د شعرا نویدا، خواندەڤا ب وێنەی ڤە دھێتە گرێدان، رەنگە د ئێك شعردا چەندین وێنە بكەڤنە بەر چاڤێن مرۆڤی و دبیت د شعرەكا درێژ دا، ھیچ وێنەیەك تێدا نەبیت كو سەرنجا مرۆڤی بۆ خوە راكێشیت. مەبەستا من ب وێنەی، ھەر تشتەكی نەلڤێ ھەلبەستاڤێ شیابیت لڤینەكێ بدەتێ و برەنگەكی و دووان ژیانێ بدەتێ و مرۆڤ ھەست ب زیندیبوونا وی بكەت. ئەگەر بۆ زێدەتر روھنكرن برەنگەكێ دیتر بێژم، دوبارە بەرێخوەدانا سروشتی و دیمەنان، بێزاریەكێ لدەف مرۆڤی پەیدا دكەن و تا وی راددەێ ئەڤ دوبارە دیتنا ھەمان جوانی و تا ئەو جوانی ل چ قاس ژی بیت، بەھایێ خوە یێ جوانی و سەرنج راكێشیێ ژ دەست ددەت. بەلێ ھندەك ھەلبەستڤان ھەنە، ب وێ جوانیێ و كاریگەر دبن و وێنەكی ژێ دروست دكەن، لڤین و دەنگ و دیتن تێدا ھەبیت و چەند ئەڤ وێنێ شعری شیا ڤان ھەر سێ بەھایان بخوەڤە ھەلگریت، دێ ئەو شعر زێدەتر سەرنجا خواندەڤای بۆ خوە راكێشیت.
شعرەكا كورت كو گەلەك جاران ھندەك ب ھایكویان ناڤ دكەن، ل سەر دیوارێ ھەلبەستڤانا گەنج ھیوا فازل ھاتبوو بڵاڤ كرن، سەرنجا من بۆ خوە راكێشا، دەما دبێژیت.
خوه‌جهێن وارێ خه‌ونا
د ڕكه‌ها بێ دادیێ دا
خوزیا پا‌رڤه دكه‌ن
دا ل په‌راڤێن ژیانێ ب گه‌ڤزن
دڤێ شعرێدا من وێنەك دیت، دبیت د ناڤەروكا خوەدا وێنەك بچووك بیت و ب چەند پەیڤان ھاتبیتە چوارچوڤەكرن و ببیتە تابلوو، لێ وێنەكە ب قەد نڤیسینا رۆمانەكێ یە. دەما دبێژم رۆمان رەنگە پرسێ لدەف گەلەكان دروست بكەت، چاوان رۆمان؟! شعر بخوە جیھانەكا جوداترە ژ ھەمی ژانرێن ئەدەبی و دا زێدەتر ل سەر ڤێ خالێ نە راوەستم، ئەڤ وێنێ بچووكێ دڤێ شعرێ دا چەندین رامانان د ھەلگریت و دێ ھەولدەین بتنێ ل سەر ڤێ وێنەی راوەستین، ئەوێ مە مەبەست پێھەی، بوچی ب قەد نڤیسینا رۆمانەكێ بیت؟!
دەما ھەلبەستڤانا مە دبێژیت (خوه‌جهێن وارێ خه‌ونا)، مەبەست پێ خەلكێ ڤی باژێرینە، ئەڤ باژێری ئەم تێدا دژین و ھەلبەستڤانا مە تێدا دژیت و ئەگەر بتنێ بەحسا خوە كربایە ژی، رەنگە گەلەك تایێن دی ژێ چووبانە و ل وی دەمی شعر زێدەتر دھێتە پێش، دەما خوە ل ئێش و ژانێن خەلكێ خوە دكەتە خودان و دەما دبێژیت: (د ڕكه‌ها بێ دادیێ دا.. خوزیا پا‌رڤه دكه‌ن)، یان كو خەلكێ وێ، وەك بالندەكێ حەزا وی ھەمی ل سەر فرینێ، كو بالندە بێ فرین ھەست ناكەت یێ دژیت و ئەو بالندە نوكە یێ د رەكەھێدا زیندان كرییە و ئھا ھوسان، ئەو ركەھێ ب نە دادیێ بەراورد دكەت و دبێژیت (دا ل په‌راڤێن ژیانێ ب گه‌ڤزن)، كو مەبەست پێ ژیانەك خوش ھەبیت و ئەگەر ل سەر ڤی پەرەگرافی راوەستین، دەما دبێژیت (بگەڤزن)، یانكو ب ئازادانە ژیانێ بكەن وەك وان دڤێت، گەڤزین ژی لڤینەكە بالندە گەلەك حەز ژێ دكەن و دیسان گەلەك گیانەوەرێن دی، مەبەست پێ ئەو لڤین و ژیانا ئەو دكەن وەك وان بڤێت نەك ل سەر بھێتە سەپاندن.
یا من ژ ڤێ شعرێ تێبینی كری، ھەلبەستڤانێ یا شیایی بۆ دروستكرنا تابلویێ خوە، دەما ئەز دبێژم تابلوو، كو وێ وێنەكێ جوان یێ كریە دڤی تابلویدا و ئەو دەستەواژەیێن تێدا بكار ئیناین ژی، ھەمی كوردەوارینە و ھلكولایێ وێ ژیانا رۆژانە یا ڤی كومەلگەھینە، كو نوكە تاكێن وێ ژبەر نەبوونا دادییا جڤاكی خوشییا ب ژیانەكا دیڤە دبەن.
*نڤیسین ل سەر مالپەرێ روانگە و رەخنە
ـ نڤیسین ل سەر فەیسبوكێ مالپەرێ رۆانگە و رەخنە
ـ ـ درۆژناما ئەڤرو ژمارە 2813ێ یا رۆژا 24/8/2020ێ لاپەرە 10 دا بڵاڤ بوویە و بۆ زێدەتر دیتنێ
ليست هناك تعليقات:
إرسال تعليق