نە. ئەگەر ئەو ژی بیت، ئەو نەدشیا ب ناڤێ وێ گازی بكەتێ! هەر چەندە لڤی تاخی دەنگێ زارویان ژ هەمی تشتەكی بلندترە، دەنگێ زارویێن باژێری هەمیێ لڤی تاخی خرڤە دبن، هەمی ژی یێن دناڤ مەژیێ وی دا. دوو سێ پێنگاڤێن دی خو نزیك كر، دبیت ئەو نەبیت، ئەو رەشاتیا خودانێ كیسكی بیت و ئێك ژ وان تابلویان بیت ئەڤێن ژ جگارا وی بلند دبن و لدویڤ خەونێن خوە هاتبیت. لڤی باژێری هەمی لدویڤ خەونێن خوە دچن، خودانێ كیسكی خەونێن خوە هەنە و وی ژی خەونێن خوە هەنە و دەنگێ زارویان ژی خەونێن خوە دڤێن.
جهـ و دەمێ نڤیسینا ڤێ چیروكێ ل پیشانگەهەكێ یە و ژ كومەكا تابلوییان پێكدهێت، هەمان ئەو جهـ و دەمن یێن تو نوكە تێدا دژی. مروڤێن ڤی باژێری ژی، هەمان ئەو مروڤن یێن ژناڤ تابلویێن دكێلا جگارا خودانێ كیسكی دەردكەڤن و هەمی دەنگ ل بەر پەنجەرا من خرڤە دبن و ب ساناهی دیوار و پەنجەرەیا من دبرن و دهێنە دژوورا من ڤە و دچنە دناڤ مێشكێ من دا.
هەر چەندە هەمی حەز ژ چوونا ژ دەرڤە و پیاسێن جاددێ و دومینا چایخانا و خواندنا روژنامە و كوڤاران دكەن، لێ من تاقەتا چ ژ ڤانە نەمایە. مالا من نزیكی بەشێ ناڤخویێ كچانە و كچەكێ ژی هەمی دەمێ من یێ دگەل خوە بری و ئەز گەلەك یێ بێ تاقەت كریم. ژبلی من و چاكیتێ من یێ هلاویستی و پاكیتا من یا جگارا ل سەر مێزێ و تەبلیكا جگارا و چەقماقەكا ئاگر نەخوش، ئەز نەشێم بیر ل چ تشتەكێ دی بكەم. دەست ئێش، تەمبەل، چاڤەخوور و هەمی تشت دژوورا من دا دگەل بێدەنگیا من راهاتینە و بتنێ دەنگێ زارویێن ڤی باژێری نەبیت، ئەوان ژی خەونێن خوە هەنە. هەر تشتێ من بڤێت ژی، دڤێ پەنجەرەیێ را دهێتە بەرچاڤێت من و ئێكەم هەڤالێ من ژی، دكێلا جگارا خودانێ كیسكی یە و تێركرنا حەزێن من ژی ئەو تابلونە، یێن خودانێ كیسكی بو من دروست دكەت.
ل روژناما وار ژمارە 1068 دا بلاڤ بویە
ليست هناك تعليقات:
إرسال تعليق