عبدالرحمن بامەرنی
مە بڤێت و نەڤێت، دڤێت ئەم خوە دگەل جیھانا نوی ب گونجینین و مل ب ملێ وێ بچین. خوە ئەگەر ئەم دگەل نەچین ژی، ئەو دێ مە ددوف خوەرا راكێشیت، چ راكێشاندن؟ ئەو بابەتەك دییە و دڤێت ئەو راكێشان نەبیتە خراندن. سینەما ژی ئێك ژ وان ھەمی تشتانە یێن مە و تاكێ مە ژڤێ خراندنێ رزگار دكەن و مە ب جیھانا نویرا دگەھینن، خوە ئەگەر ئەم دویڤەلانك ژی بین، دێ مە دەرفەت ھەبیت، ئەم تاكێ كورد، نەوەیێ نوی ژڤێ جیھانێ نە ڤەقەتینین و ئێك ژ بەرەژەنگێن ڤێ ڤەقەتیانێ ژی، وەك نمونا گەنجێن مەیە، ل سەر سنورێن بیلاروسیا یا نوكە دھێتە دیتن.
ئەز بەحسا سینەمێ و گرنگییا وێ ناكەم بۆ مە كوردان، ھندی ئەز دێ ل سەر فلمە فێستیڤالا دھوكێ راوەستم. ئەز دێ بەحسا مەزاختیەكێ مەزن كەم، كو ژ بودجا حكومەتا ھەرێما كوردستانێ بۆ فێستیڤالێ دھێتە خەرجكرن، ئەو بودجە ژ خەلكییە و دڤێت بۆ خەلكی بیت. ئەگەر بەحس ل گەرێن بوریێن فێستیڤالێ بكەم، دا بینی چارێكا ھولێ ژ بینەران تژی نەبوویە، من گوت چارێك دا مەعنەویاتێن پێرابوویێن فێستیڤالێ كێم نەبن، ژبەركو ژ چارێكا وێ ژی كێمتر دھاتنە دیتن، ئەڤ گەرە و ھاتنا خەلكی باشتر بوو، ئەگەر راستر بێژم، من شەنسێ وەرگرتنا باجەكا چونا ژوور ھەبوو، ئەگەر بۆ من ژی دەست نەددا ئەز ل تەماشەكرنا گەلەك فلمان یێ ئامادە بم..
دا بزڤرم بابەتێ من مەبەست پێھەی، وەك ئەم دزانین ل دھوكێ مە كەلتورێ سینەمێ نینە، مە كەلتورێ شانوویێ نینە، مە ھولا سینەمێ نینە، دگەل ڤان ھەمی نەیییاندا، ئەم دێ چاوان شێین خوە دگەل ڤی كەلتوری گونجینین و خەلكێ مە مفای ژێ وەربگریت، خوە ئەڤە بخوە دەستكەفتەكە بۆ دھوكێ و ئەم چاوان مفای ژڤی دەتسكەفتی وەربگرین؟!! من گوت بۆ خەلكێ دھوكێ ھەمیێ، من نە گوت بۆ ئەڤێن بتنێ ب فێستیڤالێ رادبن و ھەر ئێكی گرێبەسەتەك بۆ ھاتیە چێكرن. ئاخر من چ دگەل وان نینە، ژبەركو ئەو یێ ب كارێ خوە رادبن و جوان ژی، لێ لایەنێ ب كارێ خوە نە رابووی، ئەڤێن ل سەر فێستیڤالێ رادوەستن و پلاندكەن، چاوان خەلكێ مە مفای ژڤێ خرڤەبوونا مەزن وەربگریت.
ئەم دشێین گەلەك تشتان بكەین، ھەر رۆژەكێ بلا دەرفەت بۆ خویندكارێن زانكویەكێ بھێتەدان، بھێنە فلمە فێستیڤالێ، تا خوە نەچنە ناڤ ھولێ ژی و تەماشای چ فلمان نەكەن، ئەو خرڤەبوونە بۆ وان گەلەك یا گرنگە. ئەڤ خەلكێ دی، ئەڤێن حەزا بەرێخوەدانا فلمان ھەی، یان گەلەك كەس یێن ھەین حەز ژ ئالیێ ھونەری و رەوشەنبیری دكەن و حەزدكەن لێ بەرھەڤ دبن، رێ بۆ بدەن، بھایێ پلێتێ ژ ئامادەبوونا وەرنەگرن، دەما ھول تژی بینەر بوو، ئەڤێن دی ھەر ڤێ خرڤەبوونێ ژی بینن، دێ ھەست ب خوشیەكا دی كەن.
ئاخر ئەڤە ئەتەكێتن، دڤێت ئێكەم جار تو خەلكی فێربكەیە كەلتورێ سینەمێ، دا بشێت تەقەبوللا سینەمێ بكەت، خوە بتنێ بەرێخوەدانا فلمەكی نینە، ئەو دشێت ل مالێ و تا خوە ل سەر موبایلا خوە ژی، فلمەكێ خوشتر بینیت و بەرێخوە بدەتە وی جورە فلمی یێ ئەو حەژێدكەت و د زمانێ فلمی ژی بگەھیت، كو د فلمە فێستیڤالێدا، زمان ئێك ژ كێشەییانە.
ئەڤا ئەڤرو و ڤان رۆژان ل دھوكێ دھێتە برێڤەبرن، بتنێ لایەنەكە و بدەرفەت بزانن، بكەنە كەلتورەك ژبۆ كو ئەم باژێرێ خوە ب جیھانێ را بگەھینین و كەلتورەكێ رەوشەنبیری ھونەری لدەف دروست بكەین، كی كەمتەرخەمە و كی ب دروستاھی ب كارێ خوە نارابیت و بوچی بێ پلانی، ئەو بابەتێ من نینە، دڤێت بھێتە چارەسەركرن..
ـــــــــــــــــــــــــــــــــــــــــــــــــــــــــــ
ليست هناك تعليقات:
إرسال تعليق