لاپتوپ...........
عبدالرحمن بامەرنی
Bamerni77@yahoo.com
گەلەك كەس یێن هەین داخباری هندەك تشتان دبن و پێڤە دهێنە گرێدان، ژوان كەسێن گەلەك سەرنجا من ژی راكێشاین، كچەك دتەمەنێ گەنجاتیا خوە دا، عاشق و داخبارێ دەنگێ هونەرمەندێ وەغەركری (عەبدولواحد زاخویی) بو. ئەڤ كچا هەنێ نە بتنێ داخباری گوهداریكرنا سترانێن وی بو، لێ ئەڤ داخباریا هەنێ گەهشتبو راددێ دینبونێ. سێ هەیڤان ژی پشتی مرنا هونەرمەندی، ڤێ كچێ رەنگێ رەش ژبەر خو نەدكر! رەشبینیێ هەمی هزرێن وێ داگیر كربون! من گەلەك جاران كەربێن خوە ژ دەنگێ سترانبێژی ڤەدكرن، لێ ئەو ژ من تورەدبو و دگەهشتە وی راددەی كو پەیوەندیێن خوە دگەل من ب قەتینیت. هەر چەندە من چ پەیوەندی دگەل دا نەبون، بتنێ نیاسینەكا كێم، دیارە وێ ژی دڤیا هندەك ژ كولێن خوە، ژ خەمێن خوە لدەف كەسەكی دارێژیت، كو بەشداری خەمێن وێ ببیت. ئەڤ داخباریا هەنێ نە بتنێ لدەف وێ كچێ پەیدا بوو، ژبەركو بدەهان كورو كچێن باژێری داخبار ببون، نزانم، ژ دەنگێ وی، ژ كەساتیا وی یان ژی ژبەر كو مرنا وی نە تشتەكێ ئاسایی بو، تا ئەو دلوڤانی و حەژێكرن گەهشتیە وی راددەی، ئەڤ داخباربویێن هەنێ هزر بكەن، ئەو سترانبێژێ هەنێ نە مریە و یێ چوویە دخەونا هندەك چاكان دا، كو یێ دگوری دا ساخە. باوەربكەن، بابەت گەهشتە وی راددەی، خەلك چوون، كامیرە دگەل دا، چوون سەر گوری و گور هلكولان، ژ هەمی دلێ خوە ژی، كو ئەڤ سترانبێژێ هەنێ یێ ساخە و نەمریە، ئەز زێدەتر بەحسا ڤێ چەندێ ناكەم، دبیت هەكە من ژ ژێدەرەكێ باوەرپێكری گوهلێنەبایە، من ژی وەك وە باوەرنەكربایە كو گورێ وی دوبارە یێ هاتیە هلكولان.
ئەڤ حەژێكرنا دەنگێن سترانبێژان هەر چەندە نە تشتەكێ نوی یە، بیرا من دهێت ل سالێن هەشتیان بو، فلمەكێ عەرەبی هەمان چیروكەكا بڤی رەنگێ بەرچاڤ دكر، چاوان كچەك ببو عاشقا دەنگێ سترانبێژێ كوچ كری (عەبدولحەلیم خافز)، ئەڤا هەنێ ژی نە بتنێ دناڤ كچان دا هەبویە، من كور ژی بڤی رەنگی یێن دیتین، ئێك ژوان كەسێن من ناسكرین، شەیدایێ دەنگێ هونەرمەندێ كورد (تەحسین تها)ی بو، كیش ستران ل كیش سالێ و دكیش هەلكەفتێ دا هاتیە گوتن، هەمی دمێشكێ وی دا بون، تا گەهشتبو وی راددەی، نەدڤیا گوهداریا چ دەنگێن دی بكەت، تا ڤێگاڤێ ژی ئەز كەسەكی ناس دكەم، كو سترانبێژێ وێ یێ ئێكانە (تەحسین تها)یە.
تشتێ ئەز راكێشایمە نڤیسینا ڤی بابەتی ژی، هەر حەژێكرنەكا ژڤی رەنگی بو، دەما هەڤالەكێ منێ كاری گوتی من 250 كاسێتێن هونەرمەند (محەمەد عارف جزیری) یێن هەین، براستی جزیری ژی شەیدایێن دەنگێ خوە هەبون، ئێك ژوان ژی (ئیسماعیل گەیلانی) بو كو رەحمە ل گورا وی بن، دیسان گەلەك تا نوكە ژی سترانێن وی وەك وی و وەك سەلیقا وی دبێژن. ل گوندێ ئەز لێ ژ دایكبوم ژی كەسەك هەبو و عاشقێ دەنگێ هونەرمەند (محەمەد تەیب) بو و تشتێ سەیر ژی تا نوكە ژی هەڤالێن وی ب ناڤێ محەمەد تەیبی، گازی دكەنێ.
هەر چەندە ئەڤ بابەتە من ل سەر خاترا ڤێ كچێ یێ نڤیسای، هیڤدارم ژی بكەڤیتە بەر چاڤێن وێ، ژبەر كو ئەڤە زێدەتر ژ دەهـ سالان من دەنگ و باسێن وی نەماین، ئەز نزانم نوكە ژی هەر ل سەر سوزا خویە و گوهداریا عەلدولواحد زاخویی دكەت، نزانم هێشتا حەژ جلكێن رەش دكەت یان ژی كەتیە بەر خەما هەڤژینی و زراوكان، بەس هیڤیا من ئەوە، ژیانا وێ یا گەشبینتر بیت و سلاڤ بو وەفاداریا وێ، بو سترانبێژێ وێ حەژێكری.
كوڤارا زين ژماره 11 يا هه‌يڤا 11/2013
ليست هناك تعليقات:
إرسال تعليق