عبدالرحمن بامەرنی
رەنگە لدەف گەلەك ھەڤالان ژی، ھەمان پرس من ئازراندیە، ئەرێ بوچی ل دەڤەرێن دی باشترین ھوزانڤان و چیرۆك نڤیس و رۆمانڤیس و ھونەرمەند وووووو ھەنە و لدەف مە ئەگەر پرسیار ژمە بھێتەكرنێ، ئەم نەشێین ناڤەكی دەست نیشان بكەین؟ ئایا ئەڤە جورەكێ زكرەشیێ یە، كو ئەم شوونا ئێكودوو بلند بكەین ئەم ئێك د شكێنین یان ژی بۆ ڤالاتیا دناڤبەرا نڤیسەری و خواندەڤانی دا ھەی دزڤریت؟! ئەڤ بابەتە بلا لجھێ خوە بمینیت..
ئایا نڤیسەرێ مە وی تشتێ پێشكێشی خواندەڤایێ خوە دكەت، یێ وی بڤێت و ئایا پروسا خواندنێ لدەف مە یا دروستە؟! ئەڤ پرسیارە گرنگن، دا بشێم بھێمە سەر كاكلا بابەتێ خوە یێ من دڤێت ل سەر راوەستم.
ژبەركو نڤیسین بخوە بەھرەمەندی و پیشە و سنعەتكاریە و دا كو نڤیسەر بشێت بەردەوامیێ بدەتە بەھرەمەندییا خوە و سنعەتكاریێ تێدا بكەت، دڤێت دو كاراكتەر تەمامكەرێن وی بن، ئێك: رەخنەگر و ئەو تشتێ ئەو دنڤیسیت ل موخل و بێژنكان بكەت، دا نە ھەر تشتێ ھەبیت بێخیتە بەر دەستێ خواندەڤای و دوو: دڤێت خواندەڤا ھەبیت و نڤیسەر ھەست بكەت، ئەو تشتێ ئەو دنڤیسیت، یێ دھێتە خواندن، دا بشێت نڤیسینا ددوڤدا جوانتر لێبكەت و زێدەتر سنعەتكاریێ تێدا بكەت.
كاریگەرییا ڤان ھەردوو كارێكتەران، ل سەر پروسا خواندنێ چیە؟
ئەز دێ بەرسڤێ كورتكەمە سەر ئەو بابەتێن د (روانگە و رەخنە) دا دھێنە بلاڤكرن، رەنگە بابەتێ من مەبەست پێھەی زویتر بگەھیت. ژبەركو د روانگە و رەخنەدا رولێ رەخنەگری و خواندەڤای دیاردبیت، رەنگە پسیار بھێتە كرن چاوان؟!
رۆژانە كومەكا گوتاران د روانگە و رەخنەدا دھێنە بلاڤكرن، ھندەك ژوان گوتارێن باشن و نڤیسەرێن باش دنڤیسن و ھندەك ژی بتنێ لێنێرین و رەخنەنە و ھندەك جارێن كێم ژی، گوتارێن نڤیسەرێن تازە پێگەھشتی دھێنە بلاڤكرن. لڤێرە دڤێت ئەم پرسیارەكێ ژخوە بكەین، ئەم چبكەین نڤیسینێن باش بەردەوامیێ بدەنە خوە و نڤیسینێن بھزرا مە لاواز ژی، ئەم گوشارێ ل سەر دروست بكەین، بۆ جارێن بھێت ئەو باشتر بنڤیسن.
پێنەڤێت ھەمی جورێن كەسان ل سەر سوشیال میدیایێ ھەنە و رەنگە ل ھەمی ئاستان ژی گوتاران بخوینن، كەسەك بێژیت راستە گوتار یا جوان بوو، بەس من چ تێبینی نەدیتن كومێنت بكەم یان دبیت ئەز نەگەھشتبم ھەمیان بخوینم و ھەمیان لایك و كومێنت بكەم و د بەرامبەردا دێ بینی، بابەتەكێ دی گەلەك كومێنت بوچوون و بابەت ھاتە ئازراندن، رەنگە نڤیسەرێ خودانێ بابەتێ ئێكێ كو برەنگەكێ زانستی بابەتێ خوە نڤیسایە و نڤیسەرەكی زیرەكە، لێ بتلێن دەستان كومێنت بۆ ھاتنە، ئەڤە جورەكێ بێھیڤیبوونێ بۆ دروست بكەت، كو نەشێت وەك پێدڤی بەردەوامیێ بدەت و ئەڤا من مەبەست پێ، كو (ئەم نەشیێین باشترین نڤیسەر لدەف خوە پەیدا بكەین). لڤێرە ئەز نابێژم، ئەو بابەتێن دی بھێنە پشتگوخستن، ژبەركو ئەو ژیانا رۆژانەنە و دگرنگن، لێ ئەم نڤیسەرێ خوە ژبیرنەكەین، ئەگەر نڤیسینا وی نەشیابیت مە بكێشیتە نڤیسینا كومێنتەكێ ژی و مەرج نینە ھەمی گاڤان مە كومێنت ل سەر ھەمی گوتار و نڤیسینان ھەبیت، لێ رێزگرتن بۆ ماندیبوونا وی و دا بەردەوامیێ بدەتە نڤیسین و سنعەتكاریا خوە، ئەم دشێین گولەكێ بۆ فرێكەین، ئەڤە مە بەشداری د بزاڤا رەوشەنبیری یا دەڤەرێ دا كر.
ئەڤ نمونا من ئینای نە بتنێ بۆ روانگە و رەخنەبوو، بەلكو بۆ سترانەكێ و تابلویەكێ شێوەكاری و ھەر بوارەكێ یت، ئەگەر مە بڤێت مە داھێنان دھەمی بوارەكیدا ھەبن، دڤێت ئەم بەشداریێ دوان داھێناناندا بكەین، ئەم كەسان ئاڤا بكەین و بلیمەتان دروست بكەین و ئەڤە ژی رەنگە ب لایكەكێ یان كومێنتەكێ یان ژی ب كرینا پەرتووكەكێ یان ژی ب گوھدان و كرینا ئەلبومەكا سترانان بیت وووو ھتد و ھینگێ ئەڤە مە بەشداری د پێشخستنا باژێرێ خوە و دەڤەرا خوەدا كر.
ـــــــــــــــــــــــــــــــــ
%20copy.jpg)
ليست هناك تعليقات:
إرسال تعليق