ئەز بەحسا ناكوكیێن دناڤبەرا ھەرێمێ و بەغدادا ناكەم، ژخوە ژ دەرھاڤێژێ سیاسەتا نە حەكیمانە، ئەڤ ناكوكیە ھند یێن ئالوز بووین، سەرێ من بخوە ژ ناڤ ناھێتە دەر.. بتنێ ئەز دێ بەحسا ھاتنا كازمی و سەرەدانێن وی و مەسجا وی بۆ خەلكێ عیراقێ ھەمیێ كەم، دەما ل سەر كورسییا حوكمرانیێ روونشتی.
عیراق ب ھەرێما كوردستانێ ڤە، كومەلگەھەكێ ھندێ ئالوزە، دڤێت ئەڤێ حوكمرانیێ لێدكەت یاریكەرەكێ گەلەك زیرەك بیت. كازمی بۆ دەستپێكرنا یاریكرنا خوەیا حوكمرانیێ، چ راست و چ نە راست زارڤەكرنەك دناڤ تورێن كومەلایەتیدا بلاڤەكر، دەما برایێ وی تەلەفون بۆ دكر و وی دگوتێ، تو بۆ واستە و واستەكاریێ ژنوكە وێڤە نە برایێ منی، تو ژی بتنێ ھاولاتیەكێ عیراقی..
دا بزڤرمە ئەوا بمەڤە گرێدای و ھاتنا كازمی بۆ ھەرێما كوردستانێ و فوكسا من ل سەر (دھوكێ) یە. كو تێدا كازمی سەرەدانا چەند جھان كر، ژوان كەلھا نزاركێ و چاوا مە دیت، شلق ب تورێن كومەلایەتی كەفتن، دەما دەیكەكا قورتالبوویا ئەنفالێ دبێژیتێ (تە ئەمانەت كوردستان)..
ئەڤێ ئەمانەتكرنێ بیرا من ل سەرھاتیەكێ ئینا، (پیرەژنەك چوو دەف حاكمی و گوتێ: بزنا من یا ھاتیە دزین؟ حاكمی گوتێ: دیارە تو یا دخەو بوویی. پیرەژنێ گوتێ: راستە حاكمی خوش بیت ئەز یا دخەو بووم، لێ من ھزركر تو یێ ھشیاری)..
ھیڤیدارم حكومەتا مە ژڤێ خەوا گران ھشیار بیت، ژبەركو مە ھشیاری یا بھیڤیا وێڤە ھێلای و ژبیرنەكەت، ئەم كورد كومەلگەھەكێ گەلەك ھەستیار و عاتفینە، تا ڤێگاڤێ ژی ئەم دبەر فلمێن ھندی را دكەینە گری و ئەڤێ عاتیفێ ھەر دەم ئەم یێن كرینە داردەستێ نەحەزێن كوردا، جار ب ناڤێ ئاینی و جار بناڤێ پاریێ ژیانێ و جار بناڤێ ئاڤاكرنا وەلاتی ئەم بۆ خوە راكێش كرینە. ھیڤیدارم حزبێن مە ل سەر وی بالگەھی ژی نەنڤن، كو بێژن مە مێژوویەكا قوربانیدانێ یا ھەی، مە دەزگەھێن ترساندنێ یێن ھەین و ئەم یێ دەستھەلاتێ برێڤە دبەین و ھەر تشتێ مە بڤێت دێ كەین، ژبەركو ل بەری سەرھلدانێ ژی لڤێ دھوكێ ھەبوون، گەلەك ب سەدامی و حزبا بەعس د خورت بوون و چ جارەكێ باوەرنەدكرن، ئەو حزب ژناڤ بچیت و مە دیت چارەنڤیسێ وێ ب چ سەرڤەچوو.
ــــــــــــــــــ
ـ خواندنا گوتارێ ل سەر ویب سایتێ رەوانگە و رەخنە
ـ خواندنا گوتارێ ل سەر پەیچێ فەیس بوكێ
%20copy.jpg)
ليست هناك تعليقات:
إرسال تعليق