بحث هذه المدونة الإلكترونية

pertook

pertook

2014/05/18

كی دخوینیت و كی دنڤیسیت


دكوڤارا زين ژماره‌ 12 دا بلاڤ بويه‌
عبدالرحمن بامەرنی
Bamerni77@yahoo.com

هەر چەندە ئەڤ چیروكا دێ‌ نڤیسم، سەرهاتیا خوە یا تایبەت هەیە و كەسێ‌ بو من ڤەگێرای ژی ل سەر رویدانەكێ‌ گوتبو، كو ئەو رویدانا هەنێ‌ بمن و هەڤالەكی و بخواندن و نڤیسینێ‌ ڤە یا گرێدای بو! لێ‌ ئەڤە زێدەتر ژ دوو سالان ل سەر گوهدانا من بو وێ‌ چیروكێ‌ بورین و ئەز هەر جار ڤێ‌ پرسێ‌ ژ خوە دكەم، هین بێژن راست بیت كو ئەو تشتێ‌ ئەم دنڤیسین و بلاڤ دكەین، گوتنا كی (دخوینیت و كی دنڤیسیت) ل سەر بگونجیت و ئەم ل عاقارەكی بین و ئەو ل عاقارەكی.
بەری ئەز بچمە ل سەر وی تشتێ‌ من دڤێت بەحس بكەم، ئەز دێ‌ بنەكوكا چیروكێ‌ نڤیسم، چیروك بخوە ژ دارستانێ‌ دهێتە ڤەگێران و بڤی رەنگی: (ریڤیەك و گورگەك هەبون، ریڤی هەر شەڤ دچوو رییا گوندی و دەما ڤەدگەریا دیكلەك دئینا و دخار. گورگ ژی هەردەم یێ‌ برسی بو و چ بدەست نە دكەفت. روژەكێ‌ گورگی گوتە ریڤی، تو نابێژیە من، تو هەرو ڤان دیكلا ژ كیڤە دئینی؟ ریڤی گوتێ‌: سەیێ‌ گوندی هەڤالێ‌ منە و هەر گاڤا ئەز نزیكی گوندی دبم، ئەو دهێتە بەراهیا من و بو من دیكلەكی دئینیت. گورگی گوتێ‌: كا دێ‌ من ژی بكە هەڤالێ‌ وی سەی، ئەڤە چەند روژە من هیچ تشتەك بەرێڤەی گەورییا خو نەكری. ریڤی كاغەزەك بو نڤیسی و گوتێ‌: هەر گاڤا سە هاتنە تە، ڤێ‌ كاغەزێ‌ بدە دەستێ‌ وان. دەما بویە شەڤ، ریڤی و گورگ بەرەڤ گوندی ڤەچوون. سە بهاتنا وان حەسیان! ریڤی بازدا و گورگ بنك سا ڤەچوو و كاغەز ئینادەر و گوت: ئەڤە كاغەزا ریڤی یە. بەلێ‌ سا قیچ كرنێ‌ و چەند كێلبێن خوە گەهاندنە پشتا وی، گورگی گازی كرە ریڤی، كو سە یێ‌ هێرشێ‌ دكەنە سەر و كەس كاغەزا وی ناخوینیت، ریڤی ل گورگی ڤەگێرا و گوتێ‌: خو خلاس كە، كی دخوینیت و كی دنڤیسیت).
براستی ژی وەسانە، بو حەفتیەكێ‌ ل سەر ئێك من قەستا بازاری كر، كا چ بەحسە و خەلك چ دكەت و چ دبێژیت، دڤێ‌ حەفتیێ‌ دا هەر ژ سەرێ‌ سیكێ‌، ژ جادا گومركێن هشك یێن كەڤن دا ژوردا هێمە خارێ‌ و بو جادا خەیاتا و سەرێ‌ سیكا چەلێ‌ و تا دگەهشتمە دەرمانخانا سەعد و ژوردا بو جادا مەركەزی دهێت و لدوور سینەمێ‌ دزڤریم و دنیڤا سیكا دەرمانك و بهاراتان را و دا فلكەكێ‌ لخوە دەم و سیكا ماستی و تا ل جاددا بەرامبەری چایخانا نەجارا دەردكەتم و بو ژێهەل و ل سیكا جگارا ب سەركەڤم و دكانێن عەقاراتا و دچوومە جهێ‌ خو ڤە. هەر چەندە پیاسێن سیكێ‌ گەلەك دكورتن و مروڤ زوی هاتن و چوونێ‌ تێدا دكەت، بتایبەت ئەگەر مروڤی چ شول و كەسپ نەبن، لێ‌ پیاسێن من گەلەك ڤەدكێشان و هندی مروڤ دهاتن و چوون، خودێ‌ بێژی كونزڤیركا زركێتكانە، زەلام و بچیك و ژن و هەمی عەمر یێ‌ هات و چوویێ‌ دكەن، مروڤ لێك دهلنگڤن. 
تشتێ‌ سەرنجا من راكێشای، بازارێ‌ هەمی تشتەكی هەبو و بتنێ‌ یێ‌ روژنامە و كوڤار و پەرتوكان نەبیت! دكانێن موبایلا دتژی مروڤ بون، چایخانە و ئەڤێن نەرگیلێ‌ دكێشن، سەرتراشخان و ئەڤێن خو حەفاف دكەن و رهێن خوە دتراشن، سیكێن جلكا و ئەڤێن لدویڤ مودێلێن نوی دچن، سیكا چەلێ‌ و تەنزیلات، دكانێن لەفا و ئەڤێن ل بەر كافیتریا دراوەستن و تەزیاتیا ڤەدخون. ئەز سویندا كەسەكی بتنێ‌ ناخوم، روژنامەك كربو بالولوك و دبن كەفشان رابو، وەسا یا پێچای بو، ئەگەر بو پاقژكرنا جامێن شیشەی بكار نەهێت، هیچ باوەرناكەم نڤیسینەك لێ‌ بهێتە خواندن!!
إرسال تعليق