تەتەر یان تویتەر

عبدالرحمن بامەرنی

تەتەر من بۆ (عەلی تەتەر) بكارئینایە، كو ھاتیە دەست نیشانكرن دا پوستێ پاریزگارێ نویێ دھوكێ وەربگریت و تویتەر ژی من بۆ تەكنەلوجیایێ و پێشكەفتنێ بكارئینایە، تەكنەلوجیا ژی مرۆڤی دناڤ خوەرا بەرزەدكەت و وەكی شیرەكێ دوو سەرە یان مرۆڤی دبریت یان مرۆڤ رێكا خوە پێ ڤەدكەت. ئینانا ھەردوو زارڤان ژی پێكڤە، بەرچاڤكرنا دوو سەرەرێیانە و پوستێ پاریزگاریێ بۆ جەنابێ وی ئەزموونەكە و ئەگەر ل سەر دەمێ پوستێ خوە شیا دھوكێ پێش بێخیت و دوور ژ حزبایەتی و بەرژەوەندیێن خوە یێن تایبەت و مرۆڤێن خوە كاری بكەت و خوە ب خودانێ ھاوڵاتیێن دھوكێ بزانیت، ئەڤە شییا ناڤێ خوە ل رێزبەندییا باشترین پارێزگار توماربكەت و پارێزگەھا دھوكێ ژی ژ ھەمی روویانڤە، بكەتە سەر پشكا پارێزگەھێن دی.

من گوت دوو سەر یان دوو رێ ل بەر سینگا وی ھەنە، ئەز دێ وەك ئاكنجیەكێ پاریزگەھا دھوكێ گوتارا خوە نڤیسم و ڤێ راستیێ بەرچاڤ كەم، بۆ من پێشكەفتنا پارێزگەھا دھوكێ ژ ھەمی روویانڤە ژ پێشكەفتنا پارێزگەھا (ھەولێرێ و سلێمانیێ و ھەلەبچە) باشترە، لدویڤ ئەزموونا من دیتی و من خواندی، گەلەك یا بزەحمەتە كەسێ ئێكێ بشێت سەركەفتنەكا تەمام دكارێ خوە دا بینیت، ئەگەر كەسێن دبن ویدا دگەلدا دھاریكار نەبن، ئەڤە نە بتنێ بۆ پوستێ پارێزگاریێ، بەلكو خوە تا بەرپرسێ ھوبەكێ ژی بیت.

دبیت راگەھاندن بۆ وی یا باش بیت، ئەگەر تیمەكێ زیرەكێ راگەھاندكاران لدوورێن خوە كومكرن، بۆ ببنە چاڤ ل سەر ئەڤا ل پارێزگەھێ رووددەت، ئەو تیما ھەنێ بێ جوداھی و چاڤ نقاندن، ھەمی كێم و كاسییان بدانە سەر مێزا وی، ژبەركو بەشەكێ پیڤەرێ سەركەفتنا وی دێ راگەھاندن و دیڤچوونێن رۆژنامەڤانی بیت. من گوت تیمەكا زیرەكا راگەھاندنێ، كارێ وێ تیمێ نە بتنێ بەرچاڤكرنا كارۆچاڵاكیێن وی بن، بەلكو گەھاندنا تشتێ ڤەشارتی و نخافتیێ ل پارێزگەھێ رووددەت بۆ بگەھینن.

خاڵا دییا من دڤێت باس بكەم، دڤان سالێن ئەو پارێزگاریێ ل دھوكێ دكەت، دێ بۆ وی ئەزموونەك بیت و ھەر وەكو گەنجینەیەكا تژی تشتێن ب بھا كەتینە بەر دەستێ وی، ژبەركو ئەڤ پوستە ژ ھەمی ڵایەكیڤە گەلەك یێ جوداترە ژ وان ھەمی پوستێن وی بەری نوكە وەرگرتین. ل قوناغا ئێكێ، ئەو شییا باوەریا حزبا خوە بدەست خوەڤە بینیت و ڤی پوستی بۆ خوە ئێكڵابكەت، قوناغا دووێ، كو بھزرا من ئەڤە بۆ وی قوناغەكا گرنگتر و ھەستیارترە، ئەگەر شیانێن خوە و بسپوریا خوە ئێخستنە د خزمەتا پوستێ خوەدا، رەنگە پشتی 10 سالێن دی و پشتی 100 سالێن دی ناڤێ وی وەك پارێزگارەكێ باش بھێت، كو ل سەر دەمێ وی دھوك دگەلەك بیاڤاندا پێش كەفتی و ھینگێ بەرپەرێن دیروكێ دێ ناڤێ وی بتنێ ئینن و ناڤێ وان كەسان نائینن، یێن ئەو بۆ ڤی پوستی پێشنیاركرین و تا بوویە پارێزگار، رەنگە خوە ناڤێ حزبێ ژی بۆ وی كەسی یێ گرنگ نەبیت، ئەڤێ پشتی سەدان سالێن دی دھێت و ل سەر ڤێ پارێزگەھێ د خوینیت و ڤەكولینێ ل سەر دكەت..

*گوتار ل سەر مالپەری http://www.rwangauraxna.com/ba/detail.aspx?IDNews=1453

*گوتار ل سەر فیس بوكێ مالپەری

https://www.facebook.com/groups/rwangeurexne/permalink/3327907833914096/