بحث هذه المدونة الإلكترونية

pertook

pertook

2014/05/19

قەردارێ‌ تە مە سەیدایێ‌ عەدنان

عبدالرحمن بامەرنی 
هەر كەسەكی ژ مە ویستگەهەك هەیە و ژ وێرێ‌ ژیانا وی دەست پێدكەت، چ ئەو ژیانا هەنێ‌ دەستپێكا خواندنێ‌ و چوونا كولیژەكا تایبەت بیت یان ژی ئەنجامدانا پروژەكی یان ژی گوهورینا هزرێن وی بیت و بیروكەیا وێ‌ هزرێ‌ كارتێكرن ل سەر ژیانا وی هەمیێ‌ كربیت. رەنگە ئەو ویستگەهـ ژی خوە دچوارچوڤێ‌ شیرەتەكێ‌ یان سوحبەتەكێ‌ یان ژی دان و ستاندنەكا هەڤالینیێ‌ دا و تا حەژێكرنەكێ‌ دا ببینیت، چ ئەو حەژێكرن ژ ئالیێ‌ كوری ڤە بیت یان كچێ‌ و هەردوو پروسا هەڤژینیێ‌ دگەل ئێك پێك بینن.
 سەیدایێ‌ عەدنان ژی ئێكەم ویستگەها من یا هزرێن نەتەوایەتی بو، ئێكەم ویستگەها من بو كو بیر ل نڤیسینێ‌ و داهێنانێ‌ و خواندنێ‌ بكەم. لبیرا منە ل دەستپێكا سالێن هەشتیان بو، سەیدایێ‌ عەدنان ماموستایێ‌ مە یێ‌ بابەتێ‌ كوردیێ‌ بو. دوانەكێ‌ دا بو مە گوت، چاوان دناڤ موسلمانەتیێ‌ دا هەیە كو  دەما زاروك شنوی ژ دایك دبیت، دڤێت كەسەك دگوهێ‌ وی دا بانگ بدەت كو ژ پەیرەوێ‌ موسلمانەتیێ‌ دەرنەكەڤیت، هوسان ئەم كورد ژی دڤێت دگوهێن زارویێن خوە دا بانگ بدەین و بێژینێ‌ ئەم كورد نەتەوەیەكێ‌ بن دەستین و چار پارچەینە و دڤێت ئەم بو كوردستانا مەزن كار بكەین. براستی ئەڤ گوتنە چ جاران ژبیرا من ناچیت، ژبەركو دەستپێكا ژیانا من یا هزركرنێ‌ بو، ئەز سنێلە و رەنگە ماموستایەكێ‌ دی یان هەڤالەكێ‌ جاددێ‌ ب گوتنەكا بەروڤاژی یان یا بێ‌ مفا كارتێكرنەكا دی لمن كربایە و هەر چاوان نوكە ئەم خەلكێ‌ دەوروبەرێن خوە دبینین، هەر ئێك ب تشتەكی ڤە مژولە و ژیانا خوە برەنگەكی پرێڤە دبەت. براستی ژی ل وی دەمی هندی یێن وەك سەیدایێ‌ عەدنان هەبانە، ئەم پێدڤی وان بوین، لێ‌ نوكە و سەردەمێ‌ نوكە و پێشكەتنا نوكە، ئەم پێدڤی كەسەكی نە، بەرێ‌ مە بدەتە داهێنانێ‌، تەكنەلوژیا ئەڤرو جیهان گەهشتیێ‌، خواندنێ‌ و ڤەكولینێن زانستی و ئەم چاوان ببینە كەسێن بەرهەمهێنەر. بەرهەمهێنەری و داهێنان ژی گەلەك یا ب ساناهی یە، بتنێ‌ وێرەكی بو دڤێت، كەسەك هەبیت رێ‌ ل بەر مە خوش بكەت، مە هانبدەت و ئەگەر ئەم خەلەت بوین، ریێن رابونەڤەیێ‌ نیشا مە بدەت و مە بێ‌ ئومێد نەكەت. مە كەسێن هەین خودان شیان، داهێنەر، بەرهرەمەند، بتنێ‌ مە رێ‌ دڤێت، ئەڤ ریێن هەنێ‌ ژی، ڤەكرنا خول و ۆورك شوپان بو دڤێن و كەسێن شارەزا و بسپور بو دڤێن. ئەڤرو بەرێ‌ سنێلەیان بدەتە ئارەزویەكێ‌ و كەساتیا خوە دناڤ دا ئاڤا بكەت، دروستكرنا ئارەزویێ‌ حەژێكرنا كاری و ئینتیما كاری بو مروڤی دروست دكەت، كەنگی ئەڤ حەژێكرن و پەیوەندیا هەنێ‌ ب ریێن زانستی ژی هاتە دروستكرن، دێ‌ داهێنان و بەهرەمەندی ژی ددویف راهەبیت. 

إرسال تعليق