ژ شنگالێ‌ بو كوبانێ‌ چەند هەناسەیێن ڤەقەتیایی

ـ تیرور ـ

چەكێ‌ وان ئیمانە و 
بناڤێ‌ خودێ‌ و پێغەمبەران
بەروكێ‌ شەری دگرن و
پێشرەویێ‌ دكەن.
خەلیفەنە و ئەمیرن، جیهادی نە
خوە كوژن و مروڤایەتیێ‌ نزانن!
دێرو و مزگەفتان، مەكان و مەزارێ پێغەمبەران
ژبنی رادكەن دپەقینن
خەونا هەمیان ژی ئێكە
بەحەشتی نە و دێ‌ حەفتێ‌ حوریان بدەست ڤە ئینن..

ـ شەهید ـ
ئەو بناڤێ‌ خودێ‌ شەری دكەن،
لبن ئالایێ‌ لا الە الا الله دكەڤن و
دسەكتن.
ئەم بناڤێ‌ ئاخێ‌ و نەتەوەی و نامیسێ‌
بەرگریێ‌ دكەین
ئەم دكەڤین و شەهید دبین..

ـ داعش ـ
ئیسلامیێن ئەڤرو نە و
بەرمایكێن ئەوێن تا دهی ژ میزا حێشتران ڤەدخار.
بناڤێ‌ جیهادێ‌، جیهاد و لنیكاح دكەن
بناڤێ‌ فتوا و شریعەتان، خەلكی سەر بر دكەن
بناڤێ‌ فتوحاتان،
ژنان دكەنە كەنیزە و
بازاری و كرین و فروتنا پێدكەن
دكورترین پێناسا خوە ژی دا،
جیهادی نە و خیلافەتێ‌ نوی دكەن..

ـ پێشمەرگە ـ
ل چیا پێشرەوی دكر و
ژ چاندكێ‌ و رەختی زێدەتر ل پشتێ‌ نە بو،
كەسێ‌ پاداشت نەدكر و
سینگێ‌ خوە دكرە چەپەر.
ل دەشتێ‌ چاڤ نەترسە و دپێشرەویێ‌ دا یە
بەرەڤانیێ‌ ژ ئاخا خوە دكەت
چ پروزییان نا پەقینیت و
خوینا چ كەسان بدەستان ڤە نینە
رێزێ‌ ل مزگەفتان دگریت
دێر و مەكانێن ئاینێن دی، مەزارێن پێغەمبەران
پیروز رادگریت
فێر نەبویە ژی لهیڤیا چ پاداشتەكێ‌، ژ كەسەكێ‌ وەربگریت..

ـ وەلاتێن روژئاڤای ـ
دگوتن: ئەو نە مروڤن
نە دیندارن، نە ژ كەلتورێ‌ مە نە و پشتێ‌ تێبكەن.
دگوتن: خو ژ وەلاتێن وان بكرن
هەر كەسێ‌ تێكەلیا وان بیت
میێن بەرازا لێ‌ دهێن، گاورن.
دئێكەم هەوار ژی دا
ژبلی خودێ‌ مە كەسێ‌ دی نینە
كورد دەستێ‌ خوە ل بەر ڤەگرن..

ـ وەلاتێن عەرەبی ـ
دگوتن: ئەو مروڤ ژ دینێ‌ مەنە
حەقی زانن و ئەم پێكڤە براینە و
بەرێخودانا مە ئێك قیبلەیە.
ل ئێكەم هنگافتن ژی
ژبلی وان مە ژ كەسێ‌ رەڤ نینە و
مێژوێ‌ بدەهان ڤەگێران تێدا هەنە
مە سەربری دكەن،
ژن و كچێن مە بو وان حەلالن، كەنیزەنە..

ـ كریڤ ـ
دەنگێ‌ كریڤا من ژ دویر دهێت،
ژ مێژە ڤی دەنگی دگوهێ‌ من دا نە قیژاندی و
ژمێژە جوانیا كریڤا من نە كەتیە بەر بازارێ‌ كرین و فروتنان.
بێهنا كریڤا من ژ دویر دهێت
گیانێ‌ من لدەف وێ‌ یە و
جەستەیێ‌ من لڤێرە

ـ كوبانێ‌ ـ
بەرخودانا كوبانێ‌
قارەمانی و ركاتیا كوردان دچەپەران دا نیشاندا.
نالینا عەفرینی
بو سومبلا بەرخودانا ژنێ‌ ل جیهانێ‌
ئارینا گیانێ‌ خوە كریە قوربان
بەرێخودانا جیهانا عەرەبی ژ بو ژنان ڤەگەراند
ژن نە متعەیە و نە بو جیهادو لنیكاحە
ژن دایكە و خوشكە و هەڤژینە و
بەرخودان..

تێبینی:
دروژناما وار ژمارە 1213 ێ‌ دا هاتیە بلاڤ كرن.