بحث هذه المدونة الإلكترونية

pertook

pertook

2014/04/24

چایخانا رەوشەنبیری (1)

لاپتوپ...........
عبدالرحمن بامەرنی
Bamerni77@yahoo.com

 هێشتا مە خو ژ چلێ‌ زڤستانێ‌ خلاس نەكری، دێ‌ ترسا چلێ‌ هاڤینێ‌ كەڤیتە بەر سینگا مە! د وەرزێ‌ زڤستانێ‌ دا ب تنێیاتی زێدەترە و شاعر و نڤیسەر ژی زێدەتر حەز ژ بێدەنگیێ‌ و وەرزێ‌ وەریانا بەلگا و شەڤێن درێژ دكەن، هەر چەندە شەڤێن زڤستانان بو عاشقان نا برسقن و نەشێن تەماشای ستێران بكەن، بەلێ‌ حەز دكەن دڤێ‌ بێدەنگیێ‌ دا دگەل تنێیاتیا خوە بمینن! ئەز ژی وەك وان حەز ژ تنێیاتیێ‌ دكەم، بەس ئەز نە عاشقم و نە ئەز عەشقێ‌ دكەم ژی، ژبەركو ئەز هەست دكەم من تەمەنێ‌ عەشقێ‌ یێ‌ ل پشت خوە هێلای.
بەری چەند روژان بو دەما من قەستا بازارێ‌ دهوكێ‌ كری و ئەو چەند جاركی بو من دەورا خوە ژ فلكا دەرمانخانا سەعد و بو بن سینەمێ‌ و د بەر كولانكا سەردابێ‌ را سەردكەتم و بو چایخانا نەجارا و سیكا سەرافا یا كەڤن و دا جارەكا زڤرمە جهێ‌ خوە ڤە، نزانم جارا چەندێ‌ بو و ژ مروڤان ئەز نە دشیام پرێڤە بچم و هەر من هەست ب تنێیاتیێ‌ دكر، هەر چەندە هەمی تشت دكەڤتنە پێش چاڤێن من و رەنگێن مروڤان تەماشای من دكرن، چاڤێن من هەمی تشت دڤیان و هەمی تشت بو من دگرنگ بون ئەز بكرم و خو من بازارێ‌ تشتەكی ژی نە دكر! وان هەمی مروڤێن د بەر من را دبورین یان ل پشت من دهاتن یان ل بەری من دچوون، حەز دكرن من ژ ڤێ‌ تنێیاتیێ‌ دەربێخن و هەر كەسێ‌ من هەست پێدكر یێ‌ پێن خوە سست دكەت خو پسیارەك ژی ژ من هەبا، دا پێنگاڤێن خو ڤر هاڤێژم و خو ژێ‌ دویر ئێخم.

 كوشتنا تنێیاتیێ‌ ژی ب ڤەخارنا چایەكێ‌ یان كێشانا چەند قورمێن جگارێ‌ ب دوماهی دهێت یان هەر چنە بیت كەزەبا وێ‌ ژ دلێ‌ مروڤی كێم دبیت، هەر چەندە دەرفەتا كێشانا جگارێ‌ ل بازارێن دهوكێ‌ گەلەك یا مشە یە و ژ هەمی تشتان زویتر ب دەست مروڤی دكەڤیت و هەر جهێ‌ تە بڤێت دێ‌ جگارا خوە بەردەیێ‌ و هەر دەلیڤا هەبیت دێ‌ پاكیتا خوە ژ بەریكا خوە ئینیە دەرێ‌ و كەس ژی نابێژیتە تە جگارا نە كێشە یان ئەز پێنەخوش دبم یان قوپكێ‌ جگارا خو نە هاڤێژە عەردی، ژبەركو هەمیان پێخوشە مروڤ جگارا بكێشیت، هند هزر دكەن زەلامینی یا د كێشانا جگاران را و هند ژی حەز ژ هەڤالینیا وان كەسان دكەن یێن جگاران د كێشن و دبێژن ئەو دنیا دیتی نە و مروڤ شرینترن. هەر چەندە چ ژڤانا هەمیان نەبون، لێ‌ یا راست هەمی ژ بەتالیێ‌ د بازاری دا دگەریان و ژ ڤی سەرێ‌ سیكێ‌ قەستا سەرێ‌ دی دكرن!
هەر چەندە ئەز و جگارە ژی نە هەڤالێن ئێكین، جگارە نە كێشانا من ژی ئەگەرەكێ‌ دی بو كو ئەز هەست ب تنێیاتیێ‌ بكەم، بەلێ‌ من چ ئاریشە دگەل ڤەخارنا چایێ‌ نەبون، چا ژی هەڤالێن كەسێن وەك منە و  بەلێ‌ ئەگەر جهەك هەبیت تو لێ‌ ئازاد روینیە خارێ‌ و ئەو جهێ‌ تو چایێ‌ لێ‌ ڤەدخوی، بزانی قورچا وێ‌ گەهشتە كیرێ‌! لێ‌ جگارە و نەرگیلە و نەبونا چایخانێن رونشتنێ‌ ل دهوكێ‌، ئەز ب وان سەرودلان ڤە ل بەرامبەری لاپتوپێ‌ من راوەستاندم و وەكی هەر جار، ڤێجارێ‌ ژی من تنێیاتیا خوە دارێژتە ڤەخارنا چایەكێ‌ و ب دەست من نەكەڤت، هین بێژن چەند كەسێن دی وەك من هوسا بێزار ڤەگەریاینە مال و ئەگەر مە ل ناڤا بازارێ‌ دهوكێ‌ چایخانەكا رەوشەنبیری هەبا، ژبلی دا بیتە پێگەیەك بو ڤێك كەفتنا كەسێن رەوشەنبیر، دا چەند تشتەكێ‌ شارستانی ژی بیت و دهەمان دەم دا، دا رویەكێ‌ دی یێ‌ جانتر دەتە دهوكێ‌.

إرسال تعليق