نڤیسینا من د كوڤارا (زین) ژمارە 6 دا كو وەك گوشەكا هەیڤانە لبن ناڤێ (لاپتوب) دهێتە بلاڤكرن
عبدالرحمن بامەرنی
Bamerni77@yahoo.com
ئەز ببومە بازرگان، یا راستتر بازرگانەكێ بچویك و هەرو جارەكێ ئەز ب (ئەمانێ) و ب (ربعەكێ) دچوومە كومەلگەها كورێن گاڤانا. بازرگانیا من ژ دەهـ دیناران دەست پێكریە و دوماهی جار من بایێ 28 دیناران تشتێن قەچاخ دگەل خوە ئینابون. بازرگانیا من ژی دەمژمێرێن ئەلەكترونی بون و جزدانك، هەر چەندە خەلكی گەلەك تشتێن بناڤ قاچاخ ژ وێرێ دكرین و بخو دئینانە مال. ئەڤ قەچاخیا ئەز ژێ بەحس دكەم، یا سالێن هەشتیان بو هێشتا شەرێ عیراقێ و ئیرانێ دگەرمە گەرما خوە دا.
هەر دەما ئەز دچوومە ڤێ بازرگانیێ ژی، ترسا من ژ چ تشتەكی نەبو، بتنێ ژ خالا پكشنینێ (سەیتەرێ) بو، یا راستر نە بتنێ هەكو تشتێن قاچاخ ڤمن ئەز دترسام كو بهێمە گرتن، بەلكو دەما ئەز دچووم ژی ئەز دترسام. سەهما سەیتەرێ دسەرێ هەمیان دابو، هەر دەما ئەم نزیك دبوین ژی، وەك بڤێنەكێ دەنگەك ب سەر نەفەران ڤە دچوو و من دزانی كو هەمی یێ (ئایەتان و بسمللا و قولئەعوزو وا و ئایەتولكورسی) بخو ڤە دخوینن، ئەڤ دوعایێن هەنێ ژی زێدەباری نفرینان.
فەرە ژی دڤێ كورتە نڤیسینێ دا بەحسێ هندەك ژوان تشتێن ب سەهم بكەم، ل سەیتەرێ خەلك بێی چ ئەگەر دهاتنە پاشڤەبرن، ژ ترومبێلێن وان دئینانە خار، ئاخفتنێن كرێت، هەر تشتێ ددەستێ وان دا، چ (عەلاگەكێ) فێقی با، سەلكەكا هژیرا، تا مریشكەك، جلكەك و پێلاڤەك و خودێ نەكەت كەسەكی دوو دەستێن جلكان بو خێزانا خوە كریبان.
سەهما (سەیتەرێ، نە بتنێ دتشتێن قاچاخ دا بو یان كا چ تشت بو پێشمەرگەی دهێتە برن یان ئەو گوندێن خیچا سور بناڤێ (موحەرەم) دهاتنە ناڤكرن، بەلكو ژ جورێ پاشڤەبرنێ بو، چ رێزەك بو كەسەكی نەدهاتە گرتن و مروڤ چەند یێ ژخوە پشت راست بایە، ناسناما مروڤی دبەریكا مروڤی دابایە، لێ سەهم و ترسەكا ڤەشارتی دناخێ خەلكی دا هاتبو چاندن.
بیرا من دهێت ل سالێن هەشتیان كار ب دەمێ هاڤینێ و زڤستانێ دهاتەكرن. ئەڤ چەندا هەنێ ژی نە كو تشتەكێ خراب بو، دبیت باشیێن وێ ژ خرابیێن وێ زێدەتر بن، لێ ئەو سڤكاتیا سەرا ڤێ دەمژمێرێ خەلكی دیتی و گوهلێبوی، خالەكا دی یا رەشا ڤێ سەیتەرێ بو، ب دەهان دەمژمێرێن خەلكی دهاتنە شكاندن، ژبەركو كار ب وی دەمی نە دهاتەكرن و بهزرا وان كو ئەڤ خەلكێ هەنێ (تەمەرد)ێ ل سەر بریارێن حزبێ دكەن.
هەر چەندە ئەڤێن هەنێ فلاش باكەك بون، لێ ئەڤێ فلاش باكێ گرێدان ب بیرهاتنا من ڤە هەیە، دەما من ب بهایێ 28 دیناران دەمژمێرێن ئەلەكترونی و جزدانك ئیناین، من هەمی دبەریكێن خوە دا ڤەشارتن و دەمژمێر ژی ل زەندكێن خو شداندبون. دەما (ئەمانا) مە گەهشتیە ڤێ خالێ، ئەم هەمی ئیناینە خارێ و ئێك چوو سەلال و كورسی و بن كورسی هەمی پشكنیین. ئەزێ بچویك ژی دگەل هەمیان هاتبومە خارێ، زەرفێن فێقی و هەر تشتێ وان حەزكربا ژ دەستێن خەلكی ئینابونە دەرێ و هاڤێتبونە واران، ژ بەدبەختیا من، تا ئێك ئێكە سیاری ئەمانێ كرین، من خوە بهندەك گیزان ڤە مژوول كرن و من چەند دانەك ژێ شكاندن و خارن، لێ دەما بویە دوورا من و ئەز ب سەركەتیم، ئەز هاتمە ئاشكەراكرن و كت و كت ئەو دەمژمێر و جزدانكە ژ من هاتنە وەرگرتن و ئەز دەست خالی ڤەگەراندمە مال، كو دەرسەك دا من كو ببیتە دوماهی روژا بازرگیانیا من. لێ تشتێ تا نوكە ئەز نەشیایم بزانم، ئەوان چاوان زانی ئەو تشتێن هەنێ ڤ منن! هوین بێژن ژ دوعایێن خودانێ گیزان نەبن؟ ئەڤە یە ئەو پسیارا هەر گاڤا ئەز دهێمە سەر لاپتوپێ خوە دەما هزرێ ل بیرهاتنێن خوە دكەم، ئەز نەشێم چ بەرسڤان بو ببینم.
%20copy.jpg)
ليست هناك تعليقات:
إرسال تعليق