2011/01/02

كوچا ملیونى چ ل پاش خوه‌ هێلا!


به‌رپابونا سه‌رهلدانا جه‌ماوه‌رى یا سالا 1991 ێ، ژ ئه‌نجامێ كومه‌كا فاكته‌ران بو و هاتنه‌ دى. ره‌نگڤه‌دانێن كوچا ملیونى، كو ئێكسه‌ر ب چه‌ند روژان پشتى سه‌رهلدانێ ده‌ستپێكرى، ب قوناغه‌كا دى یا گرنگ و كارتێكه‌ر، نیشانێن وێ ل سه‌ر سه‌رهلدانێ دیاربون. تا نوكه‌ ژى شوینه‌وارێن وێ د دیار و به‌رچاڤن. ژ وان، په‌یدابونا كوچا ملیونى شیا یه‌كسانیه‌كێ دناڤبه‌را دوو عه‌قلیه‌تان دا په‌یدا بكه‌ت، عه‌قلیه‌تا چیایى و ژلایه‌كێ دیڤه‌ عه‌قلیه‌تا سه‌رهلدان دناڤدا په‌یدابوى، كو ل نیڤا  باژێران ئه‌ڤ چریسكه‌ لێ سه‌رهلداى. یا دوێ، كوچا ملیونى به‌ره‌للایه‌ك دناڤ خه‌لكى دا په‌یداكر، روژانێن ره‌ڤێ كو هه‌مى كه‌س بێى جیاوازیا هه‌ژاری و زه‌نگینیێ یان ئاستێ وى یێ زانستى و بچویك و مه‌زناتیێ، هه‌مى ئێخستنه‌ به‌رامبه‌رى ئێك ئارمانج، كو چاره‌نڤیسێ هه‌میان ئێك بیت، خوه‌ قورتالكرن و خالا گرنگ كه‌سێ ژ خوه‌ و خێزانا خوه‌ دویرتر نه‌ بینیت! 
ده‌ما ئه‌ڤ قوناغه‌ ژى ب دوماهى هاتى و هه‌مى زڤرینه‌ جهێن خو، جیاوازیێن زورێن مه‌زن دناڤ خه‌لكێ دا په‌یدابون، گه‌له‌ك ژ خودان باوه‌رنامه‌ و پله‌یێن زانستى یێن بلند د جهدا مان و ژ پله‌یێن رێڤه‌برنێ بێ باربون! به‌رامبه‌رى وێ هنده‌ك كه‌س بونه‌ خودان پایه‌، كو بسپورى و شاره‌زایى یا وان نه‌ لوى ئاستێ رێڤه‌برنێ بون. جیاوازیێن زور دناڤبه‌را سه‌رماییه‌داریێ دا په‌یدابون، هنده‌ك دناڤبه‌را شه‌ڤ و روژان دا بونه‌ خودان سه‌رمایه‌كا نه‌ به‌رچاڤ، هنده‌ك ژى ب ئێك جارى هلوه‌ریان! ئه‌ڤ كه‌سێن دناڤبه‌را شه‌ڤه‌ و روژان دا خوه‌ ب وێ سه‌رمایێ دیتین، نه‌شیان خوه‌ دگه‌ل وێ پێشهاتێ ب گونجینن. یا دوێ ژى ئه‌و سیاسه‌تا خه‌له‌تا حزبێن مه‌ یێن سیاسى دناڤ خه‌لكى دا په‌یره‌وكرى، هه‌ر ژ ململانا و كێش و ڤه‌كێشكێن حزبایه‌تى و فه‌رزكرنا عه‌قلیه‌تا چیایى و ژ خالێن لاوازێن ڤێ عه‌قلیه‌تێ، نه‌بونا كه‌سێ شیاو بو جهێ شیاو.
 ژ ئه‌نجامێ ڤان فاكته‌را و سه‌ربارى وان ئابلوقێن دووقولى یێن ئابورى و گه‌ف و ده‌ستێوه‌ردانێن رژێما به‌عسا روخیایى و وه‌لاتێن ده‌وروبه‌ر، نه‌ ئارامیێ دناڤ هاولاتیان دا دوم كێشا. مه‌ ژى هه‌ر ژ چێبونا هه‌رێمه‌كا ئارام و ته‌نا كو ژلایێ هه‌ڤپه‌یمانان ڤه‌ بو مه‌ هاتیه‌ دروستكرن، په‌رله‌مان هاته‌ هه‌لبژارتن و حكومه‌ت هاته‌ دامه‌زراندن. كو ئه‌ڤه‌ دخوه‌ بخوه‌ دا ده‌ستكه‌فتێن نه‌ یێن بچویك بون و هه‌مى ژى بتنێ پشتى چه‌ند هه‌یڤان ژ زڤرینا كوچا ملیونى هاتنه‌ ئه‌نجامدان.
 ئه‌ڤ هه‌مى ده‌ستكه‌فتێن ژ پشتى سه‌رهلدانێ ب ده‌ستڤه‌ هاتین، كو سه‌رهلدان ژى ئێك ژوان به‌رهه‌مان بو، مه‌ بڤێت و نه‌ڤێت ژ ئه‌نجامێ خه‌باتا پێشمه‌رگه‌ى و قوربانیدانا شه‌هیدان و كاره‌ساتێن ب سه‌رێ كوردان هاتین بوینه‌، به‌لێ ئه‌و ژى دبێ شاشى نه‌بون، بگره‌ ژ شه‌رێ ناڤخوى، ته‌قه‌بولنه‌كرنا ئێك و دوو، په‌یدابونا دوو ئیدارا و تا دوماهیێ. لێ دسه‌ر ڤێ هه‌میێ را ده‌ستكه‌فت دزوربون، پێشكه‌فتن ل هه‌مى بیاڤه‌كى په‌یدابون. به‌لێ دڤیا با ئه‌ڤ ده‌ستكه‌فته‌ و ئه‌ڤ  پێشكه‌فتنه‌ د به‌رچاڤتربان، ده‌ما ئه‌م بو هه‌لكه‌فتا ڤان روژان دزڤرین، دڤێت ئه‌م باشى و شاشیێن خوه‌ بهه‌لسه‌نگینین، ل شاشیێن خوه‌ ب ڤه‌كولین. مه‌ چ بو ئازادیا لاوان كریه‌، مه‌ چ به‌رامبه‌ر توندوتیژیا ژنان ئه‌نجامدایه‌، ئه‌م چه‌ند شیاینه‌ بێكاریێ نه‌هێلین، ئاریشێن ئاكنجیبونێ چاره‌سه‌ركه‌ین، مه‌ چ بیاڤێن پێشكه‌فتنێ په‌یداكرینه‌. ئه‌م چه‌ند شیاینه‌ وه‌ك حكومه‌ت و ده‌ستهه‌لات، خوه‌ دگه‌ل بیاڤێن سیاسى و ئابورى و جڤاكى بگونجینین، ئه‌ڤه‌ 17 سال ب سه‌ر سه‌رهلدانێ ڤه‌ بورین. 17 سال یان كو كامل بون و مه‌زنبون و سه‌رهلدانا مه‌ جاران بناڤێ نازكیێ ناڤدكر نه‌ما و هێژ ئه‌م چاڤه‌ریێ گه‌له‌ك تشتان! 

ليست هناك تعليقات: