نڤیسینا پێشگوتن بۆ پەرتووكا ھەلامەتێن شەڤێ یا عەلی بەندی

 عبدالرحمن بامەرنی

ھوزانڤان جوداتر ژ كەسێن دی..

ھەڤالینیا زێدەتر ژ 30 سالان، تێرا ھندێ ھەیە مرۆڤ بشێت ئێك دوو ناس بكەت، ھەر چنەبیت ھندەك وێستگەھان ژ ژیانا وی، گەنجاتیا وی، مژوولاھیێن وی و حەزێن وی، ئەڤێن ھەنێ ژی ھەمیان دێ كورتكەمە ناڤ جیھانا نڤیسینێ، ژبەركو نڤیسینێ و شعرێ ئەم كرینە ھەڤال، بەردەوام ژی ئەم بەرھەمێ ئێك دوو دخوینین، ھەر چنەبیت شعر گەلەك نھێنیان ژ ھوزانڤانی دیار دكەت، ئاستێ ویێ ھزركرنێ و مەعریفێ و یا گرنگ لدەیف من بخوە و تایبەت ئەڤێن شعرێ دنڤیسن، شێوازێ یاریكرنا وانە ب پەیڤان و ئەو سنعەتكاریا ئەو د شعرێن خوەدا دكەن.

 ئەڤ ھەڤالینییا ئەز ژێ بەحس دكەم ژی ھوزانڤان (عەلی بەندی)یە، كو شعرێ ئەم كرینە ھەڤالێن ئێك و نوكە ئەز پێشەكیكێ بۆ كومەلا وی یا شعران دنڤیسم.

 

ھوزانڤانی ژ ھەر کەسەکێ دی زێدەتر باوەری ب وێ جیھانێ ھەیە، یا ئەو  تێکستێ خوە تێدا زیندی د ھێلیت. د وێ جیھانێ ژی دا ھەست ب گڤاشتنێن دەرەکی ناکەت و چ بھای ژی بۆ دەمی و وان عرف و عادەتان نا دانیت، یێن دەوروبەرێن وی بۆ خوە ژ ھزر و ڤەرێژا بیروباورێن خوە، بۆ خوە کرینە پیروزی و ل سەر پرێڤە دچن.

 

 ھوزانڤان دەما دکەڤیتە بن باندورا نڤیسینا دەقەکێ نوی، ھەست ب چ ئەزمونێن پێش وەخت ناکەت، ھندی ھەست ب وێ چەندێ دکەت، کو ئەڤ دەقێ وی دێ بیتە جھێ لێزڤرینێ و دێ (واقعەکێ) نوی دروست کەت. ھوزانڤان ھەمی تشتەکی دبینیت و دا بشێت وان ھەمی تشتان ژی گیانی و رحێ بدەتێ، ل بەرکرنەکا نوی دگەریت و ئەڤ بەرکرنا ھەنێ ژی، ئەو وێنە نە ئەڤێن ژ سحرا خەیالا خوە بۆ کەر دکەت و دکەتە بەر ڤە و سەروسیمایەکێ دی پێ دپەخشیت و ژڤێ ھەڤکێشەیێ ژی، ئەوا دناڤبەرا ھوزانڤانی و تێکستی دا دھێتە دیتن، ھندەک ژ ساخلەتێن ساحریانە د خودیێ شاعری دا دھێنە دیتن، تا بشێت دەقێ خوە د قالبەکێ چێکری و نە یێ سروشتی دا بینتە بەرچاڤ. ژبەرکو د بنەرەت دا، سحر و شعر ژی ب دوو دەستە خویشکان دھێنە ناسکرن یان کو ھەردوو ژ دایکبویێن ئێک مالبچیکن.

 

 ژڤی روانگەی ژی ئەگەر سحر پێرابوونەک بیت و شیا بیت ھەر ژ ئەزەل سەرنجا خەلکی بۆ خوە راکێشا بیت، شعر ژی بھەمان روانگەی، خەلکەک بخوە ڤە حێبەتی کریە و سەرنجا وان بۆ خوە ئینایە، شعر جوداتر ژ سحرێ ئەڤا ب کریارێ نەھێتە نمایشکرن، ب خەیالی دھێتە دەربرین و ژبەر ھندێ ژی ھەر دووک رویێ ئێک دراڤن و بتنێ زمانێ شعرێ یە رویێ وێ جودا دکەت و جوان دھێلیت.

ژبەركو ب باوەریا من شعر سنعەتكاریە زێدەتر ژی كو ئیلھام بیت، بوویە ھەر ھوزانڤانەك جوداتر پەنایێ د بەتە بەر ئالاڤێن ل بەر دەستێن خوە، ئەو تشتێن ئەو دبینیت، ئەو تشتێن ئەو پێ داخبار دبیت، ئەو تشتێن كارتێكرنێ ل وی دكەن، بۆ ھوزانڤانەكی ژی كارێ وی یێ سەرەكی دناڤ خێزانێن ئەنفالكریان دا بیت،  خەمێن وان، ئێش و ئازارێن وان، چیرۆكێن وان یێن نەھێنە ژبیركرن، دەردەسەری و ئەو كابوسێن ب شەڤێن درێژ خوە ژوان دوور نەئێخن، پێنەڤێت دێ ڤان ھەمی تشتان كارتێكرنا خوە یا راستەوخو ژی ل سەر نڤیسینا شعران ھەبیت. 

نە بتنێ ئەنفال، گەلەك تشتێن دێ دناڤ ڤان شعران دا من دیتن، ھوزانڤانەكێ عاشق، ھوزانڤانەكێ حەزا لێگەریانێ لدەف ھەی، ھوزانڤانەكێ بۆ جوانیێ نڤیسایی، بۆ جوانیێ سەماكری و دبەر جوانیێ را ئەڤ شعرێن ھەنێ نڤیسین، ئەگەر جوانی نەبیت، ھینگێ پەیڤان ژی رامانا خوە نابیت و تشتێ ھوزانڤانان ژ كەسێن دی جودا دكەن ژی، جوانیە و نھێنییا دپشت پەیڤان را، ل خواندنا ڤان شعران ژی ڤان ھەمی تشتان دێ بینین و ھەست پێكەین.

عبدالرحمن بامەرنی