بحث هذه المدونة الإلكترونية

pertook

pertook

2011/01/02

كارێن ژنا بیست و چارن، بتنێ دوو ژێ د دیارن



دبێژن ل گونده‌كى خێزانه‌ك هه‌بو ژ ژن و مێره‌كا پێك دهات، ئه‌و زه‌لام چه‌ند زڤرى با مال و داخازا خارنێ ژ هه‌ڤژینا خوه‌ كربا، دا هه‌ڤژینا وى بێژتێ نه‌ یا ئاماده‌ یه‌ یان هێژ من دان نه‌ كریه‌ قازانێ یان ئاڤ نه‌ كه‌لیه‌ یان دێ دوهنى گه‌رم كه‌م و لێ ره‌شینم. چ جاره‌كێ خارن لده‌مێ وێ یا به‌رهه‌ڤ نه‌ بو و زه‌لامى نه‌ دخار.
ئه‌ڤ زه‌لام و ژنه‌ هه‌روو سه‌را خارنێ ب سه‌ر و ستوێن ئێك و دوو ڤه‌بون و هه‌مى گاڤا گازندێن وان بون و ژنكێ دگوتێ، كو شولێ ژنكان گه‌له‌ك یێ بزه‌حمه‌ته‌ و نه‌ وه‌ك یێ زه‌لامانه‌ و شولێن وان بیست و چارن و بتنێ دوو ژێ ددیارن.  به‌لێ زه‌لامى دگوتێ كو تو نه‌ ژنه‌كا زیره‌كى و شولێ ژنكان گه‌له‌ك یێ ب ساناهیه‌. تا روژه‌كێ ژنكێ گوتێ ئه‌گه‌ر تو باوه‌رنه‌كه‌ى ئه‌م دێ بو روژه‌كێ بتنێ، شولێن خوه‌ لێك گوهرین و ئه‌ز دێ چمه‌ شوینا ته‌ جوتى و تو ژى بتنێ خارنێ چێكه‌ و چاڤێ ته‌ ل چیچه‌لوكێن مریشكێ بیت و مه‌شكێ بكێ،  زه‌لامى ژى گوتێ من قه‌بیله‌.
سپێدێ زوى ژنك چوو گایێن جوتى به‌ردان و دانه‌ به‌ر سینگا خوه‌ و چوو ناڤ ره‌زى كێلانێ بكه‌ت. زه‌لام ژى رابو چوو جوهنى ئینا و هنده‌ك برنج كرێ دا بقوتیت و دیت كو چیچه‌لوكێن مریشكێ هه‌ر ئێك یا بخو دچیت، رابو چوو به‌ندكه‌ك ئینا و پێن هه‌میا پێكڤه‌ گرێدان و وه‌ك شه‌مه‌نده‌فرێ ئێك بدویڤ ئێكێ ڤه‌ گرێدا و هنده‌ك تومك كره‌ به‌ر و هه‌مى مانه‌ بدویڤ ئێك ڤه‌ و هات دا برنجێ خوه‌ دجوهنى دا بقوتیت، ما هزرێن خوه‌ كرن و بخو گوت مانێ ئه‌ز هه‌ر یێ جوهنى دقوتم و دگه‌ل رادبم و دروینم، ما بوچى ئه‌ز دبه‌ررا مه‌شكێ ژى نا ده‌مه‌ پشتا خوه‌ و دگه‌ل رابون و چه‌میانا من دێ ئه‌و بخو هێته‌ شلقاندن. رابو مه‌شك دپشتا خوه‌ دانا و ده‌ست دا میر قوتى و دانا جوهنى و گوتى ئها ئه‌ڤه‌ شولێ ژنكانه‌ چه‌ند یێ ب ساناهیه‌.
زه‌لام یێ بقوتانا جوهنى ڤه‌ مژویل بوى و بوچى دوان گاڤان دا ته‌یره‌كێ مه‌زن ناهێت و مریشكێ رادكه‌ت و چیچه‌لوكێن وێ ژى ب پێن مریشكێ ڤه‌ بونه‌ رێزك و هه‌مى دگه‌ل خوه‌ راكرن و برن. زه‌لامى به‌رێخوه‌ دایێ كو ته‌یرى مریشك ب چویچه‌لوك ڤه‌ برن، گوتى من خه‌له‌ت كر، ئه‌گه‌ر من پێكڤه‌ نه‌ گرێدابان، دا ئێكێ بتنێ به‌ت و نه‌ دشیا هه‌میا پێكڤه‌ ببه‌ت، زه‌لامى دا دویڤ ته‌یرى و مه‌شكا وى یا ب پشتێ ڤه‌ و بوچى دگره‌كى دا ناچیته‌ خارێ و كه‌له‌مه‌ك ژ مه‌شكێ دگریت و مه‌شك ددریێت و ده‌وێ وێ هه‌مى ب پشتا وى دا درژیێت، ته‌یرێ وى ژى لبه‌ر به‌رزه‌ بو و هه‌تا زڤریه‌ مال، دیت مریشكێن جیرانان یێن هاتینه‌ سه‌ر جوهنیێ وى و برنجێ دجوهنى دا هه‌مى یێ خارى.
ژنك ده‌مێ خارنێ هاته‌ ڤه‌ و دیت كو زه‌لامێ وێ یێ دوى حالى دا و گوتێ پا ته‌ دگوتى كارێ ژنكا گه‌له‌ك یێ ب ساناهیه‌، شنوى زه‌لامى داخازا لێبورینێ ژێكر و گوتێ ژ نوكه‌ وێڤه‌، ئه‌ز چ جار نابێژ مه‌ ته‌ بو من خارنێ بینه‌ و خو ئه‌گه‌ر فراڤین لده‌مێ خوه‌ یا به‌رهه‌ڤ نه‌بیت ژى تو دشێى لده‌مێ شیڤێ بینى یان ده‌مێ پاشیڤێ.

تێبینى:
ئه‌ڤ سه‌رهاتیه‌ ژ زارده‌ڤێ هونه‌رمه‌ندێ ده‌نگ بێژێ فلكلورى (هاشم ئه‌مین خاجه‌ یێ به‌رنیاس ب هاشم بوسه‌لى) ڤه‌ هاتیه‌ وه‌رگرتن، ژ دایكبویێ سالا 1972 ێ یه‌ و هه‌ر وه‌كو دبێژیت خانده‌ڤایه‌ و تا سیێ ناڤنجى خاندیه‌ و نوكه‌ ل زاخو ئاكنجیه‌. 


إرسال تعليق