بحث هذه المدونة الإلكترونية

pertook

pertook

2011/01/04

مریت


دبێژن زه‌لامه‌كێ گه‌له‌كێ ته‌مبه‌ل ژنه‌ك هه‌بو و چ كه‌سب و كار بو خو و مالا خو نه‌ دكرن.
روژه‌كێ ژنكا وى گوتێ جامێر و ئه‌ز دێ چمه‌ سه‌ر بالاڤێ گولك یێ دگوڤێ ڤه‌ هه‌ره‌ ئاڤ بده‌؟
زه‌لامى گوتێ نه‌خێر ئه‌ز ناچم ئاڤده‌م، هه‌ما تو دگه‌ل رێكا خوه‌ هه‌ره‌ ئاڤده‌ پاشى هه‌ره‌ بالاڤێ.
ئاخفتنه‌ك ژ ژنكێ و ئێك ژ زه‌لامى و هه‌ر دوو مانه‌ ب ده‌ڤ و لێڤێن ئێك ڤه‌، زه‌لامى گوتێ هه‌چیێ به‌رى ئاخفت ئه‌و دێ چیت گولكى ئاڤده‌ت.
ژنكێ ژى ته‌شت و مه‌نجه‌لێكن خوه‌ هه‌لگرتن و به‌ره‌ف كانیا بالاڤا چوو.
زه‌لام ما دخانى ڤه‌ و پشتى بێهنه‌كى زه‌لامه‌كێ دى كو نه‌ خه‌لكێ گوندێ وان بو هاته‌ د ده‌روكى دا و سلاڤ كرێ و ئه‌وى ده‌ینه‌كر.
رێڤنگى گوتى برا ئه‌ز یێ برسیمه‌ هه‌كه‌ تشته‌ك هه‌بیت ئه‌ز بخوم، دیسان ده‌ینه‌كر.
رێڤنگى گوتى دیاره‌ تو یێ لالى، هه‌ما نه‌كره‌ نه‌ مه‌ردى چوو دژورڤه‌ و ل سه‌ر هه‌ڤیركى گه‌ریا و تێر نان و ماست خارن و پاشى لناڤ مالێ گه‌ریا دیت ره‌خت و تڤه‌نگێن وى یێن ب كه‌له‌مى ڤه‌ د هه‌لاویستى نه‌ و رابو بملێ خوه‌ ڤه‌كرن و چه‌ك و زێرن ژنكێ ژى ژناڤ بوقچكێ ده‌رێخستن بو خو برن و چاڤێ خودانێ مالێ یێ لێ، بێى ئاختنه‌كێ بكه‌ت.
رێڤینگى رێكا خو گرت وهه‌ر زوى ژ گوندى ده‌ركه‌ت.
 ده‌ما ژنك زڤرى دیت زه‌لامێ وێ هێش یێ ل جێه خو.
ئینا گوتێ جامێر و ما تو نه‌ چوویه‌ چ شولا؟
زه‌لام راست رابو ڤه‌ و گوتى ئێه ته‌ به‌رى من ئاخفت، دێ هه‌ره‌ گولكى ئاڤده‌.
ژنكێ گوتێ ئه‌ڤ ته‌ هێشتا گولك نه‌ ئاڤدایه‌.
زه‌لامى گوتى ئه‌رێ ب سه‌رێ ته‌ هێش من نه‌ ئاڤدایه‌ و رێڤینگه‌ك هاتبو مالا مه‌ و هندى سلاڤ كر و گوت ئه‌زێ برسیمه‌ من سلاڤا وى ژى نه‌وه‌رگرت داگو گولكى نه‌ ئاڤده‌م و یێ چوویه‌ دژورڤه‌ و تێر نان و ماستێن خارین و ره‌خت و تڤه‌نگێن من و چه‌ك و زێرێن ته‌ ژى كرنه‌ د پاخلا خودا و بو خو برن و چوو.
ژنكێ گوتێ ئو ته‌ چ نه‌ گوتێ؟
زه‌لامى گوت مانێ هه‌كه‌ من ئاخفتبا دا چم گولكى ئاڤده‌م!
ژنكێ ته‌په‌ك ل سه‌رى دا و گوتێ عه‌مرێ ته‌ نه‌مینیت، كا زوى بێژه‌ من ئه‌و زه‌لام ب چ ره‌خى ڤه‌ چوو؟
زه‌لامى ده‌ستێ خو درێژكره‌ رێكا ژورى.
ژنكێ زوى كارێ خوه‌ گوهرى و پێت خو سڤك كرن و تا ب وى مروڤى را گه‌هشتى و ب ره‌خت و تڤه‌نگێن زه‌لامێ خوه‌ زانى ئه‌ڤه‌ ئه‌و مروڤه‌.
ژنكێ گازیكرێ: زه‌لام زه‌لام.
رێڤینگ ژى ل دوور خو زڤرى و دیت كو ژنه‌ك بتنێ یا د دویف ویرا دهێت.
گوتى به‌لێ خویشكا من ته‌خێره‌؟
ژنكێ گوتێ ئه‌ز نه‌وێرم بتنێ ل رێكێ بچم، من دگه‌ل خو ببه‌.
زه‌لامى گوتێ ما تو چ كه‌سى و دێ كیڤه‌چى تو ژن و حورمه‌ت.
ژنكێ گوت: ئه‌ز بیژنم و زه‌لامێ من یێ مرى و ئه‌ز یا بێخودانم و من دڤێت بچم بخو ل شویه‌كى بگه‌رم و شوى ب نان حه‌لاله‌كى بكه‌م.
كه‌یفا رێڤینگى هات و د دلێ خوه‌ دا گوت: ئه‌ڤه‌ ره‌خت و تڤه‌نگ و زێر و ژنه‌ك ژى هه‌مى ب روژه‌كێ بو من هاتن.
رێڤینگى گوتێ هه‌كه‌ دێ شوى ب من كه‌ى هه‌ما دگه‌ل من وه‌ره‌.
ژنكێ گوتێ بلا.
رێڤینگى گوتێ ناڤێ ته‌ چى یه‌؟ ژنكێ گوتێ ناڤێ من مریته‌.
هه‌ر دوو ب رێ كه‌تن، هه‌تا ل گونده‌كى ده‌ركه‌تین و چوون ل مالا مختارى بونه‌ مێهڤان و ده‌مێ نڤستنێ، مختارى گوتێ پسیار د بێ عه‌یبن مه‌ نه‌زانى هوین چ یێن ئێكن كا جێه وه‌ یێن نڤستنێ ل ده‌ف ئێك ب دانین یان نه‌؟
ژنكێ بله‌ز گوتێ ئه‌ڤه‌ مێرێ منه‌ و هه‌ما جهێن مه‌ بره‌خ ئێك ڤه‌ دانن!
دبێژن ژنكێ ده‌ما هه‌مى دخه‌و، ده‌ستێ خول ره‌خت و تڤه‌نگێن زه‌لامى دا و چه‌ك و زێرێن خوه‌ ژى برن و ژ مال ده‌ركه‌ت و بله‌ز به‌ره‌ف گوندێ خو زڤرى.
دناڤبه‌ره‌كێ دا، زه‌لام ژ خه‌و رابو دیت ژنك ب ره‌خ كێله‌كا و یڤه‌ نینه‌.
ئینا گازیكر: 
 - مریت... مریت..!
خودانێ مالێ گازیكر:
 - نه‌رى   راوه‌سته‌ دا بو ته‌ ده‌رگه‌هى ڤه‌كه‌م.
رێڤینگى گوتێ كور و نه‌ من رویتییه‌ بخو ڤه‌، به‌لێ ناڤێ ژنكا دگه‌ل من هاتى مریت بو.
ژ نوى چیروكا خو بو خودانێ مالێ گوت و زانى كو ئه‌و ژنكا خودانا وان تشتا بو د دویف تشتێن خوه‌ را هاتى.

إرسال تعليق