بحث هذه المدونة الإلكترونية

pertook

pertook

2014/12/09

حاسیبە ئێكەم بێ‌ پلانیا من بو

عبدالرحمن بامەرنی
ل سالا 1993ێ‌ بو، ئەز هینگێ‌ ل بامەرنێ‌ بوم و من كەر دكانكەك بو خوە ڤەكربو. زڤستانێ‌ پەرێن خوە دادهێلان و هەمییان خوە بو سەرمایا وێ‌ بەرهەڤدكر. ژ هەبون و نەبونا گازێ‌ و سوپا دارا، من كر و نەكر، من ژ نیڤ بەرمیلێ‌ گازا سپی زێدەتر دمالا خوە دا من نەبو. ئەڤە ژی بو گوندەكێ‌ چیایی و بەفرین گەلەك كێمە، كو ب شەڤ و روژان دڤێت ئاگر دمالێ‌ دا یێ‌ هلكری بیت. من دحسابا خوە دا بو خوە دانا، ئەز پێدڤی دوو تەرەكتورێن دارا مە، ئەگەر بتنێ‌ سر و سەقەما زڤستانێ‌ مە نە ئێخیتە نڤینان.

خوشبەختانە مە رەزەك هەبو و ژ خولپێن دناڤ دا هەین، من شییا بارێ‌ تەرەكتورەكا داران ببرم و بكێشمە بەردەرێ‌ مالێ‌ بو قەدكرن و كەلاشتنێ‌. بو تەرەكتورا دژی من بریار دا، ئەز قەدێن داران ژ چیایی ببرم و بكێشمە مالێ‌. هەر روژ من كارێ‌ خو بنیڤی دكر، نیڤ دانی ئەز دچوومە بەر دكانێ‌ و نیڤ دانێ‌ دژی من داسكا خوە هەلدگرت و ئەز ب سەر گەلیكان دكەفتم، كو نێزیكترین جهـ بو ژبو من بو ب سەر كەفتنا چیایی و ل نێزیكترین جهێ‌ دار ژی لێ‌ هەبن، من دارێن خوە دبرین، كو هەمی ژ ستوراتیا زەندكا دەستێ‌ مروڤی دەرباز نەدبون و من حسابا خوە كر، كا دێ‌ زڤستانا من چەند دار بەس بن، كو ئەز خوە و خێزانا خوە ژ سەرمایا زڤستانێ‌، دەرباز بكەم. بو ڤێ‌ چەندێ‌ ژی، من دسەرێ‌ خوە دا حاسیبە دروست كر و سەرما زڤستانێ‌ دێ‌ چەند روژان ڤەكێشیت، تا گەرما بهارێ‌ و بەر بەروشكێن هەتاڤێ‌ دگەهیتێ‌. من ئەو روژ دابەشی سوپێن دارێ‌ كر و روژ و شەڤان ئەز پێدڤی هلكرنا چەند سوپێن دارا مە و ئەگەر سوپە نەهێتە شاراندن ژی و رەخێن وێ‌ سور ژی نەبن، لێ‌ بتنێ‌ گەرماتیێ‌، بلەشێ‌ مە دا بینتە خارێ‌. من روژێن خوە ل سەر داربرینێ‌ هژمارتن، هەر روژێ‌ چەند قەدان ببرم و هەر قەدەك دێ‌ بنە چەند قەدێن ب قایدا سوپێ‌ و هەر روژێ‌ دێ‌ چەند قەد چنە سوپێ‌ و دێ‌ چەند سوپان هلكەم.
تا ڤێرە، پلانا من یا دروست بو و دبیت من زڤستانا خوە ئاسایی بوراندبا، لێ‌ تشتێ‌ من بێ‌ پلانی تێدا كری. من بو خوە گوت: ئەگەر ئەز دارێن كەلاشتی یێن خولپان بەری یێن چیایی بكار بینم، رەنگە زڤستان یا خوش بیت و گەلەك سوپێن داران هل نەكەم، هینگێ‌ قەدێن زەند، ئەڤێن من ژ چیایی فراندین، دێ‌ بو نان پێژتنێ‌ مفای ژێكەم، بو بن سێلێ‌.
ئەڤە ژی وەك من نەهات و پلانا من دروست دەرنەچوو و زڤستانەكا سار! نیڤ بەرمیلێ‌ گازێ‌ زوی خلاس بو و تەرەكتورا دارێن رەزی تا ژێ‌ نەما و قەدێن دارێن چیایی ژی ژبەركو چەند هەیڤان مان، بونە قلقلیشكان و هشكارە بون و دسوپێ‌ دا دبو چریسڤە چریسقا وان و دگاڤێ‌ دا خولی ژێ‌ دما و زڤستانێ‌ ئەز بو مە لەگلەگە، هەكو ب كولانكی دبێژن.
هەر چەندە ئەڤا ل سەری من نڤیسی، راست و راست گرێدان ب بەشەكێ‌ ژیانا من یا تایبەت ڤە هەیە، بەس ئەگەر ئەم ڤێ‌ بیروكەیێ‌ بو هەمی ژیانا خوە دانینن، هەر كارێ‌ ئەم بكەین هزرا خوە تێدا بكەین و خواندنێ‌ ل سەر بكەین، دێ‌ ژیانا مە چەند هێتە گوهورین، تا چ رادە دێ‌ شێین سەركەفتنێ‌ بدەست ڤە ئینین. ئەگەر ئەڤ سەربورا من نڤیسی هەمیێ‌ ژی بەروڤاژیكەینە پروژەیێن حكومەتێ‌، یێن باژێرڤانیێ‌، پەروەردێ‌ و كەرتێ‌ تەندروستی، ئایا هەر كارە و پروژەیێ‌ ئەو پێرادبن پلانێ‌ بو ددانن؟ بەلێ‌ بو ددانن، بەس دجێبەجێكرنێ‌ دا چەند د سەركەفتی نە و چەند دەلیڤەیێ‌ بو هەكەیێ‌ دهێلن. ئاریشا مە هەمیان هەكەیە و دپلان دارێژیێن خوە دا ئەم وێ‌ ژبیر دكەین، بەلگە ژی بو گوتنا من، هلكولانا جاددا نە و سیستەمێن پەروەردێ‌ نە و ووو هتد.
تێبینی:
دروژناما وار ژمارە 2200 دا هاتیە بلاڤكرن
إرسال تعليق