عبدالرحمن بامەرنی
كەفتن نە تشتەكێ سەیرە و ھەمی مرۆڤ دكەڤن، زارۆك دكەڤن و سنێلە دكەڤن و گەنج دكەڤن و مەزن دكەڤن و خوە سەروك ژی دكەڤن، ئەوێ نە كەڤیت بتنێ خودێ یە و ئھا من دڤێت دڤی تێكستیدا، نھێنییا كەفتن و رابوونا (كەوسەر شەوكەت)ێ ببینم.
دڤی تێكستیدا كو لبنێ گوتارێ دێ (تێكستا وێ یا بێ ناڤ) ھەمیێ دانم، مە كەفتنا وێ زانی و لێ دوبارە نھێنییا رابوونا وێ د چ دابوو، كو ئێدی ئەو جارەك دی نەكەڤیتە ڤە؟!! ئەڤە ئەوە یا ل دەستپێكا تێكستێ خوە، كەوسەر مە یێ خواندەڤان دگەل خوە دبەت، ئەوا دبێژنێ جوانییا تێكستی، جوانیا نڤیسینێ، دەما دبێژیت: " دەمێ کەڤتی، پازدە سال دەرباز نەکربوون، د وێ کەڤتنێدا ڕۆحا وێ شکەست بوو، ھەر چەندە ئەو کەفتن ژ چو ئاڤاھییێن بلند نەبوو، لێ شکەستنەکا دۆمدرێژ ل دووڤ خوە ھێلا!". نڤیسەر دڤی پەرەگرافیدا مە ل بابەتەكی ب ئاگەھـ دئینیت، ئەو ژی دڤێت ھەمی تشتەكی خالەكا دەستپێكی ھەبن، دڤێت ئەگەرەك بۆ بەرخوەدانێ ھەبیت، من بەحسا بەرخوەدانا دەروونییە و ئەڤە ئێكەمین بەرخوەدانە مرۆڤ دگەل خوەدا بكەت، تا مرۆڤ خوە یێ مرۆڤ نەبینیت و مرۆڤ دخوە نەگەھیت و مرۆڤ خوە پێناسە نەكەت، مرۆڤ نەشێت د كەسێن دی بگەھیت و كەوسەرێ ھەر چەندە ئەگەر ل وی دەمی تەمەنێ وێ یێ ھندێ نەبیت، د 15 سالیێ دا ئەو ھزر لدەف نە جەمیابن، كو ڤێ لێگەریانێ بكەت، لێ ھندەك دی ئەڤ بەرگەریانە بۆ كریە و ئێكەم كەسێن لدەف گێراندین ژی دا ب نەخوشییا وێ بكەڤن و وێ چارەسەر بكەن، نوژدار بوون.
بزانین ژ زاردەڤێ وێ، نوژدار چاوان چارەسەرییا وێ دكەن، دەما دنڤیسیت: (نۆژداران شیان نەبوون ب دورستی جھێ شکەستنێ دەست نیشان بکەن، دا ب سەر وێ نەخۆشییا لەشی ھەلبن). كەوسەرێ دڤێت بێ چەپ و خوە بادان دیار بكەت كو تشتەك یێ ھەی ژ نوژداری و جەباران مەزنتر، ئەڤێن ھەستییان دبەنە بەر ئێك و دجەبرینن، دەما مرۆڤ دكەڤیت، ھێشتا دبێژیت: (ھەر حەبەک و دەرمانەکێ ژ نۆژداری وەردگرت ب نھێنیڤە دھاڤێت، ھزر دکر کەنگی دێ ئامیرەک شێت، نەخۆشییا ڕۆحێ دەست نیشان کەت، ئەو ژی پێدڤی ب حەبک و دەرمانایە، بۆ نموونە دەنگەک ببیتە دەرمان، دوجار ل سحارێ و دو جار ل ئێڤاران بھێتە گوھ لێبوون، بێهنەک ببیتە ملحەم، پەیڤا من تو دڤێی ببیتە حەبک، ھەمبێزەک ببیتە چارەسەرییەک! بەلێ پا ئەڤە ژی ھندە تەخمینێن چڤێلن).
دا ل نڤیسینا خوە ڤەگەرین ڤە و ل سەر نھێنییا رابوونا وێ ب راوەستین و یا ئەم دزانین نڤیسەر كەسەكە ب ئازادانە ل ناڤ ھەمی ھزران دگەریت، ھەمی بیاڤان ددەتە سەر پێن خوە و چ سنوران نە ل بەر سینگا خوە و نە لپشت خوە نابینیت و دا كو نڤیسەری شیانێن داھێنانێ ھەبن، ئەو شیانە ھەبن تشتەكی بینتە ھەبوونێ، كو ل پێش وەخت ئەو تشتەكە ئەگەر ل بەر چاڤ ژی بن، كەسێ ھەست پێنەكربیت، دڤێت جوداھیەكێ دناڤبەرا خوەیێ مرۆڤ و خوەیێ خوداوەنددا دروست بكەت، دڤێت نڤیسەر دگەرماتییا نڤیسینا خوەدا كەڤلوژانكێ مرۆڤبوونا خوە ژ بەرخوە دانیت و تا تشتەكێ جوان ژبن قەلەمێ وی دەركەڤیت، ئەز نابێژم من ئەڤە دڤی تێكستیدا دیت، لێ ئەز ھەمی خواندەڤایان پشت راست دكەم، ئەگەر نڤیسەری بڤێت تشتێ جوان ژبن قەلەمێ وی دەركەڤیت و ئەو تشتێ ھەنێ زیندی بمینیت، دڤێت كەڤلوژانكێ خوە یێ مرۆڤ بوونێ ژ بەر خوە دانیت و بەرەڤ عەسمانان بچیت، ئایا دڤی تێكستیدا كەوسەر شییایە ڤێ چەندێ بكەت؟!!
ئھا ئەڤە بوو یا ڤی تێكستی ئەز راكێشایمە خوە و دەمەكێ درێژە ئەز ل سەر ھێزا راكێشانێ راوەستییام، نھێنییا ھەمی تشتەكی و تایبەتی د بوارێ نڤیسینێ دا، ئەو چ تشتن تە دكەتە نڤیسەر، كەوسەر شەوكەت دبێژیت: " گەلەک سالان، ئەوێ ئەو ڕۆحا شکەستی د گەل خوە ھەل دگرت و دئینا و دبر ". راستە تەمەنێ 15 سالیێ تێرا وێ چەندێ ناكەت تو ببیە نڤیسەرەكا/ێ زیرەك و داھێنانێن جوان بكەی و تشتی ب ئافرینی، لێ دا تو ببیە نڤیسەر، دڤێت گەلەك تشتان لدەف خوە خرڤە بكەی و دنیا بینیا تە ژی دگەلدا یا جودا بیت و لدووماھیا تێكستی دەما دبێژیت: " نەشێت خوە تێبگەھینیت، کو خودایێ وێ ھندێ لاوازە، خوە شیانێن دانا ڤیانێ نینن". و ئەڤە نە مەبەست بێ نە باوەریبوونا وێ ب خوداییە، بەلكو دەھـ باركی باوەرییا وێ زێدەدكەت، كو ئەگەر تە بڤێت كەفتنێن خوە بكەیە رابوون، دڤێت تو خوە ژ خوەیێ مرۆڤ رزگار بكەی و جیھانەكا جوداتر ژ یا مرۆڤ ل سەر دچن، بۆ خوە دروست بكەی.
...........................
تێكستێ (كەوسەر شەوكەت).
دەمێ کەڤتی، پازدەسال دەربازنەکربوون، د وێ کەڤتنێدا ڕۆحا وێ شکەست بوو، ھەر چەندە ئەو کەڤتن ژ چو ئاڤاھییێن بلند نەبوو، لێ شکەستنەکا دۆمدرێژ ل دووڤ خوە ھێلا! نۆژداران شیان نەبوون ب دورستی جھێ شکەستنێ دەست نیشان بکەن، دا ب سەر وێ نەخۆشییا لەشی ھەلبن، یا ب زەحمەتە ئێک بێژیتە نۆژداری ڕۆحا من یا دئێشیت، زانست ژی ھندێ تامسارە، دانپێدانێ ب نەشیانێ ناکەت، ھەر حەبەک و دەرمانەکێ ژ نۆژداری وەردگرت ب نھێنیڤە دھاڤێت، ھزر دکر کەنگی دێ ئامیرەک شێت، نەخۆشییا ڕۆحێ دەست نیشان کەت، ئەو ژی پێدڤی ب حەبک و دەرمانایە، بۆ نموونە دەنگەک ببیتە دەرمان، دوجار ل سحاری و دو جار ل ئێڤاران بھێتە گوھ لێبوون، بێهنەک ببیتە ملحەم، پەیڤا من تو دڤێی ببیتە حەبک، ھەمبێزەک ببیتە چارەسەرییەک! بەلێ پا ئەڤە ژی ھندە تەخمینن چڤێلن، ئەرێ پێشتر تە گوھ ل کەڤتنا ڤیانێ بوویە، مرۆڤەک ب حەزکرنێ نەخوەش ببیت، ئەو نەخۆشییا نۆژدار نەشێن چارە بکەن، ئەو ژی ب ڤێ نەخۆشییێ کەڤت بوو، لێ بۆ چارەسەرییێ ئەو ل بەندا چو موعجزەیان نەبوو، قەت ھزر ژی تێدا نەدکر، بەلکی ھەمی ھیڤییێن خوە ب کاغەزانڤە ھێلابوون، ھزر دکر ئەگەر تشتەک ھەبیت وێ چارە بکەت دێ قەلەم و کاغەز بن.
گەلەک سالان، ئەوێ ئەو ڕۆحا شکەستی د گەل خوە ھەل دگرت و دئینا و دبر، ئەز باسێ زەحمەتییا سەرەدەریکرنێ د گەل نەخوەشەکی ناکەم، تو ب خوە دڤێت بزانی چەندا گرانە! لێ یا سەیر ئەوە، ئەوا ئەو چارەکری ھەر دەرکەڤت موعجزە، ژ بەر ڤێ چەندێ ئەو وەسا بوویە باوەردارەکا توند، ھەر دەم دبێژیت ساخکرن کارێ خودایە، ئەوێ ڕۆحێ ددەت دڤێت خودا بیت! لەوڕا خوە ب تەمامی ڕادەستی وی خودای کرییە. ڕک ئەو ب ڕەنگێ باوەردارەکا بتپەرێس دچیت، وەکی وان ئەوێن خودا دورست دکرن و پاشی دخوارن! نەشێت خوە تێبگەھینیت، کو خودایێ وێ ھندێ لاوازە، خوە شیانێن دانا ڤیان نینن، ھندێ ھەژارە ھێش ھزر دکەت ڤیان و ھەست و حەزکرن کێماسینە! تەخمین بکە د باوەرا خودایێ وێدا داخازکرنا ڤیانێ نەخوەشییەکە! تو دزانی باوەرداری دەردە...
ـــــــــــــــــــــــــــــــــــــــــــــ
لینكێ گوتارێ ل سەر سایتێ روانگە و رەخنە:
%20copy.jpg)
ليست هناك تعليقات:
إرسال تعليق