2014/05/18

ژێڤەبە حەقێ‌ تە گەهشت؟!


نڤیسینەكا من یا نوی دكوڤارا زین ژمارە 9 دا، وەك گوشەكا هەیڤانە لبن ناڤێ‌ لاپتوپ دهێتە بلاڤكرن.
عبدالرحمن بامەرنی
Bamerni77@yahoo.com

بیرا من ل سوحبەتەكێ‌ هات، ئێك ژ هەڤالێن من یا راستتر نە برامانا هەڤالی، چنكو ئەو گەلەك ژ من مەزنتر بو، لێ‌ ئەم وەك هەڤالان بوین و گەلەك تشت هەبون ئەم ل سەر سوحبەتا بكەین و مە بەردەوام سەرەدانێن ئێك دكرن و مە پسیارا ئێك دكر بو خوشی و نەخوشیان. روژەكێ‌ ل سەر سوحبەتا تزبیان و گرانیا وان بو من ڤەگێرا، گوت: ل سالێن هەشتیان بو، مە سیارێن بارهەلگر ژ گومكرێن دهوكێ‌ تژی فێقی دكرن و مە بو باژێرێن باشورێ‌ عیراقێ‌ دبرن. ئێك ژڤان گەشتان ژی، مە بارەكێ‌ شتییا بو (باژێرێ‌ دیوانیە) ل باشورێ‌ عیراقێ‌ باركر و پشتی مە شتیێن خوە هەمی فروشتین، مە فراڤین ل ئێك ژ خوارنگەهێن وی باژێری خار و ئەم ل چایخانەكێ‌ بو ڤەخارنا چایەكێ‌ درونشتی بوین. هندەك تزبی ددەستێ‌ من دابون كو ب پارێ‌ هینگێ‌، من 65 دینارێن عەسلی پێدابون و من كربونە ددەستێ‌ خوە دا و دبەر ڤەخارنا چایێ‌ را من چەق چەق ژێ‌ دئینا و خوە پێڤە مژوول دكر. برەخ منڤە عەرەبەك ب دشداشەكێ‌ بێ‌ سەروبەر روشنتی بو، ب عەرەبیا خو گوتە من (حەجی تزبیێن تە گەلەك دجوانن)، من ژی نەكرە نە مەردی من تزبیێن خوە كرنە ددەستێ‌ وی دا و من گوتێ‌ بو تە پیروز بن، وی ژی تزبیێن كرنە ددەستێ‌ من دا كو ب بتنێ‌ بهایێ‌ وان چەند دەرهەمەكێن وی دەمی بون و گوتی (شوكرەن). ڤێ‌ شوكرەنا وی، داخەك بمن ڤەنا و ئێدی من شەرم كر تزبیێن خوە ژێ‌ وەرگرم ڤە و تا ڤێ‌ گاڤێ‌ ژی من تزبی یێ‌ لخو حەرام كرین.
یا راست ئەڤێ‌ گوتنێ‌ ژ هینگێ‌ وەرە گەلەك كارتێكرن یا لمن كری، بتایبەت دەما ئێك قەلەمێ‌ ئێكی یان ماكینا ئێكی یان تزبیێن وی ژ دەستا دئینتە دەر و دبێژیتێ‌ گەهشت. یا ژڤێ‌ نەخوشتر بو من، دەما ئێك دبێژیتە ئێكی ژێڤەبە حەقێ‌ تە گەهشت. باش لبیرا منە ل سالێن هەشتیان بو، هینگێ‌ گەراجێ‌ بەروشكێ‌ ل بەرامبەری چایخانا نەجارا یا نوكە بو و سیارێن وی دەمی ژی رەفێن كەسك و سور بون، ئەز خویندكار بوم و باش لبیرا منە بتنێ‌ پارێ‌ دگەل من دا، تێرا بهایێ‌ كرییا من دكر. ئەز چووم من جهێ‌ خوە ل كورسیێن پشتی گرت، نەفەر ژ ژن و زەلامان و زاروكان ب سەركەتن و ئێك ژوان ژی ژنەكا نیاس بو! ئەز گەلەك گوهشیم، ئەز چبكەم، شەرمە نەبێژمێ‌ حەقێ‌ تە گەهشت و یا راست ژی بتنێ‌ پارێ‌ من بهایێ‌ منە و من زێدەتر دبەریكێن من دا نینە، بهەر حال ئەز هاتمە خارێ‌ ب بەهانا كو من تشتەك ژبیر كر. 
مەرەما من ژڤان هەردوو بیرهاتنان، تا كەنگی دێ‌ بێژین ژێڤەبە حەقێ‌ تە گەهشت، ئەز باوەردكەم هین ژی دگەل منن كو ئەڤە تشتەكێ‌ زێدەبیت، بەلكی كابرایی، لدویڤ پارێ‌ خوە دێ‌ چیتە خارنگەهێ‌ و لدویڤ پارێ‌ خو دێ‌ وی تشتی خوت و بخو داخوازا كەت، یێ‌ بەریكا وی و پارێ‌ دبەریكا وی دا ژ وی دخازیت، ئەگەر هینگێ‌ هەڤالەك یان دوو سێ‌ هەڤال هاتن، ئایا وی دەمی چ بكەت؟ ژێڤەبیت شەرمە!خو ڤەدزیت شەرمە! پارێ‌ وان بدەت بو دەست نادەت!
ئەڤە ئەو بابەت بو وەك گەروكەكێ‌ لناڤ سیكا و ل بەر دەرێ‌ دكانا، ب دەهان ژێڤەبە هاتینە گوهێن من و من ڤیایی ڤێ‌ دیاردێ‌ بكەمە دلاپتوپێ‌ خوە دا. خوزی ئەڤ عادەتە هاتبانە گوهورین و كەسێ‌ نە گوتبا كەسێ‌ ژێڤەبە حەقێ‌ تە گەهشت.

ليست هناك تعليقات: