ئەڤ دیوارە ل سەر ناڤێ من یێ هاتیە تاپووكرن و ئەگەر رۆژێ سێ جاران پالا من لێ نەبیت، ب پشت راستیڤە ئەز دوو جاران هەر دهێم یان پالا خوە ددەمێ یان ژى ل سەر ڤى كەر بلوكى، جهێ روونشتنا خوە ل سەر خوەش دكەم. چاڤێ من لێ یە، ئەڤە ژ سپێدێ ژ خەو رابووی، جارا سیێ یە دهێتە هنداڤ بەلەكونێ و ل سەر پێن خوە د زڤریتەڤە. هەر جارەكا دهێت، چاڤێن خوە ل كولانێ هەمیێ د گێرینیت و تا پشت راست نەبیت، ل سەر پێن خوە نا زڤریت، هەر جارا دهێت ژی، ئەز ل بەر ڤى دیوارى مە و هشك راوەستیایى، خوە لڤین ناكەڤیتە مژوولانكێن چاڤێن من.
ڤێجارێ ئەو بخوە هات، بەلێ هاتنا وێ نەشیا من ژ جهێ من بلڤینیت و پیرە دایكا وێ، دوو چاڤ هەبوون پێ زێرەڤانیا كچا خوە دكر و ب هەردوو چاڤێن دی، ل كولانێ و ل قورمێ داران دگەریا، كا دێ رەشاتیا من دكیرێ را، ستێركا چاڤێن وێ بوو خوە راكێشیت.
نە ژ دەڤێ من، دبێژن ڤێ پیرەژنێ حەفت مێر كرینە و خوە ژ دویان دایە بەردان و د شەڤا بیكینیا وێدا، ل زاڤایەكی نەبوویە سپێدە و دو یێن دی نەگەهشتینە بكەنە ئێك سال و یێ شەشێ كەس نزانیت ب چ سەرچوویە و ئەڤێ نوكە لدەف مای، یێ كەتیە قورنەتی و دێ بێژی، بەری حەفت سالان یێ مری و ژ قورنەتێ خانی نەشێت دو پێنگاڤان ژ جهێ خوە بلڤیت.
ئەڤا نۆكە ئەز بو وە دبێژم، هەمان ئەو گوتن بوون، جارەكێ من بۆ دەیكا وێ ڤەگێراین و هەمان گوتن بوون، ل سەر سكالایا دەیكا وێ من گوتینە رێڤەبەرێ قوتابخانێ و هەمان گوتن بوون، ل بەرامبەری دادوەری من بەرەڤانی پێ ژ خوە كری و ئەڤە ئەز ژ قوتابخانێ ب ئێكجارى هاتیمە دەركرن، هەرو لبەر چاڤێن خێزانا خوە ژ مال دەردكەڤم و پەرتووكێن من یێن قوتابخانێ لبن كەفشێ منن، قوتابخانە و كەسپ و كار و تا قیبلەگەها من ژى بوویە، خوە ڤەنیساندنا ل بەر ڤى دیوارى و یان دێ دەیكا وێ من قەبیل كەت زاڤایێ خوە یان ل سەر دفنا وێ، دێ رازى بیت، ببمە زاڤایێ وێ!
• د كوڤارا رامان، ژمارە 262 ل رۆژا 5/3/2019ێ دا هاتیە بلاڤكرن.
%20copy.jpg)
ليست هناك تعليقات:
إرسال تعليق