حكومەت چاوان قەرەبۆیا وولاتیان بكەت

دگرژە و كێشمەكێشەیێن دناڤبەرا حكومەتا بەغدا و هەرێما كوردستانێ‌ دا، ژبلی كو بابەت زێدەتر گرێدای سەروەرییا حكومەتا هەرێما كوردستانێ‌ و ماف و دەستور و بەرژەوەندیێن مافێن نەتەوەی یێن وێ‌ بون، دگەل بەغدا، كو دبەرامبەر دا بەغدا و سیاسەتا سەروك وەزیرێن بەرێ‌ یێن عیراقێ‌ هەمی ئەو بون، كو هەرێمێ‌ ملكەچی ئیرادەییا خوە بكەت، بو ڤێ‌ چەندێ‌ ژی حكومەتا عیراقێ‌ چەند كارتێن فشارێ‌ بكار ئینان و كارتا ژ هەمیان ژی كاریگەرتر، كارتا برینا موچێ‌ فەرمانبەران بو، ئەو ژی بتنێ‌ فەرمانبەرێن هەرێما كوردستانێ‌ و نەك عیراقێ‌ هەمیێ‌، بمەرەما، خوە نەرازیكرنا فەرمانبەرێن هەرێما كوردستانێ‌ و گڤاشتن ل سەر سەركردایەتی و حكومەتا هەرێمێ‌، كو هەرێمێ‌ پابەندی بریارێن بەغدا بكەت. دبەرامبەر دا، هاولاتی بو بەشەك ژ پشتەڤانییا حكومەتێ‌، ژبەركو بابەت نە بتنێ‌ گرێدای برینا قیتێ‌ وی یێ‌ روژانە بو، بەلكو، بابەت گرێدای دەستكەفتان و سەروەریێ‌ و ئەو خەباتا بو هاتیە كرن و خوین و كارەسات ژبو هاتینە دان، كو هیچ خێزانەكا كورد نینە، ئەگەر، بجورەكی و دووان، نە ببیتە قوربانی ڤان دەستكەفتان، ئەڤێن نوكە ئەم پێ‌ بوینە خودان هەرێمەكا سەربەخو، دناڤ عیراقەكا ئێكگرتی دا.

خوشبەختانە، رێكەفتن دناڤبەرا هەرێما كوردستانێ‌ و عیراقێ‌ دا بو بەرژەوەندا كوردان هاتە ئیمزا كرن، كو رەنگە ژ دەستپێكا سالا بهێت، جومگەیێن ڤێ‌ رێكفتنێ‌ بكەڤنە كاری و بارودوخێ‌ ئەڤە چەند هەیڤە هەرێم كەتیە تێدا، گوهورینێ‌ بخوە ڤە بگریت. لێ‌ پسیار لڤێرە، دبەرامبەری هەڤكارییا هاولاتی دگەل پێشڤەبرنا ڤان كێشمەكێشان و چوك نەدانا وی ل بەرامبەری ڤێ‌ كارتێ‌، كو حكومەتا عیراقێ‌ بو خوە ب باشترین چەك بكارئینای، كو هاولاتی كەربا خوە دارێژیت و هاولاتی ئەو كەرب نە دارێژت و بو بەشەك ژ سەنگەری، حكومەت، بو قەرەبوكرنا وی چ بكەت؟ ئەڤە ددەمەكی دا، هاولاتی ژ گەلەك ئالیان ڤە زەرەرمەند بو، هەر ژ گیروبونا مووچێ‌ وی یێ‌ هەیڤانە، كو تا نوكە ژی مووچێ‌ دوو هەیڤێن وی نە گەهشتیە دەستێن وی، ئەڤێن نە موچە دار ژی، هەمی برەنگەكی و دوان زەرەرمەند بون، كارێن وان پەككەفتی بون، پێشینە هاتبونە راوەستاندن، هەمی پروژە و جهێن كاری یێن ژ كار نەكەفتین ژی، گەلەك ب بێچارەی پرێڤەدچوون، یا ژهەمیێ‌ كاریگەر تر بو هاولاتی، گرانبونا بهایێ‌ لیترا پانزینێ‌ بو، كو ددەمەكی دا، نەبونا موچەی، كارتێكرن ل سەر ڤی هاولاتی دكر و دگەل دا ژی، گرانبونا بهایێ‌ پانزینێ‌، گڤاشتنەكا دی ل سر پرێڤەچوونا ژیانا وی یا ئاسایی دكر.
حكومەت چ بكەت بو ڤێ‌ قەرەبویێ‌. دبیت كەسان هەبن بێژن، حكومەت ژ هاولاتی یە و هاولاتی ژ حكومەتێ‌ یان كو، ئەڤ بێهنفرەهییا هاولاتی ل بەرامبەری ڤان كێشمەكێشەییان كێشایی، وەك ئەركەكێ‌ نیشتیمانی یە و هاولاتی چ منەتان ناكەت، ژبەركو ئەو دەستكەفتێن هەنێ‌ و پێداگیرییا سەركردایەتیا كوردی و ئێك دەنگییا وان بەرامبەری ڤان گرژیان، بو هاولاتی بخوە بن و ئێكەمین سودمەند ژی هەر ئەو بخوە بیت. تا ڤێرە راستە، بەلێ‌ دهەمان دەمدا، ئەگەر هاولاتی و گروپێن تێكدەر، بەروڤاژی ڤێ‌ بێهن فرەهیێ‌ كارێن تێكدەرانە و نە رازیبونێ‌ كربانە، هینگێ‌ دا، هەڤسەنگییا گرژیێن هەرێمێ‌ و بەغدا ژی دەرز دبەرژەوەندا بەغدادا كەڤنێ‌، كو خوشبەختانە خەونا، خودانێن وان بریاران ل بەغدا وەسا نە دەركەت و هالاوتیێ‌ كورد، بەروڤاژی هزرا وان، ژبو ڤان دەستكەفتان گەلەك قوربانی داینە و بێ‌ پیل و پارە، بێ‌ دەستكەفت و (ئیمتیازات)، هەردەم خوە ل بەروكێ‌ شەری و بەرخوەدانێ‌ و قوربانیدانێ‌ دیتیە و لهیڤییا چ پاداشتان ژی نەبویە.
نوكە دەم یێ‌ هاتی، حكومەت قەرەبوییا بێهنفرەهییا هاولاتی بكەت، دا ئەڤ هاولاتیێ‌ هەنێ‌ و بێ‌ بەرامبەر و بێ‌ دودلی خوە ل تەنگاڤیێن حكومەتێ‌ بكەتە خودان، كو ئەم دزانین گەفێن بەردەوام هەنە و ئەڤ گەفێن هەنێ‌ ژی بەردەوام دخوە نویكرنێ‌ دانە، دڤێت حكومەت بیر ل ئەرزانكرنا بهایێ‌ لیترا پانزینێ‌ بكەت و چاوان هەمی بزاڤێن خوە دابونە كاری، كو مووچەی بو فەرمانبەران دابین بكەت، دڤێت هوسان هەمی بزاڤان بكەت، كو دوبارە دەست بزڤراندنا بهایێ‌ لیترا پانزینێ‌ بكەت و وەك بەەرێ‌ و چ بهانە نەماینە، كو حكومەت خوە پاش بهێلیت و دەم هاتیە خوە ل قەرەبوكرنا هاولاتی بكەتە خودان.

دروژناما وار ژمارە 1228 دا هاتیە بلاڤ كرن