عبدلبرحمن بامەرنی
ئەڤ بەلگە فلمە ب ناڤێ (the migratory birds) و من وەرگێرانا گوگلی لێدا ھوسا ھات (بالندێن مشەخت)، دەمژمێر 5ی ئێڤارێ ل ھولا ژمارە (1) یا دھوك مول ھاتە نیشاندان و من چانسێ بەرێخوەدانا وی ھەبوو. بەلگە فلم ل دەڤەرا قەرەداخێ ل باكورێ كوردستانێ ھاتیە وێنەكرن و دەرھێنەرا فلمی ژی توركە و پیشەییا وێ ماموستا بوو، لێ دەولەتا توركییا ژبەر ڤی فلمی ئەو ژ سەركارێ وێ دەرئێخست، ئەڤە لدویڤ گوتنا وێ بخوە.
تشتێ من ژڤی بەلگە فلمی تێبینی كری و ئەز پالدایمە ڤێ نڤیسینێ، كو تایبەت بۆ ل سەر ژیانا كوچەرێن كوردان، ل زوزانا و پەزی و چەراندن و ھەمی ھوردەكاریێن كوچەراتا ب جوانی و رێك و پێكی دھاتنە پیشاندان. تا وی راددەی ھەر كەسێ ئەڤ بەلگە فلمە یە دیتبا دا زانیت ڤێ دەرھێنەری چەند حەز بۆ ژیانا كوچەراتیێ یا ھەی، ژیانا وان یا سادە، ھەمی تشتەك ب جوانی وێنە دكرن و پیشانددان، تا وی راددەی دا ھزركەی، ئەڤ تشتێن ھەنێ دھزرا وێدا بۆ ھەمی بینەران دێ تشتەكێ نوی و سەرنج راكێش بن، ئەڤە ژی دبیت ب دیتنا وێ ژینگەھێ ڤەبن ئەوا ئەو دناڤدا مەزن بووی. تا ڤێرە كارێ دەرھێنانێ و وێنەگرتنێ تشتەكێ ھەری جوانن و ئەز نەشییام ھیچ تێبینیەكێ ل سەر بنڤیسم.
لێ یا من چاڤەرێدكر و نەشییام دناڤ ڤی بەلگە فلمیدا ببینم، من چیرۆكەكا ئێكگرتی نەدیت، كو ئەڤە بۆ سیناریستی دزڤریت، تەڤلیھەڤی دناڤ دیمەناندا ھەبوون، تا وی راددەی مرۆڤ ھەست بخوە ژبیركرنێڤە دكر، كا ڤێ دەرھێنەرێ دڤێت برێكا ڤێ ژیانا ناڤ چول و چییا و كوچەراتیێ چ بگەھینیت؟ ھەر چەندە د بەرسڤا پرسیاراندا گوتی: (ئێك ژ ئەگەران ئەو بوو كو عەردێ پەز و كەوال لێ دھێتە چەراندن یێ دھێتە داگیركرن و ئاڤاھی و كارگەھێ ل شوونێ دھێنە دروستكرن)، لێ بھزرا من ئەڤە بتنێ بەس نەبوو و خالا من وەك بینەرەك پرسیار ئاراستەی وێ كری، دەما ھاتیە سەر ستێجی بۆ دانا چاڤروھنیەكێ ل سەر ڤی بەلگە فلمی و من گوتێ: بوچی ئاخفتنا ھەمیان كوردی بوو و بتنێ یا كچا وان نە، دەما ھاتیە دەف وان وێ ب توركی د ئاخفت؟ سەرەرای ل دووماھیا فلمی دیار دبیت و دیا دیار بووك و وێ نەخوشیەك ھەبوو؟
د بەرسڤێدا وێ گوت: "ژیێ وێ كچێ بتنێ (2) سال بوون دەما نەخوشكەفتی و تا (4) سالیێ ل نەخوشخانێ ما و نەشییا فێربیتە زمانێ دایكێ، كو كوردییە یان كو دویر مالباتا خوەبوویە". خالا دوویێ دەما گوتی: "ئەز وەك وێنەگرەك ھاتبوومە ڤێ دەڤەرێ و جوانیا دەڤەرێ بالا من گەلەك بۆ خوە راكێشا و ئەز پالدامە دروستكرنا ڤی بەلگە فلمەی".
سەرەرای ئاستەنگییا زمانی بو منەكێ بینەر، ئەز گەھشتمە ڤان سەرەنجامان، ئێكەم: ئەگەر كورد ل توركییا ھەبن، لێ بەرە بەرە جھێ وان و عەردێ وێ یێ لێ دھێتە بەرتەنگكرن و زوری ل ئاخ و عەردێ وان دھێتە كرنێ و خالا دوویێ و گرنگ، زارۆكێن كوردان دناڤ توركاندا یێ بەرزە دبن، ژبەركو گەلەك ژوان نزانن، ب زمانێ خوە یێ كوردی ب ئاخڤن.
ـــــــــــــــــــــــــــــــــــــــــــــــــــــــــــــــــــــــ
ليست هناك تعليقات:
إرسال تعليق