عبدالرحمن بامەرنی
ئەڤرو ئاھەنگا ئیمزاكرنا پەرتووكا (ل ژێر سیبەرا چیا) یا نڤیسەر رزگار كێستەی بوو و تێدا نڤیسەر و ئەدەب دوست و ل ھەردوو رێزێن ئێكێ، كو ل سەر كورسییان نڤیسی بوو تایبەت، بتنێ پێشمەرگێن كەڤن، پلەدارێن سەربازی و بەرپرسان مافێ روونشتنێ ل سەر ھەبوو.
كی ل كیرێ ب روونیت، ئەڤە بابەتێ من نینە و یا من ژ ڤێ ئاھەنگێ تێبینی كری، نڤیسەرێ پەرتووكێ كو دناڤ شورەشێدا وەك پێشمەرگەیەك ژیایە، ب دلسوزییا خوە و وەك ئەركەك، كو ھەم نڤیسەرە و دەستێ نڤیسینێ ھەیە و ھەم ژی بەشداری دەھان داستانان بوویە، رابوویە ب نڤیسین و بەلگەكرنا شورەشێ، وەك ئەو دناڤدا ژیایی و دیتی، كو ئەڤە بەرگێ دوویێ بوو ژ پەرتووكا وی و پرۆژێن وی یێن داھاتی دڤی دەربارەیدا كو بەحسكرین، جھێ دەست خوشیێ بوون.
دا ل بابەتێ خوە بزڤرم، بەرییا چەند سالان خوێندكارەكێ زانكویێ ژمن خاست، كا چ پەرتووك ل سەر شورەشێن كوردی ھەنە، ژبەركو ڤەكولینا وی ل سەر شورەشێن كوردییە؟! راستی بیت چ پەرتووك نەبوون، من گەلەك جاران ژی ھزركریە ئایا شورەشێن كوردی ھندە د شەرمینوك بوون، بوویە كەس ل سەر نا نڤیسیت؟ ئەڤێن دناڤ شورەشێدا ب لاوازی ب ئەركێ خوە رابووینە و وان بخوە پێنەخوشە راستیێن تەحل بھێنە ئاشكەراكرن؟ پێشمەرگەیێ نوكە ھێشتا یێ تا ئەڤرو دژیانێدا مای، ھەست دكەت ئەڤا بۆ وی ھاتیە كرن بەسی وییە و پێشمەرگاتی نەما و شورەش نەما، ئێدی بەرناكەڤیت بەحس لێ بھێتە كرنێ؟!! ئەڤە و سەدان پرسیارێن دی یێن بێ بەرسڤ د سەرێ مندا دروست دبن، تو بێژی سەركردایەتییا كوردی بخوە ئەنقەست نەڤێت ڤان شورەشان بەلگە بكەت، ژبەركو رولێ كاراكتەرێن وێ ھاتیە بەرزەكرن و ئەو بخوە گەھشتبنە دامێ و نەڤێن چ دەرگەھان ل سەر خوە ڤەكەن؟ بلا بەرسڤا ڤێ ژی ژنك من نەبیت، ژبەركو ئەڤە ژی بابەتێ من نینە..!
باشی و خرابیێن شورەشێ یێن مە ھەمیانە:
دڤێت ئەم ژ خەباتا خوە و شورەشێن خوە شەرم نەكەین، ئەگەر مە شاشی ھەبن، مە كێماسی ھەبن، دڤێت ئەم ب راستگویانە ھەر تشتی بەحس بكەین، دڤێت رولێ كەسەكێ نەھێتە ژبیركرن، ئەڤێن خەبات كری و ماندیبوون دیتی و گەلەكان مال و حالێ خوە ھێلابوون و ب چیا كەفتبوون و ببونە پێشمەرگە، ژبەركو كوردینی دڤییا و زوردارییا رژێما وی دەمی ل سەر خوە قەبیل نەدكر. لێ پرسیار، كی دێ بەرپرس بیت ئەگەر رولێ وی ھاتە بەرزەكرن یان نەھاتە بەحسكرن و نوكە د خانیەكێ تەجاوزڤە بیت؟! ئایا كورێ وی یان برایێ وی دێ چاوا زانن رولێ وی و ئەگەرێ دەربەدەرییا وی چبوون و ئایا یێ ترسنوك بوو یان یێ وێرەك و دلسوز بوو؟!! ئەگەر شورەش نوكە بھێنە نڤیسین و ھات و كاراكتەری وەك خوە بیرەوەریێن خوە نڤیسین و رولێ ھندەكا بھێتە بەرزەكرنێ ژی، دێ ھەبن وی كەسی ب نەوەی دەرئێخن، دا راستی نەھێنە شێواندن.
ئەز گەلەك ب درامایێن كوری یێ سەرسورمان بووم، وان ب سەدان سالان گرنگی ب نڤیسینا مێژوویێ ددا، دەما ئێكی شاشیەك ژی كربایە، نە دگوتنێ ما تو ژ خودێ نا ترسی، لێ دگوتنێ ما تو ناترسی مێژوو ب خرابی بەحسێ تە بكەت، لێ د شورەشێن مەدا، ئایا مێژوویێ مافێ ھەمییان دروست دایێ یان نە؟!!
ـــــــــــــــــــــــــــــــــــــــــــــــــــــــــ
%20copy.jpg)
ليست هناك تعليقات:
إرسال تعليق