عبدالرحمن بامەرنی
ئەڤرو سپێدێ ب ترومبێلا خوە ئەز یێ ل دویڤ پانزینا ئەرزان گەریام و شێڤدی كەسەكی گوتە من، ل پانزینخانا بەرامبەری تەناھیێ دێ سوبەھی پانزینا ئەرزان ھێتە بلاڤكرن و سپێدێ پشتی تشێت خارنەكا زوی، من بەرێخوەدا دەرڤەی دھوكێ و بۆ رێكا تەناھیێ و من دیت ل وێ پانزینخانێ بلاڤ ناكەن و من گوتە خوە ئەز ھەر یێ ھاتیم، من رێكا خوە بۆ سێمێلێ گرت و ھەر پانزینخانا ئەز د گەھشتمێ و بھایێن وان بڤی رەنگی بوون دناڤبەرا (890، 875، 850) و باش بوو نزانم چاوان چاڤێ من ب پانزینخانەیەكێ كەفت و بھایێ لیترێ بتنێ 820 دینار بوون، ھەر وەكو ئەز ب سەر تشتەكێ مەزن ھەلبوویم و من ئیشارەتێن ترومبێلێ ھەلكرن و چوومە دوێ پانزینخانێ ڤە و من ترومبێلا خوە ژ پانزینێ فول كر.
ئەڤا ل سەری ئاخفتنا ھەڤالەكێ من یێ دەوامێ بوو، سپێدێ ئەم ل سەر گرانی و ئەرزانییا بھایێ لیترا پانزینێ د ئاخفتین و دەما من گوتیێ ئەگەر شوونا تو ھندە ل پانزینخانا بگەری، ما باشتر نەبوو، ھەما ھەر ژ دەستپێكێ تە ب گرانی داگرتبایە؟ ئەڤا من پرسیاركری من لدویڤ ترومبێلا خوە و سەرفكرنا پانزینێ بەحسدكر، لێ وی گوت: ترومبێلا من كێم سەرف دكەت و رەنگە لیترەك بۆ دوو لیتران زێدەتركێ نەچبن.
ئێڤاری من و ھەڤالەكێ خوە یێ نڤیسەر ژڤانێ روونشتنەكێ ھەبوو و مە سوحبەت ئینا سەر ھەولێرێ، كو دوھی ب كارەكێ خوەیێ تایبەت چبوو ھەولێرێ و گوتی دھوك تشتەكێ سەیروسەمەرە؟! گوت ل چەندین پانزینخانێن ھەولێرێ بھایێ لیترا پانزینێ ب 690 دینارا تا 730 دیناران زێدەتر نەبوو و گوت سرا ژی نەبوو، عەجایبب ل ھەولێرێ چەندین پانزینخانە ھەبن و بھا ئەرزان و لدھوكێ بڤێ گرانیێ، ھەكو ئەم ب كوردی دبێژین بڤێ قەتلازیێ!!
سوحبەتا مە لڤێرە بتنێ نە راوەستا، بەلكو بەرەڤ باژێرێ مووسل ژیڤە چوو و گوتە من، ئەرێ تو دزانی نوكە ل مووسلێ ژی یا بوویە ئەزما پانزینێ، ئەو ژی ژ بەر ترومبێلێن دھوكێ ھندی قەستا وێرێ دكەن و گوت: دەمەكی ل پانزینخانێن وێرێ كربوو فەردی و زەوجی و نوكە ئەو ژی یا كێم بووی و دڤێت قەستا ئالیێ دی مووسل بكەی.
دا بزڤرمە سەر بابەتێ خوە، ھین بێژن بوچی دھوكێ بتنێ یا ھوسا بیت؟ ئایا ژ بێ خودانیە یان ژبەر كو دھوك ل سەر چ سنوران نینە؟! ئێ باشە ئەو پانزینا دھێتە ھەولێرێ، ما تانكەرێ وێ نەشێت بھێتە دھوكێ ژی، بلا بابو شوونا بھایێ لترێ ب 690 و ب 730 ا بیت، بەس ھەبیت، ئێ راستی گەلەك یا بێ رامان بووی؟!!.
ــــــــــــــــــــــــــــــــــــــــــــــــ
%20copy.jpg)
ليست هناك تعليقات:
إرسال تعليق