عبدالرحمن بامەرنی
پارچە ڤیدیویەك ژلایێ چەند ھەڤالێن من ڤە من بۆ من ھات و تێدا دیار بوو، كو (ھیڤیدار ئەحمەد) وەك پەرلەمانتارێ كوردستانێ ل سەر كەنالێ رووداو چەند راستی دگوتن، ھەر چەندە ئەو تشتێن وی گوتین تشتەكێ ڤەشارتی نینە و (ب رۆژا نیڤرو دكەنە گازی)، لێ پەرلەمانتارەك و ل سەر كەنالەكێ دیاریكری ڤان راستییان دیار بكەت، دخوە بخوەدا جھێ ل سەر راوەستیانێ یە.
ھیڤیدار د بەرسڤەكا پرسێن پێشكێشكاری دا، دبێژیت: "مە سەرەدانا ھەمی گومركێن ھەرێما كوردستانێ كرینە یێن فەرمی و نە فەرمی، ئەگەر دزی و تالان ل وان گومركان نەبیتن و ھەمی پارە بۆ خەزینا حكومەتێ بیتن، رەنگە پێویست نەكەتن ئەم ھندە تكا و رجا ل عیراقێ بكەین، بەلام ئەو پارە نە بۆ خەزینا حكومەتێ نە و ھەتا بەشەك بۆ حزبان ژی نینن و بۆ ھندەك شەخسانە، بۆ خوە دبەن و پێ دەولەمەند دبن، پرۆژێن خوە پێ چێدكەن و خوە پێ مەزن دكەن ل سەر حسێبا ڤێ خەلكی و ئەڤ كوردستانە و ئەڤ خەلكە ژی نە موھیمە. سوبەھی ئەگەر لڤێ كوردستانێ قەوما، ئەوان بەشەكێ زورێ پارێ خوە یێ تەحویل كری ژی و ئەو دێ جەوازا خوە و چانتێ خوە یێ بچیك ھەلگریت و دێ چیتە دەرڤە، بوویە ئەم داخوازێ ل حكومەتێ دكەین، گوشارەكا ئێكجار زور ل سەر ڤان دەروازان بكەتن، پارە ھەمی ددەستێ حكومەتێ دا بن، كو ئەم بشێین موچێ خەلكێ خوە بدەینێ، كو ب سەر بلندانە حكومەت بشێت بەرامبەر خەلكێ خوە راوەستیت، كەرەمبكەن ئەڤە من حەقێ وەدا".
ئەڤە گوتنێن ڤی پەرلەمانتاری بوون، كو ژ رەوانبێژیا وی پێدڤی نەدكر، بۆ دارێژمەڤە. دا بھێمە گوتنێن خوە، ئەز ناچمە بەر شیرەتان و داخوازیان ل حكومەتێ بكەم، كو ھیڤی و رەجایان ژ ھەوەیێن پایە بلند دكەین، چاكسازیێن خوە ئەوێن وە بۆ چەند ھەیڤان سوشیال میدیا پێ شاراندی بێخنە وارێ جێبەجێكرنێ، ژبەركو ئەگەر وان چاكسازییان بكەن، ئەڤە وە پێگەھێ خوە بلندكر و مێژوو دێ وە ھەلسەنگینیت و دێ ب دەستكەفت بۆ ھەوە ھژمێریت.
من گوت ئەز ناچمە بەر شیرەت و داخوازیان، ژبەركو ب راستی ھندی ئەم بكەینە گازی وە كەیف بمە دھێت و ھین بۆ خوە مفای ژ لاوازی و بێ دەستھەلاتیا مە وەردگرن و ھین پێگەھێ خوە خوشتر لێدكەن و ھین دەنگێن خوە ل سەر حسابا مە زێدە دكەن، ئەز دێ بتنێ چەند پرسەكان ئازرینم، ھەر چەندە چ بگەھنە وە یان نەگەھن، ھیچ ژ ھەڤكێشەیێ ناگوھوریت.
ـ گەلەك جار دھێتە گوتن كو گەلەك سەرمایەداران ڤیاینە پرۆژان دروست بكەن، لێ یێن گوتینێ دڤێت ئەم بەشەك بین ژ قازانجێ تە، ئەڤ سەرمایەدارێن ھەنێ ژ پرۆژێن خوە پاشكەز بووینە و ئەگەر دەمەكی ئەڤە لدەف من جھێ گومانێ بیت، نوكە بۆ من دیار بوو كو راستیەك یا بۆ ھەی.
ـ دەما ئەز ل پارێزگەھێن ھەرێما كوردستانێ دگەرم و ئاڤاھیێن بلند ب بەرچاڤێن من دكەڤن، ھەر چەندە ھینگێ ئەز پێ دلخوش دبم كو كوردستان یا جوان دبیت، لێ بۆ من دیار بوو ئەو ژ پاشكەفتێ موچێ من بلند بووینە، ئەو ژ وی پارەی ھاتینە دزین، كو دڤیا با نوكە بارودوخێ ژیارا من خوشتر بایە و خواندنا زارۆكێن من باشتر بایە.
ـ ل شوونا ئەز بخوازم بھایێ پەترولێ گران ببیت و داھاتێ خەزینەیا حكومەتێ تژی بیت و موچە بھێنەدان و پرۆژە بھێنە دروست كرن، خوزیا من ئەو بیت بھایێ پەترولێ ئەرزان بیت، ھەر چنە بیت دێ چەند دینارەك ژ بھایێ پانزینێ كێم بن، دەما دچم ترومبێلا خوە دبەمە بەر پانزینخانێ و دزانم، گرانبوون و ئەرازنبوونا پەترولێ نەبوو منە.
ـ دەما ئەز دبینم پرسا نەتەوەیی ل سەر ھەڤكێشەییا بەرژەوەندییا دھێتە پێڤان و كێشان، ھینگێ ئەز ل كوردبوونا خوە ب گومان دكەڤم، ئەز ل وێ ئاخێ ب گومان دكەڤم یا ب سەدان قوربانی بۆ ھاتینە دان و خوین بۆ ھاتیە رێتن. ببورن ئەگەر ڤێ ژی بێژم، رەنگە ئەوێن سەرێ خوە ژ پێخەمەت ئازادبوونا كوردستانێ داناین و نوكە دناڤ گوریدا، ئەو چ ھزر دكەن ژ بلی نەفرەتكرنێ، نەفرەتكرن ژ بۆ وان كەسان یێن یارییان ب خوینا وان دكەن.
تشتێ ژ ئەڤا من دڤێ پارچە ڤیدیویێ دا دیتی و ژ دیڤچوونێن پەرلەمانتارەكی و ئەو گوتن ل سەر كەنالەكی بھێنە ئاشكەراكرن، كو ئەو كەنالە یێ نزیك بیت ژ جھێ بریارێ، ئەڤە من دگەھینتە باوەریەكێ، كو وەلات دروست ناھێتە برێڤەبرن و بدەھان دەرز یێن ھەین یان دڤێت ئەو دەرزێن ھەنێ بھێنە پركرن یان ژی ئەو خواحافیزیێ ژ دەستھەلاتداریێ بكەن یان ئەم خواحافیزیێ ژ كوردستانێ ھەمیێ بكەین، كو ئەڤ ھەردوو ھەلبژاردە دھزرا مندا نینن، ئەگەر ژ نەچاریێ نەبیت.
*گوتار ل سەر مالپەری:
*گوتار ل سەر فەیسبوكێ مالپەری:
ـــــــــــــــــــــــ پارچە فیدیوییا پەرلەمانتار ھیڤیدار ئەحمەد:
ليست هناك تعليقات:
إرسال تعليق