عبدالرحمن بامەرنی
تشتێ من چ جار باوەرنەدكر، پیروبونا محەمەدێ دختور بو! ژبەركو هەر كەسێ نەساخ با، ددانێ وی ئێشابا یان هەستی چاڤكێن وی كەفتبان و خو سەرێ وی ژ كەستبا یان جهەكێ وی بریندارببا، ڤێجا چ ئەو كەسێ هەنێ زاروك با یان ژن یان زەلام و تا پیرەمێر و پیرەژنان ژی قەستا خەستێ دكرن و محەمەدێ دختور بو دەرمان دنڤیسین و ئەو ب وان دەرمانان ساخ دبونە ڤە. تشتێ من هیچ جارەكێ ژی هزر تێدا نەكری، كو محەمەدێ دختور پیر ببیت و ئەو ژی بكەڤیتە بەر نەساخیان تا من وێ روژێ ل هەلكەفتەكێ دیتی كو ژ برێڤەچوونا وی مروڤی دزانی، ئەو دەرمانێن وی بو خەلكی دنڤیسین یان ئەو دەرمان نەماینە یان ژی ژیانێ دەمێن خو هەنە و دڤێت مروڤ تەقەبوللا هەمی قوناغەكا ژیانا خو بكەت.
ئەڤ دەستپێكا نڤیسینێ ئەو هزر بون، دەما ئەز ژ بازاری ڤەگەریایمە مال، كو سێ هەڤال و نیاسێن من ئەڤێن رییا من ل وان كەفتین ل بازاری دگوتنە من تو یێ پیر بوی، هەر چەندە وەك ئەز هەست پێدكەم، بتنێ پیراتیا من دوەریانا پرچا من دا لمن دیار بویە، وەكی دی، ئەز چ گوهورینان لخوە نابینم، لێ گوتنا ئێكی ژوان هەر سێكان ئەڤێن گوتینە من تو یێ پیربوی، گەلەك ئەز یێ مژویل كریم، دەما گوتی خوزیێن زاروكینیێ و هەكو مە (تیسانێ و ڤەشارتكانێ) دكر و دگوتی: خوزی ئەم زڤریباینە وی وەختی و وی تەمەنی ڤە!
ئها تشتێ من دڤێت بەحس بكەم، كو ئەو گوتنا هەنێ من ژ گەلەك كەسێن دی گوهلێبویە، كو حەز دكەن دتەمەنەكێ دێ یێ ژیانا خوە دا بژین، كو بچویكتر لێ بهێن. لێ ل دوماهیێ ئەز شیام خو (قانع) بكەم، كو ئەوێ پرسا ئەو ژ خو دكەن و خوزیان بو رادهێلن، رویەكێ پسیارێ بتنێ یە و رویێ دی، كو وان بخو نەڤێت وێ پسیارێ ژ خوە بكەن، ئایا وان دڤێت ب تەمەن و جەستە ڤە بگەهنە گەنجاتیا خو؟ یان عەقلێ وان و سەربورا وان و ترومبێل و خانی و رەوشەنبیرییا وان ژی دگەل دا بو بمینیت؟! ئەگەر برەنگەكێ دی بێژم، كابرایەك خودان ترومبێل و پلە و پایە بیت و ڤەگەریتە بەری دەهـ سالان ژ تەمەنێ خو، كو ئەو رەوشەنبیریەت و زانین و بسپوری لدەف نەمابن و هەمان رەوشەنبیریەت و ئاستێ بەری دەهـ سالان بو ڤەگەریا بیت، ئەو هینگێ دێ چاوان شێت مامەلێ دگەل خێزانا خوە و زاروكێن خوە و هەڤال و هەڤالكارێن خوە و دەوروبەرێن خوە بكەت.
*محەمەدێ دختور: ئێك ژ نوژدارێن نەخوشخانا بامەرنێ بو ل سالێن حەفتیا و هەشتیان و تەمەنكێ درێژ بو دخازم.
دكوڤارا زینێ ژارە 15 دا بلاڤ بویە
%20copy.jpg)
ليست هناك تعليقات:
إرسال تعليق