ژیانێ گه‌له‌ك ته‌حلى دگه‌ل مندا برینه سه‌ر، زاروكینیا من و هه‌ر ژ شوینواركێن گویزا و هه‌كو ئه‌م دچوینه گهیشكێن سه‌رێ كه‌له‌كێ یێن مامێ ئاڤده‌ل. چه‌ند دبیته پایز و گهیشكان دبینم، بیرێن ئاڤده‌لى دكه‌م هێژ به‌رێ پاتكا من یێ شوینه و ژ جهێ وى به‌ره زیڤێ ژ كه‌لا كه‌ربێ داوه‌شاندیه مه ره‌ڤدا زاروكان. سه‌رهلدانێ ئه‌م ژڤى ده‌ستى قولپاندینه ده‌ستێ دى و هه‌له‌ى بابێ وى قوناغا به‌رى سه‌رهلدانێ بخو بكه‌ته په‌رتوكه‌كا بیرهاتنا و بتنێ من مامێ ئاڤده‌ل ژیر نه‌كریه، بیرهاتنێن جاران ژى هه‌كو ل كولانا دریا من خوه درێكا شكرویێ دا ڤه‌دشارت. سه‌رهلدانێ چاڤ لبه‌ر مه ڤه‌كرن و بكولافه‌ت هه‌ر تشتێ نوى مه سه‌رو سه‌ر خوه دبه‌رراكر. من گه‌له‌ك تشت حه‌شاندنه دوێ ده‌فته‌ركا بیرهاتنان دا و من كره ده‌فته‌ركه‌كا بێ گونه‌هیێ، ل به‌راهیێ هندى بێژى مه ده‌ستێ شێخان یێ هژاندی و عه‌فه‌رما وى هێژ ل سه‌ر سه‌رێ مه‌یه. ئه‌ز ناچمه قوناغا به‌رى سه‌رهلدانێ و هه‌كو هێژ ئه‌م لێبوك دده‌ستێن ره‌فیقان دا، ئه‌ز ناچمه پشتى سه‌رهلدانێ و هه‌كو پشتێن مه هه‌میان تژى ساجور و مه هیتاف ددانه پاتێن كه‌سك و سور، ئه‌ز ناچمه گرانیێ و ژیارا بزه‌حمه‌ت و هه‌كو هزره‌تا مه پاریكه‌كێ سویر و شه‌رێ ناڤخوى و گه‌نده‌لى و كاره‌ب و گاز و په‌نزینا و ته‌زكیا حزبى یا ئه‌ز هێلایمه دخانیێن كرێ ڤه! هه‌ر مه یا دیتى ئه‌م دویڤه‌لانكێن تشتێن نوى نه و مه ئیمزا خوه یا گه‌هاندیه هه‌مى تشته‌كى، دوماهیك قوناغا به‌هره‌مه‌ندیێ ژى مه‌سجێن موبایلانه و مه‌یا خوه كریه ته‌پا كومپانیێن موبایلا، رێكا ستێران ژى ڤه‌رێژا په‌روه‌ردا ململانێ یه و بیرێن شاباشێن داوه‌تان دئینته بیرامن هه‌كو بو كاكه‌ى و مامه‌ى پاره دهاتنه بلندكرن. ئه‌ڤه پایزا دهێت و سه‌رما یا دگه‌ل گلیزانكێن مه ڤه‌دكه‌ت. تشتێ ژێ نه عه‌ده‌تى هه‌رگاڤا ئه‌ز عه‌ره‌بانه‌كا فروتنا گهیشكان لنیڤا بازارێ دهوكێ دبینم، بیرێن مامێ ئاڤده‌ل خرناقه‌تێن سالێ خره‌كێ دبه‌رچاڤێن من رابورین، دكه‌ته سیناریو و دوێ ده‌فته‌رێ دا تو دشێى ببینى.
ليست هناك تعليقات:
إرسال تعليق