زاروكینى بیرهاتنێن گه‌له‌ك خوشن! گه‌ر بو مروڤى ده‌ست بده‌ت، لوێ زاروكینیێ بزڤریت و جاروبارن سه‌ره‌دانا شوینواران بكه‌ت. هێژ ئه‌ڤ زاروكینى یه سیناریویه‌كا زیندى یه ل پێش چاڤێن من، هه‌كو ئه‌م چار پێنج زاروك دبوینه شڤانێن دوو سێ گیسكا و مه فراڤین دكره دچانتكێن خوه دا و ئه‌م بو فراڤینێ ژى دماینه ل به‌یارى. تشتێ گه‌له‌ك كه‌یفا من بڤان بیرهاتنان دئینیت، ئه‌ز دشێم پێ باشتر ژیانا خوه رێك بئێخم، ژیانه‌كا گه‌له‌ك ب ساناهى! بتنێ دێ گیسكێن خوه به‌مه كیرێ چه‌رێ و دێ ل كیرێ ئاڤده‌م و دێ ل كیرێ مه‌خه‌ل ئینم و لبن كیژ دارێ فراڤینێ خوم! ئه‌ڤه روتینیه‌كا هه‌ر روژ بو، تشتێ ژڤێ روتینیێ من مفا ژێ دیتى دگه‌ل روژانێن خوه یێن لبه‌ر گیسكان من به‌رنامه‌كێ ژ روژێن دى جودا بو خوه ددانا، جارنا من رێكا خوه ل وه‌رزێ گوندورێن مامێ هادى دئێخست و جارنا ژى من مه‌ته‌رێ خوه یێ ئاڤێ ل كانیكا لناڤ جنیكا سه‌عیدێ زه‌لیخایێ دته‌زاند و تژى دكر. براستى خودێ ژێرازى هنده‌ك حلیكێن پایزى یێن سپى و مه‌زنێن لاو هه‌بون و بزورى دۆان ژێ جێه خوه دبنێ به‌ریكا منا شه‌لوالى دادكرن.
ژیان یا رێكخستى بیت مروڤ هه‌ست ب وه‌ستیانێ ژى ناكه‌ت، ئه‌ڤێ گوتنێ ئه‌ز هه‌رجار ڤه‌دگێرم. نوكه ئه‌ز یێ فێریویم و په‌یره‌و دكه‌م، ژیانا خوه یا روژانه كو ئه‌ز پێ خوه و خێزانا خوه رێك دئێخم، روژێ گوهدانا چه‌ند ستران و موزیكه‌كا و نیڤ سه‌عه‌تێ پیاسه و جارنا فلمه‌كێ بدلێ خوه و تا دوماهیێ دروینمه لبه‌ر، باشترین هه‌ڤالێ خوه ژى من یێ كریه قه‌له‌مێ خوه و ئه‌ز باوه‌رناكه‌م روژه‌كێ ژى بێى وى بزانم ده‌ركه‌ڤم، په‌رتوكێن من نێزیكترین فرا منن، كو ئه‌ز دناڤدا بێهنێن كویر هه‌لكێشم. هه‌مى روژنامه هه‌ڤالێن منن و سه‌رقه‌له‌مكێن من دناڤ دا جێه خوه دبینن. پشتى ئه‌نترنێت ژى بو یه هه‌ڤاله‌كێ دى، ژیانا من پتر یا هاتیه رێكخستن!. كه‌س نه بێژته من بڤێ ژیانێ تو زه‌نگین نابى، ژبه‌ركو ئه‌م یێن فێربوین ده‌ستێن هه‌ر ئێك ژ مه یێت ددووسێ جهان را و ئه‌م نه‌شێین د چ بیاڤان دا به‌هره‌مه‌ندین ژبه‌ركو ئه‌م وه‌ك مێریا بار ژ خوه مه‌زتر یێن لێهاتین، تو دزانى بو؟ ژبه‌ركو جارنا ئه‌م دناخێ خوه دا دبه‌رزه‌ینه و ئه‌م نزانین د چ بیاڤ دا پێشكه‌فتنێ بده‌ستڤه بینین، ژبه‌ر هندێ ژى هه‌مى تشتێن مه و تا له‌عبیكێن زاروكێن مه ژى ژ وه‌لاتێن ده‌رڤه دهێن. تو بێژى چاره‌سه‌رى چبیت؟ ئه‌ز دێ وێ ژى بێژم، هه‌ر ئێك ژ مه ل ژیانا خوه یا ساده بزڤریت و سیناریویا زاروكینیێ و ژیانا خوه سه‌روشنوى رێكبێخیت. بكورتى هه‌ر ئێك ژ مه ته‌رازیه‌كا ئه‌له‌كترونى ب دانیته دژورا خوه ڤه و روژانه سه‌نگا خوه پێ بكێشیت و ژ ئاستێ خوه زێده‌تر بو خوه نه‌دانیت، یا گرنگ ژى هه‌ر ئێك رێزێ ل جێه خوه بگریت، تا ئه‌م كێشا خوه نه‌زانین ئه‌م دێ جڤاكه‌ك مشه‌خور بین.
%20copy.jpg)
ليست هناك تعليقات:
إرسال تعليق