لاپتوپ...........
عبدالرحمن بامەرنی
Bamerni77@yahoo.com
عەشقا قیتارێ، نە ناڤێ رونامەكێ یە و نە ژی داهێنانەكا نوی و نە ژی ئێك ژ فلمێن هولیوودە. عەشقا دناڤ قیتارێ دا ڤەگێرانەكە و مەرەما من ژ ڤێ ڤەگێرانێ ژی، بتنێ پاقژییا دلێن گەنجێن مەیە و ئەو كومەلگێ ئەڤ گەنجە دناڤ دا پەروەردە بوی و دیسان كارتێكرنا دنیا بینینێ ل سەر وی و چەند ئەڤ گەنجێن هەنێ شیاینە و دشێن خوە خوە ژ بن گڤاشتنێن كومەلگەهی و رەوشت و تیتالان دەرباز بكەن، كو گەلەك جاران ئەڤ رەفتارێن مروڤی، دبنە ڤەگێرێن پێكەنینێ و مروڤ خوە دئێختە بن ڤێ پرسێ ڤە، تو بێژی ئەز هینگێ یێ گێل نەبم؟!
ئەو جارا دوێ بو ئەم دچین پلێتا قیتارێ دبرین، مەرەما من ئەو جارا دوێ بو ئەز ل قیتارێ سیار دبم. ئەڤێ جارێ ژی ئەم هەشت نەهـ هەڤال بوین، ئەم هەمی دەرچووێن ئێك قوناغ بوین و دا ژ باژێرێ میسل بەرەڤ بەغدا برێكەڤین. دەم شەڤ بو و ئەگەر ئەز یێ شاش نەبم، ل دەهی شەڤێ ژڤانێ برێكەفتنا قیتارێ بو. ئەڤ ڤەگێرانا ئەز ژێ بەحس دكەم، بەری سەرهلدانا سالا 1991 ێ ب سالەكێ بو. دقیتارێ دا هەر دوو كەس ل سەر ئێك كورسی درونشتن، كو هەر كورسیەك دوو نەفەری بو. مە رێزبەندیا خوە گرت و ئەم ئێك و ئێك و دوو و دوو بەر ب برینا پلێتان چوین و لدویڤ ژمارا ل سەر پلێتێ، ئەم ل جهێن خوە گەریاین و هەر دوو ژ مە ل سەر ئێك كورسیا دوو نەفەری و ئێك ژ هەڤالێن مە ل سەر كورسیەكێ رونشتە خوارێ و ما لهیڤیا كەسێ دوێ كو لدویڤ ژمارا پلێتێ بهێت. رەنگە مە ئەڤێن دی ب دل پێڤەمان ل وی هەڤالی دنێری، ژبەر كو تا بەرێ سپێدێ و ژ گرگر و مر مرا قیتارێ، كو نەدهێلا خەو بكەڤیتە چاڤێن مە، ئەم نەدشیاین چاڤێن خوە دانین سەر ئێك و دەما سپێدەهیان ژی ئەم ژێ پەیا دبوین، ئەم دشر و دڤەقوتایی بوین.
ئەز باوەردكەم هەڤالێ مە ژی قورنجیك ل دلێ خوە ددان كو ئەو بتنێ نەبایە و ئەوی ژی وەك هەر ئێك ژ مە، بەحسێ و قوتابخانێ و روژانێن هەڤالینیێ و ماموستا و سەیرانێن قوتابخانێ دگەل ئێك ژ هەڤالان كربایە. ئەڤە ژی نەكو كەسێ حەژ هەڤالینیا وی نەدكر، بەلێ ئەم كت بوین و ڤێ چەندێ دخازت كو ئێك یێ بتنێ بیت. بەلێ ئەڤ تشتێن ئالوزێن هەنێ هەمی دگەل هاتنا كچەكا ئەسمەر یا بەژن بلند بێدەنگ بون و لدویڤ پلێتا خوە، كو وێ كچا ئەسمەر نیشا هەڤالێ مە دای، هەڤالێ مە پێش ڤە رابو و جهـ دایێ و شنوی رونشتە خارێ.
ئێك و ئێك مە هەمی ئاگەهداركرن، سەحكەنێ! نە حەویان كەتە مە هەمیان و پیاسێن مە دناڤ فارگونا قیتارێ دا زێدەبون و بتایبەتی ل هنداڤ سەرێ وان هەردووكان، ئەم تێك دهاتین و تێك دچووین، مە گەلەك قوریچك ل گەوریا خوە ددان، كو ئەو كچا شوخ و شەنگ تا بەرێ سپێدێ برەخ ملێ ئێك ژ مە رونشتبایە و خەیالێن مە گەلەك دویر دچوون. تا ڤێرە ئەڤ ڤەگێرانە زور تشتەكێ سروشتی بو و ئەوا ئەز ڤێجارێ ژی ل بەرامبەری لاپتوپی راوەستاندیم، كو ڤێ ڤەگێرێ بنڤیسم، دەما ئەو سپێدێ ژ قیتارێ هاتینە خارێ، پسیارا من ژ وی هەڤالی، ئێ تە چ كر؟ وە چ گوتە ئێك و دوو؟ بەرسڤا وی ژی بو من، ئەوێ كچێ، جار بو جار دەستێ خوە دبرە دناڤ پرچا خوەرا، تو بیژی ئەوێ دڤیا بێژیتە من ئەز حەژ تە دكەم؟!
%20copy.jpg)
ليست هناك تعليقات:
إرسال تعليق